Rusiya Təhlükəsizlik Şurasının sədr müavini Dmitri Medvedev prezident Vladimir Putinin Ukraynada planlaşdırdığı “bufer zonası”nın, demək olar ki, bütün ölkəni əhatə edə biləcəyini deyib.

Musavat.com xəbər verir ki, bu barədə o, Telegram kanalında məlumat paylaşıb.

"Kiyevə hərbi yardım davam edərsə, bufer zonası belə görünə bilər" - ifadəsini işlədərək, demək olar ki, bütün Ukraynanı əhatə edən xəritə paylaşıb.

Medvedev iddia edib ki, Qərbdən gələn uzunmənzilli silah təhdidlərinə qarşı çıxmaq üçün bu miqyasda tədbir lazım ola bilər.

Medvedev NATO qaynaqlı uzaqmənzilli silahların Rusiya üçün birbaşa təhdid olduğunu qeyd edib: "Başqa sözlə, Rusiya orada olmalıdır; təhlükəsizlik üçün 550 kilometr, üstəlik əlavə 70-100 kilometr".

Məlumdur ki, Rusiya prezidenti Putin hələlik bütün Ukraynanı işğal etmək planını açıq şəkildə dilə gətirməyib. Buna baxmayaraq, Medvedevin bəyanatı Kremlin mövqeyini sərtləşdirməyə davam etdiyinə işarə kimi qiymətləndirilir. Ekspertlərin fikrincə, Medvedevin bütün bu açıqlamaları Kremlin razılığı ilə edilir.

Musavat.com