Müxtəlif şirkətlərdə rəhbər vəzifələrdə çalışmış Ramin İsayevin (həmçinin Ramin Ali Hakan kimi tanınır) dələduzluq fəaliyyəti ilə bağlı yeni detallar ortaya çıxıb. Son araşdırmalar zamanı Ramin İsayevin Massaçusets Texnologiya İnstitutunda (MIT) təhsil aldığı dövrdə törətdiyi saxtakarlıq və plagiatla bağlı faktlar aşkarlanıb. Məlum olub ki, 2025-ci ilin yanvarında MIT tərəfindən Ramin İsayevin diplomu, MBA dərəcəsi və məzun statusuna əsaslanan bütün imtiyazları rəsmi şəkildə ləğv edilib. Bu qərar Ramın İsayevin 2016-2018-ci illər ərzində MIT-də təhsil alarkən etdiyi qayda pozuntuları və dələduzluq faktlarının, həmçinin çoxsaylı plagiat və tabeliyində olan işçiləri öz əvəzinə təhsil çərçivəsində verilən tapşırıqları yerinə yetirməyə məcbur etməsi hallarının uzunmüddətli araşdırmasının nəticəsində verilib.

Hurriyyet.az xəbər verir ki, MIT-nin İntizam Komitəsi Ramin İsayevin plagiatla məşğul olmasını, rəhbərlik etdiyi şirkətin əməkdaşlarını öz yerinə təhsil ilə bağlı tapşırıqları və işləri yerinə yetirməyə məcbur etdiyini təsdiqləyib. Müəyyən edilib ki, o, faktiki olaraq öz təhsilini tabeliyində olan əməkdaşlarına tapşırıb.

MIT-nin kommunikasiyalar idarəsinin rəhbəri Kimberli Allen də jurnalist sorğusuna cavab olaraq 2016-cı ilin payızından 2018-ci ilin yazına kimi təhsil müəssisəsində aspiranturada oxuyan R.İsayevə verilən diplomun 2025-ci il yanvarın 16-da ləğv edildiyini təsdiqləyib. Haqqın.az saytı R.İsayevin yaxınlarının redaksiyaya müraciətindən sonra mümkün anlaşılmazlıqları aradan qaldırmaq üçün yenidən xanım Allenlə əlaqə saxlayıb və o, bir daha Ramin İsayevin MIT-dən aldığı elmi dərəcəsinin ləğv olunduğunu təsdiqləyib.

Xatırladaq ki, Ramin İsayev 16 milyon manat məbləğində kreditin mənimsənilməsi ilə əlaqədar Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilib. Kredit 2012-2014-cü il dövründə Azərbaycan Beynəlxalq Bankı tərəfindən "Baghlan Group" ilə əlaqəli şirkətə verilib, harada ki Ramin İsayev rəhbər vəzifə tutub.

Araşdırmalar zamanı Ramin İsayevin fəaliyyətinin digər gizli təfərrüatları da üzə çıxmağa başlayıb. İsayevin əməlləri nəticəsində dəymiş ziyan 54 milyon manat qiymətləndirilir ki, bu da ilkin hesablamadan 4 dəfə çoxdur.

Ramin İsayevə qarşı Cinayət Məcəlləsinin 179.4-cü (xüsusilə külli miqdarda ziyan vurmaqla mənimsəmə və israf etmə) və 193-1.3.2-ci (cinayət yolu ilə əldə edilmiş pul vəsaitlərinin leqallaşdırılması) maddələri üzrə yekun ittiham irəli sürülüb.

Hazırda cinayət işi bağlı məhkəmə prosesi davam edir. İstintaq materiallarına əsasən, Ramin İsayev rəhbərlik etdiyi şirkətin korporativ inkişafı üçün nəzərdə tutulmuş vəsaitlərini sistematik olaraq şəxsi aktivlərinə yönəldib. Hazırda istintaq onun təsdiqlənən akademik fırıldaqçılığı ilə maliyyə cinayətləri arasındakı mümkün əlaqələri araşdırmağa davam edir.

“İmperial” MTK tikinti şitkəti ilə bağlı ilginc məlumatlar əldə etmişik.

Belə ki, Nizami rayonu, Tofiq Abbasov küçəsi, daha dəqiq, “Hədəf” liseyin yanında inşa edilən 18 mərtəbəli yaşayış binalarında hər an fövqalada hadisə baş verə bilər. Lahiyədə nəzərdə tutulan binalara əlavə olaraq daha bir mərtəbə əlavə olunub.

Bunu bilən sakinlər hiddətli şəkildə etirazlarını bildiriblər. Məlumatda daha sonra vurğulanır ki, artıq bir neçə ailəyə qanunsuz olaraq əlavə edilən mənzillərdən satılıb. Hətta elektrik enerjisinin oğurluq yolu ilə istifdə edildiyi də məlumatlar sırsındadir.

Binanın şaxtsında olan bütün faktlar öz təsdiqini tapır. Məsələ ilə bağlı adı hallanan “İmperial” MTK rəhbəri Arif müəllimlə əlaqə saxlamağa çalışdıq. Qarşı tərəf məsələyə münasibət bildirmək üçün əməkdaşlarımızı baş ofisə dəvət etdi. Söhbət zamanı Arif Mustafayev qeyd etdi ki, Bakı şəhərində bütün binalar eyni vəziyyətdədir. Yəni, tək “İMPERİAL” MTK deyil, digər MTK-da hündür mərtəbəli yaşayış binalara daha əlavə bir mərtəbə əlavə olunur. FHN nə üçün məsuliyyətdən özünü kənar tutur?

Elə buradaca bütün dövlət qurumlarına, o cümlədən Baş Prokurorluq Yanında Korrupsiyaya Qarşı Mübarizə Baş İdarəsinə məlumat üçün bildiririk ki, yuxarıda göstərilən MTK rəhbərliyi qanunsuz olaraq lahiyədən kənar mənzillər tikdirərək müxtəlif vətəndaşlara satmışdır.

Əgər yaşayış binasında hər hansısa bir bədbaxt hadisə baş verəcəksə, məsuliyyət bir başa MTK rəhbəri Arif və ona himayadarlıq edən şəxslərin üzərindədir. Mövzü diqqətimizdədir.

Yenixeber.org

Azərbaycan İqtisad Universitetinin (UNEC) Dərbənd filialının məzunları diplomlarını ala bilmirlər.

Bu barədə maliyyə ixtisasında təhsil almış və məzun olan tələbələr Oxu.Az-a şikayət ünvanlayıblar.

Onlar bildirirlər ki, Rusiya vətəndaşları diplomlarını aldı, lakin azərbaycanlı 70 tələbə hələ də sənədləri ala bilmirlər:

"2020-ci ildə UNEC-in Dərbənd filialına qəbul olunmuşam. Qiyabi qəbul olanlar beş il, əyanilər isə dörd il təhsil alır. Nə biz 2024-cü il məzunları, nə də ki, 2023-cü il məzunları olan tələbələr diplomlarını ala bilirlər. Elm və Təhsil Nazirliyinə müraciət edirik. Bizə cavab verilir ki, siz Dövlət İmtahan Mərkəzinin keçirdiyi qəbul imtahanında iştirak edərək qəbul olmamısınız deyə, tələbələrin qəbulu, tədris prosesi, diplom verilməsi araşdırılır.

Biz 2023-2024 -cü il məzunları olaraq 70 tələbəyik. Hamımız da kəsrsiz tədris müddətini başa vurmuşuq. Rektor tərəfindən müvəffəqiyyətlə məzun olduğumuza dair arayış verilib. Artıq iki ilə yaxındır araşdırma aparılır. İki ildir 70 tələbəni araşdırıb bitirə bilmirlər?

Bəlkə də şübhə duyulur ki, biz karantin müddətində dərsdə iştirak etməmişik. Amma belə bir hal baş verməyib. Bütün tələbələr təyyarə ilə Mahaçqalaya, oradan da Dərbəndə gediblər. Qroznıya, Mineralnıye Vodıya da uçmuşuq. Bir saat ərzində belə bütün məzunların məlumatlarını araşdıra bilərlər.

Hətta qəzadan sonra Dağıstana təyyarə uçmadı. Tələbələrin adları Dövlət Sərhəd Xidmətinə verildi. Tələbələr quru sərhəd ilə Dağıstana getdi. Biz çətinliklərə baxmayaraq, dərslərimizi buraxmadıq, əziyyətlə yollarda qalıb oxuduq, indi də diplom ala bilmirik.

Tələbələrin bəzilərinə çağırış gəldi deyə, hərbi xidmətə yollandılar. İndi onlar diplomu yoxdur deyə, bir il altı ay xidmət çəkirlər.

Bizim haqlarımız kobud şəkildə pozulur. Əziyyətimiz yerdə qalır".

Məsələ ilə bağlı UNEC-in İctimaiyyətlə əlaqələr şöbəsinin müdiri Elnarə Məmmədova Oxu.Az-a açıqlamasında qeyd edib ki, Elm və Təhsil Nazirliyi (ETN) tərəfindən diplom blankları UNEC-ə verilən kimi məzunlara diplomlar təqdim olunacaq:

"Hazırda nazirlik tərəfindən araşdırma aparıldığı bildirilir".

Məsələ ilə bağlı Elm və Təhsil Nazirliyinə də sorğu ünvanlanıb.

Qeyd edək ki, 2016-cı il noyabrın 28-də Azərbaycan Dövlət İqtisad Universitetinin Rusiya Federasiyasının Dağıstan Respublikasının Dərbənd şəhərindəki filialının rəsmi açılışı olub.

Dərbənd filialına qəbul Rusiya Federasiyasının ali təhsil müəssisələrinə qəbul qaydalarına əsasən aparılır.

Maraqlıdır, belə olan halda tələbələrin diplomlarını DİM vasitəsilə qəbul olunmadıqları üçün araşdırma aparılır deyərək, verməmək nə qədər doğru yanaşmadır?

Sualımıza cavab olaraq təhsil məsələləri üzrə ekspert Ramin Nurəliyev bildirib ki, sözügedən filiala qəbul Dövlət İmtahan Mərkəzinin (DİM) qəbul imtahanı əsasında aparılmadığı üçün araşdırma aparılır deyilirsə, bu doğru yanaşma deyil:

"Daha doğru şərh vermək üçün UNEC-in Elm və Təhsil Nazirliyi ilə olan nizamnaməsinə baxmaq lazımdır.

Ümumilikdə, xarici filiallarda qəbul prosesi bir az fərqlidir.

UNEC-in Dərbənd filialının nizamnaməsinə baxmaq lazımdır. Xarici filiallarda proses bir az fərqlidir.

Məsələn, Azərbaycanda M.V.Lomonosov adına Moskva Dövlət Universitetinin, İ.M.Seçenov adına Birinci Moskva Dövlət Tibb Universitetinin filialları var. Bura qəbul Azərbaycanın qəbul qaydaları ilə yanaşı, Rusiyanın özünün keçirdiyi qəbul imtahanı əsasında aparılır.

UNEC-in Dərbənd filialına qəbul da eyni qaydadadır. Tələbə qəbulu həm Azərbaycanın daxili imtahanı, həm də Rusiya qəbul qaydaları əsasında aparılır. Diplomları da UNEC verir. Təhsil Nazirliyi bu diplomları tanımırsa, burada artıq problem var deməkdir.

Nazirlik DİM vasitəsilə qəbul olmamısınız deyə araşdırma aparılır deyirsə, bu, doğru yanaşma deyil. Çünki xarici ölkə vətəndaşı da DİM vasitəsilə qəbul olunmayıb".

Ekspert qeyd edib ki, DİM imtahanları vasitəsilə tələbə qəbulu yalnız ölkə hüdudları çərçivəsində keçərlidir:

"Dərbənd filialı da Azərbaycan ali təhsil müəssisəsinin filialıdır. Azərbaycan ali təhsil müəssisəsi bunu tanıdığı üçün ETN də tanımalıdır. Buna görə DİM-i şərt kimi qoymamalıdır. Çünki DİM-in qəbul imtahanı ölkə hüdudları çərçivəsində keçərlidir. Ölkə hüdudlarından kənarda bu, keçərli deyil. Qurumun vasitəsilə ölkə hüdudlarından kənarda qəbul keçirilə bilməz.

Azərbaycan ali təhsil müəssisələrində ikinci ali təhsil almaq imkanı var. Bura da qəbul DİM vasitəsilə aparılmır. O zaman ETN ikinci ali təhsil alanlara diplom verməməlidir? Bu heç doğru cavab və yanaşma deyil.

Xarici ölkələrdə fililal üçün DİM vasitəsilə tələbə qəbulu keçərli deyil. Çünki ali təhsil müəssisəsi xarici filialda istədiyi formada tələbə qəbulu həyata keçirə bilər.

Düzdür, burada ETN ilə UNEC arasında razılıq nizamnaməsinə baxmaq lazımdır. Buna əsasən müəyyən fikirlər bildirildikdə, daha doğru olar. Lakin ümumi beynəlxalq prizmadan yanaşdıqda, söylədiyim qaydalar keçərlidir".

Onun sözlərinə görə, ETN tələbələrin diplomlarını almalarına dəstək verməlidir:

"Bizim ali təhsil müəssisəmiz o qədər inkişaf edib ki, Rusiyada filialı var. Bu, bizim qürur mənbəyimizdir. Bu gün etibar sarsılarsa, sabah digər tələbələrin qəbulu üçün əngəllər ortaya çıxa bilər. Ona görə də sözügedən məsələnin həlli yolunda ETN tələbələrə dəstək olmalıdır".

Ramin Nurəliyev UNEC-in Dərbənd filialına tələbə qəbulu prosesi barədə də məlumat verib:

"Bu filialın açılmasında məqsəd Dərbənddəki türkdilli xalqların, bizim soydaşlarımızın təhsilinə dəstək verilməsidir. Filial ümummilli lider Heydər Əliyevin təşəbbüsü ilə açılıb.

Qəbul prosesi üç istiqamətdə aparılır. Bizi maraqlandıran əsas iki istiqamətdir. Birincisi türk soylu vətəndaşlar, Rusiyanın digər vətəndaşlarının müraciətidir - bu, daxili imtahan ilə həyata keçirilir. Yəni Rusiya dövlətinin keçirdiyi qəbul imtahanı əsasında aparılır.

İkinci müraciət isə Rusiyadan kənarda qalan xarici tələbələrin müraciətdir. Bu zaman azərbaycanlılar müraciət edə bilər. Burada ayrıca olaraq riyaziyyat, coğrafiya, Azərbaycan dili və rus dilindən imtahan keçirilir, yaxşı nəticə əldə edənlər Dərbənd filialına qəbul oluna bilir.

Filial qanuni olaraq fəaliyyət göstərir. Rusiya tərəfindən də lisenziya verilib".

Xatırladaq ki, sözügedən tələbələr aprelin 3-də Oxu.Az-a müraciət edərək, diplomlarını ala bilmədiklərini söyləmişdilər.

“AQTA-nın cərimələrı, yoxlamaları kifayət etmir. Özü də belə bürokratik yoxlamalar. Qida sahəsində yoxlamalar dəyişməlidir. Hökümətin biznes qurmaq üçün yaratdığı toxunulmazlıq şəraitindən sahibkarlar bol istifadə edirlər, yəni onları yoxlamaq olmaz, yoxlama planlı olmalıdır, əvvəlcədən deyilməlidir ki, gəlirik filan şeyi yoxlamağa və s”.

TEREF Ajans.az-a istinadən xəbər verir ki, bu barədə Azad İstehlakçılar Birliyinin sədri Eyyub Hüseynov deyib. O bildirib ki, AQTA-nın qəfil yoxlama aparmaq səlahiyyəti olmalıdır:

“Lazım olsa, gecə də yoxlanış apara bilsinlər, çünki şadlıq evləri o vaxt başlayır işə. Nə qədər ki, bu cür qəfil yoxlamalar yoxdur, bu hadisələr də davam edəcək, heç bir cərimələr fayda verməyəcək. Ona görə AQTA-nin əsasnaməsində dəyişiklik aparılmalıdır, onlar xəbərdarlıqsız yoxlama imkanlarına malik olmalıdılar.

Üstəlik bu sahədə tələb təklifi üstələyir. İnsanlar şadlıq evində toy etmək üçün növbəyə durublar. Harada ki, tələb təklifdən çoxdur, orada mütləq keyfiyyətsiz xidmət meydana çıxır. Ona görə toy edən vətəndaş da ilk öncə gedib şadlıq evinin mətbəxinə baxmalıdır. Yəni burada həm şadlıq evlərinin sahibləri, həm də vətəndaşlar məsuliyyətli olmalıdır”.

Eyyub Hüseynov eyni zamanda bildirib ki, AQTA-ya məhsulla bağlı şikayət göndərib və cavab gözləyir:

“AQTA-nın işini test etmək üçün bir material göndərdim ki, görüm tez reaksiya veriləcək? Dünən bir istehlakçı gətirib, "Batonçik" adlı konfetdir, "Mirzəoğlu MMC"də istehsal olunur, Buzovnada. Vətəndaşlar bunu Rusiya məhsulu kimi alırlar. Göndərdim AQTA-nin müvafiq şöbəsinə.

Çox mübarizə apardım ki, AQTA-ya ictimai dəstək verək, lakin bu qurum heç bir ictimai dəstəyə, KİV ilə effektiv işləməyə üstünlük vermir. Nə qədər belə olacaqsa, zəhərlənmələr də olacaq. Təsadüfi deyil ki, AQTA-nın göstərdiyi rəqəmlərə görə Azərbaycanda zəhərlənmələrin statistikası ümumdünya göstəricisindən 1400 dəfə azdır. Bu yalançı statistikalara son qoyulmalıdır”.

Eyyub Hüseynov saxta içkilərin aşkarlanması problemindən danışarkən qeyd edib ki, AQTA-nın işində belə bir qeyri-şəffaflıq mövcuddur:

“Məsələnin son nəticəyə qədər təqib edilməsi ictimaiyyətə açıqlanmır. Bu, çox pis bir cəhətdir. Yaxşı olardı ki, bu məsələlər şəffaflaşdırılsın. Əhaliyə yarımçıq informasiya lazım deyil, o məhsulun ilk mənbəyinə gedib çıxılması lazımdır”.

“Bağırov” körpüsünün növbəti dəfə su altında qalmasına səbəb yenidənqurma zamanı buraxılmış layihə və nəzarət səhvləri olub. Körpünün 2010-cu illərdəki rekonstruksiyası zamanı giriş yolları uzadılıb və səviyyə 2 metrə yaxın endirilib. Bu isə nəticədə həmin əraziyə toplanan suyun miqdarını kəskin artırıb.

Tribunainfo.az xəbər verir ki, bu sözləri memar Elçin Əliyev leysan xarakterli yağışlardan sonra sözügedən körpünü su basma səbəbi barədə danışarkən deyib. O bildirib ki, körpüdə aparılan yenidənqurma zamanı bu cür risklər nəzərə alınmayıb:

“2010-cu illərin əvvəllərində Bağırov körpüsü yenidən quruldu. Görülən işlərin nəticəsində, körpüyə giriş yolu (aeroport tərəfdən) təxminən 2 metr aşağı salındı və uzunluğu əlavə 500–600 metr artırıldı. Bu isə əvvəlki dövrlərlə müqayisədə körpünün altında daha çox su yığılmasına səbəb oldu.

Maraqlıdır, mütəxəssislər belə bir vəziyyəti əvvəlcədən görürdülərmi (görməmələri mümkün deyildi), amma körpünün yenidən qurulması zamanı suyu çəkən nasosların sayı və kanalizasiya ötürücülük qabiliyyəti əvvəlki səviyyədə saxlanıldı. Bu da, nəticədə, körpünün altındakı sahənin tez-tez su altında qalmasına və hərəkətin dayanmasına gətirib çıxardı. Bunu layihəçilərin səhvi hesab etmək olar.
Ən maraqlısı budur ki, yeni tikilmiş yan tunellərdə belə bir su basması müşahidə olunmur, çünki orada uyğun avadanlıq quraşdırılıb”.

Memar bildirib ki, aparılan yenidənqurma işləri belə faciəvi hallar və fəlakətlərlə müşayiət olunur:

“Halbuki işlərin şəffaf aparılması və dövlət nəzarətinin düzgün təşkili ilə bunların qarşısını almaq mümkün olardı”.

Xatırladaq ki, “Bağırov” körpüsündə yenidənqurma işləri 2008-2010-cu illərdə aparılıb. Yenidənqurma işləri Türkiyənin “Kolin” şirkəti tərəfindən həyata keçirilib. Sözügedən şirkət hazırda işğaldan azad edilmiş ərazilərdə bir sıra infrastruktur layihələrinin icrasında iştirak edir.
Şirkət Azərbaycan üçün strateji önəm daşıyan Füzuli-Şuşa avtomobil yolunun, Göygöldən Kəlbəcərə magistralın çəkilişində, Əhmədbəyli- Horadiz-Mincivan-Ağbənd avtomobil və Horadiz-Mincivan- Ağbənd dəmir yollarının, Qarabağda qurulan yeni hava limanlarının inşasında iştirakçıdır.

Fövqəladə Hallar Nazirliyinin Dövlət Yanğın Nəzarəti Xidməti daha bir yanğın təhlükəli obyektin fəaliyyətini dayandırıb.

Demokrat.az nazirliyə istinadən xəbər verir ki, Dövlət Yanğın Nəzarəti Xidməti tərəfindən Bakı şəhəri, Nəsimi rayonu, Alı Mustafayev küçəsi, 30/14 ünvanında yerləşən “Azər-Aqro LTD” Şirkətinə məxsus “Kəndli yarmarkası”nda keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki:

– obyekt avtomatik yanğınxəbərverici siqnalizasiya qurğusu və ilkin yanğınsöndürmə vasitələri ilə tam təmin olunmayıb;

– elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb, o cümlədən elektrik təsərrüfatına profilaktik baxış keçirilərək kabel və naqillərin izolyasiyasının gərginliyə qarşı müqaviməti ölçülməyib;

– obyekt yanğın su hovuzu ilə təmin olunmayıb;

– obyektin ərazisi yanar tullantılardan təmizlənməyib;

– pilləkən qəfəsinin tavan konstruksiyasının bəzədilməsində yanar material olan lambirindən istifadə olunub, taxta konstruksiyalara isə odadavamlı məhlul hopdurulmayıb;

– yanğın zamanı insanların təxliyə olunması üçün köçürmə planı tərtib olunmayıb;

– obyektin daşınmaz əmlakının icbarı sığorta şəhadətnaməsi təqdim edilməyib.

Beləliklə, mövcud vəziyyət onu göstərir ki, obyektin istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.

Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş “Kəndli yarmarkası”nın inzibati binasının fəaliyyətinin dayandırılması barədə qərar qəbul olunub.

Bu videosüjet ilk qarşımıza çıxanda düşündük ki, zarafatdır. Sonra gördük ki, yox, həqiqətdir və bir daha anladıq ki, Azərbaycan reallığında, bəzi vəzifəli şəxslərin timsalında primitivliyin, geridəqalmışlığın, görməmişlyin sərhədi, ucu-bucağı yoxmuş...

Süjetdən göründüyü kimi, Sumqayıtdakı məhəllələrin birində “besetka” tikiblər və Sumqayıtın bütün ölkəyə yayımlanan “Dünya tv” televiziyası da oradan yekə bir reportaj hazırlayıb. “Besetka”nın “açılışına” daha kimlər qatılmayıb – şəhərin millət vəkili, YAP Sumqayıt təşkilatının sədri, şəhər icra hakimiyyəti rəhbərliyinin nümayəndələri, “Qartal”adlı tikinti şirkətinin başçısı və s. Heyətə baxanda düşünürsən ki, bircə Baş nazir, nazirlər, parlament rəhbərliyi, xarici səfirlər çatışmır...

Əlbəttə, istənilən abadlıq işi təqdirəlayiqdir. Amma videoda gördüyünüz bu tikili nə məktəb, nə uşaq bağçası, nə tibb məntəqəsi, nə də başqa bir samballı sosial obyektdir. Adi “dominoxanadır”, “dominoxana”! Bunun nəyi və niyə reklam olunsun ki? Bundan ötrü kamera qarşısına çıxmağı, bunun çəkilişini aparıb ölkəyə yaymağı bir ağlı başında, savadlı, ziyalı, dünyagörüşlü adam özünə necə sığışdıra bilər axı?

Bu “möhtəşəm” tədbirə, "açılışa" qatılan, utanmadan televizyanı da çağırıb, özünü reklam etdirən vəzifəli, kostyumlu, qalstuklu “dayılar”ın təkcə buraya gəldiyi avtomobillərin qiyməti onların tikib ərsəyə gətirdikləri və minnət qoyduqları ”analoqu olmayan” “besetka”nın dəyərindən yəqin ki, yüz dəfələrlə bahadır.

“Qartal”-ın “toyuq hini dizaynında” tikdiyi bu “möhtəşəm memarlıq əsəri”nə maraqlı ad da qoyublar – “söhbətgah”. Məhəllə sakinləri isə bu “söhbətgah”ın dəmir barmaqlılqaları arxasından içəridə baş verənlərə baxıb, məəttəl qalırlar ki, burda nə böyük iş olub, nə vur-çatlasındır, nə çəkilşdir belə? Hələ utanmadan onların bəzilərini danışdırıb, “dominoxananı” və onu tikənləri təriflədirlər də...

İnsanları bu dərəcədə aşağılamaq, onlara “3-ün 5-ə” bir yarıtikiliyə görə minnət qoymaq, sonra da bunu reklam etmək nə şəhər rəhbərliyinə, nə hakim partiyanın şəhər təşkilatına, nə millət vəkilinə, nə də “Qartal”-ın sahibinə yaraşmır. Amma bəlkə də elə yaraşır...


Bu videonu paylaşmağımızın və şərh etməyimizin bir səbəbi də odur ki, qoy Bakıda, YAP və parlament rəhbərliyində də bu eybəcər, əttökən mənzərəni görsünlər. Bəlkə bu cür biabırçılıqlara bir “dur” deyən tapıldı...

“AzPolitika.info”

1988-ci il təvəllüdlü Süleymanov Ceyhun Akif oğlunun yanvarın 21-də müalicə aldığı “Medilife” klinikasında dünyasını dəyişməsi barədə xəbər verilib.
Mərhumun anası Afayət Süleymanova Musavat.com-la əlaqə saxlayaraq hadisənin təfərrüatı barədə danışıb.

Onun sözlərinə görə, oğlu Ceyhun Süleymanov babasildən əziyyət çəkdiyi üçün “Stimul” klinikasına müraciət edib. Orada həkim Ləman Xasıyevanın qəbulunda olub.

“Müayinə üçün “Stimul”a getmişdi. Ordan mənə zəng etdi. Dedi ki, təzyiqi olduğu üçün həkim ona iynə vurmağı təklif edib. İynəni də Ceyhun özü alıb gətirib. “Stimul”da iynəni vurduqdan sonra Ləman Xasıyeva oğluma deyib ki, burada narkoz yoxdur. Ona görə də Ceyhundan “Medilife” klinikasına getməsini istəyib. Ceyhun gedəndən sonra Ləman Xasıyeva da ora gəlib. Yolda Ceyhun mənimlə yenə danışdı”, – deyə mərhumun anası qeyd edib.


Afayət Süleymanova deyib ki, oğlu “Medilife” klinikasında olan zaman onunla yenidən əlaqə saxlayıb və yaxşı olduğunu bildirib: “Mənə dedi ki, 3-4 dəfə bağırsaqlarını yuyublar və hər şey qaydasında olub. Deyirdi ki, mama, çox rahatlamışam. Hətta klinikada olanda video da çəkmişdi. Ayaq üstə dayanıb, sağlam, özündə olan adam. Bir saat içində nə ola bilərdi?”

Ailəsi sonuncu danışıqdan sonra Ceyhun Süleymanovdan xəbər ala bilməyib. Bir neçə saat sonra onlara zəng edərək Ceyhunun dünyasını dəyişdiyini deyiblər: “Mən xəstə adamam. Ona görə də mənə bu barədə heç nə deməyiblər. Klinikada olanda Ceyhunun yanında iş yoldaşının oğlu olub. Onun sözlərinə görə, birdən həkimlər koridorda qaçmağa başlayıb. O da nə baş verdiyini soruşanda deyiblər ki, xəstəni ayılda bilmirik.

Hadisəni biləndən sonra kürəkənim və Ceyhunun əmisi oğlanları klinikaya gediblər. Görüblər ki, mərhumu palataya uzadıblar. Yanında da heç kim olmayıb. Oradan Sabunçuya, morqa aparıblar”.

Afayət Süleymanova bildirib ki, oğlunun ölümündən sonra nə həkim, nə də klinikadan kimsə onlara məlumat verib. Sadəcə, polisdə olan zaman həkim Ləman Xasıyevanın dediyi ilk məlumatdan xəbər tutublar.

“Müstəntiq bizə dedi ki, həkim Ləman Xasıyevadan izahat alıblar. Həkim izahatında deyib ki, Ceyhuna kofein vurublar. Deyiblər ki, təzyiqi düşüb. Oğlum özündə olub. Yaxşı, təzyiqi düşmüşdüsə, niyə müayinə edib bilməyiblər? İndi oğlumun ölümündən sonra deyirlər ki, təzyiqi düşüb. Ceyhuna iynə də aldırıblar. Sonra da həmin iynəni vurublar. Buradan aydın olur ki, həqiqəti demirlər. Nəyisə gizlədirlər. Sağlam adamın birdən-birə təzyiqi niyə düşdü?

İndi biz bilmirik ki, oğluma nə vurublar, nə ediblər. Bundan sonra da ayılmayıb. Ətraflı heç nə bilmirik. Ekspertizanın cavabının bir ay sonra çıxacağı deyilir. Ceyhunun ölümünə səbəb olanların layiqli cəza almasını, işin ədalətli araşdırılmasını tələb edirik. Bununla bağlı aidiyyəti qurumlara müraciət edəcəyik”, – deyə A.Süleymanova açıqlamasına əlavə edib.

Qeyd edək ki, mərhumun iki övladı olub.

Klinikadan Musavat.com-a bildirilib ki, hazırda mövzu ilə bağlı sualları cavablandıracaq məsul şəxs yoxdur.

Xatırladaq ki, ötən il jurnalist Fərahim İlqaroğlu anası Bahar Qasımovanın “Stimul Hospital”da sistem köçürüldükdən sonra dünyasını dəyişdiyini bildirib.