Təqaüdə göndərilən polis polkovniki Vaqif Əsədov "Sea Breez"dən mənzil alacaq.

Sitat.info xəbər verir ki, o, bu gün iş adamlarının "Sea Breez"ə səfəri zamanı keçirilən toplantında danışıb.

"Sea Breez"i bəyənən Vaqif Əsədov 2-3 mənzil alacağını bildirib.

Qeyd edək ki, V.Əsədov uzun müddət Bakı Şəhər Dövlət Yol Polisi İdarəsinin bölmə rəisi vəzifəsində çalışıb.

Həmin videonu təqdim edirik:

Bakı şəhəri üzrə Təhsil İdarəsinin 2 saylı xüsusi əyani-qiyabi tam orta məktəbinin sabiq direktoru Əmrah Səfərovun cinayət işi üzrə məhkəmə prosesi başa çatıb.
TEREF Teleqraf-a istinadən xəbər verir ki, Əmrah Səfərov 63 min 636 manat məbləğində mənimsəmədə ittiham olunub.
İş üzrə zərərçəkmiş qismində Bakı Şəhəri üzrə Təhsil İdarəsi tanınıb.
Qeyd edək ki, xüsusi məktəbdə yetkinlik yaşına çatmayan məhkumlar təhsil alır.
Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə ifadə verən Əmrah Səfərov ona elan olunmuş ittiham üzrə özünü qismən təqsirli bilib.
O, ifadəsində göstərib ki, müəllimlik fəaliyyəti ilə məşğul olub məktəb direktoru vəzifəsində çalışıb: “Cəzaçəkmə müəssisəsində məhbus şagirdlərə dərs vermişəm. Həmin şagirdlərin yaşı 25-dən çox olub. Ailəliyəm, 3 qız övladım var. Cəzaçəkmə müəssisəsində 20 faiz əlavə maaş verildiyinə görə müəllimlik fəaliyyətinı həmin müəssisədə davam etdirmişəm”.
Təqsirləndirilən şəxsin sözlərinə görə, 1996-cı ildən ona onkoloji xəstəlik diaqnozu qoyulub və həmin il əməliyyat olunub: “Müalicəmi davam etdirə bilmədiyim üçün bu cinayət hadisəsini törətdim. Müəllimlərin bəziləri maaşlarının az olduğu üçün dərsə gəlmək istəmirdilər. Lakin dərslərə görə əməkhaqqı almaq istədiklərini bildirirdilər. Bəzi müəllimlər arabir dərsə gəlirdi. Onların işə gəlmə-getmə cədvəlini mən doldururdum, maaşı isə özləri alırdılar. Aldıqları maaşın bir qismini də mənə verirdilər. Törətdiyim cinayət əməlindən peşmanam. 2019-cu ildə böyrəyimdən əməliyyat olunmuşam. Lakin müalicələr effekt vermədi. Cinayət yolu ilə əldə etdiyim pulları müalicəm üçün xərcləmişəm”.
Məhkəmənin hökmü ilə Əmrah Səfərovun barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Ona 2 il sınaq müddəti olmaqla 5 il 6 ay müddətinə şərti cəza verilib. O, 1 il 6 ay müddətinə dövlət və yerli özünüidarəetmə orqanlarında rəhbər və maddi-məsul vəzifə tutma hüququndan məhrum edilib.
Vurulmuş ziyanın dəyəri məbləğində təqsirləndirilən şəxsə məxsus mənzil və 1999-cu il buraxılışı olan “Mercedes C180” markalı avtomobilə xüsusi müsadirə tətbiq edilib və dövlət nəfinə alınması qərara alınıb.
Xüsusi müsadirənin təmin tədbiri kimi Nərimanov rayonu, Qarabağ küçəsində yerləşən mənzil və dövlət qeydiyyat nişanlı “Mercedes C180” markalı avtomobil üzərinə həbs qoyulub.
Hökmdən narazı qalan təqsirləndirilən şəxs apellyasiya şikayəti verib. O, barəsində bəraət hökmünün çıxarılmasını istəyib.
Həmçinin təqsirləndirilən şəxsə məxsus mənzilə və avtomobilə tətbiq edilmiş xüsusi müsadirənin, həmin əmlakların üzərinə qoyulmuş həbsin ləğv edilməsinə dair qərar qəbul edilməsi xahiş edilib.
Apellyasiya şikayəti onunla əsaslandırılıb ki, təqsirləndirilən şəxs ittihamı qəbul etmir, nə istintaqda, nə də məhkəmə zalında ona etibar edilən hər hansı əmlakı talamayıb, heç kim bunu sübut edə bilməyib.
Bakı Apellyasiya Məhkəməsinin qərarı ilə Əmrah Səfərovun şikayəti qismin təmin edilib. Hökmdən Nərimanov rayonunda yerləşən mənzilə və “Mercedes C180” markalı avtomobilə xüsusi müsadirənin tətbiq edilməsi, üzərinə həbs qoyulması ilə bağlı müddəalar çıxarılıb.
Bu qərardan narazı qalan dövlət ittihamçısı Ali Məhkəməyə müraciət edib. Dövlət ittihamını müdafiə edən prokuror əmlakların üzərinə həbs qoyulmasını tələb edib.
Hakim Tahir Kazımovun sədrliyi ilə keçirilən prosesdə qərar elan edib. Bakı Apellyasiya Məhkəməsinin qərarı ləğv edilib və iş yenidən araşdırılması üçün apellyasiya instansiyası mərhələsinə qaytarılıb.

Bakıda qəzalı vəziyyətdə olan binaların sökülməsi nəzərdə tutulsa da, proses yavaş gedir. Əsas səbəblərdən biri də verilən kompensasiyalarla bağlıdır. Məsələn, 60 kvadrat metrlik evə 90 min manat təklif edilir, vətəndaş isə bu pula normal ev ala bilməyəcəyindən şikayətlənir. Mövcud kompensasiyaların bazar qiymətlərinə uyğun olmadığı bildirilir.

Kompensasiya məbləği niyə azdır? Vətəndaş razılaşmadığı halda, qəzalı binalar sökülməzsə, nə baş verəcək?

Globalinfo.az-a danışan əmlak məsələləri üzrə ekspert Elnur Azadov deyib ki, hazırda ölkədə 16 mindən çox istismar müddəti bitmiş bina var:

“Bakı və Abşeronda bu rəqəm təxminən 11 mindir. Bu binaların sökülməsi istiqamətində müəyyən planlar qurulub. 197 bina qəzalı və yaşayış üçün təhlükəli hesab olunur. Artıq Baş nazirin yanında komissiya yaradılıb və keçən aydan başlayaraq işlər aparılır. 1100 binanın istismar müddəti bitib, qismən qəzalı kateqoriyaya aiddir. Bunların həllinə isə gələcəkdə baxılacaq. Hələ ki, 197 mənzil problemi ön plandadır. Çoxmənzilli binalarda vətəndaşlara kompensasiyanın verilməsi, mənzillərin alınması praktikada yoxdur. Burada tam pilot layihə həyata keçirilir, binadan sakinlər köçürülür, onlarla icarə müqavilələri bağlanır, yeni bina inşa olunur, kompensasiya əlavə sahə olaraq vətəndaşa verilir. Proses hazırda iki seqmentə bölünüb – çoxmənzilli binalar və digər ərazilərdə vətəndaşların köçürülməsi. Tikinti şirkətləri təbii ki, vəsaitə qənaət etməyə, daha çox pul qazanmağa çalışırlar. Buna görə vətəndaşlara müəyyən formada təzyiq göstərirlər və bu, qanuna ziddir. Hətta kompensasiyalar üçün də az məbləğ təklif edirlər. Qanunvericiliyimizə görə, vətəndaşların hüquqları və əmlakları toxunulmazdır. Hər bir halda, tikinti şirkətləri vətəndaşlarla razılığa gəlməlidirlər”.

Ekspert bildirib ki, tərəflər qiymətləndiriciləri prosesə cəlb edə bilər:

“Əgər razılığa gəlməsələr, artıq məsələlərə məhkəmə səviyyəsində baxılır. İstənilən ərazinin köçürülməsində əvvəlcə tikinti şirkətləri vətəndaşlara yazılı şəkildə altı aydan çox vaxt verməklə, xəbərdarlıq etməlidirlər. Vətəndaşlar isə öz mənafeyini qorumaq üçün mütləq birləşməli, şirkətlərlə heç bir şifahi kontakta girməməlidirlər. Yaxşı olar ki, vəkillər cəlb olunsun və qarşı tərəflə danışıqlar aparılsın. Əvvəllər Nazirlər Kabinetinin 86 saylı qərarı var idi. Rayon icra hakimiyyəti orqanları sərəncamların verilməsi hüququna sahib idi və bu işdə vətəndaşlarla tikinti şirkətləri arasında prosesi həyata keçirirdilər. Həmin qərar qüvvədən düşüb. Təəssüf ki, bütün səlahiyyətlər Dövlət Şəhərsalma və Arxitektura Komitəsinə verilib. Bu baxımdan, vətəndaşlarla tikinti şirkətləri arasında tənzimləyici mexanizm yoxdur. Problemlər də buradan qaynaqlanır”.

E.Azadov məsələ ilə bağlı tövsiyələrini də bölüşüb:

“Adətən tikinti şirkəti söküntü işi aparacağı yeri seçir, dövlət orqanlarına müraciət edir və buna uyğun rəy bildirilir. Bundan sonra vətəndaşların seçim şansı olmur. Onlar yalnız məcburi şəkildə həmin tikinti şirkəti ilə üzləşməli və razılaşmalı olurlar. Lakin müəyyən bir binanın sökülməsi nəzərdə tutulubsa, dövlət tenderlər təşkil etməli, şirkətlər təkliflər verməlidirlər. Hansı təklif vətəndaşların marağına uyğun olsa, o, qəbul olunmalıdır. Vətəndaşlara daha çox kompensasiya, sahə verənlərə üstünlük verilməlidir”.

Hesablama Palatası, Naxçıvandakı bəzi dövlət qurumlarındakı maliyyə yeyintisi və digər qanun pozuntularını araşdırmaq üçün DTX və Baş Prokurorluğa müraciət edib. Bu qurumlar yerli Təhsil Nazirliyi və yerli dövlət televiziyası olan NTV-dir.
Maliyyə yeyintisi və qanun pozuntuları ilə bağlı konkret məlumat verilmir. NTV redaksiyası isə bir müddət öncə məqalə paylaşaraq, Hesablama Palatasının özünü korrupsiya və maliyyə yeyinitisində günahlandırmışdı.
Gündəlik Naxçıvan

Qubada körpü çöküb, 30-dan çox kəndin yolu bağlanıb.

Quba-Qonaqkənd-Muçu avtomobil yolunun Quba rayonunun II Nügədi kəndi ərazisindən keçən hissəsində Qaraçayın üzərindəki körpü qəzalı vəziyyətə düşüb.

Güclü sel suları nəticəsində körpünün dayaqlarından bir neçəsi çökərək təhlükəli vəziyyətə düşüb.

Hazırda körpü bağlanıb və rayonun 30-dan çox kəndi ilə əlaqə kəsilib. \\Qafqazinfo.Az

“BTB Bank”da müştərilərin depozit otağındakı saxlanc yeşikləri – seyflərdən 800 min manatlıq oğlurluqda ittiham olunan iki nəfər Belarus vətəndaşı, 1976-cı il təvəllüdlü Babayev Aleksey Ramizoviç və 1990-cı il təvəllüdlü Qrinkeviç Sergey Oleqoviçin Bakıda məhkəmə prosesi keçirilib.

Gununsesi.info-nun xəbərinə görə, onlar bankdan pul və qızıl-zinət əşyaları oğurlamaqda təqsirləndirilirlər.

Banklarda müştərilər əmanət saxlamaqla yanaşı, icarə əsasında saxlanc yeşiyi götürüb, orada qızıl-zinət əşyalarını, sənədlərini və s. saxlaya bilirlər. Təqsirləndirilən şəxslər də oradakı qiymətli əşyaları oğurlamaqda ittiham olunur.

Gununsesi.info-nun xəbərinə görə, təqsirləndirilən şəxslərdən Sergey hadisədən bir müddət əvvəl Bakıya gəlib, oteldə qalıb. Gedib bankda seyf icarəyə götürüb.

O, bildirib ki, bu oğurluğu sifarişlə icra edib.

Bunu həyata keçirmək üçün ona xüsusi alətlər də veriblər. Əvvəllər Minskdə azərbaycanlılarla restoran biznesi ilə məşğul olduğunu deyən Sergey Qrinkeviçin sözlərinə görə, ona bu oğurluğu German adlı şəxs sifariş verib.

Bakıya öz hesabına gəlsə də, sonrakı xərclərini də o ödəyib. Cinayətin hansı bankda törədiləcəyini, onun harada yerləşdiyini və s. məsələləri də Bakıda olarkən öyrənib: “Heç açdığım seyflərin də kimə məxsus olduğunu bilmirdim, təsadüfən açırdım. Həmin seyfləri açan alətlər vermişdilər. İcarəyə seyf götürmüşdüm deyə, rahat girə bilirdim o yerə. Bir də gördüyüm işlərin videosunu çəkmək tapşırılmışdı”.

Sergey Qrinkeviç vurduqları ziyanın məbləğinin ittihamda göstərilən qədər çox olmadığını da qeyd edib. Bu cinayət işində 5 nəfər zərərçəkmiş var: Nurlan Kazımlı, Fuad Lütvəliyev, Zibeydə Qurbanova, Reyhan Hacıyeva və Tuqay Rəhimli. Zərərçəkmişlərdən bəzilərinin bankdakı seyflərinə müdaxilə edilib açılsa da, heç nə götürülməyib, onlara ziyan dəyməyib. Onlar şikayətçi olmayıb.

Zərərçəkmişlər arasında maddi baxımdan ən çox ziyan görən Zibeydə Qurbanovadır. O göstərib ki, bankdakı seyfdə 55 min dollar pul və 156 ədəd qızıl-zinət əşyası olub. Həmin əşyalar özünə və övladlarına məxsus olub.

Zərərçəkmişin sözlərinə görə, ona ümumilikdə 500 min manata yaxın ziyan dəyib.

Saytımızın araşdırması zamanı məlum olub ki, Zibeydə Qurbanova Azərbaycanda İnterpolun Milli Mərkəzi Bürosunun rəis müavini Namiq Camalovun anasıdır.

O, bundan əvvəl Cəlilabad və Sabirabad rayonlarının polis rəisi olub. 2023-cü ilin mayında İnterpola rəis müavini təyin edilib. Zibeydə Qurbanovanın digər oğlu Natiq Camalov isə Qaradağ rayonu, 38-ci polis bölməsinin rəisidir. O, əvvəl Səbail rayonu, 9-cu polis bölməsinin rəisi olub.

Onlar keçmiş Müdafiə Sənayesi naziri, 2018-ci ildə vəfat etmiş Yavər Camalovun qardaşı Əlihüseyn Camalovun övladlarıdır. Əlihüseyn Camalov vaxtilə “Azəriqaz”a rəhbərlik edib, daha sonra Milli Aerokosmik Agentliyin direktor müavini olub.

Qeyd edək ki, “Bank BTB”nin səhmləri Prezident Administrasiyasının keçmiş rəhbəri, Milli Elmlər Akademiyasının sabiq prezidenti Ramiz Mehdiyevin ailə üzvlərinə məxsusdur.

Bildiyiniz kimi, bəzi plastik cərrahların lisenziyalarının ləğv olunması prosesi davam edir. Elə aprelin 17-də “Azərbaycan Respublikasının ərazisində plastik cərrahiyyə ixtisası üzrə praktik tibb fəaliyyətinə icazə verilən həkim-mütəxəssislərin siyahısı” tərtib edildi.

Bu prosesdən sonra belə bir təftişin sadəcə plastik cərrahlar üzrə yox, digər bir neçə ixtisasla bağlı da aparılmasının vacibliyini vurğulayanlar oldu. Həmin diqqətçəkən ixtisaslardan biri də stomatoloqlardır.

Xatırladaq ki, plastik cərrahların icazəsinin yoxlanılması məqsədilə Səhiyyə Nazirliyinin, Baş Prokurorluğunun, Daxili İşlər Nazirliyinin, Elm və Təhsil Nazirliyinin səlahiyyətli nümayəndələrindən ibarət Xüsusi Təftiş Komissiyası yaradıldı.

Bəs belə bir komissiya stomatoloqların yoxlanılması məqsədilə də yaradıla bilər? Ümumiyyətlə, stomatoloqların sənədlərinin yoxlanılması prosesi nə yerdədir?

Məsələylə bağlı Səhiyyə Nazirliyindən Bizim.Media-ya açıqlama verilib.

Nazirliyin Mətbuat Xidmətinin əməkdaşı Elvin Hacıyevin sözlərinə görə hazırda Azərbaycanda stomatoloqların sənədlərinin yoxlanması ilə bağlı olaraq yeni bir komissiyanın yaradıldığına dair məlumat yoxdur.

“Qeyd edək ki, 2025-ci ilin yanvar-mart ayları ərzində stomatoloji xidmət göstərən 20 özəl tibb müəssisəsində yoxlama keçirilib. Bu yoxlamalar nəticəsində 8 müəssisədə nöqsanlar aşkar edilib. Aşkar edilən nöqsanlara görə protokol tərtib olunub”.

Məlumatda bildirilir ki, aparılan yoxlamalar zamanı lisenziyası ləğv edilən klinika olmayıb.

“Bununla belə, diplomu olmayan və ya saxta diplomla fəaliyyət göstərən stomatoloqların aşkarlanması istiqamətində yoxlamalar davam etdirilir.

Diplomsuz və ya diplomu təsdiq edilməyən stomatoloqların fəaliyyət göstərməsi ilə bağlı vətəndaş şikayətləri əsasında və ya belə hallar mediada geniş işıqlandırıldıqda, insanların həyat və sağlamlığına mühüm təhlükə yarada biləcək fakta əsaslanan hallarda Səhiyyə Nazirliyinin Analitik Ekspertiza Mərkəzi aidiyyəti sahibkarlıq subyektlərində qanunvericiliklə müəyyən olunan qaydada plandankənar yoxlamalar keçirir. Bu yoxlamalar zamanı aşkar edilən qanunsuz tibbi praktiki fəaliyyət faktları inzibati qaydada tənbeh olunur.

Vətəndaşlara bir daha xatırladırıq ki, özəl tibb müəssisələrində və aptek təşkilatlarında üzləşdikləri hər hansı problemlə bağlı AEM-in “bir pəncərə” sistemi, “qaynar xətt”i (012 596 05 20), aem@pharma.az elektron ünvanı və ya pharma.az saytının MÜRACİƏT bölməsi vasitəsi ilə bizə müraciət edə bilərlər. Bu halda araşdırılma aparılır və lazım gələrsə, plandankənar yoxlamanın keçirilməsi barədə qərar qəbul edilir”, -deyə verilən açıqlamada qeyd olunub.