İki gün əvvəl Naxçıvan şəhər 4 saylı uşaq baxçasında daun sindromlu uşağa qarşı fiziki təzyiqlə bağlı xəbər ictimailəşdikdən sonra, insidentə görə araşdırma başlanılıb. DİA.AZ bildirir ki, bu haqda „Gündəlik Naxçıvan“a Naxçıvan şəhər Polis İdarəsindən bildirilib. Məlumata görə, araşdırma bitdikdən sonra, cinayət işinin açılıb-açılmaması ilə bağlı qərar veriləcək.

Bağçada fiziki təzyiqə məruz qaldığı iddia olunan dörd yaşlı Ayanın nənəsi Aybəniz Əsgərova isə, uşağın bağçadakı dayəsini bağışladıqlarını, artıq şikayətçi olmadıqlarını bildirir:

“Dünən xəbər ictimailəşəndən sonra, evə gəldi, yalvardı, uşağa təzyiq etmədiyini dedi. Buna baxmayaraq, xahiş etdi ki, onu bağışlayaq. Onun da evində bizdəki kimi qüsurlu uşaq var. O uşağın xətrinə bağışladıq, şikayət etməyəcəyik. Ondan zəmanət aldım ki, heç vaxt heç bir uşağı incitməyəcək“.

Naxçıvan şəhər Qaraxanbəyli kənd sakini Aybəniz Əsgərova “Gündəlik Naxçıvan”a bildirmişdi ki, dörd yaşlı daun sindromlu nəvəsi Ayan bağçada fiziki və psixoloji təzyiqlərə məruz qalır. O bildirirdi ki, nəvəsi 4 saylı Naxçıvan şəhər uşaq bağçasından aprelin 28-də qorxmuş və paltarı cırılmış halda evə qayıdıb. Ailə iddia edirdi ki, uşağın bağçadakı dayələri ona fiziki və psixoloji təzyiq göstərirlər.