Hər bir ailədə münaqişələr olur. Lakin ən pisi isə münaqişələrdən doğan acı nəticələrdir. Münaqişələr intihara, cinayətə, boşanmalara belə səbəb ola bilir. Son dövrlər hər 3 hadisənin artdığını nəzərə alsaq, Azərbaycanda münaqişəli ailələrin sayının əvvəlki illərlə müqayisədə artdığını deyə bilərik.
Psixoloqlar hesab edirləır ki, hər bir ailədə münaqişə və konflikt olmalıdır. Lakin onların nəticələri hər iki şəxsdən asılı olan məsələdir. Tərəflər münaqişəni həm müsbət, həm də mənfi tərəfə çevirə bilərlər. Ailədə münaqişənin olması həmin ailənin problemli olması demək deyil. Əksinə, problem daha çox səssiz ailələrdə olur. Belə bir deyim də var ki, əgər ailədə səssizlikdirsə, demək onun ardından fırtına qopacaq. Belə ailələr daha təhlükəlidirlər. Çünki onların biri ilə mübahisə edəcək, paylaşacaq belə mövzuları yoxdur.
Lakin münaqişələrin qətllə, intiharla nəticələnməsi artıq bərpa olunmayan itkiyə səbəb olur. Hətta öz ardınca yeni cinayətləri dartıb gətirə bilər. Ən acınacaqlı hal isə hüquq-mühafizə və cinayət təqibi orqanlarının belə faktlara düzgün hüquqi qiymət verməməsidir.
Laçın rayonunun Ağcakənd kəndində qeydiyyatda olan 1953-cü il təvəllüdlü Gülməmədova Əfruz Binnət qızı bildirir ki, qardaşı Zamanov İntiqamın düşməni elə oğlu Elgündür: “Özü deyir ki, mən atamı deşik - deşik edəcəkdim. Məgər baş prokurorluq görmür bunu, əsl qatil nə səbəbə çöldə azad gəzir?”
Ə,Gülməmmədova qardaşının cibindən çıxan intihar məktubuna istinad edərək, həmçinin əlində Elgünün öz atasını ailə münaqişəsi zəminində hədələdiyini etiraf etdiyini təsdiqləyən səs yazısının olduğunu bildirir və iddia edir ki, Suraxanı rayon prokurorluğu rüşvət qarşılığında cinayəti ört-basdır etmək istəyir: “Elgün evini və maşının satıb, özünü cəzadan qurtarmaq istəyir. Suraxanı prokurorluğu ilk əvvəl hətta heç faktla bağlı cinayət işi açmamışdı. Lakin biz – mərhumun bacıları və digər qohumları Prezident Administrasiyasında Hüquq mühafizə orqanları ilə iş şöbəsinin müdiri cənab Fuad Ələsgərovun qəbulunda olandan sonra cinayət işi açıldı. Bununla belə görünən odur ki, rayon prokuroru Rəşid Mahmudov və prokurorluğun müstəntiqi Tamerlan müəllim işi bağlamağa meyllidirlər”.
Redaksiyamıza iddiasının sübutu kimi qiymətləndirilə biləcək, həmçinin Elgünün rüşvət kimi istənilən məbləği öyrənmək istəyini ifadə edən, işi bağlamaq üçün vasitəçi axtardığını və əmlakını satmağa hazır olduğunu bildirdiyi səs yazısını da təqdim edən Ə.Gülməmmədova və digər qohumları baş prokuror cənab Kamran Əliyevdən xahiş edirlər ki, cinayət işinin təqibini ədalətsiz, qeyri-obyektiv aparan Suraxanı rayon prokurorluğundan alınıb başqa prokurorluq orqanına verilməsinə köməklik göstərsin.
İbrahim Hümbətov
