Dəhlizlərə nəzarət uğrunda rəqabət Cənubi Qafqazın yeni geosiyasətini müəyyən edən amilə çevrilir.
DİA.AZ qeyd edir ki, bu proses İkinci Qarabağ müharibəsindən sonra Zəngəzur dəhlizinin açılması uğrunda bölgədə maraqlar toqquşmasının artması ilə müşahidə olunur.
Son günlər Laçın dəhlizinə nəzarətlə bağlı yaranmış gərginlik prosesi yeni mərhələyə keçirə bilər. Ermənistanın indiyə qədər Zəngəzur dəhlizinin açılmasına dair öhdəliyini yerinə yetirməməsi, eləcə də Qarabağa silah və sursat daşıması Azərbaycanı Laçın şəhərindən yan keçən yeni yolda sərhəd-buraxılış postu qurmağa vadar edə bilər.
Ancaq regionda marağı olan Rusiya, Türkiyə, İran, Avropa İttifaqı, ABŞ kimi güc mərkəzlərinin ortaq mövqedən çıxış edə bilməməsi Azərbaycanla Ermənistan arasında eskalasiya ehtimalını artırır. Bu isə münaqişənin Zəngəzur dəhlizinə keçməsi riskini yaradır.
Son zamanlar Moskvadan gələn bəyanatlar Rusiyanın Zəngəzur dəhlizinin açılmasında maraqlı olduğu qənaətini yaradır. Ancaq Rusiyanın regional proseslərdə İran və Fransa ilə birgə hərəkət etməsi buna şübhə yaradır. ABŞ isə sözügedən dəhlizlə bağlı açıq mövqe nümayiş etdirmir.
Qərb dəhlizin açılmasında maraqlı olsa, Ermənistanın Baş naziri Nikol Paşinyanı bu öhdəliyin icrasına razı salmaq imkanına malikdir. Paşinyan isə yaranmış fikir ayrılığından istifadə edib manipulyasiya edir və Azərbaycana verdiyi vədi yerinə yetirmir.
Milli Cəbhə Partiyasının sədr müavini, politoloq Məhəmməd Əsədullazadə Cebhe.info-ya açıqlamasında bildirib ki, Zəngəzur dəhlizininin açılmasına Rusiya maneə yaradır:
“Rusiya da İranı bu perosesə təhrik edir. Ümumiyyətlə, Zəngəzur dəhlizinin açılması Rusiya üçün prioritet deyil. Çünki bu dəhlizin mövcudluğu Cənubi Qafqazda Türkiyənin rolunu daha qabarıq göstərir. Digər tərəfdən Zəngəzur dəhlizi açılarsa, Çinin “Bir kəmər, bir yol” layihəsinin bir hissəsinə çevriləcək.
Eyni zamanda, ABŞ bölgədə Rusiya Federal Təhlükəsizlik Xidmətinin sərhəd qoşunlarının yerləşdirilməsini istəmir. Sadəcə olaraq, Avropa İttifaqı Çinlə ticarət əlaqələrinin inkişafında maraqlı olduğundan Zəngəzur dəhlizinin açılmasının tərəfdarıdır. İran əlbəttə ki, Zəngəzur dəhlizinin açılmasına qarşıdır.
Çünki bu ərazidə nəqliyyat və kommunikasiyaların işə düşməsi İranın çıxdaş edilməsi deməkdir. Hesab edirəm ki, ABŞ-ı da bu dəhlizin açılmasına razı salmaq olar. Lakin Rusiya bu məsələdə Ermənistana dəstək verir və Zəngəzur dəhlizinin reallaşmasına mane olur”.