2021-ci ilin sentyabrında ölkənin hər yerində Vətən Müharibəsi şəhidlərinin birinci anım günü qeyd olunurdu. Görünüb ki, matəm günlərində adam qara libas geyinər və yaxud ən azı al-əlvan geyinməz.
Millətimiz bu qaydanı həmişə gözləyib, qoruyub... Həmin ilin anım günündə külli-aləm bir qadından danışırdı. Həmin qadın o zaman Abşeron Rayon Səhiyyə şöbəsinin müdiri işləmiş Qaralova Mehriban Zahid qızı idi.
Mehriban xanım deyəsən anımla toyu qarışdırıb tədbirə qıpqırmızı geyimdə gəlmişdi. Hələ qırmızı ayaqqabısını, qırmızı maskasını demirəm.
Vətən övladlarının al qana boyanmağını al geyimlə qarşılayan bir məxluqun Azərbaycan xalqına məxsusluğuna o vaxtdan şübhə etdim.
Onsuz da bu qadının illərdi oturduğu kresloda özünü firon kimi aparmağı, "qansız"lığı hamıya məlum idi. İki çağırış Milli Məclisin deputatı olmuş atası Zahid Qaralov, 2000-2020-ci illərdə baş prokuror olmuş əmisi oğlu Zakir Qaralovun kölgəsində tabeliyindəkilərə çox haqsızlıqlar edib.
Neçə həkimi, tibb işçisini işdən çıxardıb, şərə salıb. İş yerini şər yuvasına çevirib. Zakir Qaralovun sayəsində prokurorluqdakı bəzi müstəntiqlərlə də yaxşı iş birliyinə girib. Ona görə də çox işlərini ört-basdır etməyi bacarıb.
Lakin Zakir Qaralovun işdən çıxarılması və özünün "qırmızı geyim" hadisəsindən sonra Mehriban Qaralova postunu itirdi. Bir müddət işsiz qaldıqdan sonra indi Xocəsən Sağlamlıq Mərkəzinin direktoru olaraq peyda olub. Yəqin bəzi adamlar üçün bu cür səhiyyə işbazı sərf edir.
Bu Mehriban Qaralovanın qara işlərindən çox misallar gətirmək olar. Son sərgüzəştlərindən biri Abşeron Rayon Mərkəzi Xəstəxanasının həkim-ginekoloqu Bədəlova Arzu Ənvər qızı ilə bağlıdır.
Arzu xanımın dediklərinə əsasən o Mehriban Qaralova tərəfindən sözün əsl mənasında şərə salınıb. Beləki, 2022-ci ildə Arzu Bədəlovanın qəbul etdiyi bir doğuş zamanı körpə ölüb. Arzu həkim ölümün səbəbini tam dəqiqləşdirmək üçün valideynlərə meyitin yarılmasını təklif edib.
Onlar əvvəl razı olmasalar da sonradan razılaşıblar. Bu barədə həmin vaxt səhiyyə şöbəsinin müdiri işləmiş Mehriban Qaralova da məlumatlandırılır. Onun tapşırığı ilə hadisə haqqında prokurorluğa bildirilir. Prokurorluqdan onlara şikayət daxil olmadığını deyirlər. Lakin 10-15 dəqiqə sonra müstəntiq Faiq Sultanov zəng edərək xəstəxanaya gələcəklərini bildirir.
Müstəntiq gəlir və körpənin meyitini ekspertizaya aparırlar. Orada meyit təşrih olunur (yarılır). Hadisə vaxtı və sonrakı günlər valideynlər şikayət etməsələr də araşdırma başladılan kimi birdən-birə şikayətçi olduqları bildirilir. Niyəsi məlumdur.
Mehriban Qaralova bu işi "yoluna qoymaq" üçün Arzu Bədəlovaya pul sövdləşməsi təklif edib, amma Arzu xanıma rüşvət verməyə razı olmayıb, qanun çərçivəsində özünün haqlı olduğunu sübut etmək istəyini bildirib. Bundan sonra iş daha da dolaşığa düşüb.
Halbuki valideynlərin dövlət orqanlarına müraciətlərində də həkimin günahkar olmadığı bildirilir. Müstəntiq isə yalnız ekspertizanın şablon rəyinə əsaslanaraq işi tam, obyektiv və hərtərəfli araşdırmayaraq qərəzli qərar verib.
Ekspertiza rəyi başdan ayağa cəfəngiyyatdır, müstəntiqin sifarişi ilə yazılıb, heç bir kliniki protokol və tibbi ədəbiyyatla təsdiq olunmayan uydurma dəlillərdən ibarətdir. Ekspertiza rəyi şahid ifadələri ilə də uyğunluq təşkil etmir, ziddiyyətlidir.
Hətta meyitin yarılmasını həyata keçirən ekspert ilə komisyon ekspertizanın digər ekspertlərinin rəyləri arasında ziddiyyət var. Bütün bunlara məhkəmə prosesində baxılmayıb, səthi yanaşılıb, faktların üstündən keçilib.
İndi yekun söz məhkəmənindir. Ümid edirik ki, gənc və savadlı bir mütəxəssisin haqqı bərpa olunacaq.
Biz öz tərəfimizdən Arzu Bədəlovanın işlədiyi yerdə, onu tanıyanlar arasında münasibət öyrəndik. Hər kəs onun haqqında müsbət fikirdədir və işdən uzaqlaşmasına təəssüf edirlər.
Buradan Baş prokurora, Ali Məhkəmənin sədrinə müraciət edərək xahiş edirik ki, Arzu Bədəlovanın işi düzgün araşdırılsın, işə ədalətli baxılsın.
Burinci Vitse-Prezident Mehriban xanım Əliyevadan, cənab Prezident İlham Əliyevdən məsələni nəzarətə götürmələrini rica edirik. Sizin diqqətiniz gənc bir mütəxəssisin əsassız təqibdən qurtarar, həkim karyeyarısının yarımçıq qalmasının qarşısını alar.
Sima Babayeva
Adları çəkilən hər bir şəxsin mövqeyini dərc etməyə hazırıq!
TEREF

Zaqatalanın əksər yaşayış məntəqələrində müasir məktəblər inşa olunaraq şagird və müəllimlərin istifadəsinə verilib. Lakin rayonun ucqar Kəpənəkçi kənd tam orta məktəbi mövcud olan gündən bu yana nə təmir edilir nə yenisi tikilir.

Bizim.Media-nın yerli bürosu xəbər verir ki, artıq şagird və valideynlər dilə gəlib. Çünki məktəbin binasında sağ-salamat bir yer qalmayıb desək yanılmarıq.

Şəkillərdən də gördüyünüz kimi bu pəncərələri sınıq, taxta parçaları ilə qapadılan, suvağı tökülən, damı bərbad vəziyyətdə olan məktəb binası Kəpənəkçi kəndində şəhid Sərdar Kərimov adını daşıyır.

Ötən əsrin 60-cı illərində inşa edilən Kəpənəçki kənd tam orta məktəbində hazırda 160 şagird təhsil alır, 40-a yaxın pedaqoji və texniki heyət çalışır. Sakinlərin sözlərinə görə ötən müddətdə bu təhsil ocağında heç bir təmir-bərpa işləri aparılmayıb. Məktəbin xarici ilə yanaşı daxili də qəzalı vəziyyətdədir.

Dərs saatı başa çatdığından şagirdlərə yaxınlaşıb daxildəki vəziyyətlə maraqlanırıq.

Bizim.Media-ya danışan 8-ci sinif şagirdi Kamilə Hacıyevanın arzuları böyükdür. O, da televiziya ekranlarında gördüyü, dostlarının bəhs etdiyi bütün şəraiti olan məktəbdə təhsil almaq arzusundadır.

“Mən də digər məktəblilər kimi yeni, keyfiyyətli, müasir standartlara cavab verən məktəbdə təhsil almaq istəyirəm. Fizika, kimya və digər fənnlərdən də yaxşı oxumaq istəyirəm. Gözəl dərs avadanlığı olan sinif otağında oturmaq istəyirəm. Təhsilimi mükəmməl etmək istəyirəm.

Müəllimlərimə dərindən təşəkkür etmək istəyirəm ki, onlar bizim təhsilimiz üçün mükəmməl şəkildə əziyyət çəkirlər, oxumağımız üçün əllərindən gələni edirlər. Tək arzum bu məktəbin yenilənməsidir”, - deyə şagird bütün Kəpənəkçi kənd sakinlərinin arzularını dilə gətirib.

Qeyd edək ki, kənd məktəbi şəhid Sərdar Kərimovun adını daşıyır. Şəhid bacısı Gülnar Qurbanova deyir ki, onun da övladları bu təhsil ocağında oxuyub. Qardaşının adını daşıyan bu təhsil ocağını belə vəziyyətdə görmək şəhid bacısı kimi ona təsir edir.

“Müəllimlərimizdən çox razıyıq. Çətin şəraitə baxmayaraq onlar bütün imkanlardan istifadə edib övladlarımıza savad, bilik verirlər. Amma məktəbin heç elektrik xətləri belə yoxdur. Bu səbəbdən şagirdlər kompüter və digər müasir texnologiyadan istifadə edə bilmirlər”- deyə şəhid bacısı qeyd edib.

Digər kənd sakini Saniyə İsayeva isə yaz gələndə sinif otaqlarında böcək, siçan və siçovulların, bəzən də ilanların peyda olmasından narahatlığını ifadə edib.

Məsələ ilə bağlı Şəki-Zaqatala Regional Təhsil İdarəsindən bildirildi ki, şəhid Sərdar Kərimov adına Kəpənəkçi kənd tam orta məktəbinin vəziyyəti barədə məlumatlıdırlar. Təhsil müəssisəsinin maddi-texniki bazasının möhkəmləndirilməsi məqsədilə aidiyyəti üzrə müraciət edilib. Təhsil müəssisəslərinin təmiri və tikintisi növbəlilik və prioritetlik prinsipi əsasında həyata keçirilir.

Regional idarədən verilən məlumata əsasən son iki il ərzində Şəki-Zaqatala Regional Təhsil İdarəsinin tabeliyində olan 100-dən çox məktəbdə cari, 1 məktəbdə isə əsaslı təmir işləri aparılıb və 8 məktəb binası sökülərək yenidən tikilib. 2024-2025-ci tədris ili üzrə 4 məktəbin sökülərək yenidən tikilməsi və 90-dan çox təhsil müəssisəsində təmir işlərinin aparılması nəzərdə tutulur.

Naxçıvanda Şərur rayonunda Ulu önədrimiz Heydər Əliyevin adına olan “Heydər parkı” baxımsız vəziyyətdədir.

XALQ.AZ xəbər verir ki, dövlət hesabına salınan parklar baxımsız vəziyyət olması ilə bağlı mətbuatda həmçinin sosial hesablarda məlumatlar yayımlandıqdan sonra aidiyyatı strukturlar hərəkətə keçərək qırılmış avadanlıqları təmir edir, və ərazidə təmizlik işləri aparırlar.

Bununla əlaqədar Şərur rayon sakinləri XALQ.AZ-a müraciət edərək baxımsız qalan parka aidiyyatı qurumların diqqətinə çatdırmaq istəyiblər.

Sakinlər bildiriblər ki, parkda avadanlıqlar qırılıb uşaqlar üçün təhlükəli vəziyyət yaranıb. Gözləyirlər hər-hansı bir xoşəgəlməz hadisə baş versin sonra uşaqlar üçün əyləncə avadanlıqlarını təmir etsinlər deyə Şərur sakinləri bildiriblər.

Bununla bağlı rayon icra hakimiyyətinə müraciət etsələrdə heç bir tədbir görülmədiyi bildirirlər.

Məsələ ilə bağlı Şərur rayon icra hakimiyyəti ilə əlaqə yaratmaq mümkün olmadı.

Qeyd edək ki, 2017-ci ildən Şərur rayon icra Hakimiyyətinin başçısı Kamal Cəfərovdur.
Qurumunda mövqeyini dərc etməyə hazırıq.

Daşınmaz Əmlakın Dövlət Kadastrı və Reyestri publik hüquqi şəxsinin tabeliyində “Kadastr və Yerquruluşu Layihə-Tədqiqat Mərkəzi” MMC 23.04.2025-ci ildə satınalmaların portalında nəqliyyat vasitələrinin təmiri işləri və onların ehtiyat hissələrinin satınalınması üzrə 27.01.2025-ci ildə başladığı açıq tenderə yekun vurduğunu açıqlayıb. Tender müsabiqəsinin qalibi “İDEAL MOTORS” MMC seçilib və tərəflər arasında 802.388,54 manat dəyərində satınalma müqaviləsinin bağlanılması gözlənilir.

Qeyd edək ki, “Kadastr və Yerquruluşu Layihə-Tədqiqat Mərkəzi” MMC tərəfindən nəzərdə tutulmuş nəqliyyat vasitələrinin təmiri işləri və onların ehtiyat hissələrinin alınması üzrə keçirilmiş açıq tenderdə ehtimal olunan qiyməti 1.255.227,16 manat müəyyən edilmişdir. Dövlət satınalmalarının vahid internet portalına yerləşdirilmiş bu məlumatlardan görsəndiyi kimi satınalan təşkilatın müəyyən etdiyi ehtimal qiyməti ilə təchizatçının təklif edərək qalib olduğu qiymətlər arasında kəskin fərq var.

Qeyd edək ki, “Dövlət Satınalmaları haqqında” Azərbaycan Respublikasının Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Amma göründüyü kimi “Kadastr və Yerquruluşu Layihə-Tədqiqat Mərkəzi” MMC bu təchizatçını müsabiqədən kənar etməmiş, əksinə yeni müqavilə bağlamağı planlaşdırır.

Qeyd edək ki, bu “Kadastr və Yerquruluşu Layihə-Tədqiqat Mərkəzi” MMC ilə “İDEAL MOTORS” MMC arasında bağlanan ilk satınalma müqaviləsi deyil. Tərəflər arasında nəqliyyat vasitələrinin təmiri və onların ehtiyat hissələrinin satın alınması üzrə 692.347,28 manat dəyərində bir müqavilə də 06.08.2024-cü ildə bağlanılıb. Satınalmaların portalında göstərilən vaxta görə “İDEAL MOTORS” MMC 05.08.2024-cü ildən 05.08.2025-ci ilə qədər servis xidməti göstərməlidir.

Mərkəz “İDEAL MOTORS” MMC ilə bir müqavilə də avtonəqliyyat vasitələrinin satınalınması üzrə bağlayıb. 22.11.2023-cü ildə bağlanmış bu müqavilənin qiyməti 217.500 manat təşkil edib və 5 ədəd yeni avtomobilin alınması nəzərdə tutulub.

Qeyd edək ki, “Kadastr və Yerquruluşu Layihə-Tədqiqat Mərkəzi” MMC bu satınalma da “Dövlət Satınalmaları haqqında” Qanunun 35.1.8. maddəsinin tələblərini ciddi şəkildə pozub. Belə ki, 1.397.908,24 ehtimal olunandan 50 faiz aşağı qiymətə.

Bu məlumatdalardan sonra “Kadastr və Yerquruluşu Layihə-Tədqiqat Mərkəzi” MMC-nin nəqliyyat vasitələrinin təmiri və onların ehtiyat hissələrinin satın alınması ilə bağlı keçirdiyi tenderləri araşdırdıq. Məlum oldu ki, MMC balansında olan nəqliyyat vasitələrinin təmiri və onların ehtiyyat hissələrinin satın alınması üzrə 243.283,43 manat dəyərində müqavilə “RN STRONG” MMC ilə 23.11.2023-cü ildə bağlayıb. Müqavilənin başlanma tarixi 17.11.2023-cü il, bitmə tarixi 17.11.2024-cü ilə müəyyən edilib.

MMC balansında olan nəqliyyat vasitələrinin təmiri və onların ehtiyyat hissələrinin satın alınması üzrə 292.669,85 manat dəyərində müqavilə “İDEAL MOTORS” MMC ilə 19.04.2023-cü ildə bağlayıb. Müqavilənin başlanma tarixi 13.04.2023-cü il, bitmə tarixi 31.12.2023-cü ilə müəyyən edilib.

“Kadastr və Yerquruluşu Layihə-Tədqiqat Mərkəzi” MMC nəqliyyat vasitələrinin təmiri və onların ehtiyyat hissələrinin satın alınması üzrə 494.625,32 manat dəyərində bir müqavilə də 14.01.2022-ci ildə “ŞƏRQMOTORS” MMC ilə bağlayıb. Bu müqavilənin başlanma tarixi 14.01.2022-ci il, bitmə tarixi 10.01.2023-cü ilə müəyyən edilib.

Göründüyü kimi “Kadastr və Yerquruluşu Layihə-Tədqiqat Mərkəzi” MMC 2022-ci ilin yanvarından 2025-ci ilin aprelinə qədər balansında olan nəqliyyat vasitələrinin təmiri və onların ehtiyyat hissələrinin satın alınmasına ümumi olaraq 2 525 312 manat vəsait ayırıb.

Buradan ortaya sual çıxır. “Kadastr və Yerquruluşu Layihə-Tədqiqat Mərkəzi” MMC-nin balansında nə qədər avtomobil var ki, hər il servis xidmətinin göstərilməsinə yüzminlərlə dövlət vəsaiti ayrılır. İnternet axtarış sistemləri üzərindən apardığımız araşdırma zamanı bu barədə heç bir məlumat tapa bilmədik. Yalnız “emlak .gov.az” saytında Daşınmaz Əmlakın Dövlət Kadastrı və Reyestri publik hüquqi şəxsinin tabeliyində “Kadastr və Yerquruluşu Layihə-Tədqiqat Mərkəzi” MMC -nin Bakı şəhəri üzrə 15 noyabr 2022-ci il tarixində keçirilmiş hərracda 16 avtomobilin satışa çıxarıldığı göstərilir.

Bundan əlavə 16 may 2023-ci il tarixində “Daşınmaz Əmlakın Dövlət Kadastrı və Reyestri” publik hüquqi şəxsinin tabeliyində “Kadastr və Yerquruluşu Layihə-Tədqiqat Mərkəzi” MMC 3, iki Nissan Patrol və bir MITSUBISHI PAJERO markalı avtomobil satışa çıxardığını elan edib.

Bir maraqlı nüans da “İDEAL MOTORS” MMC ilə bağlanan ən son müqavilədə var. Məsələn Mərkəz bir “Volskvagen Passat 2013 WVWZZZ3CZDP035350” markalı avtomobilə 10 ədəd yağ filteri, 10 ədəd hava filteri, 50 litr mühərrik yağı, 4 ədəd əyləc diski, 8 ədəd təkər kimi.

Bir “Nissan X-Trail 2008 JN1TBNT30Z0111670” markalı avtomobilə 30 ədəd yağ filteri, 30 ədəd hava filteri, 30 ədəd kondisioner filtri, 450 litr mühərrik yağı,32 ədəd təkər, 10 ədəd akkumulyator, 30 ədəd ön amartizator kimi avtomobil ehtiyyat hissələrinin alınması və dəyişdirilməsi xidmətinə küllü miqdarda vəsait xərcləyir.Burada göstərilən markada neçə avtomobilə xidmət göstəriləcəyi bəlli olmur. Mərkəzin sifariş verdiyi ehtiyyat hissələrindən belə çıxır ki, hər bir avtomobil yenidən qurulur. Sayı bəlli olmadığından səkkiz yüz min manatın neçə avtomobilə servis xidmətinin göstərilməsinə ayrıldığını da sual altında qoyur. Sual altında qalan bir məsələ də odur ki, ayrılan bu vəsaitlər həqiqtən də avtomobillərə ehtiyyat hissələrinin alınmasına xərclənir, yoxsa…

İnternet axtarış sistemlərində Daşınmaz Əmlakın Dövlət Kadastrı və Reyestri publik hüquqi şəxsinin tabeliyində “Kadastr və Yerquruluşu Layihə-Tədqiqat Mərkəzi” MMC-nin direktoru vəzifəsini kimin tutuğunu öyrənə bilmədik. Mərkəzin heç rəsmi saytı da yoxdu. Bütün bunlar isə MMC-nin sanki qapalı bir müəssisə olmasından xəbər verir.

Qeyd edək ki, Daşınmaz Əmlakın Dövlət Kadastrı və Reyestri publik hüquqi şəxsin İdarə Heyətinin sədri Nigar Alimovadır. O, bu vəzifəyə 2021-ci ildə təyin edilmişdir. Daha əvvəllər isə Vergilər Nazirliyinin aparatın rəhbəri vəzivəsində çalışıb.

Aktualinfo.org

Fövqəladə Hallar Nazirliyi (FHN) ötən il vəfat edən sabiq millət vəkili Hadi Rəcəblinin oğlu Vüsal Rəcəblinin sifarişi əsasında paytaxtın Nəsimi rayonu ərazisində inşa olunan 2 mərtəbəli (zirzəmili) obyektin istismarına icazə verib.

Yeniavaz.com xəbər verir ki, Azərbaycan Milli Avtomobil Klubunun (AMAK) prezidenti olan Vüsal Rəcəblinin tikdirdiyi obyektin ümumi sahəsi 275 kv. metrdir.

Şəhərin mərkəzi hissəsində – Nizami küçəsi 121 F ünvanında istismara verilən obyektin layihəçisi “Israıl Ahmadov Investment” MMC olub.

Məlumat üçün bildirək ki, Vüsal Rəcəbli özünün sosial şəbəkə hesabında göstərib ki, o, hazırda energetika nazirinin müşaviri vəzifəsində çalışır.

Azərbaycan Milli Avtomobil Klubunun sosial şəbəkə hesablarında isə Vüsal Rəcəblini bu qurumun prezidenti kimi təqdim ediblər.

Qeyd edək ki, nizamnamə kapitalı 100 manat olan “Azərbaycan Milli Avtomobil Klubu” MMC (VÖEN – 1404041941) 12 dekabr 2017-ci ildə dövlət qeydiyyatına alınıb. MMC-nin hüquqi ünvanı Nəsimi rayonu, Qulu Quliyev, ev 8, mənzil 40-da yerləşir. Şirkətin qanuni təmsilçisi Həsənova Cülyetta Ənvər qızıdır.

Həsənova Cülyetta Ənvər qızının qanuni təmsilçi olduğu və Qulu Quliyev, ev 8, mənzil 40-da yerləşən daha bir şirkət “VRS Consulting” MMC (VÖEN-1402452351) adlanır.

Qeyd olunan hüquqi ünvanda Hadi Rəcəblinin gəlini Səidə Rəcəblinin rəhbərlik etdiyi “VRS” MMC (VÖEN-14022370521) adlı şirkət də dövlət qeydiyyatına alınıb.

Azərbaycan parlamentinin adı Milli Məclisdir. Ancaq illərdir orada kreslosundan vaz keçməyən bəzi deputatlarla sıravi vətəndaşlar arasında çoxdan körpülər yandırılıb. Çünki orada barmaqla sayılacaq qədər millət vəkili var ki, seçildiyi dairənin dərdinə şərik olur, problemlərə canla-başla yanaşır. Lakin elələri də var ki, seçilməsindən aylar keçməsinə baxmayaraq, nə parlamentdə izləri var, nə də seçicilərlə birbaşa təmasda görünürlər. Var olan isə yalnız bahalı kostyumlar, qorxunc səssizlik və milyonlarla dəyərləndirilən biznes imperiyalarının kölgəsində gizlənmiş mandatlardır.

Parlament daxilində “köhnələr” və “yenilər” arasında sanki görünməyən bir qarşıdurma hökm sürür. Təəssüf ki, bir çox yeni deputatlar da sələfləri kimi susqunluğu “siyasi mədəniyyət” kimi təqdim etməyə çalışır. Bəziləri çıxış etməklə yox, sosial şəbəkələrdə selfilərlə, ya da tenderlərdə iştirak edən şirkətlərinin idarəetməsi ilə gündəmə gəlir. Toxunulmazlıq statusu bəziləri üçün artıq cəmiyyətə xidmət aləti yox, sərvət yığmaq vasitəsinə çevrilib.

İllərlə eyni dairədən seçilən, lakin parlament tribunasından bir dəfə də olsun danışmayan deputatlar var. Əvəzində onların biznesləri böyüyür: restoranlar, yanacaqdoldurma məntəqələri, tikinti şirkətləri, banklar və ticarət mərkəzləri… Yəni millət vəkili mandatı bəzi hallarda ictimai maraqları yox, şəxsi sərvətləri qorumaq üçün istifadə olunur.

Əslində səbəb aydındır: susmaq daha sərfəlidir. Seçildiyin dairənin problemlərini parlamentdə səsləndirmək artıq bir siyasi cəsarət tələb edir. Amma bəzi deputatlar üçün mandat cəsarət simvolu yox, konformizm qalxanıdır. Danışmaq yox, susmaqla irəli getmək istəyənlər üçün isə vətəndaşın problemi yox, şəxsi komfortu ön plandadır.

Parlament xalqın səsinin, dövlətin iradəsinin təmsil olunduğu mərkəzdir. Amma orada hazırda sadəcə toxunulmazlıqla silahlanmış, şəxsi maraqlarını qorumağa çalışan bir çevrə formalaşıb. Və bu çevrənin əksəriyyəti “millət vəkili” statusunun məsuliyyətini və ağırlığını unutmuş kimidir. Ən düşündürücü məqamlardan biri isə odur ki, yeni nəsildən olan bəzi gənc deputatlar da artıq bu çevrəyə tabe olublar. Onlar da anlayıblar ki, danışsan, diqqət çəkərsən, tənqid olarsan. Amma sussan, brend kostyum geyinsən, bahalı maşında poz versən, tədbirlərdə “ön sırada” dayansan, həm mandatın təhlükədə olmaz, həm də biznesin çiçəklənər.

Ən acınacaqlısı isə budur: cəmiyyət bu reallıqla barışmaq üzrədir. İctimai gözlənti azalır və artıq parlamentdəki bu deputatlardan qanun təşəbbüsü, prinsipial mövqe, ya da seçicinin dərdinə şəriklik gözlənilmir. Əksində, sadəcə kimin daha bahalı saat taxacağı, kimin daha böyük villa inşa edəcəyi, kimin biznesinin daha geniş olacağı maraq doğurur…

Yenicağ.az

Azərbaycan Dövlət İqtisad Universitetinin Dərbənd filialının məzunları 2 ildir ki, diplomlarını ala bilmirlər.

Bu barədə Oxu24.com saytı yaxın vaxtlarda daha bir informasiya yayımlamışdı.Məsələnin kütləvi hal aldığını nəzərə alaraq yenidən bu mövzuya qayıtmalı olduq.

Universitetin 2023/2024-cü il məzunları diplom ala bilmədiklərinə görə, heç yerdə iş tapa bilmədiklərini bildirirlər. Üstəlik də həmin şəxslərə diplom verilmədiyi üçün onlar hərbi xidməti 1 il yox,1 il 6 ay müddətinə keçməli olurlar.Bu isə onların hüquqlarının kobud şəkildə pozulmasıdır.

Yaranan problemlə ilə bağlı Oxu24.com saytına müraciət edən Elnur Babayev bildirir ki, özü ilə birlikdə 70-ə yaxın tələbə bu problemlə üzləşib.

“Yaxınlarda Rusiya vətəndaşları olan tələbələrin diplomları verilib.Amma bizim diplomu vermirlər.Bizə deyirlər ki,Siz DİM vasitəsi ilə qəbul olmamısınız. Oranın daxili qaydaları ilə qəbul olunmusunuz.Halbuki,bizdən əvvəlki və sonakı kursların hamısı o qayda ilə Universitetə daxil olub. Bunun başqa yolu yoxdur.Dərbənd filialına daxil olmaq üçün oranın daxili imtahanlarını verib qəbul olmaq mümkündür.Bütün qəbullar da bu qaydada aparılıb”,-deyə diplom ala bilməyən şəxs bildirib.

Oxu24com məsələ ilə bağlı araşdırma aparan zaman ziddiyətli məqamla da üzləşib.Azərbaycan Respublikası Elm və Təhsil Nazirliyinin diplomunu ala bilməyən tələbələrə verdiyi rəsmi cavabda qəbulların yalnız Dövlət İmtahan Mərkəzinin (DİM) imtahanları əsasında həyata keçirildiyi qeyd olunur. Ancaq UNEC-in Dərbənd filialının rəsmi saytında bunun tam əksi qeyd olunub.Saytda qeyd olunur ki, sözügedən filiala tələbə qəbulu Rusiya Federasiyasının tələbələrin qəbul qaydalarına əsasən aparılır.

70 tələbə bir yana, UNEC bir yana: Diplomlar niyə verilmir?

Qeyd edək ki,filial azərbaycanlıların sıx yaşadığı Dərbənd şəhərində soydaşlarımızın ali təhsil almasına kömək məqsədi ilə ümummilli lider Heydər Əliyevin təşəbbüsü ilə 1993-cü ildə yaradılıb.

Azərbaycan Respublikasının Prezidentinin göstərişi ilə İqtisad Universitetinin Dərbənd filialının yeni təhsil kompleksi tikilərək istifadəyə verilib. Müasir tələblərə cavab verən kampus 1500 tələbə üçün nəzərdə tutulub. Kampusa 200 nəfərlik tələbə yataqxanası, kitabxana, yeməkxana, idman zalı və hovuz, həmçinin 200 nəfərlik lisey də daxildir.

Rusiya Federasiyası Elm və Təhsil Nazirliyinin 25 noyabr 2015-сi il tarixli 2220 saylı əmri ilə UNEC-in Dərbənd filialının fəaliyyəti üçün lisenziya verilib. 2016/2017-ci tədris ili üçün ali təhsilin bakalavr pilləsi üzrə UNEC-in Dərbənd filialına Rusiya Federasiyası Elm və Təhsil Nazirliyinin 14 oktyabr 2015-ci il tarixli 1147 saylı əmrinə uyğun hazırlanan Qəbul Qaydaları təsdiq edilib. Qəbul Qaydaları UNEC-in Elmi Şurasının 25 dekabr 2015-ci il tarixli 142 saylı qərarı ilə təsdiq edilib.

2016-cı il noyabrın 28-də Azərbaycan Dövlət İqtisad Universitetinin Rusiya Federasiyasının Dağıstan Respublikasının Dərbənd şəhərindəki filialının rəsmi açılışı olub.

Filiala qəbul Rusiya Federasiyasında tələbələrin qəbul qaydalarına əsasən aparılır.

Əyani təhsil formsı üzrə tədris rus dilində, əyani-qiyabi və qiyabi təhsil formaları üzrə isə rus və azərbaycan dillərində aparılır.

Sayt mövzunu diqqətdə saxlayacaq.

Neftçilərin Hüquqlarının Müdafiəsi Təşkilatının (NHMT) sədri, tanınmış hüquq müdafiəçisi Mirvari Qəhrəmanlı növbəti dəfə işçilərin üzləşdikləri problemlə bağlı çıxış edib.

XALQ.AZ xəbər verir ki, bu dəfə işçilərdən birinə istinadla məlumatı açıqlayan Mirvari Qəhrəmanlı əlaqədar qurum və şəxsləri tədbir görməyə səsləyib. Hüquq müdafiəçisinin bununla bağlı açıqlamasında deyilir: ”

İşçi bildirir ki, SOCAR AQŞ hələ də onların mart ayının əmək haqqısını ödəməyib.

Bu halda qurum Azərbaycan Respublikası Əmək Məcəlləsinin 178. 1. maddəsində deyildiyi kimi – hər gecikdirilmiş gün üçün işçiyə əmək haqqının azı bir faizi məbləğində ödəniş verməlidir”.

Qeyd edək ki, “SOCAR AQŞ” MMC 2007-ci ildə qazma və quyu xidmətləri göstərən birgə müəssisə kimi təsis edilib.

Tərəflər və iştirak payları isə SOCAR-13.38% , Nobel Oil Ltd., – 73.77% , Abşeron Qazma MMC -12.85% qədərindədir.

SOCAQ AQS-ın baş direktoru Samir Mollayevdir.