 |
|
|
Bütün dünya pandemiya dövrünü geridə qoysa da Azərbaycan hökuməti karantin rejimini hələ də ləğv etməyib. Bu səbəbdən də ölkənin bütün quru sərhədləri bağlı qalıb.
Təyyarə biletlərinin fantastik qiymətə olması isə xaricdə, xüsusilə Rusiyada qalan vətəndaşların ölkəyə gəlişinə imkan vermir.
Bəzi məlumatlara görə Rusiyada imkansız duruma düşən çoxsaylı azərbaycanlı ölkəyə gələ bilmədiyi üçün küçələrdə səfil həyatı yaşayır.
Dünən Azərbaycan-Gürcüstan sərhədində baş verən bir olay isə oradakı insanlara təsirli anlar yaşadıb.
DİA.AZ Gununsesi.info-ya istinadla bildirir ki, Gürcüstanda yaşayan siyasi fəal Samirə Bayramova şahidi olduğu bu olayı sosial şəbəkədə yazıb.
Həmin qeydləri təqdim edirik:
“Dünən Qırmızı Körpü sərhəd məntəqəsində bir nəfər Azərbaycan vətəndaşı çarəsiz şəkildə əlindəki pasportunu göstərərək buradan 500 metrdə görünən vətənimə gedə bilmirəm deyib ağlayırdı. Neçə gündür aclıq və yorğunluqdan halsız vəziyyətdə qalan şəxs bir müddət də divara söykənib hüzünlü şəkildə dizlərini qucaqlayıb oturdu. Pulsuzluğun, kimsəsizliyin acısını çəkib insan yaradılışına nifrət edirdi. Yaxındakı taksi sürücüləri onu dinləyib sakitləşdirməyə çalışırdı amma nə fayda, kimsə onun dərdinə çarə ola bilməyəcəkdi. Kənardan bu səhnəni görmək ağır idi. Cəmiyyətdəki yuxarı və aşağı təbəqənin yaratmış olduğu şəraitdən əziyyət çəkən çarəsiz insanlar.
Təəssüf olsun ki, ona heç mən də kömək edə bilmirdim, ona baxıb halıma və düşdüyüm vəziyyətə şükür edirdim, ona baxıb öz dərdim yadımdan çıxdı. Mənim heç olmasa qayıtsam qalmağa yerim vardı, o hara gedəcəkdi, neynəyəcəkdi?! Bir müddət sonra baxdım ki, yoxdur. Hara getdiyini görmədim, böyük ehtimalla ordan keçən maşınlara minib özü də bilmədiyi yerlərə getmişdir. Bəzən çox çarəsiz qalırıq, əlimizdən heçnə gəlmir və adamın vicdanı sızlayır. Bütün gecəni gözümə yuxu getməyib, səhərə yaxın yalnız əlimdən gələ biləcək bir ideya ağlıma gəldi, bu və ya digər bu vəziyyətdə olan insanlara kömək üçün rəsmi müraciət, bəlkə səsimizə səs verələr.
Bundan sonrakı status imza üçün petisiya linkini və müraciəti əlavə edəcəm”.