Göyçay rayon sakinləri tərəfindən

ŞİKAYƏT

Dövlət Su Ehtiyatları Agentliyinin sədri Zaur Mikayılovun 16 avqust 2024-cü il tarixdə Göyçay rayonunda keçirdiyi vətəndaş qəbulunda özbaşınalıq oldu. Həmin günü heç bir qanunu əsas olmadan bizi qəbula buraxmadılar. Hansı ki, biz 15 gün əvvəl qəbula yazılmışdıq poçt vasitəsi ilə xəbərnaməli teleqram göndərmişdik.
Bizim şikayətimiz Göyçay rayon Suvarma Sistemləri İdarəsinin müdiri Orxan Mahmudovun qanunsuz fəaliyyətindən olduğu üçün onun müdaxiləsi nəticəsində qəbula düşə bilmədik.
Ancaq həmin günü bizdən başqa şəxslərdə qəbula düşə bilmədilər.Yağış yağdığı üçün qəbula gələnlə açıq havada dayana bilməyib qəbula girmədən oranı tərk etmək məcburiyyətində qaldılar. Həmin gün Göyçay rayon Suvarma Sistemləri İdarəsinin böyük akt zalını bağlayıblar ki, vətəndaşlar yağışda islanmamaq üçün qəbula girmədən oranı tərk edib getsinlər.
Bütün bu özbaşınalıqları edən Orxan Mahmudova bir başa yardımçı olan isə Dövlət Su Ehtiyatları Agentliyinin Bakıdan gələn Dilqəm Şükürov adlı əməkdaş oldu.
Hətda qəbul günü növbədən kənar qəbul olunması nəzərdə tutulan Şəhid anaları saatlarla gözləməli oldular.
Orxan Mahmudov təxminən 1 ildən çoxdur ki, Göyçay rayon Suvarma Sistemləri İdarəsinin müdiri vəzifəsini icra edir. Bizim yaşadığımız və digər kəndlərdə heç bir lildən təmizləmə, bənd vurma işləri aparılmayıb. Ancaq buna baxmayaraq Orxan Mahmudov hesabat xarakterli televiziya çıxışında bildirir ki, 2024-cü ilin yanvar ayından Göyçay rayonunun kəndlərində ümüumilikdə 280 km məsafədə su kanallarında lildən təmizləmə işləri aparılıb.

Bu tam yalandır şişirdilmiş rəqəmdir. 5-6 km məsafədə lildən təmizləmə işləri aparılsada rəqəmlər həddən artıq şişirdilərək vəsaiti siliblər. Bu fakt təcili və ciddi yoxlanılmalıdır. Orxan Mahmudov əvvəl bank sektorunda işləsədə oradan işdən çıxarılıb. Onun suvarma sahəsində heç bir təcrübəsi, biliyi və bacarığı olmadığı üçün Göyçay sakinləri əziyyət çəkirlər.
Azərbaycan Respublikasının Prezidenti cənab İlham Əliyev vətəndaşların yerlərə qəbulunun səmərəli təşkili üçün sərəncamlar imzalayıb tapşırılar verib.Ancaq təssüf olsun ki, Orxan Mahmudov öz şəxsi maraqlarına görə Prezidentin sərəncamına əməl etmir verdiyi tapşırıqları qulaq ardına vurur.
Prezident cənab İlham Əliyevdən xahiş edirik şikayətimizi obyektiv araşdırıb yarıtmaz fəaliyyəti ilə dövlətə və xalqa ziyanlar vuran Orxan Mahmudovun barəsində ciddi tədbirlər görəsiniz.
İmza; Göyçay rayonu Cəyirli kənd sakinləri
Mirzəliyev Elman Çingiz oğlu
Feyzullayev Rahim Zülfü oğlu
REDAKSİYADAN: Qarşı tərəfində mövqeyini dərc etməyə hazırıq!
TEREF

Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti maşın və avadanlıqların satın alınması ilə bağlı tenderə yekun vurub.

Qaynarinfo xəbər verir ki, tenderin qalibi "Ultra Technoligies" MMC seçilib. Qurum şirkətdən alacağı İKT məhsullarına görə 210 199,3 manat ödəyəcək.

"Ultra Technoligies" MMC-nin veb-səhifəsində qeyd edilib ki, şirkət 1999-cu ildə təsis edilib. Lakin mediada Dövlət Vergi Xidmətinin reyestr məlumatlarına istinadən tirajlanan xəbərlərdə şirkətin 2000-ci ildə qeydiyyata alındığı bildirilir. Bu isə o deməkdir ki, şirkət bir il vergi qeydiyyatına alınmadan fəaliyyət göstərib.

Maraqlıdır ki, hazırda Dövlət Vergi Xidmətinin reyestr məlumatlarında şirkət haqqında heç bir qeydə rast gəlinmir. Görünür, Xidmət saytını yeniləyərkən "Ultra Technologies" MMC-ni unudub. Faktiki olaraq saytın "Vergi uçotuna alınmış vergi ödəyiciləri barədə məlumatların verilməsi" və "Kommersiya hüquqi şəxslərin reyestr məlumatları" bölmələrində şirkətin adını və VÖEN-ni axtarışa verərkən "Daxil etdiyiniz ada uyğun kommersiya qurumu müəyyən olunmamışdır" qeydi çıxır.

Bununla belə, "Kommersiya qurumlarının dövlət reyestrinə daxil edilən məlumatlarındakı dəyişikliklərin tarixçəsi" bölümündə "Ultra Technologies" MMC haqqında müəyyən məlumatlar əldə etmək olur. Aydın olur ki, şirkət 2016-cı ilə qədər "Ultra Computers" Firması adı altında fəaliyyət göstərib.

MMC-nin nizamnamə kapitalı 1000 manat, qanuni təmsilçisi isə Zülfüqarlı Məhəmməd Zülfüqar oğludur. Araşdırmalarımız zamanı məlum olub ki, Məhəmməd Zülfüqarlı həm də "MSM" MMC-nin qanuni təmsilçisidir. Bu şirkət SMS satışını həyata keçirir.

Lakin mediada gedən məlumatlara görə, Məhəmməd Zülfüqarlı bu şirkətlərin sahibi deyil. Hər iki şirkətin Milli Məclisin VI çağırış deputatı olmuş Tahir Mirkişiliyə məxsus olduğu iddia olunur.

Tahir Mirkişilinin tərcümeyi-halında onun 2000-2011-ci illərdə adıçəkilən şirkətdə müxtəlif vəzifələrdə, o cümlədən direktor vəzifəsində çalışıb. Bu fakt şirkətin Tahir Mirkişiliyə bağlı olduğuna dair şübhələri daha da artırır.

Milli Məclisə seçkilərin keçirilməsinə 14 gün qalır.

Adları qalmaqallardan əsirgənməyən, milyonluq villaları və biznes fəaliyyətləri ilə yerli medianın manşetlərini dağıdan bəzi deputatlar, nə hikmətdirsə, kreslo sevdasından indi də əl çəkmirlər. Belə şəxslər üçün ömrünün axır çağlarında 5 il öz kreslosuna yayxanıb Milli Məclisə gəlib getmək, əlbəttə ki, xalqının dərdini-sərini parlamentdə səsləndirməkdən daha üstündür.

TEREF Yenicag.az -a istinadən xəbər verir ki, bu şəxslərdən biri də adı biznes imperiyalarının zənginliyi ilə sadalanan Məşhur Məmmədovdur. 74 saylı Masallı seçki dairəsindən VII çağırış Milli Məclisə düşmək istəyən Məşhur bəyi ölkədə “məşhur” edən əsas fakt isə sözsüz ki, “Embawood”un sahibi olmasıdır

Vaxtaşırı medianın gündəmə gətirdiyi “Embawood Məşhur” öz şirkətini 1996-cı ildə qurub. Bu gün şirkət öz sərhədlərini bir xeyli genişləndirib. Şirkətin kağız üzərində rəhbəri isə hazırda Elşad Abbasovdur. Çünki Məşhur müəllim deputatlıq macəralarına görə de-yure öz qurduğu şirkətin rəhbərliyindən “istefa verib”.

Xülasə, keçək cənab Məmmədovun biznesinin onurğa sütunu sayılan “Embawood”a. Şirkət 1996-cı ildə Masallıda mebel istehsalını qurub, 2000-ci ildə Xırdalanda ikinci fabrikini açıb, 2005-ci ildə regionlarda böyük anbarlarını yaradıb, 2014-ci ildə isə Qazaxıstanda mebel fabriki açıb.

Bu gün “Embawood” şirkəti Gürcüstan, Qazaxıstan, Ukrayna kimi ölkələr də daxil olmaqla, 6 fabrik, tərkibində 200-dən çox mağazası olan qlobal pərakəndə satış şəbəkəsi yaradıb. Qazaxıstanda 26, Gürcüstanda 21 mağaza və Ukraynada 20-dən çox mağaza, dünyanın digər ölkələrində isə satış nöqtələri var. Şirkətin Azərbaycanda toplam sahəsi 85 000 kv. metrdən çox olan 141 mağazası fəaliyyət göstərir.

Belə olan halda, bu boyda şəbəkənin həqiqi sahibinin Elşad Abbasov olmasına inanmaq mümkün deyil. Heç kimə sirr deyil ki, bu miqyasda şirkətlərin arxasından, adətən, nazir, komitə sədri, deputat çıxır. Bu şirkətin ərsəyə gəlməsində sabiq nazir Fərhad Əliyevin də “xeyir-duası” olub. Ancaq şirkətin əsl “patron”u deputat Məşhur Məmmədovdur. Təkcə bir faktı qeyd edək ki, cənab deputat özünə Nyu-Yorkda neçə milyonluq villa alması xəbəri mediada rezonans doğurmuşdu. Deputatın ilk kapitalı isə çirkli yolla İrandan gəlib.

Hazırda “Embawood” şirkətinə Almaniya və İtaliyadan avadanlıqların, Türkiyə, Rusiya, Avstriya, İtaliya, İspaniya, Çin, Belarus kimi ölkələrdən idxal olunan xammalın dəyəri 100 milyonu keçib. Görəsən, cənab Məmmədov bu milyonları haradan tapıb?

Xatırladaq ki, biznesmen deputatın adı bir zamanlar biznesinə şərik olan qohumları ilə arasında ədavətin yaşanması xəbərləri ilə eyni sırada çəkilmişdi.

Bununla bağlı mediada gedən informasiyanı oxucularımıza təqdim edirik:

“İş adamı, deputat Məşhur Məmmədov şəriki ilə Bank olmayan kredit kredit təşkilatı – “BOKT Embafinans”dakı payının bir hissəsini satıb. Belə ki, “Embafinans” QSC-in səhmdarları Elşad Abbasov (60% idi) və Milli Məclisin VII çağırış deputatı Məşhur Məmmədov (40%) paylarının bir hissəsini yeni investora satıblar. Məlumata görə, Tamara Polyakova BOKT-un səhmlərinin 14%-nə yiyələnib. Bu əməliyyatdan sonra Elşad Abbasovun payı 51%-ə, Məşhur Məmmədovunku isə 35%-ə düşüb”.

Medianın diqqətindən yayınmayan daha bir mühüm nüans isə Məşhur Məmmədovun oğlu ilə qızının ölkə xaricinə üz tutmasıdır. Bildirilir ki, biznesmen-deputatın Məmməd və qızı Mədinə Şahbazova artıq bir müddətdir ki, ABŞ-yə köçüb. Babalarının adını soyad götürən deputatın övladlarının Nyu-Yorkda məskunlaşdıqları deyilir. Qeyd olunur ki, deputatın oğlu ABŞ-də təsis etdiyi “Masalli Enterprise LLC” şirkəti Nyu-Cersi ştatının Gəlirlər İdarəsi tərəfindən qeydə alınaraq rəsmi fəaliyyətə başlayıb.

Uzun sözün qısası, bu gün seçicilərin ətəyindən yapışan Məşhur müəllimi Masallı camaatı da, elə biz də yaxşı tanıyırıq. Görünən kəndə nə bələdçi?
Görək, Məşhur müəllimin builki seçkilərdə verdiyi inanılmaz vədlər nə olacaq? Ümumiyyətlə, mandatını “kupçalayan” cənab Məmmədov qarşıdakı 5 ildə hansı “sürprizlər”ə bizi qonaq edəcək?
Yaşayıb görərik…

Mövzunu davam etdirəcəyik…

Paytaxtın Qaradağ rayonunda “Kral” şadlıq sarayının sahibi əhalinin gündəlik istifadə etdiyi əsas yolu zəbt edib. Tribunainfo.az-ın verdiyi məlumata görə, yerli icra hakimiyyəti yolun obyekt rəhbəri tərəfindən “işğal” edilməsinə göz yumur. Halbuki Qaradağ rayon icra başçısı Süleyman Mikayılov daşı daş üstünə qoymaq üçün pulsuz sərəncam vermir. İndi “Kral” sahibi özünü kral kimi apararaq yolu tutub və görünür ki, bu qanunsuz hərəkətə yol vermək üçün icra başçısından razılıq alıb. Sakinlərin sözlərinə görə, Qaradağ rayon İcra Hakimiyyəti və başqa qurumlar məlumatlandırılıb, amma addım atılmır. Yolsuz qalan sakinlər problemin həlli üçün artıq kimə müraciət etməli olduqlarını bilmirlər. Narazı sakinlər bildirirlər ki, başda Qaradağ İH olmaqla, heç bir dövlət qurumu onların şikayətinə baxmır.
“Nə problem olur gərək prezidentə müraciət edək. Su, qaz, işıq, yol… Yenə də prezidentə müraciət etməli oluruq. Belə iş olar? Bəs, bu məmurlar nə işə yarayır? Bu dövlət qurumlarında, icra hakimiyyətində bir insaflı, işini bilən, prezidentin əmrlərinə tabe olan bir məmur varsa, gəlsin çıxsın ortaya. Bu qədər insanın yolunu bağlayan bir iş adamına heç kəs bata bilmir. Biri gəlib bu yol kəsən “Kral” şadlıq sarayının sahibinin sənədlərini araşdırsın. “Kral” şadlıq sarayının Səfa adlı sahibi vətəndaşların ümumi istifadəsində olan yolu bağlayıb. Heç kəs də vecinə deyil bu adamın. Deyir, sənədim var. Kim verib bu adama bu sənədi?”
Qarşı tərəfin mövqeyini işıqlandırmağa hazırıq.

35 ildir dalbadal Qubadan deputat seçilən Vahid Əhmədovun son illərdə davamlı şəkildə etdiyi “siyasi səhvləri” budəfəki növbədənkənar seçkilərdən kənarda qalmasına gətirib çıxardı. YAP da həmin bitərəf namizədin yerinə “bitərəf şəxs” axtarmaqdansa, özlərinə yaxın birini tapıblar. Bu tapıntı da təsadüfi olmayıb. Ən azından əslən qubalıdır, Vahid Əhmədovdan geri qalmır, iqtisadçıdır. Üstəlik, elmi dərəcə və digər peşə bacarıqları da var. Söhbət iqtisad elmləri doktoru, professor, auditor, motivasiya spikeri və yazıçı (?????) Əlibala Səttar oğlu Məhərrəmzadədən gedir. AzToday.az xəbər verir ki, “Çovdar çörəyi!”, “Kənar adamın söylədikləri” kitablarının müəllifi olan Ə.Məmmədzadənin peşəsi çox olsa da, həm də biznesmendir. Özü də indiki deputatlardan fərqli olaraq biznesini gizlətmir, hamı bilir ki, Qubada sanatoriya sahibidir.

Lakin Qubanın yeni deputatı olmağa namizədin ən maraqlı və gülünc fəaliyyəti də “motivasiya spikeri” peşəsi ilə bağlıdır. Belə ki, Əlibala özünə məxsus olan “Youtube” kanalında rus dilində “Ev tapşırığı” silsilə dərsləri ilə “Uğur düsturu”nu təqdim edir. Məsələn, “Ev tapşırığı”nın 13-cü hissəsində “Məhəbbət düsturu” haqqında danışır, özü də rus dilində məhəbbətin nə olduğunu, necə cinsi əlaqə və uğurlu ailə qurmağın yollarını öyrədir (https://www.youtube.com/watch?app=desktop&v=5KSEr4rKwic). Buna “öyrədir” də demək olmaz. Çünki 1 il yarımdır paylaşdığı 13-cü “Ev tapşırığı”na cəmi 34 nəfər baxıb, şərh yazan da yoxdur...
Bax, elə bizim Milli Məclisdə onun kimi, mütəxəssislər çatışmırdı. Düşsün parlamentə Elza Seyidcahanla birlikdə qoca, cavan bütün deputatlara məhəbbətdən motivasiya versin...

Məlum olur ki, Əlibala yuxarıda qeyd edilən peşələri qazanmaq üçün əlindən gələni edib. Bəs deputat olmaq üçün nə edir? İndi onu araşdıraq.

Qubadan gələn həyəcanlı xəbərlərə görə, Əlibala əsas rəqibi sıradan çıxdığı üçün fürsətdən istifadə edərək “seçkidə necə qalib gəlməyin düsturu”nu işləyib hazırlayıb. Əvvəlcə özünə “rəqib” hazırlayıb, yaxın qohumu Əliabbas Məhərrəmovu eyni dairədən namizəd kimi qeydiyyatdan keçirib. Digər namizədlərə qarşı isə təzyiq və hədə-qorxu gəlməyə başlayıb. “Qalib gəlmək düsturu”nun əsas hissəsi isə rayondakı biznes fəaliyyətindən əldə etdiyi üstünlüyü YAP-dan gələn dəstəklə çuğlaşdırmaq təşkil edir.

Beləliklə, inzibati resursları da arxasına alan “Motivasiya spikeri”nin düstur əsasında qurduğu plan öz axarnda getdiyi bir dövrdə bizim media təmsilçiləri də dinc durmayıb, araşdırıblar ki, Qubadakı “Şahdağ Turuskavets” sanatoriyasının sahibi olan Əlibala Məhərrəmzadənin 10 milyon manata yaxın borcu var.
Medianın yaydığı digər xəbərə görə, YAP İdarə Heyətinin 59 saylı Quba seçki dairəsindən namizəd kimi Əlibala Məhərrəmzadəni irəli sürməsini Quba YAP-çıları müsbət qarşılamırlar. Çünki Ə.Məhərrəmzadə əslən Qubadan olsa da, YAP-ın Quba rayon təşkilatının üzvü də deyil. Bakının Səbail rayonunda qeydiyyatda olan Ə.Məhərrəmzadənin isə bu cür xəbərlər heç vecinə də deyil.

Belə ki, 59 saylı Quba seçki dairəsindən namizəd Əlibala Məhərrəmzadə 10 milyonluq borcu ilə bağlı xəbərləri 20 gündən sonra təkzib edib. Çox güman ki, Əlibala YAP-ın verdiyi “ev tapşırığı”nı Qubada yerinə yetirməyə və daha sonra Milli Məclisə düşəndə digər həmkarlarından “ac-yalavac” parlamentə gəlib “deputat ola-ola milyonlara necə sahib olmağın düsturu”nu öyrənərək (Azərbaycan dilini bilməsə də) pul qazanmağa və bütün borclarını qaytarmağa söz verib.

Verilən sözlər və planlar öz axarı ilə getsə, Milli Məclis “Motivasiya spikeri”, YAP isə növbəti biznesmen-deputat qazanacaq..

Milli Məclisə sentyabrın 1-də keçiriləcək növbədənkənar seçkilərdə “qələbə”si öncədən proqnozlaşdırılan bir sıra namizədlərlə bağlı ortaya xeyli suallar çıxır.

2020-ci ilin fevralında keçirilmiş növbədənkənar seçkilər nəticəsində formalaşan VI çağırış Milli Məclis də gözlənildiyi kimi, özünün səalhiyyət müddətini sona qədər davam etdirmədi. Prezident İlham Əliyevin iyunun 28-də imzaladığı müvafiq Sərəncama uyğun olaraq, parlament vaxtından əvvəl buraxıldı və sentyabrın 1-nə yeni seçkilər təyin olundu. Təbii, erkən seçkilərə start verildikdən sonra bütün diqqətlər başda hakim partiya olmaqla, siyasi qüvvələrin, o cümlədən, müstəqil siyasətçilərin seçki hazırlıqlarına yönəldi. Eyni zamanda, təyin olunan seçkilərin ölkə parlamentarizmi tarixində yeni mərhələnin başlanğıcı olaraq təqdim edilməsi bu mühüm siyasi kampaniyaya marağı daha da artırırdı. O baxımdan, namizədlərin irəli sürülməsinə start verildikdən sonra partiyaların kimləri “döyüş”ə cəlb etmələri istiqamətində müzakirələr vüsət aldı.

Sözsüz ki, bu sırada ilk növbədə 1995-ci ildən sonra keçirilmiş bütün parlament seçkilərində parlament çoxluğuna sahiblənən Yeni Azərbaycan Partiyasının (YAP) namizədlər siyahısı bu müzakirələrin episentrini təşkil edirdi. Bu, bir tərəfdən YAP-ın hakim partiya olması ilə əlaqədar idisə, digər tərəfdən Milli Məclisin yeni tərkibinin əhəmiyyətli dərəcədə yeniləcəyinə dair gözləntilərlə şərtlənirdi. O baxımdan, parlamentin tərkibində gözlənilən yeniliklər YAP-ın deputatlığa namizədlər korpusunun tərkibi ilə əlaqələndirilirdi. Qısaca demək olar ki, bu gözləntilər təsəvvür edilən miqyasda doğrulmadı. Çünki YAP-ın parlament karyeraları hələ ötən əsrdən başlayan veteranlarının yeni siyahıda da yer alması həm birmənalı qarşıalanmadı, həm də bəhs olunan gözləntiləri yetərincə zəiflətdi. Yəni belə hesab edildi ki, hakim partiyanın stajlı deputatları yenə namizəddirlərsə, onların növbəti dəfə mandat almamaları istisnadır.

Lakin YAP-ın 1 sentyabr seçkilərində namizədliyini irəli sürdüyü fərdlərin içində yenilərin olmadığını söyləmək də imkan xaricindədir. Hər halda, nəinki cəmiyyətdə, hətta media cameəsində belə adını kimsənin eşitmədiyi bəzi fiqurlar hakim siyasi təşkilatın namizədləri qismində mübarizəyə qoşulublar. Doğrudur, onlardan bir çoxunun “növbətçi namizəd” olduqları iddia edilsə də, həmin şəxslərin YAP-ın deputatlığa rəsmi namizəd statusu qazanmalarının özü də üstündən sükutla keçiləcək məsələ deyil.

Cəmiyyətdə adı eşidilməyən, jurnalistlərin belə tanımadığı YAP-ın deputatlığa namizədləri arasında Elnur Fidail oğlu Rəhimovun adı xüsusi seçilir. Əslində, burada “seçilir” sözü bəlkə də yerinə düşmür – artıq deyildiyi kimi, onun hər hansı ictimai obrazı mövcud deyil. Amma onun adını ictimai diqqətə yönəldən ciddi bir amil var – o, “Bakı Tikiş Evi” ASC-nin rəhbəri Fidail Rəhimovun oğludur. Həm də sadəcə oğlu deyil, eyni zamanda, atasının maliyyə məsələləri üzrə müavinidir. Bununla belə, xarici ölkədə təhsil almaq və tanınmış iş adamının oğlu olmaq YAP-ın namizədlər siyahısına düşmək üçün nə qədər yetərli ola bilər? Axı son məlumatlara əsasən, hakim partiyanın üzvlərinin sayı 700 min nəfəri çoxdan keçib. Təsəvvür edin, onların arasında Elnur Rəhimova siyasətdə master-klass keçə biləcək yüzlərlə, minlərlə, lap on minlərlə hazırlıqlı insan var. O zaman “Bakı Tikiş Evi”ndə gəlir-çıxar məsələləri ilə məşğul olan birinin YAP-ın namizədlər korpusuna daxil edilməsi nə dərəcədə təbii görünür? Cavab özlüyündə aydındır.

Bundan başqa, Elnur Rəhimovun atası Fidail Rəhimovun rəhbəri olduğu “Bakı Tikiş Evi” ASC-nin də cəmiyyətdəki reputasiyası müsbət deyil ki bu amilin onun namizədliyinə təsirindən danışmaq mümkün olsun. Əksinə, son illərdə məktəbli formalarının istehsalını monopoliyaya götürən, o məhsullara istədiyi qiyməti qoyaraq valideynləri soymaqdan çəkinməyən bir şirkətin belə məsələlərdə pozitiv rolu ola bilməz.

Ona görə də Elnur Rəhimovun YAP-ın namizədlər syahısına salınmasında “qüdrətli gizli əl”in rolu haqqında fikir yürütmək olar. Bəli, rəqiblərindən biri uzunmüddətli deputat Ziyad Səmədzadə olsa da, YAP-ın namizədi olması onun mandat almaq şansını artırır. Ancaq mandat qazansa belə, fövqəladə nə baş verəcək ki? VI çağırış Milli Məclisin deputatı olan və namziədliyi yenə irəli sürülən, Nurlan Həsənovdan fərqli nə edəcək? O da xaricdə təhsil almışdı, “yeni təfəkkür” sahiblərindən hesab olunurdu. Amma mətbuata ilk açıqlamasındaca Azərbaycanla Almaniya arasında “möhtəşəm” müqayisə apararaq, özünü ömürlük gülüş hədəfinə çevirdi.

Görək, Elnur Rəhimov mandat alacağı təqdirdə Azərbaycanı hansı ölkə ilə müqayisə edəcək?

www.yenicag.az

Estetik mərkəz. Artıq, illərdir ki, belə mərkəzlər geniş yayılmış biznes sahələrindən birinə çevrilib. Yaşından, cinsindən asılı olmayaraq, bir çox insanların üz tutduqları kosmetik və estetik mərkəzlər barəsində narazılıqlar getdikcə daha da artmaqdadır.

Lakin, təəssüflər olsun ki, bu narazılıqların nəticəsi - yəni yaradan şəxsin cəzalandırılıb-cəzalandırılmayacağı bəzən qanunlardan deyil, narazılıq edənin, yaxud barəsində edilənin kimliyindən asılı olur. Bu gün isə "estetik", eləcə də "kosmetoloji xidmət" adı altında insanlara yaşadılan dəhşətlərdən bəhs edəcəyik.

Əvvəlcə bu mərkəzlərə lisenziyanı hansı qurumlar verir və ümumiyyətlə fəaliyyəti barəsində rəy verilməsi hansı qaydalarla həyata keçirilir, buna aydınlıq gətirək.

- “Lisenziyalar və icazələr haqqında” Azərbaycan Respublikasının Qanununa əsasən, lisenziya verən qurum kimi İqtisadiyyat Nazirliyi özəl tibb fəaliyyəti üçün lisenziyanın verilməsi ilə bağlı daxil olmuş müraciətə baxılması ilə əlaqədar Səhiyyə Nazirliyinin rəyini alır.

O cümlədən, kosmetoloji iş üzrə ambulator tibbi xidmət göstərmək niyyətində olan müəssisələr özəl tibb fəaliyyəti üçün lisenziyanın verilməsi ilə bağlı İqtisadiyyat Nazirliyinə müraciət etməlidirlər. Müraciət əsasında rəyin verilməsi məqsədilə hər iki qurumun iştirakı ilə müəssisəyə birgə baxış keçirilir.

Müsbət rəy nəzərə alınmaqla müəssisəyə Azərbaycan Respublikası Nazirlər Kabinetinin 15 may 2017-ci il tarixli 206 nömrəli Qərarı ilə özəl tibb fəaliyyəti üzrə göstərilən xidmətlərə uyğun kosmetoloji iş üzrə müvafiq lisenziya verilə bilər. Rəyin verilməsi və sonrakı nəzarət tədbirləri zamanı müəssisənin tələblərə uyğun təşkil olunması Azərbaycan Respublikasının Səhiyyə Nazirliyinin 07 aprel 2009-cu il tarixli 37№-li əmri ilə təsdiq edilmiş “Tibb müəssisələrində sanitariya-epidemioloji tələblərə dair Qaydalar” və digər normativ aktlarla qiymətləndirilir.

TEREF xəbər verir ki, Sabunçu rayon Sabunçu qəsəbə sakini Vüsalə Əliyeva redaksiamıza müraciət edərək, Həsən Əliyev küçəsindəki "Bi-Es" VİP estetik mərkəzdə çalışan Günel adlı xanımın işindən narazı qaldığını, xanımın ona etdiyi prosedurların (müraciət etmə səbəbi olan) boğaz dərisindəki "venera halqaları" deyilən izləri aparmadığını, əksinə, tətbiq edilən preparatın onun səhhətində və fiziki görünüşündə daha bərbad problemlər yaratdığını bildirib.

Onun sözlərinə görə, izləri aparmaq yerinə, fiziki görünüşündə daha bərbad nəticə yaradan və eləcə də sosial şəbəkələrdə özünü "kosmetoloq" kimi təqdim - daha doğrusu reklam edən həmin Günel adlı xanım onu əmin edib ki, bu "normal haldır" və bir aydan sonra istədiyi nəticəni alacaq.

Beləliklə də, Günel xanımın bu "duzlu-istiotlu" vədinə aldanan Vüsalə Əliyeva dodaq nahiyəsində etmək istədiyi yeniliyi də Günel xanıma həvalə edib ki, elə vəd edilən o, bir ay ərzində hər iki prosedur lazımi nəticəni eyni vaxtda alsın.

Amma, deyir, "sən saydığını say, gör fələk nə sayır"...

Vüsalə Əliyeva deyir, artıq sözügedən prosedurdan aylar keçib. lakin Günel adlı xanım onun nə zənglərinə cavab verir, nə də mesajlarına. Hələ üstəlik nömrəsini də blok edib.

Görünür bu xanım Vüsalə xanım kimi müştərilərin üzərində "məşq edərək" , "kosmetoloq olmağa çalışır". "Alınmayan sınaqlar"ın nəticəsi ilə təkrar rastlaşmamaq üçün isə nömrəsini blok edir, vəssalam...

Amma, deyəsən Günel xanım bir məqamı unudub - bir gün qanunlarla qarşılaşacağını!

Xanım qanunları hansı formada "blok" edəcəyini isə zaman göstərəcək.

Vüsalə Əliyevanın müraciətilə bağlı qarşı tərəfin də mövqeyini öyrənmək məqsədilə Günel xanıma zəng etdik. Elə özümüzü təqdim edib, Vüsal xanımın onun barəsində bizə müraciət etdiyini demişdik ki, xanım "nəfəs almadan" danışmağa başladı.

Gah dedi, - "O, xanım heç ödənişin hamısını ödəməyib, gətirsin ödəsin başa çatdırım", gah dedi, "Mən daha onu heç qəbul etmərəm", gah da dedi ki, - "Necə ki, başqasının işini bəyənməyib, gətirib mənə əritdirib, yenidən etdirmişdi, eləcə də mənim işimi bəyənmirsə getsin başqa yerdə əritdirib, təzədən düzəltdirsin", deyib, dəstəyi asdı.

İnanın ki, ağzımızı açmağa imkan vermədi.

Bəlli ki, verəcək cavabı olmadığı üçün dayanmadan danışaraq, sual verməyimizə əngəl olmağa çalışırdı. Amma, birnəfəsə tələsik danışmağı ilə həm özünü itirdiyini büruzə verdi, həm də biri-birini tamamlamayan cümlələrlə özü haqqında əlavə şübhələr yaratmış oldu.

1. Əvvəla onu qeyd edək ki, Vüsalə xanım ona etdiyi ödəniş qəbzlərinin, bank kartına etdiyi köçürmələrin və onunla aralarında baş tutan bütün yazışmaların şəkillərini redaksiyamıza da təqdim edib. Qarşıdakı günlərdə həmin fotolar tərəfimizdən aidiyyatı qurumlara da göndəriləcəkdir.

2. Günel xanımın bu cür fəaliyyət üçün hər hansı bir tibbi təhsili, fəaliyyət göstərməsinə dair rəsmi icazəsi - yuxarıda da qeyd etdiyimiz kimi, Səhiyyə Nazirliyinin rəyi, eləcə də İqtisadiyyat Nazirliyi tərəfindən verilmiş lisenziyası varmı - yoxmu bu belə bəlli deyil, üstəlik xanım kartdan karta köçürmə üsulu ilə ödəniş alaraq, vergidən yayınır.

3. Qaldı ki, güya "başqasının işini bəyənməyib bu mərkəzə müraciət etmək" məsələsinə, xanım bunu birmənalı şəkildə rədd edir və ilk dəfə "instagram" sosial şəbəkəsində reklamını gördüyü Günel xanıma müraciət etdiyini deyir.

Ahaaa.... deyəsən, Günel xanımın "qurban" ı təkcə Vüsalə Əliyeva deyil, yoxsa niyə səhv salsın ki?!

Bundan əlavə, Vüsalə Əliyeva bildirir ki, "Bi-Es" VİP estetik mərkəzində olarkən özünü müdür köməkçisi kimi təqdim edən Ruslan adlı şəxs ona yaxınlaşıb və xahiş edib ki, "səs-küy salma, bir ay gözlə, yaxşı olmasa gəl, mən sənin ödədiyin pulu ondan alıb, özünə qaytaracam".

Deyilən vaxt tamam olanda xanım həmin şəxsə zəng edib, verdiyi vədi xatırladıb. Bu dəfə isə bir ay əvvəl söz verən bəy məsuliyyəti üzərindən atıb. Xanım şikayətçi olacağını bildirdiyində isə, Ruslan bəy ona, "Məgər bura estetik mərkəzdir ki, buranı şikayət edəsən? Qapının çölündə elə yazı görmüsən?

Mən sadəcə yerimi arendaya verib, pulumu qazanıram.", cavabını verib.

Aşağıda təqdim etdiyimiz fotodakı sözügedən mərkəzin giriş qapısıdır.

İndi Ruslan bəyin müdirinin Günel xanım kimi icarədarları ilə icarə müqaviləsi varmı, insanların həyatının risk altında olduğu bir fəaliyyət üçün icarədarlarının aidiyyatı qurumlar tərəfindən rəsmi göstərişləri varmı, yoxdursa bəs müdür hansı əsasla onlara mərkəzdə fəaliyyət şəraiti "lütf edib", bütün bunları aidiyyatı qurumlar özləri araşdıracaq.

P. S: Növbəti həftənin ilk iş günü redaksiyamız tərəfindən rəsmi sorğular və Vüsalə xanımın redaksiyamıza təqdim etdiyi materiallar aidiyyatı qurumlara göndəriləcək. (Dogruxeber.az)

Mövzunu diqqətdə saxlayacağıq.

Redaksiamız hər kəsin söz haqqını tanıyır.