Ötən günlərdə Laçın sərhəd-buraxılış məntəqəsindən Ermənistan istiqamətində 60-a yaxın şəxsin keçidi qeydə alınıb. Görünən odur ki, bura müəyyən vədlər və ümidlərlə gəlmiş şəxslər ərazini tərk edir. Amma unutmaq olmaz ki, burada erməni hiyləsi, fitnəkarlığı ola bilər. Çünki digər şərhlərdə ermənilərin növbəti müharibə hazırlığından bəhs edilir. Qarabağa qanunsuz olaraq köçürülmüş rus pasportu olan şəxslərin də tələsik buradan çıxarılmasını məhz bu kontekstdən qiymətləndirmək olar.

TEREF.AZ bildirir ki, bunu Teleqraf.com-a Milli Məclisin deputatı Elman Məmmədov deyib.

Onun fikrincə, Azərbaycanın konkret şərti odur ki, onun ərazisində yaşan hər kəs vətəndaşlığı qəbul etməlidir:

“Ona görə də burada yaşayanlar üçün iki seçim imkanı var. Onlar Azərbaycan vətəndaşlığını qəbul edib dinc şəkildə yaşaya bilər. Bunun əksinə erməni əsilli sakinlər ərazini tərk etməlidir. Ola bilsin ki, Qarabağı tərk edənlər elə ikinci yolu seçiblər. Güman ki, onlar Azərbaycan vətəndaşlığını qəbul etmək istəmədikləri üçün ərazini tərk edir”.

Deputat hesab edir kii, bu məsələdə Azərbaycanı heç kəs qınaya bilməz:

“Burada Azərbaycan beynəlxalq qanunlara və ölkə Konstitusiyasına uyğun davranış sərgiləyir. Vətəndaşlığı olmayan şəxslərin bir ölkədə qalmaq, yaşamaq müddəti var. Həmin müddət bitdikdən sonra bu şəxslər ölkə hüdudlarını mütləq tərk etməlidir. Ona görə də, Azərbaycan vətəndaşı olmayan şəxslər burada yaşaya bilməz. Eyni zamanda hələ də Qarabağda şübhəli insanlar var. Onlar da zaman etibarı ilə buranı tərk edəcəklər. Laçın sərhəd-buraxılış məntəqəsində hazırda çox ciddi yoxlanış var. Yeni Vaqif Xaçatryanlar aşkarlansa onlar da məsuliyyətə cəlb ediləcək. Ona görə də hələ də Azərbaycan ərazisində qalmış terrorçular buranı tərk etməlidir. Onlar ərazidən çıxmasalar, məhv ediləcəklər”.

Elman Məmmədova görə, vaxt itirmədən Azərbaycan ərazisində olan bütün separatçı-terrorçular çıxarılmalıdır:

“Sonuncu separatçı ərazimizdən çıxana qədər təmizləmə prosesi həyata keçirilməlidir. Əks halda təxribatların, hərbi qarşıdurmaların olması ehtimalı böyükdür. Çünki Ermənistan bu gün də revanşizm arzuları ilə silahlanır. İran ərazisindən keçməklə Hindistandan Ermənistana silah daşınır. Bütün bunlar növbəti hərbi eskalasiya riskinin yüksək olmasından xəbər verir”.