 |
|
|
"Hərbi və siyasi güc parametrindən baxdıqda, Amerika Birləşmiş Ştatları və İsrail birlikdə güclü görünür"
İran ABŞ və ya İsrailin hücumu halında Amerika və İsrail bazalarına harada yerləşsələr də, onlara cavab zərbələri endirəcək. Bunu İslam Respublikasının Müdafiə naziri Əziz Nəsirzadə deyib. "İran heç bir müharibəyə başlamayacaq, lakin İslam Respublikasına hücum edilərsə və ya ona təcavüz edilərsə, biz güclə cavab verəcəyik", - deyə nazir vurğulayıb. Əziz Nəsirzadənin sözlərinə görə, əgər ABŞ və ya İsrail tərəfindən İrana qarşı müharibə başlayarsa, Tehran “harada olur-olsun, məqsədəuyğun hesab etdiyi istənilən vaxt opponentlərin maraqlarına, bazalarına və qüvvələrinə hücum etmək niyyətindədir”.
Aprelin 19-da Reuters xəbər verib ki, İsrail ABŞ-a İranın nüvə infrastruktur obyektlərinə zərbə endirmək üçün bir neçə variant təqdim edib. Aprelin 17-də “The New York Times” öz mənbələrinə istinadən yazıb ki, İsrail artıq may ayında İranın nüvə obyektlərinə zərbələr endirməyə hazırlaşır və əmindir ki, ABŞ bu hücumun hazırlanmasında fəal iştirak edəcək və yəhudi dövlətini Tehranın mümkün cavab zərbəsindən müdafiə ilə təmin edəcək. Nəşrin yazdığına görə, ABŞ prezidenti Donald Tramp İran tərəfi ilə fikir ayrılıqlarının diplomatik yolla həlli istiqamətində kurs tutub və aprelin əvvəlində İsrailə belə bir hərbi əməliyyatı dəstəkləməyəcəyi barədə məlumat verib.
Siyasi şərhçi Nazim Cəfərsoy Bizimyol.info xəbər portalına açıqlamasında bildirib ki, əslində parametrlərə baxsaq, İranın hərbi gücü təkbaşına ABŞ-la müharibəyə yetərli deyil.
“ABŞ dünyanın bir nömrəli gücüdür. Hərbi, siyasi, iqtisadi, əhali baxımından, eyni zamanda strateji ünsürlər baxımından İranla müqayisədə çox güclüdür. Təbii ki, bir konvensional müharibədə İrana qarşı daha güclü görünür. İsrailin parametrləri İranla müqayisədə daha zəif görünür. Yəni İsrail təkbaşına İranla mübarizədə ordusu güclü sayılsa da, strateji parametrlər baxımından o qədər asan bir müharibə olmaz. Amma İrana qarşı əməliyyat İran üçün çox ciddi problemlər yarada bilər. İranın mövcud gücü konvensional müharibə üçün çox da uyğun görünmür, amma bu cür müharibələr birmənalı müharibələrdən daha çox partizan müharibəsi tərzi müharibələri də bərabərində gətirir. Məsələn; Əfqanıstanda, İraqda bənzər hadisələr baş vermişdi. Düzdür, amerikalılar söyləmişdi ki, "İran nə İraq, nə də Əfqanıstandır". Hərbi və siyasi güc parametrindən baxdıqda ABŞ və İsrail birlikdə güclü görünür. ABŞ təkbaşına daha güclü görünür. Dediyim kimi, kağız üzərində məsələ belədir. Real həyatda mənzərə daha fərqli ola bilər”-deyə Nazim Cəfərsoy qeyd edib.