"Azərbaycan Yerüstü Nəqliyyat Agentliyi izah edə bilərsizmi necə olur ki, bu gün - 09.05.2025 saat 15:44-də bilet satdığınız bugünkü Xankəndi-Bakı reysini uşaqlar zamanında gözləyirlər və avtobus gəlmir. Zəng edən (141) zaman isə avtobus "16.00-da gedib biletim.az-dan şikayət yaza bilərsiniz" cavabı verirsiniz! Axı bir dəfə yazdıq, bu uşaqları biz dövlətimizə əmanət etmişik! Rəqəmsal İnkişaf və Nəqliyyat Nazirliyi qurumunuza bir nəzarət varmı?"

Pravda.az xəbər verir ki, bu barədə tanınmış həkim Ramil Həşimli bildirib.

"Bu özbaşınalığa əncam çəkilsin. Gəlməyən avtobusa necə bilet satılır? 2 saat öncəsinə qədər bilet satılan reys ləğv olunursa və ya dəyişdirilirsə niyə xəbər verilmir? Uşaqlar yolda məcbur şəhərdən-şəhərə taksi ilə gəlməli olacaqlar. Başlarına bir iş gələrsə kim cavabdeh olacaq? Gələn il uşağı Bakıdakı universitetlərdən birinə keçirməyi də düşünməyə bilmirəm artıq" - deyə, o əlavə edib.

Ayrı-ayrı ixtisaslar üzrə dövlət sifarişi ilə ali təhsil müəssisələrinin bakalavriat və əsas (baza ali) tibb təhsili səviyyələrində hər bir təhsilalana düşən illik təhsil xərclərinin miqdarı müəyyənləşib.

Baş nazir Əli Əsədov bununla bağlı qərar imzalayıb. Həmin qərara əsasən, bakalavriat üzrə hər bir təhsilalana düşən 4 illik ən yüksək təhsil haqqı fərqlidir. Belə ki, həmin təhsil xərcinə əsasən məsələ, "Bəstəkarlıq" fakültəsində bir tələbəyə 1 illik-9 min manat, 4 illik təhsil xərci olaraq 36 min manat ayrılırsa, bəzi ixtisaslar üzrə illik qiymətlər 2100-2400 arasında dəyişir.

Maraq doğuran odur ki, bu gün ölkədə ən reytinqli ixtisaslardan hesab edilən "Müalicə işi" fakültəsində bir tələbəyə illik 8000, 4 illik 32000 manat xərclənsə də, peşəkar həkimlərin sayı barmaqla sayılacaq qədərdir. Yaxud "Bəstəkarlıq" ixtisası üzrə 1 tələbəyə illik 9 min, 4 illik 36 min vəsait xərclənsə də, bu gün ölkədə əsərləri dillər əzbəri olan bəstəkarların sayı da çox azdır. Dövlət bir tələbə üçün bu qədər vəsait ayırdığı halda niyə ölkədə ixtisaslı kadrlar yetişmir?

Məsələ ilə bağlı təhsil üzrə ekspert Vüsal Kərimli "Cebheinfo.az"-a bildirib ki, dövlət tərəfindən ayrılan təhsil xərclərində incəsənət sahəsinə dövlət dəstəyi digər sahələrlə müqayisədə 2 -3 dəfə daha çox olması reallıqdır:

"Çünki həmin sahələr üzrə tələbə sayı çox az olur. Yəni, burada həmin sahələrdə söhbət keyfiyyətli təhsil aparılmasından getmir. Məsələn, ingilis dili, tarix müəllimliyi kimi ixtisaslara qəbul olan tələbələrin sayı minlərlə olduğu halda incəsənət sahəsi üzrə təhsil alanların sayı 10-50 nəfərdir. Bunun üçün dövlət mədəniyyət və incəsənət sahəsində kadr hazırlığını və onun təminatının olması üçün daha çox vəsait ayırır. Bu nöqteyi-nəzərdən məsələ anlaşılandır.

O ki qaldı niyə bu vəsaitin müqabilində əvvəlki kimi incəsənət xadimlərimizin yetişməməsinə, mən düşünürəm ki, incəsənət istedad tələb edən bir sahədir. Bu gün dünyada məşhur olmasa da, yaxşı incəsənət xadimlərimiz var. Həmin insanların yetişməsi üçün zamana ehtiyac var. Bir gənc məzun olan kimi iş tapacaq, məşhur olacaq deyə anlayış yoxdur. O illərlə öz üzərində işləməklə yerli, sonra da beynəlxalq aləmə çıxa bilir. Bu baxımdan, dövlətin cəmi bir neçə nəfər üçün daha çox vəsait ayırması anlaşılandır".

Ekspertin sözlərinə görə, dünyada bir tələbəyə ayrılan dövlət vəsaiti ölkədən-ölkəyə dəyişir:

"Məsələn, İngiltərənin bu il təyin etdiyi vəsaitə gəldikdə, bir tələbə üçün 9535 avro müəyyənləşdirib. Ancaq bu, yerli vətəndaş olan ingilis tələbələrə şamil olunur. Türkiyədə isə dövlət universitetlərində ödənişli təhsil yoxdur". Ekspert deyir ki, dövlət universitetlərində ayrılan vəsaitə əsasən tələbə o xərcləri doğrultmur: " Düşünürəm ki, tələbələr onu tam doğrulda bilmirlər.

Məsələ, ölkədə aqrar sahə ilə bağlı ixtisaslar yalnız Azərbaycan Dövlət Aqrar Universitetində tədris edilir. Orada təhsil haqlarını 100 faiz dövlət qarşılayır. Ancaq görünən odur ki, kənd təsərrüfatımız istədiyimiz qədər inkişaf edə bilmir və lazımi kadrlar yetişmir. Bunun da əsas səbəbi ondan ibarətdir ki, universitetlər regionda yerləşdiyi üçün cəlbedici olmur və həmin ali təhsil ocağına aşağı ballı tələbələr qəbul olunur. Həmin tələbələrin də intellekti o qədər yüksək deyil.

Burada ciddi bir aksioma yaranır. Əslində dövlət bu sahələri prioritet hesab edir və kardrlar yetişdirməyə çalışır. Onu da qeyd edim ki, həmin universitetdə ikili proqramlar həyata keçirilir. Türkiyə və digər ölkələrin universitetlərilə əməkdaşlıq edirlər. Ancaq tələbə adekvat deyil. Tələbə qəbulunda bal çox aşağıdır. Tələbat olmadığına görə az ballı abituriyentlər orada təhsil alır. Ancaq ümumilikdə özlərini doğrultmurlar".

Müəllimlərin istənilən təhsili verə bilmədiyinə gəldikdə isə eksperin fikrincə, Sovet dövründə də təhsilin keyfiyyəti o qədər yüksək deyildi:

"Birincisi, SSRİ qapalı bir məkan idi. O zaman geniş istiqamətli mütəxəssislər yetişdirə bilmirdilər. İkincisi, Sovet dövründə elm və texnika bu qədər inkişaf etməmişdi. Hazırda kadr hazırlığına dövlət bu qədər vəsait ayırır. Prezidentin sərəncamları var, dövlət proqramına əsasən gənclər xaricdə təhsil alırlar. Onlar qayıdıb gəldikdən sonra təhsilə ciddi yatırımları olacaq.

Ancaq o fikirlə razıyam ki, bəzi universitetlərimizdə akkreditasiya qaydalarının tələbləri ödənilmir. Yəni, müəllim- tələbə, elmi dərəcə nisbətini göstərmək olar. Bunun da müəyyən səbəbləri, elmi dərəcənin alınmasında çətinlik, bürokratik əngəllər var. Ancaq razıyam ki, müəllimlərin də çox hissəsi günün tələblərinə tam adekvat deyil".

Bu gün Azərbaycanın Ümummilli Lideri Heydər Əliyevin doğum günüdür.

Heydər Əliyevin anadan olmasının 102-ci ildönümüdür.

Heydər Əlirza oğlu Əliyev 1923-cü il mayın 10-da Azərbaycanın Naxçıvan şəhərində anadan olub. O, 1939-cu ildə Naxçıvan Pedaqoji Texnikumunu bitirdikdən sonra Azərbaycan Sənaye İnstitutunun (indiki Azərbaycan Dövlət Neft Akademiyası) memarlıq fakültəsində təhsil alıb. Başlanan müharibə ona təhsilini başa çatdırmağa imkan verməyib.

1941-ci ildən Heydər Əliyev Naxçıvan MSSR Xalq Daxili İşlər Komissarlığında və Naxçıvan MSSR Xalq Komissarları Sovetində şöbə müdiri vəzifəsində işləyib və 1944-cü ildə dövlət təhlükəsizliyi orqanlarında işə göndərilib. Bu dövrdən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqrad şəhərində (indiki Sankt-Peterburq) xüsusi ali təhsil alıb. 1957-ci ildə isə Azərbaycan Dövlət Universitetinin tarix fakültəsini bitirib.

Heydər Əliyev Azərbaycan Kommunist Partiyası Mərkəzi Komitəsinin 1969-cu il iyul plenumunda Mərkəzi Komitənin birinci katibi seçilərək respublikanın rəhbəri olub. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev iyirmi il ərzində SSRİ və Azərbaycan SSR Ali Sovetlərinin deputatı olub və beş il SSRİ Nazirlər Soveti sədrinin birinci müavini vəzifəsində çalışıb.

Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və şəxsən Baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.

Heydər Əliyev 1990-cı ilin 20 yanvarında sovet qoşunlarının Bakıda törətdiyi qanlı faciə ilə əlaqədar ertəsi gün Azərbaycanın Moskvadakı nümayəndəliyində bəyanatla çıxış edərək, Azərbaycan xalqına qarşı törədilən cinayətin təşkilatçıları və icraçılarının cəzalandırılmasını tələb edib. O, Dağlıq Qarabağda yaranan kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib.

1990-cı ilin iyulunda Azərbaycana qayıdan Heydər Əliyev əvvəlcə Bakıda, sonra isə Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini olub. Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilən təsis qurultayında partiyanın sədri seçilib.

1993-cü ilin may-iyununda hökumət böhranının son dərəcə kəskinləşməsi ilə ölkədə vətəndaş müharibəsinin baş verməsi və müstəqilliyin itirilməsi təhlükəsi yarandıqda Azərbaycan xalqı Heydər Əliyevin hakimiyyətə gətirilməsi tələbi ilə ayağa qalxdı. Azərbaycanın o zamankı rəhbərləri Heydər Əliyevi rəsmən Bakıya dəvət etməyə məcbur oldular. Heydər Əliyev 1993-cü il iyunun 15-də Azərbaycan Ali Sovetinin sədri seçildi, iyulun 24-də isə Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başladı.

1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçildi. O, 1998-ci il oktyabrın 11-də xalqın yüksək fəallığı şəraitində keçirilən seçkilərdə səslərin 76,1 faizini toplayaraq, yenidən Azərbaycan Respublikasının Prezidenti seçilib. 2003-cü il oktyabrın 15-də keçirilən prezident seçkilərində namizədliyinin irəli sürülməsinə razılıq verən Heydər Əliyev səhhətində yaranmış problemlərlə əlaqədar seçkilərdə iştirak etməkdən imtina edib.

Azərbaycanın Ümummilli Lideri, Prezident Heydər Əliyev 2003-cü il dekabrın 12-də müalicə olunduğu Klivlend klinikasında (ABŞ) vəfat edib, dekabrın 15-də Bakıda Fəxri Xiyabanda dəfn olunub.

Heydər Əliyev bir çox dövlət orden və medallara, beynəlxalq mükafatlara layiq görülüb, müxtəlif ölkələrin universitetlərinin fəxri doktoru seçilib.

Prezident İlham Əliyev 2022-ci ilin sentyabrın 29-da "Azərbaycan Respublikasında 2023-cü ilin “Heydər Əliyev İli” elan edilməsi haqqında" sərəncam imzalayıb. Dövlət başçısının 2022-ci ilin noyabrın 28-də imzaladığı digər sərəncamı ilə “Azərbaycan Respublikasında 2023-cü ilin “Heydər Əliyev İli” elan edilməsi ilə bağlı Tədbirlər Planı” təsdiqlənib. Tədbirlər Planına uyğun olaraq, ölkəmizdə və xaricə Ulu Öndərin anadan olmasının 100 illiyi əlaqədar müxtəlif tədbirlər keçirilib.

Ümummilli Lider Heydər Əliyevin ən böyük arzusu Qarabağın işğaldan azad edilməsi, ərazi bütövlüyümüzün bərpası idi. Ulu Öndərin bu arzusunu və vəsiyyətini onun layiqli davamçısı, Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyev yerinə yetirdi.

Dövlət başçısı İlham Əliyev xalqımıza 2023-cü il sentyabrın 19-da növbəti qələbənin sevincini yaşatdı. Dövlət bayrağımızı əzəli və əbədi torpaqlarımızda - Xankəndidə, Xocalıda, Xocavənddə, Ağdərədə, Əsgəranda ucaltmaqla xalqımızın arzularını çin etdi. Bununla da müstəqil Azərbaycanın suverenliyi tam bərpa olundu.

Hazırda işğaldan azad edilmiş Qarabağ və Şərqi Zəngəzur yenidən qurulur, ərazilər minalardan təmizlənir, genişmiqyaslı bərpa və yenidənqurma işləri aparılır.

Bakının Yasamal rayonunda yerləşən Dağüstü qəbiristanlıqda uzun illərdir ziyarətçisi olmayan qəbirlərin dağıdılaraq satışa çıxarıldığı iddia olunur.

TEREF APA TV-yə istinadən xəbər verir ki, bu barədə adının açıqlanmasını istəməyən vətəndaş danışıb.

Onun sözlərinə görə, boş yer olmadığından içərisində meyit olan qəbirlər təklif olunub:

"Hansını istəyirsinizsə, seçə bilərsiniz" dedilər. Həmçinin bu proses heç bir sənədləşmə olmadan həyata keçirilir. "Bu qəbirlər bizim nəzarətimizdədir, illərdir ziyarətçiləri yoxdur, kimsəsizlərdir" - deyə bildirildi".

Şikayətçi əlavə edib ki, tullantılarla gizlədilmiş bəzi qəbirlər ustalıqla yandırılaraq izlər ört-basdır edilir.

Məsələ ilə bağlı Yasamal Rayon Bələdiyyəsindən bildirilib ki, 2019-cu ildən bu günə qədər vəfat edən şəxslərin yaxınları dəfn üçün müraciət etdikdə, onlara qəbiristanlığın 1940-cı ildə salındığı və 1974-cü ildən etibarən bağlandığı barədə məlumat verilib.

Qeyd olunub ki, yeni yer olmadığından ailələrin razılığı əsasında yaxın qohumların ətrafında, yaxud şəriətə uyğun şəkildə, 25 ildən çox müddət keçmiş qəbirlər açılaraq yenidən dəfn həyata keçirilir.

Ətraflı süjetdə:

Son vaxtlar “Kontakt Home” mağazalar şəbəkəsindən şikayət və narazılıqlar artıb. Buradan məhsul alan bir çox vətəndaşlar yüksək faizlərdən, ödəniş sisteminin qeyri-şəffaf olmasından, hansısa "əlavə xidmət haqları"ndan və s. şikayətlənirlər. Onların sözlərinə görə, kreditlə məhsul alan zaman ödənişlərin gecikməsi halında onlardan olduqca yüksək məbləğdə faizlər tutulur. Hətta bu rəqəmlər bəzən sələmi xatırladır.
Belə şikayətçilərdən biri də Bakı şəhəri, Binəqədi rayonu, Biləcəri qəsəbəsi, Ə.Xaqani küçəsi, ev 14 ünvanında yaşayan N.S-dır.
Bakupost.az -ın məlumatına görə, şikayətçi bu il martın 29-da mağazadan №1000912869 saylı müqavilə əsasında “Huawei Matebook D16 Space Gray” noutbuk, bir ədəd maus və iki ədəd qulaqlıq alıb. Lakin noutbukun istifadəsi zamanı qızma və yazı yazarkən donma halları müşahidə edildiyindən, cəmi 5 gün sonra noutbuk və mausu mağazaya qaytarıb.

N.S deyir ki, məhsulu qaytarmaq istədikdə ona "xidmət haqqı" olaraq 380 manat məbləğində borcunun qaldığı bildirilib:
“Filialın müvafiq əməkdaşlarından bu məbləğin hansı xidmətlə bağlı olduğunu soruşdum. Əvəzində "Kontakt Home"un Nərimanov filialının müvafiq əməkdaşları bildirdilər ki, “biz noutbuka müvafiq proqramlar yükləmişik və onlar ödənişlidir, mal qaytarılsa da, o proqramların pulunu ödəməlisiz. Noutbuk və mausu mağazaya qaytarmışam. Amma "Kontakt Home" mağazasının müvafiq sistemində mənim adıma 380 AZN borc qalmaqda davam edir".
N.S onu da bildirib ki, məhsulu alarkən ona bu proqramların ödənişli olduğu barədə əvvəlcədən heç bir məlumat verilməyib. Müqavilədə də bu barədə heç bir qeyd yoxdur:
“Mənə müxtəlif proqramların yüklənməsi, ödənişli olması və noutbukun qüsurlu olması halında 14 gün müddətində qaytarılması zamanı bu məbləği ödəməli olduğuma dair hər hansı məlumat verilməyib və hansısa sənəd təqdim olunmayıb. Hətta şifahi xəbərdarlıq da edilməyib. Eyni zamanda bu lazımsız proqramların noutbuka yüklənməsindən də xəbərim olmayıb. Belə ki, ümumi ad altında mənə məlum olmayan, lazımsız və əhəmiyyətsiz proqramları noutbuka yükləyərək, onların pulunu məndən tələb edirlər. “Kontakt Home” məhsulun sifarişi zamanı qeyd edilən proqramları alıcıya məlumat vermədən yükləyir, səhv və yanlış məlumat verərək, vətəndaşların etibarından sui-istifadə edir”.
Şikayətçi iki ədəd qulaqlığın pulunu faizlə birlikdə tam şəkildə ödəyib, qalan məhsullar isə qaytarılıb. Buna baxmayaraq, sistemdə onun adına 380 manat borc yazılıb:
“Məhsul keyfiyyətsiz olduğu və qaytarıldığı üçün müqaviləyə xitam verilməli və adıma hər hansı bir borc qalmalı deyil. Ancaq “Kontakt Home”un Nərimanov filialı "xidmət haqqı" adı altında üzərimə əsassız və qanunsuz olaraq əlavə xərclər qoymağa çalışır".
N.S əlavə edib ki, məsələ ilə bağlı İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etsə də, hələlik heç bir nəticə əldə olunmayıb.
“Kontakt Home”dan şikayətlər bununla bitmir. Daha bir şikayətçi Natiq Muradovun sözlərinə görə, mağazadan aldığı 240 manatlıq məhsul üçün 20 gün gecikməyə görə ona 100 manatdan artıq faiz hesablanıb:
““Kontakt Home”dan bir məhsul alırsan, 2-3 gün gecikdirsən, sələmdən artıq faiz gəlir. İnsaf yoxdur, qan içirlər. 240 manat ödənişə, 20 günə 100 neçə manat faiz gəldi. Günə 4,80 manat faiz yazarlar? Heç kimə məsləhət görmürəm ki, bu mağazadan məhsul alsın. Ödəyirəm, haram xoşları olsun. Heç xeyir işlərinə xərcləməsinlər”, - deyə o, sosial şəbəkədə bildirib.

N.Muradovun sözlərinə görə, "Kontakt Home"un faiz dərəcəsi dövlətin müəyyən etdiyi maksimum həddən 10 dəfə yüksəkdir:
“Müştərinin gecikdirməsi və şirkətin faiz yazması başa düşüləndir, lakin bu qədər yüksək məbləğdə faiz qanunvericiliyə ziddir”.
Digər vətəndaşlar da mağazadan aldıqları məhsullarla bağlı oxşar problemlərlə üzləşdiklərini bildiriblər. Bir müştəri 290 manata aldığı telefon üçün ümumilikdə 920 manat ödədiyini, başqa bir vətəndaş isə 340 manatlıq telefonun ona 700 manata başa gəldiyini qeyd edib. Hətta bir müştəri sadəcə e-mail ünvanını qeydiyyatdan keçirmək üçün ondan 49 manat “xidmət haqqı” tutulduğunu iddia edib.
Azad İstehlakçılar Birliyinin sədri Eyyub Hüseynov da Bakupost.az -a açıqlamasında “Kontakt Home”un müştəri hüquqlarını pozan şirkətlər arasında 1-ci yeri tutduğunu bildirib:

“Sanki texniki cihazlar satan firmalar, başda “Kontakt Home” olmaqla, istehlakçıları aldatmaq üçün yarışa giriblər. “Kontakt Home” trenddə, birinci yerdədir. Ondan sonra “Baku Electronics”, “Optima” və s. gəlir. Neçə ildir ki, “Kontakt Home” birinciliyi əldən vermir. Buradan gələn şikayətlərin palitrası çox əcaib və müxtəlifdir. Hər gün 2-3 şikayət qəbul edirəm. Məsələn, “Kontakt Home” elan verir ki, kim “Şeş-qoşa” oynasa və udsa, ona təmənnasız bal verəcəyik. (Bu, iki il əvvəl verilmiş ərizədir) Vətəndaş oynayır, uduzur, gedib bir fen alır. Fen xarab çıxır. Qaytarmaq və ya dəyişmək istəyir, amma deyirlər, “yox, sən “Şeş-qoşa” oynamısan”.
İkinci nümunə, vətəndaş soyuducu alıb. Soyuducu səs edir. Qaytarır, akt alır ki, məhsulu qaytarmışam. Amma bir aydan sonra məhkəmə qərarı gəlir ki, sən borclusan. Vətəndaş nə qədər çalışsa da, məhkəmə qərarından yaxasını qurtara bilmir. “Kontakt Home” isə tələb edir, halbuki mal qaytarılıb".
Eyyub Hüseynovun sözlərinə görə, “Kontakt Home” tərəfindən “Qızıl Zəmanət” kimi təqdim edilən əlavə xidmətlərin hüquqi əsası yoxdur:
""Qızıl zəmanət” deyilən bir anlayışı da “Kontakt Home” icad edib. 300-400 manata bu “zəmanət”i satırlar, guya qızıl zəmanət verirlər. Halbuki bu, qanunsuz, heç bir əsası olmayan zəmanətdir".
E.Hüseynov bildirib ki, uzun illərdir şirkətin rəhbərliyi ilə görüşmək istəsə də, bu, mümkün olmayıb:
"Bu illər ərzində mən “Kontakt Home”un rəhbərliyi ilə görüşə bilməmişəm. Bir dəfə də mümkün olmayıb. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəhbərliyinə də demişəm ki, bunları bir yerə toplayın, mənə 3 dəqiqəlik vaxt verin ki, deyim, bunlar nə iş görürlər. Dövlət orqanı bunu etmir. 28 il ərzində cəmi bir dəfə Fərhad Əliyev nazir olanda biznes qurumlarının yığıncağında mənim çıxışıma imkan yaradılıb. İstehlakçı hüquqlarını qorumaq təəssüf ki, hökumət üçün öncül məsələ deyil. Bu ilin yanvarında cənab Prezidentin fərmanı ilə İqtisadiyyat Nazirliyinin tabeliyində olan Antiinhisar və İstehlak Bazarına Nəzarət Dövlət Xidməti Prezident yanında Dövlət Agentliyinə çevrildi. Lakin oradakı köhnə komandadan yenə də heç nə gözləmirik. Çünki yanvardan bəri göndərilən şikayətlərə demək olar ki, heç bir reaksiya yoxdur. Bu, anormal haldır. "Kontakt Home"un öhdəsindən gəlmək lazımdır. Bu şirkət bütün vasitələrlə insanları soyur. Xarab malları, yararsız məhsulları insanlara sırıyır və bunu “kredit məsələləri” ilə edirlər. Ona görə də isteklahçılara deyirəm ki, əgər malı qaytara və ya dəyişə bilsəniz, mütləq kredit müqaviləsinin də ləğvinə nail olun. Şirin dilə aldanmayın. Onlar aqressiv reklam kampaniyaları aparırlar, istehlakçıları cəlb edirlər və “pulunu ver mənə, itil cəhənnəmə” prinsipi ilə işləyirlər. Hökumət buna son qoymalıdır. “Kontakt Home”la ciddi məşğul olunmalıdır".
Şikayətlərlə bağlı “Kontakt Home” mağazalar şəbəkəsinə sorğu ünvanladıq. Mağazadan Bakupost.az-a bildirildi ki, müştəri hüquqlarının qorunması və mövcud qanunvericilikdən yayınmamağa xüsusi diqqət yetirilir:
“Öncəliklə bildirmək istəyirik ki, müəyyən məhsullar (məsələn, noutbuk) üçün əlavə proqram təminatı bütün rəsmi riteyl şəbəkələrində ödənişli xidmətdir. Müştərimiz N.S-ya məhsul alışı zamanı əməkdaşlarımız tərəfindən bu məqam bildirilib və razılığı əldə edilib. Eyni zamanda, sözügedən məqam müqavilədə də öz əksini tapıb. Müştərilərimizin məlumatlarının konfidensiallığının qorunması səbəbindən müqavilə və şifahi razılıq səslərini ictimaiyyətə təqdim etmək imkanımız məhduddur.
Təəssüf hissi ilə bildirmək istərdik ki, müştərimizin bildirdiyi iddialar əsassızdır. Müştərimiz ilə proqram təminatının ödənişli əsaslarla olması həm yazılı, həm də şifahi olaraq razılaşdırılıb.
Müştərimiz Muradov Natiq kredit şərtlərimizdən yararlanaraq məhsul alıb. Məhsul alışı zamanı müştəriyə aylıq ödəniləcək məbləğ, gecikmə halları barədə ətraflı məlumat verilib. Əlavə olaraq, müştəriyə təqdim edilən müqavilənin 2.6-cı bəndində şərtlərin pozulması halında cərimənin hansı qaydada tətbiq olunacağı göstərilib. Gecikmə faizi isə mövcud qanunvericiliyin ümumi tələblərini nəzərə alaraq daxili qaydalar əsasında hesablanır. Bu halda da, müştəri son aprel ayı üzrə ödənişini natamam həyata keçirdiyi üçün aylıq məbləğin üzərinə əlavə məbləğ hesablanmağa davam edib".
Lalə Novruz,
BakuPost
Redaksiyadan: Göründüyü kimi, müştəri N.S noutbuk alarkən, ona proqramların yüklənməsi üçün xidmət haqqı ödəməli olduğu haqda nə yazılı, nə də şifahi heç bir məlumat verilmədiyini bildirir, şirkət isə əksini iddia edir. İkincisi, noutbuka ofis proqramlarının yüklənməsi doğrudanmı 380 manata başa gəlir? Maraqlıdır, proqram təminatı ilə məşğul olan kompüter şirkətləri də proqramları yükləməyə görə məhsulun 30-50 faizi qədər pul tələb edirlərmi? Üçüncüsü, "Kontakt Home"un açıqlamasındakı "Gecikmə faizi mövcud qanunvericiliyin ümumi tələblərini nəzərə alaraq daxili qaydalar əsasında hesablanır" fikri də kifayət qədər qaranlıq və mübahisəlidir? Bu daxili qaydalar nələrdən ibarətdir? Müştərilərə əvvəlcədən bu qaydalar izah olunurmu? Yoxsa bu da bir fırıldaqçılıq fəndidir? Araşdırmalarımız davam edir.

Kəlbəcər rayonunun Zar kəndində 547 fərdi yaşayış evi, sosial obyektlər, mühəhdis kommunikasiyaları, yol-küçə şəbəkəsinin tikintisi və abadlıq işləri həyata keçiriləcək.

Qaynarinfo xəbər verir ki, Məcburi Köçkünlərin Sosial İnkişaf Fondu bununla bağlı elan etdiyi tenderə yekun vurub.

Tenderin qalibi "Amazone" şirkəti seçilib. Tərəflər arasında bağlanacaq satınalma müqaviləsinin maliyyə dəyəri 120 628 652,59 manatdır.

Dövlət satınalmalarının vahid internet portalı üzərindən apardığımız araşdırma zamanı məlum olub ki, "Amazone" şirkəti yalnız Məcburi Köçkünləri Sosial İnkişaf Fondunun keçirdiyi tenderlərin qalibi seçilib.

Bəs, Fondun iri məbləğli tenderlərinin qalibni seçilən bu şirkət kinindir?

Dövlət Vergi Xidmətinin reyestr məlumatlarından aydın olur ki, "Amazone" şirkəti 4 oktyabr 2012-ci ildə qeydiyyata alınıb. Nizamnamə kapitalı 100 manatdır. Şirkətin qanuni təmsilçisi Şükürov Əbülfət Tapdıq oğludur. 2017-ci ilədək şirkətin qanuni təmsilçisi Məmmədov Anar İlyaz oğlu olub. Anar Məmmədov Milli Məclisin VI və VII çağırış deputatıdır.

Mediada yer alan bəzi iddialara görə, "Amazone" şirkətinin təsisçisi də Anar Məmmədovdur. Bu iddianın deputat tərəfindən təkzib edilməsi faktına rast gəlinmir.