İspaniya Superkubokunun yarımfinal matçında "Real" Madridin digər təmsilçisi "Atletiko"nu 2:1 hesabı ilə məğlub edib.

Manset.az xəbər verir ki, turnir Səudiyyə Ərəbistanında keçirilib.

Qalib komandanın heyətində qolları Federiko Valverde (2) və Rodriqo (55) vurublar. "Atletiko"dan isə Aleksandr Sörlot (59) fərqlənib.

"Real" finalda daha əvvəl "Atletik"i 5:0 hesabı ilə məğlub edən "Barselona" ilə qarşılaşacaq. Matç yanvarın 11-də keçiriləcək.

"Tottenhem" in qanalı vingeri Məhəmməd Kudus sıradan çıxıb.

Manset.az Qol.az-a istinadən xəbər verir ki, bu barədə klub məlumat yayıb.

Məlumata görə, Premyer Liqada "Sanderlend"ə qarşı keçirilən son oyunda zədələnən futbolçunun bud nahiyəsində əzələ zədəsi aşkarlanıb. 

Klubdan bildirilib ki, Kudusun yaşıl meydanlara qayıdışı yalnız mart ayının sonuna, milli komandaların oyunları üçün yaranacaq fasilədən sonraya təsadüf edəcək.

Qeyd edək ki, Kudus cari mövsümdə London təmsilçisinin heyətində bütün rəsmi turnirlərdə 26 oyuna çıxıb. O, bu matçlarda 3 qol və 3 məhsuldar ötürmə ilə yadda qalıb.

"Beşiktaş" klubu təcrübəli müdafiəçisi Qabriel Paulista ilə yollarını ayırmağa hazırlaşır.

Manset.az Qol.az-a istinadən xəbər verir ki, braziliyalı futbolçu Antalyada keçirilən təlim-məşq toplanışını yarımçıq qoyaraq komandanın düşərgəsini tərk edib.

Məlumata görə, buna futbolçunun valideynlərinin səhhətinin pisləşməsi səbəb olub. "Qara qartallar"ın yaydığı rəsmi açıqlamada futbolçunun bu istəyinin anlayışla qarşılandığı qeyd olunub.

Qeyd edək ki, 35 yaşlı müdafiəçi 2024-cü ilin yayında "Atletiko"dan ayrıldıqdan sonra "Beşiktaş"a azad agent kimi qoşulub. O, "ağ-qaralar"ın heyətində ümumilikdə 45 oyuna çıxıb, 1 qol vurub və 3 məhsuldar ötürmə edib.

"Mançester Siti" İngiltərə Premyer Liqasının XX turunun ev oyununda "Çelsi" ilə 1-1 hesablı heç-heçə edib.

Manset.az xəbər verir ki, meydan sahiblərinin qolunu Tijani Reynders 42-ci dəqiqədə vurub.

Qonaqların heyətində Enzo Fernandes fərqlənib (90+4).

"Mançester Siti" İngiltərə Premyer Liqasının ardıcıl səkkiz oyununda məğlubiyyət tanımır (altı qələbə, iki heç-heçə). Komandanın 42 xalı var, turnir cədvəlində ikinci yerdədir, lider "Arsenal"dan altı xal geridədir.

"Çelsi" baş məşqçi Enzo Mareskanın istefasından sonra ilk oyununu keçirib. London klubu 31 xalla beşinci yerdədir.

"Mançester Siti" növbəti turda "Brayton"u qəbul edəcək, "Çelsi" isə səfərdə "Fulhem"lə oynayacaq. Hər iki oyun 7 yanvarda keçiriləcək.

“Qalatasaray” Berkan Kutlu və Yusuf Demirlə yollarını ayırıb.

Manset.az xəbər verir ki, bu barədə komandanın baş məşqçisi Okan Buruk “Trabzonspor”la Türkiyə Superkuboku matçından əvvəl keçirilən mətbuat konfransında məlumat verib.

Mütəxəssis hər iki futbolçunun artıq klubu tərk etdiyini bildirib.

Qeyd edək ki, Berkan Kutlu 2021-ci ildən, Yusuf Demir isə 2022-ci ildən İstanbul təmsilçisinin formasını geyinirdi.

Almaniyanın "Bavariya" klubu heyətini yeni futbolçu ilə gücləndirib.

Manset.az Qol.az-a istinadən xəbər verir ki, Münhen təmsilçisi hücumçu Bara Sapoko Ndiayeni heyətinə qatıb.

18 yaşlı forvard Qambiyanın "Gambinos Stars Afrika" klubundan icarə əsasında transfer edilib. Gənc futbolçu cari mövsümün sonuna qədər Almaniya nəhənginin şərəfini qoruyacaq.

Qeyd edək ki, Vensan Kompaninin rəhbərlik etdiyi "Bavariya" hazırda Bundesliqada inamlı təsir bağışlayır. 15 turdan sonra 41 xal toplayan komanda turnir cədvəlinin lideridir. Münhenlilər növbəti oyununu yanvarın 11-də doğma meydanda "Volfsburq"a qarşı keçirəcək.

Nüfuzlu Transfermarkt portalı bu günə olan vəziyyətə görə dünyanın ən bahalı hücumçularının siyahısını tərtib edib.

Manset.az Qol.az-a istinadən xəbər verir ki, futbol dünyasında ən bahalı forvard adını eyni anda üç futbolçu bölüşür. Bunlar “Barselona”nın vingeri Lamin Yamal, “Mançester Siti”nin bombardiri Erlinq Haaland və “Real”ın hücumçusu Kilian Mbappedir. Hər üç futbolçunun bazar dəyəri 200 milyon avro olaraq göstərilib.

Lider üçlükdən sonra siyahıda “Real”ın digər futbolçusu Vinisius Junior yer alıb. Braziliyalı hücumçunun transfer dəyəri 150 milyon avrodur.

Daha sonra isə bazar dəyəri 130 milyon avro olan üç futbolçu qərarlaşıb: Bukayo Saka (“Arsenal”), Aleksander İsak (“Liverpul”) və Maykl Olise (“Bavariya”).

FİFA Braziliyanın “Botafoqo” klubuna transfer qadağası qoyub. 

Manset.az Qol.az-a istinadən xəbər verir ki, buna səbəb klubun argentinalı yarımmüdafiəçi Tyaqo Almadanın MLS təmsilçisi “Atlanta Yunayted”dən transferi ilə bağlı maliyyə öhdəliklərini yerinə yetirməməsidir. 

Yanvarın 1-dən etibarən “Botafoqo”ya üç transfer pəncərəsi müddətində yeni futbolçuların qeydiyyatına icazə verilməyəcək. Sanksiyanın səbəbi Almadanın transferinə görə 22,5 milyon dollar məbləğində ödənişin gecikdirilməsidir. Qeyd olunur ki, borcun tam ödənilməsi transfer qadağasının vaxtından əvvəl ləğv edilməsi üçün yeganə şərtdir.

Tərəflər arasında maliyyə mübahisəsi təxminən bir il davam edib. Bu ilin fevralında FİFA “Botafoqo”nu 21 milyon dollar əsas borc, eləcə də 1,5 milyon dollar cərimə faizi ödəməyə məcbur edib. Braziliya klubu qərardan İdman Arbitraj Məhkəməsinə (CAS) şikayət etsə də, dekabr ayında CAS “Atlanta Yunayted”in tələblərini haqlı sayıb.

Mənbələrin məlumatına görə, “Botafoqo”nun Almadanın sonradan Madrid “Atletiko”suna transferi ilə bağlı bonuslar və faizlər daxil olmaqla daha 9 milyon dollara yaxın əlavə borcu da ola bilər.

Qeyd edək ki, “Qarabağ”ın futbolçusu Pedro Bikalyo “Botafoqo”nun maraq dairəsində olub. Braziliya mediasının yazdığına görə, onlar son vaxtlar 2 dəfə “Qarabağ”a rəsmi müracət etsələr də, maliyyə məsələlərində razılığa gəlinmədiyi üçün rədd cavabı alıblar.