“Paşinyan təhlükəli oyun oynayır. Əlbəttə, bu, öz oyunu deyil, onu oynadanlar var. Dövlət rəhbəri olaraq heç vaxt müstəqil olmayıb, kənardan gələn sifarişləri yerinə yetirib. Paşinyan onu iqtidara gətirən dairələrə, qüvvələrə xidmət edir”.

DİA.AZ bildirir ki, bunu Teleqraf.com-a hərbi ekspert, polkovnik Şair Ramaldanov deyib.

Ekspert qeyd edib ki, təhlükə altında təkcə Paşinyan yox, onunla birgə erməni xalqının gələcəyidir:

“Erməni xalqı döyüşlərdə öz övladlarını itirdi. Yəni bu məsələni danışıq yolu ilə həll etmək olardı. Cənab Prezident İlham Əliyev dəfələrlə onlara müraciət edərək konstruktivliyə, danışıqlara çağırıb. Paşinyan dövlət rəhbəri olsa da, düzgün qərar qəbul etmədi və yaxud da etməyə qoymadılar”.

Şair Ramaldanova görə, danışıqlar zamanı normal qərara gəlinməsə, Azərbaycan güc variantına əl atacaq:

“Siyasətdə hədəflərə nail olmaq üçün bəzən güc variantından istifadə etmək lazımdır. Tarixdə bu təcrübə var, 44 günlük Vətən Müharibəsi də buna bir sübutdur. Onlar bizim xarici işlər naziri ilə bir masa arxasında əyləşib danışanda Azərbaycan dövlətinin gücünü, şöhrətini, yumruğumuzu başlarının üstündə hiss edirlər.
Müharibə məsələsini dilə gətirənlər olur. Müharibə çox geniş anlamdır. Azərbaycan maraqlarını, sərhədlərini qorumaq üçün hansısa vəziyyətə görə adekvat cavab, təxribatın qarşısını almaq üçün tədbirlər görür. Laçın yolu və ya digər istiqamətlər olsun, ölkəmizin maraqlarına təhlükə varsa, orada Azərbaycan dövləti ordusu ilə qarşılarına çıxacaq”.