Lənkəranda kişi iynədən sonra ölüb.

TEREF-ın məlumatına görə, hadisə rayonun Viyən kəndində baş verib. Kənd sakini 1993-cü il təvəllüdlü İmran İqbal oğlu Məmmədovun hərarəti yüksək olub. Yaxınlarının deməsinə görə evdə ona qonşu tərəfindən antibiotik iynəsi vurulub. Vurulan iynədən sonra İ.Məmmədovun halı pisləşib və evə təcili tibbi yardım çağrılıb. Deyilən ünvana təcili tibbi yardım briqadası gedib. Buna baxmayaraq İ.Məmmədovda həkiməqədər ölüm faktı qeydə alınıb.

Meyit daxili və xarici müayinə olunması üçün Məhkəmə Tibbi Ekspertiza və Potoloji Anatomiya birliyinin Lənkəran rayon şöbəsinə təhvil verilib. Ekspertizanın verəcəyi rəydən sonra ölümün dəqiq səbəbləri məlum olacaq.

Qeyd edək ki, İmran Məmmədov yerli televiziya kanalında operator vəzifəsində çalışıb. Televiziya kanalı ilə müqaviləsi bitdikdən sonra toylarda çəkiliş edirdi. Bu gün də o, şadlıq saraylarının birində toy məclisini çəkməli idi.

Faktla bağlı araşdırma aparılır. (Unikal)

Xəbər verdiyimiz kimi, Milli Məclisin dünən - aprelin 11-də keçirilən iclasında keçmiş hərbi prokuror Xanlar Vəliyevin Azərbaycan Respublikası Konstitusiya Məhkəməsinin hakimi təyin edilməsi haqqında məsələyə baxılıb.

Səsvermənin nəticəsi açıqlananda məlum olub ki, Xanlar Vəliyevin Konstitusiya Məhkəməsinin hakimi təyin olunmasının əleyhinə cəmi 1 deputat səs verib.

TEREF Modern.az-a istinadla xəbər verir ki, Xanlar Vəliyevin əleyhinə səs verən yeganə deputat REAL Partiyasını partalamentdə təmsil edən Erkin Qədirli olub.

REAL Partiyasının sədri Natiq Cəfərli Erkin Qədirlinin bu təyinatın əleyhinə səs verməsinin səbəbini Xanlar Vəliyevin adının müxtəlif məsələlərdə neqativ fonda hallanması ilə əlaqələndirib:

"Cəmiyyətdə onun fəaliyyəti ilə bağlı ciddi sorğular olub və var. Buna görə də REAL-ı təmsil edən deputatın və partiyamızın ümumi fikri bu idi ki, belə bir şəxsin Konstitusiya Məhkəməsi kimi vacib, dövlətin təməllərindən birini təşkil edən bir qurumda təmsil olunması həmin orqana güvənin zəifləməsinə gətirib çıxara bilər”.

N.Cəfərli qeyd edib ki, Azərbaycanda müxtəlif üsullarla Konstitusiya Məhkəməsinə həm vətəndaşların, həm də bəlli dövlət və hökumət qurumlarının müraciət etmək hüququ var:

"Ona görə də biz düşündük ki, cəmiyyət tərəfindən birmənalı qarşılanmayan bir şəxsin oraya təyinatı həmin qurumun özünün güvənirliyini müəyyən dərəcədə zədələyə bilər. Məhz buna görə də biz əleyhinə səs verdik. Bu qərar ona xidmət edir ki, biz ölkədə dövlət institutlarının güclənməsinə, vətəndaşların həmin institutlara güvəninin daha da artmasına çalışırıq. Bu bizim siyasi partiya olaraq mövqeyimizdir ki, dövlət institutları həmişə güvənilən olmalıdır”.

“Şərq” qəzetinin Türkiyə təmsilçisi, hazırda İstanbul şəhərində yaşayan Yaqut Misirxanlı 4 il əvvəl Bakıda aldığı mənzillə bağlı problemlə üzləşib. Mənzili alandan 2 il sonra mənzilin daha bir sahibi meydana çıxıb.

Bir evin iki sahibi

Yaqut Misirxanlı APA-ya açıqlamasında bildirib ki, 2021-ci ilin may ayında Azərbaycanda olanda Bakı şəhəri, Yasamal rayonu, 9-cu keçid, ev 14/3 ünvanında yerləşən, 21 kv.m sahəsi olan mənzili ilkin alqı-satqı müqaviləsi ilə alıb:

“Alqı-satqıdan sonra evin bütün kommunal xidmətlərini “ASAN Xidmət”dən adıma keçirmişəm, Yasamal rayonu 64 saylı mənzil-kommunal istismar sahəsindən o mənzildə yaşadığıma dair sənəd almışam. 2023-cü ilin noyabr ayında evimə Apellyasiya Məhkəməsindən sənəd gəlib ki, bu ev Hüseynova Anabəyim Böyükbəy qızının imiş. O gündən ədalət uğrunda mübarizə aparıram. Məsələ budur ki, Hüseynova Anabəyim o həyətdə yaşayan Əliyev Cavidin (3 ay öncə vəfat edib) anası Əliyeva Gülzar Nazim qızına (vəfat edib) 2700 dollar borc verib, əvəzində isə, notarial qaydada sənəd alıb ki, qadının evindən 25 kv.m yer alacaq, amma bu yerin hara olduğu göstərilməyib”.

Ali Məhkəmə jurnalistin xeyrinə qərar verib, amma...

Yaqut Misirxanlının sözlərinə görə, Hüseynova Anabəyim Əliyev Cavidi anasının varisi olaraq məhkəməyə verib, 3 dəfə yerli məhkəməni, bir dəfə Apellyasiya Məhkəməsini uduzub, sonra Ali Məhkəməyə müraciət edib: “Ali Məhkəmə isə işi təkrar Apellyasiya Məhkəməsinə göndərib. Apellyasiya Məhkəməsində Anabəyim Hüseynovanın iddiası təmin olunub, mənim mənzilimin boşaldılmasına qərar verilib. Mən tərəf olmadığım üçün məhkəmədə iştirak etməmişəm, ona görə də vəkilim Yaqub Məmmədli mənim adımdan Apellyasiya Məhkəməsinin bu qətnaməsindən Ali Məhkəməyə müraciət edib, Ali Məhkəmə mən vərəsə olmadığım üçün evimin boşaldılmasının doğru olmadığına qərar verib. Bundan sonra Anabəyim Hüseynova mənzili aldığım Təranə Məmmədova ilə bağladığım alqı-satqı müqaviləsinin və Təranə Məmmədova ilə Cavid Əliyevin bağladığı alqı-satqı müqaviləsinin ləğvi tələbi ilə məni məhkəməyə verib. 2024-cü ilin sentyabr ayında Yasamal rayon Məhkəməsində keçirilən məhkəmədə iddia təmin edilib.

Daha sonra vəkilim Yaqub Məmmədli mənim adımdan bu qərardan apellyasiya şikayəti verib, 2025-ci il martın 11-də ilkin iclas keçirilib. Aprelin 8-də də ikinci iclas olub”.

Yaqut Misirxanlı bildirib ki, aprelin 18-də həyətdə yerli baxış keçirilməsinə qərar verilib.

“Qonşular Anabəyim adında qadının o həyətdə yaşamadığını deyirlər”

Şikayətçinin sözlərinə görə, Anabəyim Hüseynova iddia ərizəsində yazıb ki, 2015-ci ilə qədər o həyətdə yaşayıb, sonra xəstələnib, gedib bacısının yanında qalıb, daha sonra evə qayıdanda görüb ki, qapısı dəyişilib: “Bu isə həqiqəti əks etdirmir. Həyətdəkilər şahiddir ki, Anabəyim adında qadın o həyətdə yaşamayıb, çünki Təranə Məmmədova içi zibil dolu o evi, daxmanı 2020-ci ildə alıb, həyat yoldaşı Elşən Məmmədov zibili təmizlətdirib, təmir edib, 2021-ci ilin may ayında mənə satıb. Əgər Anabəyim Hüseynova o mənzildə yaşayıbsa, qaz, su və işıqdan istifadə etməlidir, amma onun heç bir sayğacı yoxdur, hətta aprelin 8-də məhkəmədə saxta - başqa ünvana aid işıq müqaviləsi təqdim edib. Onu da bildirim ki, Yasamal rayonu 64 saylı mənzil-kommunal istismar sahəsindən 2021-ci ildə mənə həmin həyətdəki 14/3 saylı mənzildə qeydiyyatda olduğuma dair sənəd verilib, əgər ora Anabəyimindirsə, bu sənəd mənə necə verilib?”

“Qarşı tərəfə yalnız öz bacıları şahidlik edir”

Yaqut Misirxanlı vurğulayıb ki, aprelin 8-də Apellyasiya Məhkəməsində keçirilən prosesdə şahidlər ifadə verib: “Məhkəmədə ifadə verən mənim şahidlərim o həyətdə yaşayan insanlardır. Qarşı tərəfin isə iki şahidi olub, ikisi də öz bacısı... Mən məhkəmənin ədalətli keçirilməsini və bütün sənədləri diqqətlə araşdırmasını istəyirəm”.

Anabəyim Hüseynova evi 2003-cü ildə aldığını deyir

Qarşı tərəf Anabəyim Hüseynova isə mövzu ilə bağlı APA-ya açıqlamasında deyib ki, həmin mənzili 2003-cü ildə Gülzar Əliyevadan alıb: "Mən bu evi 2003-cü ildə almışam. Kommunal xidmətlərin hamısı da mənim adıma keçirilib. Evi aldığım Gülzar Əliyeva vəfat etdikdən sonra onun oğlu evi Yaqut Misirxanlıya satıb. Mən 2003-2015-ci illər ərzində həmin mənzildə yaşamışam. 2015-ci ildə evi kirayəyə vermişdik. Məhəllədə narkotik istifadəçiləri çox olduğu üçün kirayənişinlər orda qala bilmədi, çıxdılar. Ondan sonra ev boş olub. Arada gedib baxırdıq”.

Anabəyim Hüseynova evin Yaqut Misirxanlıya necə satıldığından xəbəri olmadığını deyib: “Məhkəməyə müraciət etmişəm, bütün məhkəmələr də mənim lehimə qərar verib, çünki ev mənimdir. Yaqut Misirxanlı evin qapısını dəyişib. Taxta qapını dəmirlə əvəzləyiblər. Amma kommunal xidmətlərin heç biri onun adına deyil. Məndə 2015-ci ildə kommunal xidmətlərinin ödəniş qəbzləri də var. Hər şeyi məhkəməyə təqdim etmişəm".

Anabəyim Hüseynova onu da qeyd edib ki, evin çıxarışı yoxdur.

Gürcüstan və Azərbaycan arasında dəmir yolu ilə sərnişin daşımalarının bərpası təxirə salınıb.
Bu barədə “Gürcüstan Dəmir Yolları” məlumat yayıb.

Belə ki, “Gürcüstan Dəmir Yolları” Bakı-Tbilisi-Bakı sərnişindaşımalarının nə vaxt bərpa olunacağı və 1 may tarixinin hələ də qüvvədə olub-olmaması ilə bağlı sualı cavablandırıb.

“Gürcüstan Dəmir Yolları” “Bakı-Tbilisi-Bakı” sərnişin daşımalarının bərpası ilə bağlı həm dəmir yolu administrasiyaları, həm də məsələ ilə bağlı hər iki ölkənin müvafiq qurumları ilə danışıqların aparılması və texniki detalların dəqiqləşdirilməsini əhatə edən iş prosesinin getdiyini bildirib.

“Tərəflər nəqliyyatın hərəkətini bərpa etmək üçün intensiv işləyirlər. Konkret tarix daha sonra açıqlanacaq", - “Gürcüstan Dəmir Yolları” qeyd edib.

Qeyd edək ki, Azərbaycan və Gürcüstan arasında qatarların hərəkəti 2020-ci ilin martında koronavirus pandemiyası ilə bağlı dayandırılıb. Bir müddət əvvəl isə Gürcüstanın İqtisadiyyat Nazirliyi Bakı və Tbilisi arasında qatarların hərəkətinin mayın 1-dən bərpa ediləcəyini açıqlayıb.

Xəbər verdiyimiz kimi, Paytaxtın Məmmədəli Şərifli və Şirin Mirzəyev küçələrinin kəsişməsində yerləşən “Komfort” yaşayış kompleksinin sakinləri 7 ildir mənzillərinə çıxarış ala bilmədiklərindən şikayətçi idilər.
Sakinlər bu barədə Yenavaz.com-a yenidən müraciət ediblər.
Sözügedən yaşayış kompleksinin sakinləri daha əvvəl də dəfələrlə sadalanan problemləri ictimailəşdiriblər.
Onlar bildirirlər ki, 2019-cu ildə mətbuat nümayəndələrinin iştirakı ilə sakinlərlə görüşən şirkətin rəhbər şəxsləri qısa müddət ərzində problemləri aradan qaldıracaqlarına dair söz veriblər. Lakin həmin vaxtdan 6 il keçməsinə baxmayaraq, problemlər hələ də qalmaqdadır.
Qeyd ediblər ki, fevral ayında şirkətin rəhbər şəxsləri qısa müddət ərzində problemləri aradan qaldıracaqlarına dair söz versələr də, bu müddət ərzində heç bir iş görülməyib: “Tikinti şirkəti söz verir, amma faktiki heç bir iş görülmür”
Əlavə ediblər ki, bu gün – 11 aprel tarixində bina sakinləri yenidən şirkət rəhbərliyi ilə görüşmək üçün müraciət ediblər, lakin şirkət rəhbərliyi görüşməyib. Daha sonra sakinlər Nizami rayon icra hakimiyyətinə gediblər.
Sakinlərin sözlərinə görə, icra hakimiyyətindən gələn həftə görüşün mümkün olacağını bildiriblər.
Məlumat üçün qeyd edək ki, 2017-ci ildən tikilməyə başlamış və fors major hallar nəzərə alınmaqla 6 iyun 2018-ci ildə tam təhvil verilməli olan bina 7 il keçməsinə baxmayaraq hələ də hazır deyil.
“Binamızda ehtiyat pilləkənlərin məhəccərləri qoyulmayıb, siqnalizasiya quraşdırılmayıb, mərtəbələr yanğın şitləri ilə təchiz olunmayıb, liftlərə ehtiyat cərəyan kabeli birləşdirilməyib, liftlərlə texniki xidmət müqaviləsi bağlanmayıb. Bir sözlə, heç bir texniki təhlükəsizlik qaydalarına əməl olunmayan binada məcburi yaşayırıq”, - sakinlər bildirirlər.

Borcluların ölkədən getmək hüququ yeni qaydada müvəqqəti məhdudlaşdırılacaq.

APA-nın xəbərinə görə, bu, Milli Məclisin bu gün keçirilən iclasında müzakirəyə çıxarılan "İcra haqqında” qanuna təklif edilən dəyişiklikdə əksini tapıb.

Bununla əlaqədar qanunun 84-1-ci maddəsi yeni redaksiyada təklif olunur.

Başqa sözlə, hazırda qüvvədə olan qanuna əsasən, məhkəmə qərarları, əmrləri və vergi orqanlarının pul tələblərinin ödənilməsi ilə bağlı inzibati aktları əsasında verilmiş icra sənədləri könüllü icra üçün müəyyən olunmuş vaxtda borclu tərəfindən üzrsüz səbəbdən icra edilmədikdə, borclunun ölkədən getmək hüququ icra məmurunun əsaslandırılmış təqdimatı əsasında məhkəmənin qərarı ilə müvəqqəti məhdudlaşdırıla bilər. Borclunun ölkədən getmək hüququnun müvəqqəti məhdudlaşdırılması barədə icra məmuru tərəfindən dərhal borclunun özünə, tələbkara və müvafiq icra hakimiyyəti orqanına məlumat verilir. Borclunun ölkədən getmək hüququnun müvəqqəti məhdudlaşdırılmasına səbəb olmuş əsaslar aradan qalxdıqdan sonra icra məmuru həmin məhdudlaşdırmanın götürülməsi barədə icra qurumunun rəhbəri tərəfindən təsdiq olunan qərar qəbul edir. Həmin qərar dərhal borcluya, tələbkara, məhkəməyə və müvafiq icra hakimiyyəti orqanına göndərilir.
Yeni redaksiyada təklif olunan 84-1-ci maddəyə (Borclunun, borclu hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılması) əsasən, icra sənədləri könüllü icra üçün müəyyən olunmuş vaxtda borclu fiziki şəxs və ya borclu hüquqi şəxsin icra orqanının rəhbəri tərəfindən üzrsüz səbəbdən icra edilmədikdə, onların ölkədən getmək hüququ icra məmurunun əsaslandırılmış təqdimatı əsasında məhkəmənin qərarı ilə müvəqqəti məhdudlaşdırıla bilər. Borclu fiziki şəxsin və ya borclu hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılması barədə məhkəmə qərarı dərhal "Elektron məhkəmə informasiya sistemindən "Elektron icra" informasiya sisteminə ötürülür. "Elektron icra" informasiya sistemi vasitəsilə bu barədə dərhal "Giriş-çıxış və qeydiyyat" idarələrarası avtomatlaşdırılmış məlumat-axtarış sisteminə məlumat ötürüləcək və həmin məlumat-axtarış sistemində borclu fiziki şəxs və ya borclu hüquqi şəxsin icra orqanının rəhbəri barədə məhdudiyyət tətbiq edilir, bununla bağlı "Elektron icra" informasiya sistemi vasitəsilə borclu fiziki şəxsə və ya borclu hüquqi şəxsin icra orqanının rəhbərinə və tələbkara məlumat veriləcək, o cümlədən borclu fiziki şəxsin və ya borclu hüquqi şəxsin icra orqanının rəhbərinin adına qeydə alınmış mobil telefon nömrəsinə (nömrələrinə) SMS göndəriləcək.

Borclu fiziki şəxsin və ya borclu hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılmasına səbəb olmuş əsaslar aradan qalxdıqda bu barədə məlumat dərhal "Elektron icra" informasiya sisteminə daxil ediləcək və "Giriş-çıxış və qeydiyyat" idarələrarası avtomatlaşdırılmış məlumat-axtarış sisteminə ötürüləck və həmin məlumat-axtarış sistemində borclu fiziki şəxsin və ya borclu hüquqi şəxsin icra orqanının rəhbərinin barəsində tətbiq edilmiş məhdudiyyət götürüləcək və bununla bağlı "Elektron icra" informasiya sistemi vasitəsilə borclu fiziki şəxsin və ya borclu hüquqi şəxsin icra orqanının rəhbərinin adına qeydə alınmış mobil telefon nömrəsinə (nömrələrinə) SMS göndəriləcək.

Qanun layihəsi səsverməyə çıxarılaraq birinci oxunuşda qəbul edilib.

Xəbər verdiyimiz kimi, ötən gün Nizami rayonu, Heydər Əliyev prospekti ilə Ələsgər Qayıbov küçəsinin kəsişməsində yol-nəqliyyat hadisəsi baş verib.

“Bolt” şirkətinin taksisi kənar yoldakı beton maneəni dağıdaraq prospektin əsas hissəsinə düşüb. Qəzadan sonra sosial şəbəkələrdə sürücü, 1974-cü il təvəllüdlü Anar Nəcəfovla bağlı müxtəlif iddialar irəli sürülüb.

Tribunainfo.az xəbər verir ki, “Savashmedia.az”ın əməkdaşı sözügedən avtomobilin sürücüsü Anar Nəcəfovun oğlu Elvir Nəcəfovla əlaqə yaradıb:

“Atamın durumu çox ağırdır. Qəzadan sonra o, Sabunçu xəstəxanasına yerləşdirilib. Hazırda başımız qarışıq olduğundan baş verənlərlə bağlı ətraflı məlumat verə bilməmişik. Amma bir şeyi deyim ki, atamla bağlı mətbuatda yayılan informasiyaların əksəriyyəti yalandır. “Bolt” şirkəti açıqlama yayıb ki, guya atamın idarə etdiyi avtomobilin buraxılış kartı 8 Aprel tarixində ləğv olunub. Bu, tamamilə yalandır. Eyni zamanda atamın avtomobili başqa şəxsin adından qeydiyyatdan keçirərək idarə etməsi ilə bağlı deyilənlər də həqiqəti əks etdirmir. “Bolt” şirkətini məhkəməyə verməyə hazırlaşırıq”.

Elvir Nəcəfov atasının ayağına elektron qolbağın hansı səbəbdən taxıldığına da aydınlıq gətirib:

“Atamın dələduzluq ittihamı ilə məsuliyyətə cəlb olunması barədə xəbərlər də yalandır. Onun banka borcu olub, qaytara bilmədiyinə görə, barəsində tədbir görülüb. Ayağına elektron qolbağın taxılması da bununla bağlıdır”.

Qəzanın hansı səbəbdən baş verdiyinə gəlincə isə Elvir Nəcəfov bunu atasının sağlamlıq problemi ilə əlaqələndirib:

“Atamın səhhətində ciddi problemlər var. Onun tez-tez sudurqası tuturdu, qəza anında da bu baş verib. Buna görə də idarəetməni itirib və məlum qəza baş verib”.

Bu ayın sonu Azərbaycanın Baş Prokuroru Kamran Əliyevin səlahiyyət müddəti başa çatır.

Əgər ölkə başçısı Kamran Əliyevə yenidən etimad göstərəcəksə, Milli Məclis onu ikinci dəfə baş prokuror kimi təsdiq edəcək.

Qeyd edək ki, Kamran Əliyevin Zakir Qaralovdan sonra bu posta təyinat alması, prokurorluq orqanlarında bir sıra müsbət dəyişikliklərə səbəb olub.

Belə ki, əvvəlki illərdən fərqli olaraq, gənclərin kütləvi şəkildə prokurorluq orqanlarına qəbulu və bu prosesdə rüşvətin qadağan olunması bu qurum haqqında cəmiyyətdə müsbət fikir formalaşdırıb.

Həmçinin ötən dövr ərzində vətəndaşıların prokurorluq orqanlarında müraciətlərinə baxılması prosesində də müsbət dinamika yaşanıb.

Hər ay vətəndaşlara birbaşa ünsiyyətdə olan Kamran Əliyev Baş Prokuror kimi bütün müraciətlərə diqqətlə yanaşır.

Milli Məclisin İnsan Hüquqları Komitəsinin sədri Zahid Oruc da Gununsesi.info-ya müsahibəsində deyib ki, Kamran Əliyevin Baş Prokuror kimi fəaliyyətini qiymətləndirmək üçün, ilk növbədə, onun əvvəlki illərdə korrupsiyaya qarşı mübarizə sahəsində təcrübəsini, peşəkarlığını nəzərə almalıyıq:

“Cinayətkarlığa qarşı mübarizə sahəsində önəmli sahələrdən biri-dövlət büdcə vəsaitləri, o cümlədən biznes qurumları və vətəndaşlarla münasibətlərdə kütləvi qanunsuzluqlara hüquqi qiymət verilməsi, məsuliyyət tədbirlərinin həyata keçirilməsi prinsipiallıq tələb edirdi. O vaxta qədər hakimiyyəti xaricdən tənqid edənlər daha çox kiçik ranqlı məmurların cəzalandırılmasını qabardaraq, qanunsuzlqulara qarşı daha sərt tədbirlər görülməsinə çağırırdılar. Doğrudur, onların məqsədləri hüquq deyil, siyasət idi və hər birinin öz planı vardı, lakin Ali icra hakimiyyəti orqanlarından məsələn, Mədəniyyət nazirliyi, eləcə də yerli icra orqanları rəhbərləri barəsində o vaxt sərt qərarlar qəbul edərkən təqsirləndirilən şəxslərin güclü təsir imkanları, ierarxik əlaqələri və ətraflarında aparılan informasiya kampaniyasını yenmək iradə tələb edirdi.

Şübhə yoxdur ki, məhz cənab prezidentin iradəsi-qanunun aliliyinin təmin edilməsi üçün nəzarətin həyata keçirilməsi, korrupsiyaya qarşı yüksək ranqlı şəxslərin cəzalandırılmasındakı fəaliyyəti Kamran Əliyevin təyinatında önəmli rol oynamışdı.

Əməliyyat-axtarış tədbirlərinin həyata keçirilməsi sahəsində verilən səlahiyyətlər, o cümlədən, hüquq-mühafizə orqanları arasında uğurlu əməkdaşlıq mövqeyinin qurulması da Baş Prokurorun aktivinə yazılacaq müsbət addımlardır.

Vətəndaşların tələblərinə və müraciətlərinə gəlincə, bir faktı xatırlatmaq yerinə düşər. Administrasiya qarşısına gələn şikayətçilərlə sadə, insani bir formada münasibətin göstərilməsi, yolu birlikdə, piyada qət edərək inzibati binada onlara diqqət ayrılması və qaldırılan tələblərin həlli üçün müvafiq addımların atılması ənənəvi Baş Prokuror obrazındən fərqli müsbət hadisə idi.

Kamran Əliyev Əfv Komissiyasında müzakirələr zamanı humanist davranışlar nümayiş etdirir, müasirliyə və islahata təqdirlə yanaşır

Komitə sədrinin sözlərinə görə, Kamran Əliyev parlamentə və millət vəkillərinin çağırışlarına açıqdır: “Kommunikasiyalı adamdır, eləcə də Əfv Komissiyasında müzakirələr zamanı humanist davranışlar nümayiş etdirir, müasirliyə və islahata təqdirlə yanaşır.

Əlbəttə, hazırda vəətndaşlarımızın hüquq və azadlıqlarının qorunmasında müxtəlif problemlər inkaredilməzdir. Xüsusilə, Vətən müharibəsindən əvvəlki Baş prokurorluğun bir sıra yanlış qərarları ağır miras kimi hüquq sistemimiz üzərində daşınır.

“Prezidentimizin 2017 və 2019-cu ildəki verdiyi fərmanların icrası Azərbaycanın beynəlxalq hesabatardakı yerinə təsir edəcək mühüm islahat proqramıdır” deyən Zahid Oruc vurğulayır ki, ona görə də Baş Prokurorluğa qarşı aparılan sistemli informasiya kampaniyasının sifarişçilərini, icraçılarını və dəstək verənlərin siyasi məqsədlərini hər kəs baş düşsə də düşmən üzərində qələbənin ən yaxşı yolu Ədalətin Zəfər çalmasıdır: “Şəffaf, açıq və qanunlara əməl edərək, prokurorluq orqanlarında xidmət göstərmək, millətimizin hər bir nəfəri üçün şərəf işi olmalıdır.

Ulu Öndərin 90-cı illlərdə xilaskarlığı həm də qanunsuz birləşmələrin və silahlı dəstələrin hakimiyyət çevrilişi cəhdlərinə qarşı göstərdiyi qətiyyəti, o cümlədən, prokorluq orqanlarına hücumla onu linç etməyə qalxan qüvvələrin qarşısında yenilməzliyi və cəsarəti o qurumun fəaliyyətinin məhək daşıdır, pozulmaz konstitusion təməlidir.

Artıq 2020-ci ildən sonra yeni reallıq formalaşıb. Ali Baş Komandanın liderliyi ilə Vətən müharibəsində qazanılan parlaq Qələbəmiz azad torpaqlarda dövlət strukturlarının, o cümlədən, prokuroruluq orqanlarının fəaliyyətini mümkün edib”.

Zahid Oruc, həmçinin müstəqillik tarixmizdə ilk dəfə, torpaqlarımıza və xalqımıza qarşı təcavüzdə, onlarla cinayət əməllərində ittiham olunan şəxslər ədalət mühakiməsi qarşısına çıxarılmasını da xatırladaq deyir ki, o dövrün Baş Prokuror İsmət Qayıbovun ruhu indi sevinir ki, ərazi bütövlüyünü təmin edən bir dövlət işğalçıların əməllərinə təkcə hərbi meydanlarda deyil, həm də ədalət saraylarında qiymət verir:

“Göründüyü kimi, hüquq-mühafizə orqanlarının nüfuzu dövlət-vətəndaş münasibətlərinə birbaşa təsir edir, ölkəmizin beynəlxalq mövqeyini müəyyənləşdirir.

Ona görə də ictimai rəylə işləmək, cəmiyyətimizdən gələn çağırışlara açıq olmaq, media ilə fəaliyyəti gündəliyin birinci sırasında saxlamaq müasir idarəetmənin vacib tələbidir”.

Gununsesi.info