Ötən ilin ilk 10 ayı ərzində Azərbaycandan xarici ölkələrə 40 milyon 985 min ədəd toyuq yumurtası ixrac olunub.
Yeniavaz.com xəbər verir ki, bu barədə məlumat Dövlət Statistika Komitəsinin açıqladığı sonuncu hesabatda yer alıb.
Məlumat üçün bildirək ki, Azərbaycandan ixrac olunan yumurtanın bir ədədinin gömrük dəyəri 7 sent (12 qəpik) olub.
Müqayisə üçün bildirək ki, daxili bazarda satılan toyuq yumurtasının 1 ədədinin qiyməti 16 qəpiyə bərabərdir. Açıqlanan məlumatdan belə nəticəyə gəlmək olur ki, daxili bazarda satılan yumurtanın qiyməti xaricə satılan yumurtanın qiymətindən təxminən 33% bahadır.

İqtisadiyyat Nazirliyi ötən il Azərbaycanın qeyri-neft ixracının dəyərində tarixi maksimumun qeydə alındığını açıqlayıb.
Yeniavaz.com xəbər verir ki, bu barədə qurum öz Teleqram kanalında məlumat yayıb.
Bildirilib ki, 2023-cü ildə Azərbaycandan 3 milyard 348 milyon dollar dəyərində qeyri-neft məhsulları ixrac olunub, hansı ki bu, 2022-ci illə müqayisədə 9,8% çoxdur.
İqtisadçı-ekspert Allahverdi Aydın isə İqtisadiyyat Nazirliyinin açıqladığı məlumatlarla tam razı deyil.
O, Yeniavaz.com-a bildirib ki, əslində qeyri-neft ixracının artımı birbaşa neft-qaz sektoru ilə bağlıdır:
“Ötən ilin 11 ayı ərzində Azərbaycan xaricə 3 milyard 34 milyon dollarlıq məhsul ixrac edib. Bu 2022-ci ilin eyni dövrü ilə müqayisədə 12,8% artım deməkdir. Lakin ixrac olunan məhsulların strukturuna baxdığımız zaman açıq şəkildə görülür ki, artımın əsas səbəbi elektrik enerjisi ixracındakı artımdır. Əgər biz ixracda elektrik enerjisinin payını nəzərə almasaq onda məlum olur ki, ötən ilin ilk 11 ayında xaricə 2 milyard 625 milyon dollarlıq məhsul ixrac edilib. 2022-ci ilin ilk 11 ayında bu göstərici 2 milyard 623 milyon dollar olub. Nəticədə 2022-ci ilin eyni dövrü ilə müqayisədə demək olar ki, heç bir artım (cəmi 0,07%) qeydə alınmayıb”.

İqtisadçı-ekspert deyir ki, dəyər ifadəsində elektrik enerjisinin ixracı 2022-ci ilin ilk 11 ayı ilə müqayisədə ötən ilin ilk 11 ayında 6 dəfə artıb:
“Açıqlanan rəsmi statistikadan da göründüyü kimi, artım tamamilə elektrik enerjisinin ixracı hesabına baş verib. 2023-cü ilin ilk 11 ayında Azərbaycanda 24,1 milyard kVt.saat əmtəəlik elektrik enerjisi istehsal olunub. İstehsal olunan elektrik enerjisinin 93%-i istilik elektrik stansiyalarının payına düşüb. Elektrik enerjisi istilik elektrik stansiyalarında təbii qazdan istifadə edilərək istehsal olunur. Yəni xaricə qeyri-neft məhsulu olaraq ixrac olunan elektrik enerjisi tamamilə təbii qazdan istifadə edilərək əldə olunur”.
Allahverdi Aydın hesab edir ki, təbii qazdan əldə olunan elektrik enerjisini qeyri-neft məhsulları qrupuna daxil edərək ixrac göstəricilərini “şişirtmək”lə əslində qeyri-neft sektorundakı real ixrac göstəriciləri gizlədilir.

Son günlər bir çox abonentlər “Azəriqaz” İstehsalat Birliyindən (İB) şikayətlənirlər. Vətəndaşlar xüsusilə, dekabr ayında aylıq sərfiyyatın çox yazılmasından narazıdırlar. Abonentlərdə belə bir rəy yaranıb ki, sözügedən qurumun sayğacları aylıq sərfiyyatı əvvəlki aylara nisbətən iki-üç dəfə çox hesablayıb. Sosial şəbəkələrdə sözügedən iddia ilə bağlı kifayət qədər şərhə rast gəlmək mümkündür.

Bizim.Media-nın əməkdaşı səslənən iddialarla bağlı qurumun İctimaiyyətlə əlaqələr şöbəsinin rəisi Eldəniz Vəliyevin fikirlərini öyrənib:

O, iddiaları təkzib edib:

“Qətiyyən belə bir problem mümkün deyil. “Azəriqaz”da hər hansı bir şəxs qələmini və ya klaviaturasını götürüb, ağlına gələn rəqəmi yazaraq kiməsə göndərə bilməz. Aylıq sərfiyyatın bazada uçotu, rəqəmləri var. Bir neçə nəfər müraciət etmişdi.

Yönləndirdik, araşdırıldı, faktlarla izah etdik ki, ümumi sərfiyyatınız bu qədərdir, onlar da razılaşdı. Sosial şəbəkələrdə bir-iki nəfər var, populist çıxışlar edirlər, xal qazanırlar”.

Qeyd edək ki, oxşar problemlə bağlı Quba rayonundan da redaksiyamıza şikayət daxil olub. Nəticə etibarilə kimin haqlı, kimin haqsız olduğunu deyə bilmərik. Ancaq vətəndaşlar tərəfindən yazılan şikayətləri, bəzi müqayisəli qəbzləri sizə təqdim edirik:

Daşınmaz əmlakların notarial alqı-satqısında 20 min manatdan artıq məbləğ üçün gəlir deklorasiyası tələbi ilə bağlı ajiotaj yaranıb. Guya əmlak alışı üçün ödənilən pulun rəsmi mənbəsi göstərilməlidir. Gəlir deklorasiyası təqdim edə bilmədikləri üçün notariusdan geri qayıtdıqlarını iddia edən alıcılar bununla bağlı əmlak eksperti Elnur Fərzəliyevə müraciət ediblər.

Bu barədə “Sherg.az”a açıqlama verən Elnur Fərzəliyev isə deyib ki, böyük məbləğlərin dövriyyəsi zamanı vətəndaşdan pulun mənbəyinin soruşulması qanunvericiliyin tələbinə uyğundur:
“ Bu bank sektorunda, əmlak alqı- satqılarında, o cümlədən də digər maliyyə mübadilələrində belədir.
Notarial alqı- satqı nəğd ödənişlə aparılırsa, bu zaman noratius əməkdaşları alıcılardan ödədikləri vəsaitin gəlir mənbəyini soruşur. Pul bank vasitəsilə köçürülür, yaxud da ipoteka kreditləri ilə ödəndikdə isə vətəndaşdan bu gəlirin mənbəyi soruşulmur. Qeyd edək ki, gəlirin mənbəyi ilə bağlı vətəndaşlardan məcburi məlumat və ya yazılı gəlir deklarasiyası tələb olunmur. Vətəndaş sadəcə əldə etdiyi gəlirin mənbəyini şifahi şəkildə izah etməlidir. Lakin əldə etdiyim məlumata görə, bəzi vətəndaşlarımız onlardan ödədiyi məbləğin mənbəyi soruşulan zaman bundan narahat olur və alqı- satqı prosesindən imtina edir. Bu da əmlak bazarında təşviş və neqativ məlumatların yayılmasına səbəb olur. Burada narahatlıq üçün əsas yoxdur. Alıcılar gəlirini rəsmi mənbə ilə göstərə bilmirsə, şifahi şəkildə deməkləri kifayət edir”.

Ekspert bildirib ki, ölkə əhalisinin 25 faizə qədəri Rusiyada yaşayır və işləyir:
"Digər ölkələrdə də 100 minlərlə vətəndaşlarımız yaşayır ki orada qazandıqları pulları ölkəmizin daşınmaz əmlak sahəsinə yatırım edirlər. Başqa bir tərəfdən də ölkə daxili kənd təsərrüfatı və digər sahələrdən qazanc əldə edən şəxslər arasında da vəsitlərini əmlaka yatıranlara rast gəlmək olur. Hətta şəhərin başqa bir ərazisindəki əmlakını satıb digər bir nöqtəsindən əmlak alan şəxslər də var".

Səudiyyə Ərəbistanı bazarda tələbatın azalması fonunda fevral ayında neft tədarükünün qiymətlərini azaldacaq.

Belə ki, “Arab Light” brendi üçün neftin qiyməti hər barelinə görə 1,5-2 dollar ucuzlaşdırılıb.

Bəs bu hal Azərbaycan neftinin qiymətinə təsir edəcəkmi?

Enerji məsələləri üzrə ekspert Zəfər Vəliyev Oxu.Az-a açıqlamasında bildirib ki, artıq bir neçə ildir ki, Səudiyyə Ərəbistanı neft bazarının tənzimlənməsində öz maraqlarından çıxış edir:

“Bu ölkə bazara dörd markada neft ixrac edir və yüksək qiymətə satır. Hazırda da analoji addımları atırlar. Səudiyyə Ərəbistanı Şimali Amerika, Şimal-Qərbi Avropa, Aralıq dənizi, Asiya və Sakit okean ölkələrinə ixrac etdiyi neftin qiymətində mükafat tətbiq edir. Səudiyyə Ərəbistanının gündəlik neft hasilatı təxminən doqquz milyon bareldir. Onun təxminən 5,3 milyon bareli beynəlxalq bazarlara çıxarılır. Burada da itirəcəyi heç bir şey yoxdur. Bununla bağlı iki versiya var.

Bunlardan biri OPEC (The Organization of the Petroleum Exporting Countries) və müttəfiq dövlətlərin neft hasilatında artımın baş verməsi nəticəsində bazarı təsir altına almasıdır. Digər versiya isə Asiya və Sakit okean ölkələri bazarlarında neft emalı zavodlarının ildə bir dəfə texniki baxışa dayandırılmasıdır. Neft qiymətlərinin bu ilin ilk rübündə kəskin azalma ehtimalı yoxdur. Çünki bazarlar dəyişib, tədarük mənzili uzanıb, neftin axın xətlərində ciddi dəyişikliklər baş verib.
Eyni zamanda, Qırmızı dənizin şərq və qərbində neft balansının pozulması, HƏMAS-İsrail qarşıdurması və bu kimi digər gərginlik nəticəsində qiymətin azalma ehtimalı ləğv edilir. Dünyada mövcud neft emalı zavodlarının təmin edilməsində Yaxın Şərq ölkələrinin rolu danılmazdır. Bu ölkələrin ixrac qabiliyyəti geosiyasi fonda təhdid altına düşərsə, qısa zamanda neft məhsullarının balansı pozulacaq və xammalda güclü problem yaşanacaq. Nəticədə də qiymətlər sürətlə artacaq”.

Ekspert vurğulayıb ki, Azərbaycan nefti uzun illərdir ki, Aralıq və Qara dənizin enerji bazarlarında mükafatla satılır:

“İxrac etdiyimiz neft məhsullarının brend etalonu mükafatla satılır. Bizim neftin alıcı ölkələri sırasında Avropa nümayəndələri var. Bizim İsrailə, Hindistana, Çinə satdığımız neft az kükürdlüdür və emal xərci olduqca aşağıdır. Neftimiz bu il də mükafatla satılacaq. Bir məsələni qeyd edim ki, ötən il dünyanın avtomobil benzininə olan birgünlük tələbatı 26,7 milyon barel olub. Bu göstərici pandemiyadan əvvəlkindən də yüksəkdir.

Enerji keçidini müdafiə edən analitiklər bəyan edirdilər ki, pandemiyadan sonra benzinə olan tələbat azalacaq. Amma bazar bu proqnozları rədd etdi. Azərbaycan nefti də öz satış bazarını qoruyub-saxlayacaq. Liviyada neft hasilatının dayandırılması, tədarükündə problemlərin yaşanması bizim neftin satış bazarını daha da möhkəmləndirir. Yəni bu addımların Azərbaycan neftinə heç bir aidiyyəti yoxdur və ola da bilməz”.

İlhamə Əbülfət

Ermənistan Gürcüstanın Poti limanından Rusiyanın Qafqaz limanına bərə daşımalarını bu marşrutun rentabelli olmaması səbəbindən dayandırıb.

Bu barədə Ermənistanın iqtisadiyyat naziri Vaan Kerobyan mətbuat konfransında bildirib.

“Bərə bir neçə ay işlədi. Qiymətləndirməmizə görə, o, ixracatçılar və idxalçılar arasında kifayət qədər maraq oyatmadı. Şirkətlər bərə daşımalarından yetərincə istifadə etmədilər”, – V.Kerobyan qeyd edib.

Bundan əvvəl Kerobyan deyib ki, yüklərin Potidən Qafqaz limanına daşınması Ermənistanın dəmir yolu sistemini Avrasiya İqtisadi İttifaqı ölkələrinin infrastrukturu ilə birləşdirməyə imkan verəcək, Ermənistan iqtisadiyyatının rəqabət qabiliyyətini artıracaq, həmçinin təkcə Rusiya ilə deyil, Belarus və Qazaxıstanla nəqliyyat əlaqələrini yaxşılaşdıracaq.
TASS

YAP siyahısından mandat qazanan Elnur Allahverdiyevin daşıdığı mandat əslində qanunsuzdur. Vaxtlə Sloveniyanın fəxri konsulu olması hələ də rasmi cavablandırılmayan müəmmadır. Düzdür, MSK 27 yanvar 2020-ci il tarixində bununla bağlı Xarici İşlər Nazirliyinin Dövlət Protokol İdarəsinin arayışına əsasən açıqlama vermişdi ki, Elnur Allahverdiyevin Sloveniyanın fəxri konsul vəzifəsinə 29 dekabr 2019-cu ildə xitam verilib. Amma cumhuriyyet.az olaraq bildirək ki, Sloveniyanın rəsmi qəzetinini (Uradni list Republike Slovenije) məlumatı namizədin parlament seçkilərində xarici ölkə qarşısında öhdəlik daşıyaraq qatıldığını sübut edir. Qəzetin 12 iyul 2020-ci il tarixli buraxılışında Sloveniyanın baş naziri Yanez Yanşanın Elnur Allahverdiyev fəxri konsul vəzifəsindən azad olunması ilə bağlı qərarı dərc olunub. Qərarın altındakı tarix 4 iyun 2020-ci il kimi qeyd olunub. Yəni belə çıxır ki, Elnur Allahverdiyevin seçkidən əvvəl fəxri konsulu vəzifəsinə xitam verilməsi ilə bağlı arayış saxta olub. Elnur Allahverdiyevin parlament seçkisindən düz 4 ay sonra, yəni mandatı bir neçə ay cibində daşıdıqları sonra Sloveniya dövləti qarşısında öhdəliyinə son verilib.

Digər bir iddiaya görə, deputatın atası, Marat Allahverdiyev vaxtilə Heydər Əliyevin əleyhinə çıxıb, haqqında kəskin ifadələr işlədib. Bununla bağlı yayılan məlumatlara istinadən cumhuriyyet.az bildirir ki, Marat Allahverdiyev Ayaz Mütəllibovun zamanında Dövlət Poliqrafiya və Kitab Ticarəti İşləri Komitəsinin sədr müavini, daha sonra sədri, mədəniyyət nazirinin müavini, Respublika Xalq Nəzarət Komitəsi sədrinin birinci müavini, Azərbaycan Respublikası Prezidenti yanında Ali Nəzarət İnspeksiyasının sədri işləmişdir. Heydər Əliyevin tərəfdarlarının görüşlərinə nəzarət etmək üçün indiki Hüseyn Cavid parkında o zaman balaca bir obyektdə Marat Allahverdiyev və dostları gizlicə yığışıb müzakirə apararirmış. Bundan başqa Azərbaycan Respublikasının müxtəlif ölkələrdə səfiri işləmiş professor İsfəndiyar Vahabzadə müsahibəsində ermənilərlə qohumluq əlaqəsi olanlar sırasında Milli Məclisin deputatı Elnur Allahverdiyevin adını çəkib.

Elnur Allahverdiyevin sahibi olduğu “Kontakt Home” mağazalar şəbəkəsi kredit verən təşkilat və ya bank deyil. Deputatın mağazalar şəbəkəsi ilə bağlı xeyli şikayətlər var. Bununla bağlı cumhuriyyet.az olaraq apardığımız araşdırmaya görə xüsusən də, 3-4 gün gecikmə olduqda “bank üsulu” ilə faizlərin əlavəsi, alıcıların boynuna artıq faizlərin yüklənməsi, məsələyə qoluzorlu kollektorların cəlb olunmasına başlanır. Qanunvericiliklə, mağaza alıcıya məhsulu yalnız nəğd satış dəyəri ilə müddətli sata bilər, eləcə də, gecikmələrə görə faizlər və aylıq faiz əlavələri yolverilməzdir. Eyni zamanda “Kontakt” mağazalar şəbəkəsindəki kassa aparatlarına gündəlik kredit ödənişlərinin cəmi 15 faizi vurulur və vətəndaşlarla bağlanılan müqavilələrin cəmi 15 faizi rəsmi olaraq mühasibatlıqda qeydiyyatdan keçir. Bu isə külli miqdarda yeyinti və qanuni vergilərdən yayınma deməkdir.