 |
|
|
Qərbi azərbacanlıların öz tarixi torpaqlarına, o cümlədən Zəngəzur mahalına qayıtmaq istəyi erməniləri təşvişə salıb.
Ona görə də ermənilər Zəngəzurun əsl sahiblərinə qayıdacağından qorxuya düşüb. Çünki Zəngəzurun qanunsuz olaraq Ermənistana verildiyini onlar özləri də yaxşı bilir. Ona görə regionda gedən geosiyasi proseslər Azərbaycandan məcburi alınmış ərazilərin, həmçinin Zəngəzurun geri qaytarılması ilə nəticələnə bilər.
Ermənistan Milli Məclisinin üzvü Naira Zöhrabyanın bununla bağlı verdiyi açıqlamanı əsində, etiraf kimi də qiymətləndirmək olar.
“Bu yaxında Azərbaycan Prezidenti İlham Əliyev bəyan etdi ki, Zəngəzur dəhlizi mütləq açılacaq. Bu barədə üçtərəfli Bəyanatda qeyd edilib. İndi hamı bilir ki, Azərbaycan-Zəngəzur parlamenti yaradılıb”.
Ermənistan parlamentinin üzvü Naira Zöhrabyan belə deyib.
“Onlar hər dəfə deyirlər ki, Zəngəzur gec-tez Azərbaycana birləşəcək. Təəccüblənməyin, belə də olacaq. Çünki Azərbaycan qarşısında qoyduğu bütün məsələləri həll edir. Azərbaycanın strateji planlarına nəzər salsaq, görərik ki, bu ölkənin silahlı qüvvələri Türkiyə kimi qüdrətli ordu səviyyəsinə çatacaq.
Bütün bunlar deməyə əsas verir ki, biz çox ağır vəziyyətdəyik”, - deyə erməni deputat bildirib.
Naira Zöhrabyan bildirib ki, kapitulyasiyadan sonra Ermənistanın durumu bugünkü qədər çətin olmayıb:
“Gedin Avropa ölkələrinin, eləcə də ABŞ-ın İrəvandakı səfirliklərinin qarşısına baxın. Sanki armagedondur, yəni dünyanın axırıdır. “Yaşıl kart” alıb tərk etmək istəyənlərin sayı hər gün artır. Görün siz Ermənistanı hansı vəziyyətə gətirib çıxardınız”, - deyə Naira Zöhrabyan əlavə edib.
DİA.AZ-ın məlumatına görə, Milli Cəbhə Partiyasının sədr müavini, politoloq Məhəmməd Əsədullazadə Cebhe.info-ya açıqlamasında Ermənistanın Zəngəzur məsələsi ilə bağlı təlaş keçirdiyini deyib.
Ekspert bildirib ki, Ermənistan bu məsələdə İranla və Fransa ilə koordinasiyalı fəaliyyət göstərir:
"Hesab edirəm ki, Naira Zöhrabyan bu açıqlaması ilə bu istiqamətdə Ermənistan hakimiyyətinin zəif addım atdığını demək istəyir və onu tənqid edir. Bu proses tamamilə Ermənistanın əleyhinə olacaq.
Belə ki, Ermənistan ilk növbədə 10 noyabr Bəyanatının 9-cu bəndini yerinə yetirməlidir. Əgər bu öhdəlik icra olunmasa, Azərbaycan konkret addımlar atacaq. Xüsusilə də, İkinci Qarabağ müharibəsindən sonra regionda yeni geosiyasi reallıqlar formalaşıb. Zəngəzur dəhlizi də Azərbaycanın layihəsi deyil.
Bu, Şərqlə Qərbi birləşdirəcək beynəlxalq layihədir. Rusiya-Ukrayna müharibəsi fonunda nəqliyyat və kommunikasiya marşrutları "Orta Dəhliz"dən keçəcək. Bu baxımdan, Zəngəzur dəlizi də "Orta Dəhliz"in əsas seqmentlərindən biridir. Hazırda İran və Fransa bu yola Türkiyənin və Azərbaycanın nəzarət etməsini istəmir. Ona görə də bu məsələdə təzyiq vasitələrinə əl atırlar.
Deputat Zöhrabyanın açıqlamasına gəlincə, Ermənistan öz üzərinə düşən öhdəliyə əməl etməsə, Azərbaycan Zəngəzur dəhlizini açacaq. Ermənistan sərhədlərin delimitasiyası və demarkasiyası prosesini uzadır. Azərbaycanın ərazi bütövlüyünün tanınmasına dair Praqa razılaşmasından yayınır. Halbuki bunun sülh yolu ilə həlli var. Ermənistan tərəfi razılaşmaya əməl etmək əvəzinə İranın və Fransanın vasitəsilə prosesə mane olmağa çalışır.
Ancaq Azərbaycanın və Türkiyənin koordinasiyalı fəaliyyəti, Böyük Britaniyanın da bu prosesə dəstəyi perspektivdə məsələnin həllinə kömək edəcək".