...14 dekabr dünya şöhrətli alim Xudu Məmmədovun doğum günüdür...

Xudu Məmmədov 14 dekabr 1927-ci ildə Ağdam rayonunun Mərzili kəndində anadan olub... 1988-ci il oktyabrın 15-də Bakıda vəfat edib...

Xudu Məmmədovun haqqında əfsanəvi xatirələr söylənilir. Amma o, gerçəkdən sadə olduğu qədər də dərin-mürəkkəb xarakterli insan idi. Daha dəqiq desəm, zənnimcə, o, onu başa düşüb dərk edənlər üçün sadə, anlaya bilməyənlər üçün isə mürəkkəb... insan idi!

“Təzadlar” qəzeti olaraq ermənilərin Xudu Məmmədovu necə məhv etmək istədiklərinə dair sensasiyalı sənədi təqdim edirik:

...Dünya şöhrətli alim Xudu Məmmədov barədə çoxsaylı fikirlər və mülahizələr var. Onun elmlə sənətin, insanlıqla mədəniyyətin və mənəviyyatın vəhdəti barədə fikirləri həmişə aktual olub. Mən Xudu müəllimin barəsində deyilməmişləri deməmişdən əvvəl onun yazıb-yaradan, həm də yaradıb-yazan bir alim, ictimai xadim kimi həyat fəlsəfəsi barədə danışmaq istəyirəm. Çünki biz adətən Xudu Məmmədovu alim kimi tanıyırıq. Amma Xudu müəllim nə qədər böyük alim idisə, bir o qədər də böyük ürəyə sahibli bir vətənpərvər, millətini və xalqını, dövlətini, torpağını sevən sadə bir insan idi. Onun vətən, dövlət sevgisinin sərhədi yox idi-Azərbaycanı azad və müstəqil görmək arzuları kimi... Fikirlərimi izah etmək üçün Xudu müəllim haqqında Türk dünyasının böyük şairi Bəxtiyar Vahabzadədən eşitdiyim bir xatirəni bu məqamda xatırlamaq, məncə, lap yerinə düşər. Bəxtiyar müəllim danışırdı:
...70-ci illərin əvvəllərində Xudu Məmmədov və Nurəddin Rza bizə gəlmişdilər... Novruz bayramı günləri idi. Bayram süfrəsi ətrafında hərəmiz ürəyimizdə tutduğumuz bir arzu barədə bir-bir danışmağa başladıq. Əvvəlcə mən danışdım. Dedim, ən böyük arzum budur ki, Azərbaycan İstiqlalına daha tez qovuşsun, Türk dünyasının birliyi bərqərar olsun... Sonra Nurəddin danışdı... Dedi ki, ən böyük arzum Azərbaycanı azad və müstəqil, o taylı, bu taylı bütöv görməkdir...
Nəhayət, Xudu danışdı. Dedi ki, ən böyük arzum budur ki, bir də görüm günlərin birində qapımız bərk döyülür... Gedib açanda görüm ki, qapının ağzında əlində süngülü tüfəng tutmuş türk əsgərləri dayanıb. Desinlər ki, əfəndim, bu mənzil Xudu Məmmədovundurmu? Deyim ki, bəli, Xudu Məmmədovundur! Soruşsunlar ki, kommunist Xudu Məmmədov sizsiniz? Deyim ki, bəli, mənəm... Sonra tüfəngi mənə tərəf çevirsinlər və desinlər ki, əllər yuxarı, biz gəlmişik Azərbaycandakı sonuncu kommunist Xudu Məmmədovu güllələməyə...
***
...Məncə əlavə şərhə ehtiyac yoxdur. Çünki Xudu müəllim bəlkə də bu kiçik görünən arzısunun içində böyük bir siyasi anlamda Allahdan diləyirdi ki, bir gün SRRİ dağılmış olsun, sərhədlər açılsın, türk əsgərləri Azərbaycana gəlsin, Bakıda əli silahlı sərbəst gəzsinlər və Bakıdakı sonuncu kommunisti güllələsinlər... Onda kimin ağlına gələrdi ki, bundan neçə illər keçəndən sonra Xudu müəllimin həmin arzuları çin olacaqdı-SSRİ dağılacaqdı, kommunist partiyası süqut edəcəkdi, Azərbaycan Müstəqillik Aktını qəbul edəcəkdi... Amma heyiflər olsun ki, Xudu Məmmədov bunları görmədi, lakin bunları görən bizlərdən fərqli olaraq bizdən neçə illər əvvəl arzulamış və bununla da o günlərin tezliklə gələcəyinə ilahi bir işarə vurmuşdu...
***
...Xudu Məmmədovla eyni kənddən idik, qohumluğumuz var idi... Onun Mərziliyə hər gəlişi bir bayram idi. Ən maraqlısı budur ki, kəndə gəlişi ilə gedişindən kimsənin xəbəri olmazdı, quş kimi uçub yox olurdu. Gəlişini kimsəyə qabaqcadan xəbər yetirib əziyyət verməzdi, amma hamının əziyyətini çəkməyə gəlirdi, qayğısı ilə maraqlanırdı. Onu Bakının elmi fəaliyyətdən ayırıb Qarabağın adi bir kəndinə çəkib gətirən qüvvə torpağa və bu yurda-Azərbaycana olan dəlicəsinə sevgisi idi. Onun həyatı sonralar da elə bu sevginin qurbanı oldu.
“Təzadlar” qəzetinin adını da Bəxtiyar Vahabzadə, Famil Mehdi, Məmməd Araz və Xudu müəllimin yaxın qohumu, dostu, tələbəlik-gənclik dostu Yusif Səmədov, professor İlham Rəhmov, mərhum komandir Rövşən Cavadov qoymuşdular... Xudu müəllimin ən çox sevdiyi bir ifadə, ad idi-təzadlar!
Qarabağ hadisələri başlayanda isə Xudu müəllimin özündən asılı olmayan bir həyacanlı günləri başlamışdı. Mən həmin dövrdə Dövlət Neft Akademiyasının tələbəsi olaraq Xudu müəllimlə tez-tez görüşürdüm və hər dəfə də onun Ağdamda olduğunu eşidirdim... Həmin dövrlərdə təxminən 150 il əvvəl Azərbaycana Türkiyə və İrandan köçürülmüş ermənilər Xankəndində etirazlara qalxıb müstəqil dövlət qurmaq istəyirdilər. Kütləvi etiraz tədbirləri başlamışdı. Xudu müəllim onların bu yersiz və əsassız iddialarını, həmçinin ermənilərin Qarabağ bölgəsinə köç tarixini və s. sənəd və sübutlarla izahlayan məqalələrlə ölkə və İttifaq mətbuatında çıxışlar edirdi. Ermənilər yaxşı başa düşürdü ki, Xudu müəllim dünyada tanınan bir alim və söz sahibi idi. Və onun adi bir tarixi faktı ortaya qoyması ermənilərin sərsəm iddialarını alt-üst edə bilərdi. Odur ki, xain ermənilər onun fiziki məhvinə hazırlıqlar görməli idilər. Sən demə, görürmüşlər də.

Təbii ki, biz həmin dövrlərdə bunları bilə bilməzdik... Bu yaxınlarda ermənilərin Xudu müəllimi necə fiziki cəhətdən məhv etmək üçün hazırlıq gördüyünü və planlar cızdığını sübut edən olduqca unikal bir sənəd əldə etdik. Belə ki, Rusiya EA-nın həqiqi üzvü, görkəmli kimyaçı alim, akademik Yuri Timofeyeviç Struçkova həsr olunmuş və 2005-ci ildə Moskvada nəşr edilmiş “Çelovek, kotorıy ne umel bıtğ ravnoduşnım” (“Biganə qala bilməyi bacarmayan insan”) kitabında görkəmli Azərbaycan alimi Xudu Məmmədovun haqqında indiyədək bilmədiyimiz sensasiyalı faktlar var. Kitab Rusiya Elmlər Akademiyasının sifarişi əsasında çap olunub. Kitabda dünyanın bir çox tanınmış alimləri və onların elmi fəaliyyəti haqqında yazılar yer alıb, o cümlədən Xudu Məmmədovun da haqqında. Kitabın ayrı-ayrı səhifələrində Xudu Məmmədovun elmi fəaliyyəti, onun Azərbaycan elm və ictimai fikrində tutduğu yer və s. haqqında indiyədək bilmədiyimiz olduqca maraqlı faktlar da açıqlanır.
Budur, Y.Struçkovun həyat yoldaşı, xanım İ.S.Axrem ərinin yazıb çap etdirə bilmədiyi, indi özünün redaktorluğu ilə nəşr olunmuş (Y.Struçkov sağlığında yazsa da, tərtib edərək kitab şəklində sona çatdıra bilməmişdir) kitabının 464-cü səhifəsində həyat yoldaşından bəhs edən xatirəsində yazır: “...Yuranın Azərbaycanda çoxlu dostları və alim yoldaşları var idi. O, Xudu Surxay oğlu Məmmədova xüsusi rəğbət bəsləyirdi. Bu bəstəboy insan öz xalqını və ölkəsini dəlicəsinə sevirdi. O, vaxtilə Azərbaycan EA-nın prezidentinə müxalif mövqedə olmuşdu. Onu bu mövqeyinə görə faktiki olaraq elmi fəaliyyətdən məhrum etmişdilər. Lakin şükürlər olsun ki, Azərbaycan EA-da rəhbərlik dəyişdikdən sonra onu laboratoriya müdiri vəzifəsinə bərpa etmişdilər... Yura çox maraq və istəklə danışırdı ki, “Xudu İngiltərəyə elmi ezamiyyədən qayıdanda özü ilə iki çemodan kitab gətirmişdi. O, Azərbaycan xalqının milli ornamentləri ilə maddələrin atom quruluşu arasında paralellik apararaq elmi bağlılıq axtarıb tapmışdı. Hansı ki, məşğul olduğu sahə də kristalloqrafiya idi. Mən şəxsən onun ornamentlərdən ibarət bir kitabını görmüşdüm, hansı ki, “Azərbaycanın Eşeri” olan Xudu Məmmədov tərəfindən yazılıb-tərtib olunmuşdu. Heç bir elmi məşğələ, heç bir inzibati qərar və ya ailə problemləri onu Azərbaycanın hansısa ən ucqar bir rayonunda xəstələnmiş və onu arzulayan qohumu ilə, yaxud bir çobanla belə görüşünün qarşısını ala bilməzdi... Xudu heç vaxt bu insanların ölümqabağı onu görmək arzularını gözündə qoymazdı... Onun yanına hər cür insanlar gələrdilər, kömək almağa, məsləhətləşməyə. Yeri gəlmişkən, Xudunun adı da rus dilinə tərcümədə “əl tutan, xeyirxah” mənasını ifadə edir...””.
Nəhayət, kitabın 466-cı səhifəsində Xudu Məmmədov haqqında daha bir maraqlı hissə var: 1980-ci illərin sonlarında baş verən hadisələrdən, milli münaqişələr haqqında danışan müəllif İ.S.Axrem, həyat yoldaşı, görkəmli alim Y.Struçkovun dilindən yazır: “...SSRİ məkanında və Qafqaz ölkələrində faciələr yaşanırdı... Dəhşətli hadisələr bizim alim dostlarımızdan da yan keçmədi. Xudu Məmmədovun adı “Erməni xalqının düşmənləri” siyahısına salınmışdı. Lakin ermənilər heç cürə onu öldürməyə macal tapa bilmədilər. Çünki Xudu Məmmədov 1988-ci ildə qəflətən ikinci infarkdan dünyasını dəyişdi...”.
Bu faktlar bir daha sübut edir ki, Xudu Məmmədov 1987-88-ci illərdə Rusiyada və Azərbaycanda rusdilli mətbuatda ermənilərin İrəvanda və Dağlıq Qarabağda qaldırdıqları milli münaqişələrə, əsassız torpaq iddialarına sərt tənqidi yazıları və tarixi-elmi əsaslandırmaları ilə cavab verdiyindən ermənilər onun adını “erməni xalqının düşməni” kimi ölüm siyahısına daxil ediblərmiş. Lakin göründüyü kimi, terrorçular onu məhv etməyə macal tapmamışdılar. Çünki Xudu Məmmədov öz əcəli ilə də düşmənə bu imkanı verməmişdir!
Allah rəhmət eləsin!
Sonda: bu dəyərli faktları özündə əks etdirən kitabı redaksiyamıza çatdıran Azərbaycan Milli Elmlər Akademiyasının Kimya Problemləri İnstitutunun əməkdaşları, Xudu Məmmədovun tələbələri-İmaməddin Əmiraslanova və Vaqif Qasımova dərin minnətdarlığımı bildirirəm.
Asif Mərzili

Türkiyəli məşhurlar "Bakı Türk Filmlər Həftəsi" ilə əlaqədar ölkəmizə qonaq gəlirlər.

TEREF.AZ xəbər verir ki, aktrisalar İpek Tuzcuoğlu, Didem Balçın, aktyorlar İlker Aksum, Umut Karadağ, rejissorlar Mustafa Kara, Mehmet Altınal və Galip Günel Nizami Kino Mərkəzində baş tutacaq "Bakı Türk Filmlər Həftəsi"ndə iştirak edəcəklər.

"Bakı Türk Filmlər HəftəsBakı Türk Filmlər Həftəsi" Türkiyənin Mədəniyyət və Turizm Nazirliyi, Azərbaycanın Mədəniyyət Nazirliyi və Bakı Yunus Emre İnstitunun təşkilatçılığı ilə dekabrın 17-21-də baş tutacaq.

Açılış dekabrın 17-də rejissor Semih Kaplanoğlunun “Bağlılıq Hasan” filmi ilə olacaq.
Dekabrın 19-da isə Nizami Kino Mərkəzində Semih Kaplanoğlunun master-klassı keçiriləcək və o, sektorun nümayəndələri ilə görüşəcək.

"Bakı Türk Filmləri Həftəsi"nin keçirilməsində məqsəd türk filmlərini Azərbaycan kinosevərləri ilə bir araya gətirmək, Türkiyə-Azərbaycan kino sektorunun nümayəndələrini bir araya gətirmək, ortaq işlər görmək, Türkiyənin kino təcrübəsini Azərbaycana ötürmək, rejissorlar, aktyorlar və ssenaristlər arasında əlaqələr yaratmaq və iki ölkənin mədəniyyət sənayesinə töhfə verməkdir.

Dekabrın 17-21-də “Bağlılıq Həsən”, “7-ci Koğuşda Möcüzə”, “Yaxşı ki varsan, Eren”, “Sədaqət-Müqəddəs Dava”, “Eşqin Ömrü”, “Ankara Yayı”, “Vida məktubu” və “Rafadan Tayfa-Göbeklitepe” filmləri pulsuz nümayiş olunacaq.

Qeyd edək ki, Umut Karadağ və Didem Balçın "Kuruluş Osman" serialı, İlker Aksum "Yabancı Damat",
İpek Tuzcuoğlu isə "Asmalı konak" serialı ilə məşhurlaşıb. /starxeber.az/

“Güney Azərbaycanı tanıyaq” layihəsi çərçivəsində bu yazıda Güneydəki yurdlarımızdan biri haqda söz açacağıq. Qərbi Azərbaycan əyalətinin Maku mahalı…

Coğrafiyası və təbii şəraiti

Maku mahalı Qərbi Azərbaycan əyalətinin şimal-qərbində, Ağrı dağının ətəyində, Türkiyə, Güney Azərbaycan və Azərbaycan Respublikasının sərhəd zolağında yerləşir.

Dəniz səviyyəsindən 1634 metrə yüksəklikdədir. Mahal şimaldan Qarasu çayı və Türkiyə Cümhuriyyəti, şərqdən Araz çayı və Azərbaycan Respublikası (Naxçıvan Muxtar Respublikası), qərbdən Türkiyə Cümhuriyyəti və cənubdan Güney Azərbaycanın Xoy mahalı ilə əhatə olunub.

Maku mahalı topoqrafik baxımdan iki dağlıq və düzənlik bölgədən ibarətdir. Qərbdən şərqə və cənubdan şimala doğru onun yüksəkliyi azalır.

Maku mahalının dağ silsiləsi Ağrı dağından başlayaraq, şimal-qərbdən cənub-qərbə doğru uzanıb. Bu dağlar Güney Azərbaycanla Türkiyə sərhədini yaradır.

Makunun başlıca dağları bunlardır: Şaka dağı (3050 m), Çirkin dağ (3000 m), Qaradağ (2776 m), Tikmə dağ (2382 m), Ağgöl dağı (2023 m), Daşkəsən və Kəklik Bulağı (1850 m) və Hasun dağı (1826 m).

Mahalın ən geniş düzənlikləri Poldəşt, Zəngənə Bazirgan və Şiblidir.

Ərazisi, əhalisi, inzibati bölgüsü

Əyalət mərkəzi Urmiyadan 270 kilometr aralıda yerləşən Makunun ərazisi 6089 kvadrat kilometrdir. Mahal əhalisinin sayı təxminən 210000 nəfərdir. Əhalinin yarıdan çoxu kəndlərdə yaşayır.

Etibarlı statistik məlumatlara əsasən, mahal əhalisinin 95 faizi Azərbaycan türküdür. Danışıq dili Azərbaycan türkcəsidir. Maku əhalisinin çoxu şiədir. Az sayda sünni kürdlər köçəri halda yaşamaqdadır.

İnzibati ərazi bölgüsünə görə Maku şəhəri üç bölgə (Mərkəzi, Şot, Poldəşt), dörd şəhər (Maku, Bazirgan, Şot, Poldəşt) və on kənd rayonundan (Qala dərəsi, Şimali Çaybasar, Cənubi Çaybasar, Yolagəldi, Şimalı Qaraqoyun, Cənubi Qaraqoyun, Qərbi Gülçarat, Şərqi Gülçarat, Zəngibar, Şərqi Çaybasar) ibarətdir.

Düzənlikləri və kənd təsərrüfatı

Bölgənin iqtisadi həyatında və kənd təsərrüfatında önəmli rol oynayan düzənliklər haqqında bəzi məlumatlarla tanış olaq.

Poldəşt düzənliyi. 131600 hektar əraziyə malik olan bu düzənlik mahalın şimal-şərqində yerləşir. Burada sulu torpaqlarda əsasən buğda, yonca, arpa, dəmyə yerlərdə isə buğda, arpa və başqa dənli bitkilər əkilir. Zəngibar və Sarısu çayları düzənlikdə əkinçiliyin inkişafına səbəb olub.

Zəngənə düzənliyi. 55000 hektar ərazisi olan bu düzənlik mahalın və əyalətin ən şimal hissəsində yerləşir.

Bazirgan düzənliyi. Düzənliyin ərazisi 16200 hektara bərabərdir. Burada da arpa, buğda, yonca suvarılan və dəmyə torpaqlarda əkilir. Su təminatı əsasən qaynağı Türkiyədə olan və Yarı Qaya gölü vasitəsilə düzənliyə daxil olan Sarısu çayındandır.

Şibli düzənliyi. Bu düzənlik Araz çayı üzərində tikilən su bəndinin yanında yerləşir. Burada arpa, buğda, küncüt və günəbaxan əkilir.

Mahalın tarixindən

Mahal mərkəzi Maku şəhəri Zəngibar çayının keçdiyi dərədə salınıb. Zəngibar çayı şəhəri iki yerə - şimal və cənub hissəyə ayırır. Şəhərin cənub hissəsi Səbət dağının ətəyində yerləşir və gözə çarpacaq dərəcədə yaşayış yerlərinə malik deyil. Ancaq şimal hissəsi daha böyük və abaddır. Sarıqaya adlanan dağın (qayanın) bir hissəsi şəhərin üstünə doğru gələrək, onun üstünü çətir kimi tutub. Bu isə Makunun özünə xas və misilsiz gözəlliyinə səbəb olub.

Makunun tarixi və adı haqqında çoxlu fikirlər və ehtimallar yazılıb. Ancaq mahalda və mahal mərkəzində əldə edilən arxeoloji tapıntılar hələ eradan öncə birinci minillikdə burada parlaq mədəniyyətin mövcud olduğunu göstərir. Səngər kəndi, Çəpər kəndi, Çaybasar, Dəlikdaş, Qarabulaq, Şadı Araz, Bastam kəndləri və başqa yerlərdəki daş otaqlar, Almaniya arxeoloqları heyəti tərəfindən tapılan və oxunan mixi əlifbasında yazılmış kitabələr, onlarla başqa arxeoloji tapıntılar, yerli və əcnəbi tarixçilərin, tədqiqatçıların yazdıqları göstərir ki, bura Urartu dövründə əhəmiyyətli yaşayış və strateji bölgələrdən biri olub.

Bir sıra tədqiqatçıların fikrincə, Makuya bəzi tarixi dönəmlərdə “Qaban qalası” da deyilib.

1635-ci ildə Osmanlı sultanı IV Murad özünün adlı-sanlı sərkərdələrindən biri olan Qara Mustafa Paşanı Makunun hərbi qalalarını yenidən qurmaq üçün bölgəyə göndərib. Bu isə o dönəmdə Makunun hərbi və strateji baxımdan önəm daşıdığını göstərir.

Osmanlı-Səfəvi ziddiyyəti dövründə osmanlılar üçün Vanda Qotur qalası, Səfəvilər üçün isə Maku qalası misilsiz əhəmiyyət daşıyırdı.

Bir çox tarixi faktlara görə, Maku şəhərinin yenidən qurulması və abadlaşdırılması bayat tayfasının adı ilə bağlıdır.

Nadir Şahın sərkərdə və hakimlərindən biri kimi bu tayfanın başçısı Əhməd Sultan Xorasan əyalətinə nəzarət edirdi. Nadir Şahın vəfatından sonra o, Makuya gələrək, özünün yerli hökumətini qurdu. Rza xan hakimiyyətə gələnə qədər onun canişinləri “sərdar” adı ilə Maku bölgəsinə hakim olublar.

İqtisadiyyatı və məşğulluğu

Sənaye baxımından Maku inkişaf etmiş bölgə sayılmır. Burada əsasən kiçik sənaye müəssisələri, fərdi sexlər və fabriklər fəaliyyət göstərir. Habelə Türkiyə Cümhuriyyəti ilə sərhəddə yerləşən Bəzirgan sərhəd bazarı və gömrük-keçid məntəqəsi də mahal iqtisadiyyatında, əhalinin yaşayışında önəmli rol oynayır.

Kənd təsərrüfatı və heyvandarlıq Maku mahalının əsas gəlir mənbələrindən hesab edilir. Burada mövcud olan münbit təbii şərait, düzənliklər və dağlıq ərazilərdə olan zəngin otlaqlar mahalda müxtəlif xırda və iri buynuzlu heyvanların saxlanılmasına imkan verir. Bundan başqa mahalda taxıl, dənli bitkilər, pambıq, küncüt, günəbaxan, çeşidli tərəvəzlər, alma, üzüm, armud, qoz və badam yetişdirilir.

Maku mahalında əl işləri sənayesi də əhalinin bir qisminin dolanışığının təminatında önəmli rol oynayır. Azərbaycanın başqa yerlərində olduğu kimi, bu sənaye sahəsində xalça toxuculuğu birinci yeri tutur. Mahalda, özəlliklə kəndlərdə köçərilər tərəfindən toxunan xalçalar ölkənin bir çox yerlərinə ixrac edilir. Şəhərlərdə fərdi və sexlərdə toxunan xalçalar ölkə bazarları ilə yanaşı, başqa ölkələrə də ixrac olunur. Xalça ilə yanaşı, mahalda kilim, cecim, çeşidli örtüklər, həsir toxuma, müxtəlif ipliklərin emalı, saxsı işləri, yun toxumaları, keçəçilik və s. əl işləri sənayesi mövcuddur.

Gəzməli-görməli yerləri, tarixi abidələri

Maku mahalı özünün təbii və tarixi çəkiciliyinə görə Azərbaycanın ən görməli yerlərindən biri sayılır. Aşağıda çoxsaylı belə yerlərdən bəzi örnəkləri diqqətinizə çatdırırıq:

Bağçacıq sarayı. Bu təntənəli və tarixi bina Qacarlar dövründə, Müzəffərəddin şah Qacarın sərkərdələrindən biri olan İqbalüssəltəneyi Makuyi tərəfindən tikilib. Bu tarixi bina Rusiya memarlığının gözəl nümunələrini özündə əks etdirir. Hazırda adı çəkilən bina Maku Sərdarının ev muzeyi kimi fəaliyyət göstərir.

Külah Firəngi sarayı. Bu bina Qacarlar dövrünə aiddir və indiyə kimi üzərində heç bir dəyişiklik və ya yenidənqurma işi aparılmayıb.

Makunun Polis binası. 1902-ci ildə tikilib.

Qara qala. Bu qala eradan öncə 7-8-ci yüzilliklərdə uratrtular dövründə müdafiə və hücum məqsədilə inşa edilib.

Ravız Qalası. Eradan öncə 3-4-cü yüzilliklərdə inşa edilən qala yaşayış məskəni olub.

“Fərhad damı” adlanan Urartu şəhəri. Maku şəhərindən 7 kilometr şimalda Səngər kəndinin yaxınlığında yerləşən ərazidə aparılan son arxeoloji qazıntılar zamanı urartulara aid və qeyri-hərbi, yaşayış məskəni olan şəhər qalıqları aşkar edilib. Bu şəhərdə urartuların Xalid Tanrısına aid daş məbəd mövcuddur. Buradan azacıq aralıda, “Koroğlu qalası” adlanan yerdə isə başqa bir daş məbədin qalıqları tapılıb. Aparılan araşdırmalardan şəhərin 20 hektar ərazidə yerləşdiyi bəlli olub.

Səngər Qaya məqbərəsi. Maku-Bəzirgan yolunun 7 kilometrliyində Fərhad kəndinin yaxınlığında yerləşən məqbərə eradan 700 il öncə urartular dövrünə aiddir.

Beş Bulaq körpüsü. Səfəvilər dövründə Maku-Təbriz və Maku ilə ətraf kəndləri birləşdirmək üçün inşa edilib.

Rusa şəhəri daş yazıları. Urartu şəhəri Rusa eradan 900 il öncə İkinci Rusa dövründə inşa edilib. Ərgiştinin oğlu İkinci Rusa şəhərin inşası bitdikdən sonra darvaza üstündə daş kitabə yerləşdirib. Çox önəmli tarixi dəyərə malik olan mixi əlifbasında yazılmış bu daş kitabə almaniyalı arxeoloq Min Tess tərəfindən oxunaraq, tərcümə edilib. Kitabənin uzunluğu 72 sm, eni 56 sm, qalınlığı isə 11 santimetrdir. Kitabə üzərində 16 paralel xətdə yazı yazılıb. Assurilərin hücumu nəticəsində dağılan şəhərdən günümüzə Çaypara bölgəsində yerləşən kiçik Bastam kəndi qalıb. Adı çəkilən kitabə hazırda Makuda saxlanılır.

Maku hamamı. Qacarlar dövründə tikilən bu hamam özünün xüsusi memarlığı və mövcud imkanlarına görə əhəmiyyətli abidələrdən biri sayılır.

Qalacıq körpüsü. Maku şəhərinin cənubunda, Zəngibar çayının üzərində qurulan körpü Səfəvilər dövründə tikilib.

Qara kilsə. Albanlara məxsus olduğu iddia edilən bu kilsə Qarabulaq (“Siyəçeşmə”) kəndlərindən olan Qarakilsə kəndində yerləşir.

Xan Bəy hamamı. Çorus kəndi yaxınlığında yerləşən bu hamam Qacarlar dövründə tikilib.

Səfərəli xan evi. Makunun şimalında, bir neçə qaya üzərində inşa edilib.

Əlixan Bayat evi. Hazırda Milli Bank mərkəzi kimi istifadə edilən bina Əhməd xan Bayata məxsus olub. Bu binadan Pəhləvilər hakimiyyətinin ilk illərində Rusiya konsulluğu kimi də istifadə edilib. Qacarlar dövründə tikilib.

Şir-Xurşid binası. Qacarlar dövrünə aid binadır. Binadakı oyma və bəzək işləri diqqət cəlb edir.

Şahabad bulağı. Makunun 30 kilometrə cənub-şərqində yerləşən istisu bulağı minerallarla zəngin müalicəvi bulaqdır.

Şügüftü bulağı. Ağbulaq dağı ətəyində, Şügüftü kəndində yerləşən bu bulaq müalicəvi suyu ilə məşhurdur.

Şotabad istisu bulağı. Təpə başından çıxan bu bulaq isti və müalicəvi suya malikdir.

Başkəndi isti suyu. Başkəndi kəndinin yaxınlığında yerləşən müalicəvi bulaqdır.

Bunlarla yanaşı, gəzməli-görməli yerlərə aid bir sıra tarixi abidələrin, təbii gözəlliklərin adlarını çəkmək istərdik:

I minilliyə aid Xəlilabad kurqanı, Zəngənə çölündə Şədidaşt kəndində yerləşən daş məbəd, Maku qayası, Sarı Qayada qala bürcü və kitabə, Dambat şəhərinin tarixi qalıqları, çeşidli alban kilsələrinin qalıqları, Məhənd kəndində Gəzli xarabalıqları, Qızılca Qala kəndində qaya üzərində oymalar və rəsmlər, Ağrı dağı ətəklərində kəhrizlər və mağaralar, Qızıl dağda Səguş xarabalıqları, Ovacıq kəndində yerləşən Pir Əhmədi qəbiristanlığı, Qayadağı ətəyində yerləşən ibadətgah, Kişmiş Təpə adlı kənddə yerləşən Kişmiş Təpə kurqan, Zəngimar dərəsi, Bozalan gölləri, Qarabulaq gölü, Araz bəndi, Barun bəndi. Sürəyya bulağı, Qarasu çayı və ətrafı...

Gələn ilin Novruz, Ramazan və Qurban bayramları günləri müəyyən edilib.

Bununla bağlı Baş nazir Əli Əsədov qərar imzalayıb.

Qərarla 2023-cü il martın 20, 21, 22, 23, 24-ü Novruz bayramı, aprelin 21, 22-si Ramazan bayramı, iyunun 28, 29-u Qurban bayramı günləri müəyyən edilib.

Qeyd edək ki, Əmək Məcəlləsinin 105-ci maddəsinin 2-ci hissəsinə əsasən nəzərdə tutulan günlər iş günü hesab edilmir.

Avropa İttifaqı (Aİ) yeni sanksiyalar çərçivəsində Rusiyanın NTV/“NTV Mir”, REN TV, “Rossiya 1” və “Birinci kanal”ının yayım lisenziyalarını dayandırmaq niyyətindədir.

Bu barədə “Politico” yazıb.

Məlumata görə, yeni sanksiyalar texnologiya və müdafiə sektorlarının istifadə edə biləcəyi malları tədarük edən 169 təşkilata təsir edə bilər.

Həmçinin təyyarə mühərrikləri və onlar üçün ehtiyat hissələr də əlavə olunmaqla aviasiya və kosmik sektorlar üçün sanksiya tətbiq edilən malların siyahısını genişləndirmək, sanksiyaları noutbuklara, sərt disklərə, kameralara və linzalara da şamil etmək planlaşdırılır.

Son zamanlar oynadığı layihələrlə gündəmdən düşməyən türkiyəli məşhur müğənni Afra Saraçoğlu zirvələrə qalxmaqda davam edir.

“Yalı Çapkını” serialındakı (“Seyran” obrazı) uğuru ilə mövsümün ən çox müzakirə edilən aktrisasına çevrilən Afra Saraçoğlu IMDb siyahısında Türkiyə birincisi olub.

Dünyanın ən böyük film, serial və aktyor reytinqi saytı olan IMDb-də 11 milyondan çox ad arasında 1664-cü yeri tutan Saraçoğlu Türkiyənin ulduzu olmağı bacarıb. IMDb-nin Türkiyə siyahısında 1-ci yeri tutan uğurlu oyunçu zirvəyə qalxaraq karyera rekordunu qırıb.

Mənbə: Snob Magazin