"İnşaat Konstruksiyaları” MMC-nin qanuni təmsilçisi Rauf Əliyev artıq Bakıda məşhur mənzil fırıldaqçısı kimi ad çıxarıb. Onun şəhərin tikinti mafiyasında əsas fiqurlardan biri kimi tanıyırlar. Çünki illərlə eyni metodlarla vətəndaşları aldadır, amma heç bir cəza almır. Belə əminlik yaranır ki, Rauf Əliyev çox yüksək çinli məmurlar tərəfindən himayə edilir. Əgər elə olmasaydı, çoxdan dəmirbarmaqlıqlar arasında idi. Görünür ki, "əl əli yuyar, əl də üzü" prinsipi ilə işləyən Rauf Əliyevə buna görə "gözün üstə qaşın var" deyilmir. O da bu minvalla binalar tikir, camaatı gah aldadır, gah süründürür, gah illərlə vəd verib başından edir, nəticədə özü də qazanır, himayədarlarını da yemləyir. Misal üçün şirkətin Xətai rayonu, Fəzail Bayramov küçəsindəki pilot layihəsi olsun. 7 il əvvəl sakinlər kirayələrə köçürülüb, onlara həmin ərazidə inşa olunan binadan mənzillər veriləcəyi vəd edilib. Amma iki il ərzində yeni mənzillərə köçəcəyi vədi alan sakinlər, o gün-bu gün kirayələrdə qalıblar. Şirkət əvvəlcə bunu pandemiya dövründə yaranmış maliyyə çətinlikləri ilə izah edib, sakinlər də anlayışla qarşılayıb. Sonra bu məsələ getdikcə acı bağırsaq kimi uzanıb. Sakinlər başa düşüblər ki, şirkət rəhbəri onlara yalan danışır. Artıq pandemiya da keçmişdə qalıb, di gəl, hələ də mənzillər təhvil verilməyib. Sakinlərin sözlərinə görə, şirkət sahibi Rauf Əliyev hər dəfə eyni sözü verir, amma dediyinin üstündə durmur. Hətta bu yaxınlarda Xətai rayon icra başçısının yanında qəbulda olublar. Şirkət sahibi icra başçısının yanında sakinlərə bir daha vəd verib ki, bir həftə ərzində problem həllini tapacaq. Ancaq icra başçısı ilə görüşdə də söylədikləri fıs çıxıb. Sakinlər bir araya gələrək həmin binanın ərazisində çadır qurmağa, etiraz etməyə hazırlaşırlar. Onların bildirdiyinə görə, son zamanlar bəzi sakinlərin kirayə haqlarının ödənilməsində də gecikmələr, hətta heç verməmək halları var. Bu da ikiqat narazılıq doğurub. Ən əsası isə 7 ildir ki, camaat öz mənzillərinə köçə bilmir və kirayələrdə qalıb. Son olaraq isə şikayətin Real TV-də işıqlanması zamanı Xətai RİH məmuru şirkət rəhbərinə tövsiyələr olunduğunu, xəbərdarlıq edildiyini açıqlayıb. Daha sonra Rauf Əliyev telefon danışığında bir həftə sonra problemin həll ediləcəyini bildirib. Amma sakinlər ona inanmır və yenə yalan danışıb vaxt qazandığını qeyd edirlər.
Bu azmış kimi, məlum olub ki, şirkət rəhbəri 18 mərtəbəli bina nəzərdə tutsa da, sonradan onun 20 mərtəbəli olması üçün razılıq alacağını bildirib. Maraqlıdır ki, layihədə 18 mərtəbə göstərildikdən sonra daha iki mərtəbə artırılmasına necə icazə verilə bilərdi? Məlumdur ki, bu qərar Şəhərsalma və Arxitektura Komitəsinin səlahiyyətində olan məsələdir. Görünür, Rauf Əliyev komitə rəhbərliyi ilə "dil taparaq" problemi çözüb və daha iki mərtəbə qaldırılmasına razılıq ala bilib. Bu faktın özü də sübut edir ki, Bakıda tikinti şirkətləri ilə komitə arasında min cür oyunlar, sövdələşmələr gedir. Nəticədə şəhərin arxitekturası pozulur, şəhərsalma nizamı xaosa çevrilir, rüşvət, pul marağı ucbatından məmurlar biznes sahiblərinin hər bir qanunsuz hərəkətinə şərait yaradır, göz yumurlar. Beləliklə, paytaxt yaşamaz bir hala gəlir. Üstəgəl, əziyyət çəkən vətəndaşlar olurlar, adlanırlar, şirkət sahibləri isə hər bir problemi rüşvətlə aşırmağın mümkün olduğunu anlayaraq, müxtəlif qanunsuzluqlara yol verir, payçılara kələk gəlir, fırıldaq, dələduz yollarla pul qazanırlar. Onsuz da əmindirlər ki, onlara yaşıl işıqdır, komitəni də pulla ələ almaq mümkündür, ona görə də vətəndaşlara "atmaq" olar. O baxımdan "İnşaat Konstruksiyaları" MMC-dən narazı olanlar bilməlidirlər ki, belə MTK rəhbərlərinin arxasında himayədarları və rüşvət alan qurumlar dayanırlar. Əziyyəti çəkən isə sakinlər olurlar.
Yeri gəlmişkən, Dərəçiçək” MTK da Rauf Əliyevə məxsusdur. Məhkəmənin qərarı ilə Rauf Əliyev Cinayət Məcəlləsinin 213.3-cü maddəsi ilə nəzərdə tutulan cinayət əməlinin törədilməsində təqsirli bilinib və ona 2 il müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, 5 il müddətinə azadlıqdan məhrumetmə cəzası təyin edilib. Məhrum etmə cəzası Cinayət Məcəlləsinin 70-ci maddəsinə əsasən, şərti olaraq tətbiq edilib və onun üzərində 3 il sınaq müddəti müəyyən olunub. İş üzrə verilmiş mülki iddia qismən təmin edilib. İş adamından 659.152,54 manat tutulub, dövlət büdcəsinə keçirilməsinə qərar verilib və qalan hissədə mülki iddia təmin olunmayıb.
Rauf Əliyev şirkəti tərəfindən 2016-cı ildə Bakının Yasamal və Nizami rayonlarında icra başçılarının sərəncamı ilə tikilən binaların tikinti fəaliyyəti ilə məşğul olan şəxslərə görə Bakı şəhəri Lokal Gəlirlər Baş İdarəsinə təqdim etdiyi bəyannamələrə təhrif olunmuş məlumatlar daxil edib, ümumilkdə 3175824,89 manat, 2018-ci ildə Bakı şəhəri Xətai rayon icra başçısının sərəncamı ilə tikilən binaların tikinti fəaliyyəti ilə məşğul olan şəxslərə görə Bakı şəhəri Lokal Gəlirlər Baş İdarəsinə təqdim etdiyi bəyannamədə 2019-cu ilin cəmi 673584,12 manat sadələşdirilmiş vergisini dövlət büdcəsinə ödəməkdən yayınıb.
Mediada gedən xəbərlərə görə, Rauf Əliyev müəmmalı yollarla tikdirdiyi binalarda əlavə mərtəbə tikilməsi ilə bağlı FHN əməkdaşlarını da “razı sala” bilib. Fövqəladə Hallar Nazirliyinin əməkdaşları bu binaların dayanıqlılığı ilə bağlı müayinələr aparıb və müvafiq texniki rəy veriblər.

Azər Talıbov

Anaxeber.info

Növbədənkənar parlament seçkilərindən sonra Milli Məclisin yeni tərkibdə keçirilən ilk iclasında bəzi deputatların yatması müzakirələrə səbəb olub. Bu hadisənin ölkə başçısının parlamentdə çıxışı zamanı baş verməsi müzakirələri daha da alovlandırıb.

Yenisabah.az xəbər verir ki, dövlət televiziyasının kameralarına mürgülü vəziyyətdə yaxalanan parlamentarilər bu davranışlarını müxtəlif səbəblərlə əlaqələndiriblər. Parlamentin ilk iclasında yatdığı yerdə görüntülənən qocaman deputat Səttar Möhbalıyevin reaksiyası onun personası ətrafında ciddi ajiotaj yaradıb.

Qeyd edək ki, 69 yaşlı Möhbalıyev dövlət başçısının çıxışı zamanı yuxulamasını səhhəti ilə əlaqələndirib. O, jurnalistlərə açıqlamasında səhhətində ciddi problemlərin olduğunu bildirib. Deputat deyib ki, neçə vaxtdır kəskin ürək ağrılarından əziyyət çəkir: “Yaxın günlərdə icazə alıb müalicə olunmaq üçün 20 günlüyünə Almaniyaya gedəcəm”. vakansiyalar

Naxçıvandan deputat seçilən Səttar Möhbalıyevin bu sözləri onu hədəfə gətirib. Hazırda sosial şəbəkələrin Azərbaycan seqmenti Möhbalıyevdən bu suala cavab verməyi tələb edir: Səhhətində ciddi problem olan adam imza vərəqləri götürərkən DSK-ya sağlam olduğuna dair arayışı necə verib? Xəstə şəxs necə ağır təbliğat kampaniyası aparıb?

Müstəqil müşahidəçilər hesab edirlər ki, Möhbalıyev bu açıqlaması ilə yüksək rütbəli məmurların, digər vəzifəli şəxslərin, deputatların sirrini açmış olub. Deputat açıq şəkildə etiraf edib ki, vəzifəli və imkanlı şəxslər Azərbaycan səhiyyəsinə etibar etmirlər.

Sosial şəbəkələrdə Səttar Möhbalıyevə “Azərbaycanın ən yaxşı ürək həkimi ilə parlamentdə yanaşı oturursunuz. Səhhətinizi niyə Rəşad Mahmudova etibar etmirsiniz?” məzmunlu suallar ünvanlayanlar da olub.

“Yeni Sabah”ın əldə etdiyi məlumata görə, 69 yaşlı deputatın məlum davranışı təkcə sosial şəbəkə iştirakçılarını deyil, həm də hakimiyyət komandasında söz sahibi olan insanları qıcıqlandırıb. Onlar deputata səhhətindəki problemləri gizlətdiyinə görə ciddi irad bildiriblər.

Son vaxtlar hakimiyyətin “gözündən düşən” və buna görə də Həmkarlar Konfederasiyasındakı vəzifəsini itirən deputatın məlum davranışlarından sonra daha ciddi problemlərlə üzləşəcəyi bildirilib. Onun yaxın zamanlarda “səhhətində yaranmış problemlərlə əlaqədar” ərizə yazaraq, deputat mandatından imtina edəcəyi istisna olunmur.

"Dövlət Gömrük Komitəsinin yeni rəhbərliyinin təyinatından sonra DGK-da heç nə dəyişməyib! Şahin Bağırov da Səfər Mehdiyevin yolunu gedir. Əvvəlki kimi rüşvət və korrupsiya. Necə də olmalı idi ki... Səfər Mehdiyev başda olmaqla, özündən əvvəlki DGK sədrlərini cəzasız görən Şahin Bağırov anlamaq çox asandır".

Bu barədə Dia-az.İnfo-ya göndərilən məqalədə bildirilir.

Məqalə müəllidi daha sonra davam edir: "Məsələ ondadır ki, bir çox sahibkarlar öz mallarını gömrük qeydiyyatından keçirən zaman süründürməçilik və bunun nəticəsi olaraq, əlavə xərcə düşmələrindən şikayət edirlər. Misal üçün, laboratoriyadan keçirilərək, yoxlanılmasına ehtiyac olan malların əksəriyyətini rəsmiləşdirmək xeyli vaxt aparır. Bir çox hallarda bir malın laborator analizinin cavabı 7-10 günə verilir. Bu, olduqca uzun müddətdir və müvafiq laboratoriyaların nədən belə ləng işləməsi sual doğurur. Eyni zamanda, gecikmə həmin avtomobillərin gömrükdə saxlanılması ilə bağlı xərcləri artırır və hər maşın üçün təxminən 600-700 dollar təşkil edir. Sahibkar bu məbləği özündən asılı olmayan mənasız səbəblərdən nəqliyyat vasitəsinin sahibinə və digər xərclərə ödəməli olur.

Ancaq sahibkarın “çiləsi” bununla da bitmir. Əgər bir yük maşınında 2-3 cür, yaxud daha çox çeşiddə məhsul varsa, gömrük əməkdaşları heç bir izahat vermədən qaçaqmalçılıqla mübarizə adı altında həmin avtomobili anbara yönəldirlər. Bu da olur sahibkara qurulmuş növbəti “pul tələsi”. Sözügedən prosesi ən çox Bakı Baş Gömrük İdarəsində müşahidə olunur".

Şuşa Şəhəri Dövlət Qoruğu İdarəsinin keçirdiyi tender müsabiqəsinin (Açıq tender) qalibi “Laguna Group” MMC (VÖEN-1004604201) olub.

Yeniavaz.com xəbər verir ki, tenderin qalibi olan şirkət Şuşa şəhəri ilə qardaşlaşmış Xivə (Özbəkistan) şəhərində “Şuşa günləri” tədbirinin keçirilməsi xidmətini həyata keçirəcək və qarşılığında 122 min 449 manat 18 qəpik alacaq.

Məlumat üçün bildirək ki, daha əvvəl də “Laguna Group” MMC dövlət qurumlarının keçirdiyi çoxsaylı tender müsabiqələrində qalib olub. Şirkət barədə açıq internet resurslarda geniş məlumat yoxdur. “Laguna Group” MMC-nin nə rəsmi saytı, nə də sosial şəbəkə hesabları mövcuddur. Dövlət Vergi Xidmətinin yenilənmiş “Kommersiya qurumlarının dövlət reyestri məlumatları”nda da şirkət barəsində məlumatlar mövcud deyil.

Qeyd edək ki, “Laguna Group” MMC 15 fevral 2017-ci ildə dövlət qeydiyyatına alınıb. MMC qeydiyyata alınan zaman nizamnamə kapitalı 10 manat olub. Hüquqi ünvanı Bakı şəhəri, Binəqədi rayonu, Əcəmi Naxçıvani ev 27, m. 102-də yerləşib, qanuni təmsilçisi isə Qarayev Ərtoğrul Hafiz oğlu olub.

Binəqədi rayonu, Əcəmi Naxçıvani ev 27, m. 102-də daha bir şirkət – “My Vings” MMC (VÖEN – 1002351891) dövlət qeydiyyatına alınıb və bu şirkətin qanuni təmsiçisi Rəfiyev Müzadil İlqar oğludur. Hazırda bu şirkət fəaliyyət göstərmir. Rəfiyev Müzadil İlqar oğlunun qanuni təmsilçisi olduğu başqa bir şirkət – “Aqroman” MMC də (VÖEN – 1202544661) Şuşa Şəhəri Dövlət Qoruğu İdarəsinin keçirdiyi 800 min manatlıq tender müsabiqəsində qalib olub.

Rəfiyev Müzadil İlqar oğlu xarici işlər nazirinin müavini Rəfiyev Yalçın İlqar oğlunun qardaşıdır. Hazırda xarici işlər nazirinin müavini olan Yalçın Rəfiyev də Binəqədi rayonu, Əcəmi Naxçıvani ev 27, m. 102 ünvanında qeydiyyatdadır. Tenderin qalibi olan “Laguna Group” MMC-nin qanuni təmsilçisi olmuş Qarayev Ərtoğrul Hafiz oğlunun da Yalçın Rəfiyevin yaxın qohumu olduğu bildirilir.

Onu da bildirək ki, Yalçın Rəfiyev 9 fevral 1987-ci ildə Şəmkir şəhərində anadan olub. 2007-ci ildə Bakı Dövlət Universitetinin “Beynəlxalq Hüquq və Beynəlxalq Münasibətlər” fakültəsinin “Beynəlxalq Münasibətlər” ixtisası üzrə bakalavr pilləsini fərqlənmə diplomu ilə bitirib. 2010-2011-ci illərdə İtaliyanın Roma şəhərində yerləşən NATO Müdafiə Kollecində Ali Kursunda, 2014-2016-cı illərdə isə Avstriyanın Laksenburq şəhərində yerləşən Beynəlxalq Antikorrupsiya Akademiyasının “Korrupsiyaya qarşı mübarizə üzrə mütəxəssis” proqramı üzrə magistr proqramında təhsil alıb.

2019-cu ilin sentyabr ayından 2023-cü ilin sentyabr ayınadək Xarici İşlər Nazirliyinin Beynəlxalq Təhlükəsizlik İdarəsinin rəisi vəzifəsində çalışıb. 8 sentyabr 2023-cü il tarixindən xarici işlər nazirinin müavini təyin olunub.

Xırdalan şəhərində piyadaların hərəkəti üçün səki qalmayıb.

XALQ.AZ xəbər verir ki, bu barədə Xırdalan sakinləri məlumat verib. Onların sözlərinə görə, Xırdalanın hər yerində bütün səkilərdə ya obyekt inşa edilib, ya da avtomobil parklanması üçün ayrılıb. Piyadalar isə min bir zülmlə yol gedib gəlirlər. Sakinlərin sözlərinə görə, bu işdə məsuliyyət daşıyan Abşeron Rayon İcra Hakimiyyəti şikayətləri eşitmir. Edilən heç bir müraciətə də baxılmır.

Sakinlər bildirib ki, Xırdalan bazarının qarşısında vəziyyət lap betərdir. Piyadalar pilləkənlərin üstü ilə hərəkət edir. Tezliklə bir tədbir görülməsini tələb edən sakinlər bildirib ki, belə davam edərsə icra hakimiyyəti avtomobil yollarını da satışa çıxaracaq.

Heç təsadüfi deyil ki, Abşeron İH məhz mütəmadi olaraq torpaq zəbti, torpaq mübahisəsi səbəbindən məhkəməyə verilir. Qarşıdakı 30 gün ərzində icra hakimiyyətinin məhkəmələrdə 54 çəkişməsi var ki, onlardan da əksəriyyəti torpaq münasibətləri üzrə mübahisədir.

Həmçinin qeyd edək ki, Fövqəladə Hallar Nazirliyi Abşeron ərazisində dəfələrlə icra hakimiyyəti tərəfindən satılmış torpaqlarda qanunsuz tikililərin söküntüsünü aparıb.

Qarşı tərəfi dinləməyə hazırıq.

Səbail rayonunda Gülbala Əliyev küçəsidir bura. Bir qrup makler doluşub Bayıl ərazisinə, xüsusən də "Akapen" deyilən əraziyə, vur-hay ev tikib satırlar. Özü də, Səbail rayon İcra Hakimiyyətinin və SOCAR-ın gözünün qabağında hər gün bir ev tikirlər. Təsəvvür edin ki, səhər işə gedəndə görürəm yeri qazırlar, axşam qayıdanda görürəm ki, artıq 3 otaqlı ev tikilib, üstü də bağlanıb. Diqqət etsəniz görəcəksiniz ki, evlər neft quyusunun düz 10 metrliyində tikilib. Əvvəldən tikilənlər heç, bu fotodakılar cəmi bir neçə ayın, üstü və yanı uçulanlar isə bir neçə günün evləridir.

Bura bataqlıq idi, qamış basmışdı. Həbsdən yeni çıxan makler və onun bandası buranı cəmi bir ilə şəhərciyə çevirdi. Bir qat kərpicdən bataqlıqda ev tikib satırlar. Artıq bəzi evlərdə yaşayış var. Dəhşətlidir. Bu evlərdə birazdan çatlar yaranacaq, evi həşərat basacaq.
SOCAR yekə-yekə danışırdı ki, qanuna görə neft kəmərlərinin və neft quyularının yanında ev tikə bilməzlər.

Bir neçə il öncə valideynlərimin yaşadığı Bayıl dərəsindəki evlər sürüşməyə görə köçürüldü. Mən də bu "Akapen" deyilən ərazidən 3 sot torpaq aldım ki, onlara ev tikdirim. SOCAR-ın Bibiheybət NQÇİ-nin Nehrəmdən olan rəisi özünü ən pis yollara qoyub dirəndi ki, olmaz, qanun imkan vermir. Məsafə olmalıdır və sair və ilaxır. Çox bezdirdilər, tikə bilmədim. Sonra torpaqlarımız işğaldan azad olundu, mən də həmin ərazini satdım ki, bir-iki ilə valideynlərim Zəngilana qayıdacaq zatən, neynirəm əlavə evi.
Bir də gördüm satdığım torpaqda iki dənə ev tikib satdılar.

Ay SOCAR, bəs qanun icazə vermirdi? Yenə burada uzaq məsafə var idi, 200 metrdən çox idi. İndi fotoda gördüyünüz evlərlər neft quyusunun arasındakı məsafə heç 10 metr deyil. Adamın ağzının içində qanunu pozurlar, sən də gəlib şou göstərib evin bir qismini söküb gedirsən. Üstündən bir neçə gün keçir, SOCAR-ın baş ofisinə şəkil çəkib atırsan ki, sökdüm. Vəssalam. Sonra maklerə göz-qaş edirsən ki, get tik. Belə söküntüləri 365 dəfə görmüşük ay zavallı SOCAR.
Nəysə ki, hansısa məmurun adından istifadə edib SOCAR-ı da, Səbail rayon İcra Hakimiyyətini də divara dirəyib dayanmadan ev tikirlər. Özü də, məmurun özünün yox ha, qardaşının adı gələndə hamısı mil kimi dayanır...

Elməddin Muradlı

"Rəşad Musayev mənə dedi ki, sənin üstündə nəzarəti gücləndirib səni tutduracam".

"DogruXeber.az" Xəbər verir ki, bu sözləri aidiyyatı qurumlara videomüraciət ünvanlayan Sabirabad rayon Əsədli kənd sakini Soltanov Əvəzağa Mehdi oğlu deyib.

Əvəzağa Soltanovun sözlərinə görə o, cəmi bir neçə aydır sakini olduğu Əsədli kənd orta məktəbində təmizlikçi işləyirmiş. Lakin, ona böhtan ataraq işindən azad ediblər.

Doğrusu, evində iki nəfər birinci qrup əlili olan ağsaqqalın yuxarıda işlətdiyi cümləsini eşidəndə biz də sizin kimi təəccüblənmişdik ki, axı qosqoca Mil-muğan Regional Təhsil İdarəsinin müdirinin bir orta məktəbdə süpürgəçi işləyən ağsaqqal ilə nə ədavəti ola bilərdi?

Bax bu suala özümüzdə aydınlıq gətirmək üçün aşağıda təqdim etdiyimiz videonun ikinci hissəsini diqqətlə izləyək, ardından isə Rəşad Musayev fəaliyyətinə qısa nəzər salaq.

https://www.youtube.com/watch?v=3XCyUYx2rYY&t=30s

Xatırlayırsınızsa, portalımızda cəmi bir neçə ay əvvəl Beyləqan rayon Aşıqalılar kənd sakini Sədi Məmmədov Xalaç kənd məktəbinin keçmiş direktoru Murad Məmmədov barəsində məlumatlar dərc etmişdik.

Korrupsiya tüğyan edən təhsil müəssisəsində ailə biznesi - VİDEO

O, Murad Məmmədov ki, demək olar, ailəsinin bütün üzvləri onun direktoru olduğu orta məktəbdə çalışırlar.

Diqqət edin !

Sədi Məmmədovun sözlərinə görə, "direktorun bir qızı həmin məktəbdə katibə, bir qızı müəllim, bir qzının əri birinci mavini, bir qızının əri kompüter müəllimi işləyir. Bundan əlavə oğlu, qardaşı arvadı, bacısının əri - hamısı məktəbdə işləyir. Ona görə də təhsilimiz yoxdur.

Qeyd edim ki, dəfələrlə şəhid anası Murad müəllimdən məktəbdə hər hansı bir işlə təmin olunmasını xahiş etmişdi. Axırda Murad müəllim o, boyda məktəbdə ona süpürgəçi işi verdi ki, ayaq altı süpürsün.

Dəfələrlə bu barədə aidiyyatı qurumlara şikayətlər etmişik, heç bir nəticəsi yoxdur. Düzdür, Fevralın 12-si və 13-də iki gün ardıcıl Mil-Muğan regional Təhsil İdarəsi tərəfindən məktəbdə ciddi yoxlamalar aparıldı. Aşkar olundu ki, direktor Murad müəllim bir neça müəllimə artq dərs saatları yazıb, dövlətin pulunu mənimsəyirmiş. Həmçinin əlavə olaraq, dövlət hər ay 60 saat məşğələ saatı verirmiş, amma bu dərslər sözügedən məktəbdə heç vaxt keçirilməyib. Həmin 60 saat dərsin 1800 manat pulu mənimsənilib. Ona görə də martın 11-də Murad müəllimin direktorluğuna da, müəllimliyinə də xitam verildi. Amma, iki aydan sonra gəldi ki, "mən müəllim kimi işləyirəm".
İşlədiyi 14 ildə qanunsuz əməlləriylə özünə şərait quran cinayətkar necə oldu ki, müəllim kimi işə qaytdı?

Mil-muğan Regional Təhsil İdarəsinin özü-özünə zidd gedərək, apardığı araşdırma zamanı aşkar etdiyi nöqsanları aradan qaldırmaq və həmin nöqsanların olan təhsil işçisini işindən azad etmək, bu barədə hüquq-mühafizə orqanlarına məlumat vermək əvəzinə sadəcə sənəd üzərində vəzifəsini aşağı salır, amma bir təmizlikçiyə ən ağır cəzanı - el dilində desək, "çörəyini kəsmək cəzası" verir.

Ağsaqqalın Süpürgəsini əlindən alan təhsil idarəsi, bəs korrupsioner kimi tanınan, ailəsini, qohumlarını, sanki "ata ocağı"na yığırmış kimi təhsil müəssisəsinə yığan Murad müəllimin qələmini niyə almadı?

Mövzunu davam etdirəcəyik.

Redaksiamız hər kəsin söz haqqını tanıyır.

DogruXeber.az

Gəncə şəhər sakini, II Qarabağ müharibəsi iştirakçısı, qazi İsmayılov Elşən Arzuman oğlu tərəfindən redaksiyamıza şikayət məktubu daxil olub.

Şikayətçi iddia edir ki, ona sərancamla verilən torpaq sahəsini keçmiş icra başçısı Elmar Vəliyevin oğlu Elmir Vəliyev ələ keçirib. Qazi problemin həll olunması üçün saytımız vasitəsilə Azərbaycan Respublikası Baş prokurorunun müavini Xanlar Vəliyevə müraciət edir:

“Qeyd edim ki, sərəncamla əlimdə 116.0 kv metr torpaq sahəmiz var. Qanuni sənədim olsa da, keçmiş icra başçısı Elmar Vəliyevin oğlu Elmir Vəliyev həmin torpaq sahəsini əlimdən almaq istəyir.

Dəfələrlə müraciət etmişəm, bildirmişəm ki, bu yer mənimdir, imkan verin mən də bu yerdən faydalanım. Yarımcan adamam, ən azından sən evində rahat yatanda mən canımı qoymuşam, bir gözümdən olmuşam. Mən heç kəsin yerini, məkanını zəbt etmirəm. Mənim olana sənəd çıxarmaq istəyirəm, əlimdə sərəncamım var.

“Grand bazar”ın rəhbəri Mahmud bəy məni təhdid edir, görüşünə qəbul etmir. Mənə deyirlər ki, “Elmir Vəliyev sifarişlə adam öldürəndir, ondan uzaq dur”. Belə çıxır ki, mən haqqımı hanısa məmur balasına verməliyəm. Oddan, topdan, tüfəngdən qorxmayan oğlan heç harınlamış məmur balasının qarşısında acız qalarmı?!

Onu da deyim ki, Daşınmaz Əmlak Komitəsinin keçmiş müdiri Kərəm Həsənovla Elmar Vəliyev qudadır. Özləri verdiyi sərancamı bu gün “düzgün sənəd saymırlar”. Biz oranı pulsuz almamışıq, pulumuzu verib almışıq.

Hörmətli Xanlar Vəliyev!

Əminəm ki, sizin bu məsələdən heç xəbəriniz də yoxdur. Onu da bilirəm ki, Azərbaycanın bütövlüyü uğrunda canından, qanından keçmiş qazilərə və şəhidlərə necə hörmət edirsiniz. Mən müharibə iştirakşısı, 1 qrup əlil kimi, sizdən xahiş edirəm, sizin adınızla məni təhdid edənlərə qarşı bir tədbir görün.

Torpağa sənədi Elmar Vəliyevin müavini Məharət bəy verib. İndi Zaur adlı şəxs bizim qarşımızı kəsirərək, öz qanuni ərazimizə buraxılmırıq. Bizim çörək pulu qazanmağımıza mane olurlar.

Səlahiyyətli qurumlara müraciət edirik: biz sizin başınızı düşmən qarşısında uca etdik, siz də bizim haqqımızı tapdalamaq istəyənlərə mane olun”.

Yazıda adı keçən şəxslərlə əlaqə saxlamağa çalışsaq da, zənglərimiz cavabsız qaldı.Redaksiyadan: Qarşı tərəfin mövqeyini dərc etməyə hazırıq.

,Qeyd edək ki, Elmar Vəliyevin oğlu Elmir Vəliyev Milli Məclisin İnzibati və hərbi qanunvericilik şöbəsinin İnzibati qanunvericilik sektorunun müdiri vəzifəsində çalışırdı və 2020-ci ildə vəzifəsindən azad edilib. Elmar Vəliyev 2011-2018-ci illərdə Gəncə Şəhər İcra Hakimiyyətinin başçısı olub.Yenixeber.org

Elm və Təhsil Nazirliyinin tabeliyində fəaliyyət göstərən Təhsil İnstitutu “Alqoritmika.Azərbaycan” MMC (VÖEN- 1702264681) ilə satınalma müqaviləsi imzalayıb.

Hurriyyet.az xəbər verir ki, Təhsil İnstitutu bu müqaviləni tender müsabiqəsi keçirmədən, bir mənbədən satınalma metodu əsasında imzalayıb.

Qeyd edək ki, Təhsil İnstitutu ibtidai sinif müəllimlərinin riyaziyyat fənni üzrə təkmilləşdirilməsi sahəsində təlimlərin keçirilməsi üçün “Alqoritmika.Azərbaycan” MMC-yə 600 min 325 manat ödəyəcək.

Məlumat üçün bildirək ki, bu müqavilə 2024-cü ildə Elm və Təhsil Nazirliyi ilə “Alqoritmika.Azərbaycan” MMC arasında imzalanan sayca 4-cü müqavilədir. Əvvəlki satınalma müqavilələri də tender müsabiqəsi keçirilmədən, bir mənbədən satınalma metodu əsasında imzalanıb. İmzalanan 4 müqavilənin ümumi dəyəri 2 milyon 329 min 261 manat olub.

Onu da qeyd edək ki, “Alqoritmika.Azərbaycan” MMC barəsində məlumatlar Dövlət Vergi Xidmətinin yenilənmiş “Kommersiya qurumlarının dövlət reyestri məlumatları”nda mövcud deyil.

Bu il Elm və Təhsil Nazirliyi ilə 2,3 milyon manatlıq müqavilə imzalayan “Alqoritmika.Azərbaycan” MMC 27 oktyabr 2017-ci ildə dövlət qeydiyyatına alınıb. Qeydiyyata alınan zaman nizamnamə kapitalı 10 000 manat olan şirkətin hüquqi ünvanı Səbail rayonu Puşkin ev 2, Məhəllə 674 ünvanında yerləşib. MMC-nin qanuni təmsilçisi Rusiya vətəndaşı olan Renat Asadov olub.

“Alqoritmika.Azərbaycan” MMC Rusiyanın “Alqoritmika” (VÖEN -7704386240) şirkətinin ölkəmizdəki təmsilçisi kimi fəaliyyət göstərir.

Məlumat üçün bildirək ki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsi ilə həyata keçirilir.

Başqa bir məqam satınalmanın bir mənbədən satınalma metodu əsasında keçirilməsidir.

“Dövlət satınalmaları haqqında” Qanunun 49-cu maddəsində açıq şəkildə qeyd olunur ki, bir mənbədən satınalma metodu aşağıdakı hallarda tətbiq olunur:

- Satınalma predmeti yalnız hər hansı konkret təchizatçıda olduqda;

- Satınalma predmetinin əvəzedicisi və alternativi olmadıqda;

- Satınalma predmetinə təcili tələbat yarandıqda;

- Təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;

- Satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

İbtidai sinif müəllimlərinin riyaziyyat fənni üzrə təkmilləşdirilməsinin Qanunda göstərilən bu şərtlərdən hansına uyğun gəldiyi başa düşülən deyil.