30-a yaxın Azərbaycan vətəndaşına qarşı külli miqdarda dələduzluqda ittiham olunan Qədim Ədilov həbsə alınıb.

Musavat.com xəbər verir ki, Qədim Ədilov Binəqədi Rayon Məhkəməsinin binasına gətirilərkən ondan şikayətçi olan 10-a yaxın zərərçəkən də məhkəmə binasına gəliblər.

Zərərçəkənlər vəsatətə baxılarkən iclasın keçirildiyi zala buraxılmayıblar. Onlar məhkəmə binası önündə üzərində “Binəqədi məhkəməsinin ədalətli qərar çıxaracağına inanırıq!” “Dələduz Qədim Ədilov həbs olunsun”, “30 nəfərdən artıq vətəndaşın pullarını mənimsəyən Qədim həbs olunsun” sözləri yazılmış pankartlar qaldırıb və şüarlar səslədiriblər.

Məhkəmə Baş Prokurorluğun vəsatətini təmin edib. Qədim Ədilovun ev dustaqlığında olmasını nəzərə almaqla hələlik onun barəsində 2 aylıq həbs qətiimkan tədbiri seçilib.

Qədim Ədilov məhkəmə zalında qandallanıb, istintaq təcridxanasına göndərilib.

Zərəçəkənlər iddia edirlər ki, Qədim Ədilovun illərdir azadlıqda qalması birbaşa Bakı Apellyasiya Məhkəməsinin sədri Mübariz Əkbərovun himayədarlığı ilə baş tutub. Qeyd edirlər ki, Qədim Ədilovun qardaşı Yasin Ədilov Şirvan Rayon Məhkəmə İcraçıları Şöbəsinin rəisidir. Qədim Ədilov Yasin Ədilov vasitəsi ilə Mübariz Əkbərovla yaxın əlaqələr qurub. Hətta barəsində Baş Prokurorluqda istintaq aparıldığı müddətdə belə güclü hakim himayədarlarına arxalanaraq yeni dələduzluq əməlləri törədib.

Qədim Ədilovun həbsinə gəlincə, bəlli olur ki, 2021-ci ildə ondan 17 vətəndaş Baş Prokurorluğa şikayət edərək dələduzluqla külli miqdarda vəsaitlərinin ələ keçirildiklərini bildiriblər.

İndi məlum olur ki, həmin şikayət üzrə cinayət işi davam etdiyi bir vaxtda Qədim Ədilov Gəncə şəhər sakini Nəsrulla Cəfər oğlu Nəzərova qarşı da dələduzluq edib. Onun etibarından sui-istifadə edərək Qədim sonuncuya məxsus milyonlarla dəyəri olan asfalt zavoduna müştəri tapacağına və satacağına söz verərib. Bunun üçün zavodu etibarnamə ilə öz adına dövr etdirib. Sonra isə Nəsrulla Nəzərovdan xəbərsiz zavodu 1 milyon 750 min dollara sataraq aradan çıxıb.

Zərərçəkənlər deyirlər ki, əlavə olaraq Qədim Ədilov Nəsrulla Nəzərovun 10 minlərlə manat nağd pulunu da dələduzluq yolu ilə mənimsəyib.

2022-ci ildə isə Qədim Ədilov İnterpol vasitəsi ilə axtarışa verilməmişdən cəmi 1-2 ay əvvəl Anar Akif oğlu Məmmədov və partnyorlarının etibarını imtahana çəkib. Onlardan 612 min manat pul alandan sonra Qədim Ədilov əvvəl Türkiyəyə, oradan isə Rusiyaya keçib.

İnterpol xətti ilə Rusiyada həbs olunan Qədim Ədilov 2024-cü ilin oktyabrında Azərbaycana təhvil verilib.

Zərərçəkənlər deyirlər ki, o zaman Bakı Apellyasiya Məhkəməsinin sədri Mübariz Əkbərovun göstərişi ilə hakim Cavid Hüseyn onu məhkəmə zalından açıb buraxıb.

Zərərçəkənlərdən Xaləddin Yusibov, Natiq Hümbətov, Nəsrulla Nəzərov və Sadiq Cəfərov iddia edirlər ki, Qədim Ədilov və onun qardaşı Yasin Ədilov dələduzluq yolu ilə ələ keçirdikləri vəsaitdən rüşvətxor hakimlərə yaxşı “pay” ayırırlar. Yoxsa İnterpolun aylarla axtarışlardan sonra həbs edib Azərbaycana təhvil verdiyi Qədim Ədilovu necə zaldan buraxmaq olar?

“Yaxşı ki, Baş Prokurorluğun İstintaq İdarəsi ədalətli mövqe sərgiləyərək dələduzu ifşa etdi. Yoxsa daha nə qədər günahsız adam dələduz Qədim Ədilovun qurbanı olacaqdı?”, - deyə zərərçəkənlər bildirirlər.

Qeyd edək kki, Qədim Ədilov 2024-cü ilin fevralına qədər 17 Azərbaycan vətəndaşına qarşı 2 milyon manatlıq dələduzluq ittihamı ilə beynəlxalq axtarışda olub.

2024-cü ilin noyabrında Qədim Ədilovun qaçıb gizləndiyi Rusiya ərazisində həbsi zərərçəkənlərin bu ölkənin hüquq-mühafizə orqanlarına müvafiq müraciətlərindən sonra mümkün olub. Belə ki, həmin ilin fevralında iş üzrə zərərçəkmiş şəxslərdən Xaləddin Yusibov Rusiya Daxili İşlər Nazirliyinin Kaluqa Vilayəti üzrə İdarəsinə rəsmi məktubla müraciət edib. Bundan 5 gün sonra Qədim Ədilov qaçaq həyatı yaşadığı Kaluqa vilayəti ərazisində müəyyən edilərək həbsə alınıb.

26 fevral 2024-cü ildə həbsə alınan Qədim Ədlilov elə həmin gün təcridxanaya yerləşdirilib. Bu haqda onun barəsində beynəlxalq axtarış elan etmiş Azərbaycan hüquq-mühafizə orqanlarına, zərərçəkənlərə də məlumat verilib.

Ötən ilin oktyabrında Qədim Ədilov Azərbaycan hüquq-mühafizə orqanlarına təhvil verilib və 2 gün sonra Bakı Apellyasiya Məhkəməsi tərəfindən azadlığa buraxılıb.

Qədim Ədilov azadlığa buraxılandan sonra zərərçəkənlərdən Natiq Hümbətov demişdi ki, onun məhkəmədən ev dustaqlığına buraxılması qanunsuzdur:

“Bu adam 2 dəfə həbsə alınıb, 5 dəfə də barəsində verilmiş qanunsuz qərar ləğv edilib, yenidən istintaqa qaytarılıb. Hər dəfə də azadlığa çıxa bilib, istintaqdan yayınıb”.

Natiq Hümbətovun sözlərindən aydın olmuşdu ki, Qədim Əilovu Rusiya tərəfi Azərbaycan hüquq-mühafizə orqanlarına təhvil verəndən sonra mətbuatda o, yanlış olaraq “məşhur biznesmen” kimi təqdim olunub:

“Qədim Ədilovun dələduzluq əməllərindən zərər çəkmiş xeyli vətəndaş var. Biz - Xaləddin Yusubov, Məmməd Cəfərov, Şahin Aslanov, Mirhəbib Ağalarov, Sadiq Cəfərov, Etibar Kazımov, Rövşən Məhərrəmov və başqaları. Yenə də bu adamı “qurban” kimi göstərib aradan çıxarmaq fikirləri var? Mürəkkəb dələduzluq sxemi qurub insanların ev-eşiyini satdıraraq pullarını çırpışdırmaq nə vaxtdan biznes sayılır?

Məşhur biznesmen Araz Ağalarov, İskəndər Xəlilov, Fizuli Ələkbərov və s. kimi pillə-pillə biznes qurub zəngin olmuş şəxslərə demək olar. Yoxsa toyuq oğrusu, saxta sənədlərlə iş adamlarını aldadıb pullarını dələduzluq yolu ilə ələ keçirən nə vaxtdan “məşhur biznesmen” olub?

Düşünürəm ki, bu cür təqdimat kimlərinsə istintaqın və məhkəmənin rəyini yanlış yönləndirmək cəhdləridir. Necə ki, keçmişdə dələduzdan “zərərçəkmiş” obrazı yaratmaqla keçmiş baş prokuror müavini Rüstəm Usubov və keçmiş Bakı şəhər prokuroru İlqar Abbasov hansısa maraqlar qarşılığında dələduzu istintaqdan yayındırdılar.

Yalnız biz zərərçəkmişlər Prezidentin köməkçisi Fuad Ələsgərovun qəbulunda olduqdan sonra Fuad müəllim bu işi nəzarətə götürdü və baş prokuror Kamran Əliyevin də diqqətini bu işə cəlb etdi.

Ondan sonra Baş Prokurorluğun İstintaq İdarəsi ciddi araşdırma apardı və artıq ölkədən qaçmış dələduzun həbsi haqda məhkəmə qərarı çıxarıldı. İnterpol “qırmızı bülleten” ilə axtarış elan etdi”.

Natiq Hümbətov qeyd etmişdi ki, Qədim Ədilov Azərbaycandan əvvəlcə Türkiyəyə, zərərçəkənlərin onun izinə düşməsindən xəbər tutandan sonra oradan da Rusiyaya qaçaraq gizlənməyə çalışıb:

“Dələduzun izinə düşüb Türkiyə İnterpol İstanbul şöbəsinə məlumat verdim. Lakin “dolandırıcılıq suçları hapissiz yarqılanıyor” deməklə onu həbs etməkdən imtina etdilər. Yəni yerini bilirsənsə, get məhkəməyə ver, pulunu tələb et.

Açığı, bu, İnterpol Azərbaycana qarşı qardaş dövlətdəki İnterpol şöbəsinin hörmətsizliyi idi. Və ya onlar rüşvət alıb onu qoruyurdular. Çünki bundan sonra o, duyuq düşüb Türkiyədən Rusiyaya qaçdı”.

Natiq Hümbətov demişdi ki, bir müddət sonra Qədim Ədilovun sorağını Rusiyanın ucqarlarından eşidiblər. Bundan sonra zərərçəkmişlərdən Xaləddin Yusubov dərhal Moskvaya gedib və İnterpolun qırmızı bülleteni ilə axtarışda olan Qədim Ədilovun həbsi üçün rəsmi müraciət edib.

Xaləddin Yusibov Musavat.com-a deyib ki, Qədim Ədilov zamanında himayə edilməsəydi, bu gün layiqli cəzasını alıb həbsdə günlərini sayırdı:

“2014-cü ildə bu dələduz özünü “Azəri AQA” firmasının direktoru kimi təqdim edib Rusiyadan “Aziz” adlı firmadan taxta alıb satmağı təklif edirdi. Həmin firmadan ayrı-ayrı firmaların adına rəsmiləşmiş vaqon sənədləri göstərib pul alırdı. Sonradan məlum oldu ki, eyni vaqon üçün 8-10 nəfərdən pul alıb.

Rusiyadakı “Aziz” firmasının direktoru Mirhəbib Ağalarov ilə biz istintaqda tanış olanda məlum oldu ki, dələduz Qədim Mirhəbib Ağalarova deyirmiş ki, filan firmaya və ya şəxsin adına vaqon yüklə, rəsmiləşdir, nömrəni göstərib pulunu vurduracam.

Sonra deyirmiş ki, həmin şəxsin ödəmək imkanı olmadı, indi sənədi ləğv et, başqa firmanın adına rəsmiləşdir. Sonda da deyirmiş ki, heç birindən pul ala bilmədim. Yük dolu vaqonu özümün “Azəri AQA” firmasına göndər, satıb pulunu özüm verəcəm. Beləcə bizlərlə yanaşı, Mirhəbib Ağalarovu da aldadıb 200 min dollarlıq malını ələ keçirib və onun sənədlərini bizə göstərib ümumilikdə 2 milyondan artıq pulu ələ keçirdi.

Biz ondan şikayət etdik və cinayət işi başlandı. Lakin dələduz və onun müəllimi olan atası o zaman prokurorluqda işləyən generallara yol tapdılar və Rüstəm Usubovla İlqar Abbasov bu cinayətkarın “daydayı” oldular. Onlar onun adını MTN-də Çovdarovdan zərərçəkmiş yazdılar və cinayət işini ləğv etdilər.

Mən şahid qismində Çovdarovun məhkəməsinə çağırılanda orada məlum oldu ki, bu dələduz özü onlara “donos” yazan imiş və ora davamlı gedib-gəlirmiş. Sadəcə sonuncu dəfə polisə nəzarət prokuroru Mircavan Kazımov haqqında yalançı donos yazanda Çovdarov çağırıb üstünə təpinib ki, “ay alçaq, bizi prokurorluqla düşmən etmək istəyirsən?”

Bunu məhkəmədə hamımız eşitdik. İndi təzədən bəzi saytlar gətirib bunu MTN işinə bağlayırlar. Unudurlar ki, daha Rüstəm Usubov kimiləri vəzifədə yoxdur. Bu adamı hər dəfə həbs edib istintaqa cəlb edəndən sonra bir yol tapıb azadlığa çıxır. Sonra da ölkədən qaçır. Bakı Apellyasiya Məhkəməsinin hakimləri Cavid Hüseyn, Elbəy Allahverdiyev və Habil Məmmədov Qədim Ədilovu azadlığa buraxmazdan əvvəl onun dələduzluq bioqrafiyasına nəzər salmalı idilər.

İstintaqçıların işini çətinləşdirən, bizə qarşı dələduzluq əməlinin araşdırılmasını əngəlləyən qərar verməkdən çəkinməli idilər. Hakimlərin qərarını qanunsuz, hanısa maraqlara söykənmiş qərar hesab edirik”.

Zərərçəkən Şahin Aslanov demişdi ki, Qədim Ədilov yüksək dələduzluq, inandırma qabiliyyətinə malikdir:

“O, Rusiyanın Sverdlovsk vilayətindəki Serov şəhərində taxta emalı ilə məşğul olan, həmin şəhərdə Azərbaycan diaspora təşkilatının rəhbəri Mirhəbib Ağalarovu inandırıb ki, özünün rəhbəri olduğu “Azəri AQA” firması böyük çapda taxta idxalçısıdır. O, bu firma ilə Ağalarova məxsus “Aziz” firması arasında üçüncü firmalara və şəxslərə taxta göndərmək haqda çoxsaylı müqavilələr imzalayıb. Sonra həmin firmalar adına sənədlər rəsmiləşdirib. Lakin sonra deyib ki, o fimalardan pul ala bilmirəm. Sənədləri ləğv et, malı mənim öz firmama vur.

Mən ancaq sonradan başa düşdüm ki, o, mənim sənədlərimdən istifadə edib millətdən para toplayırmış. Mənə cəmi bir-iki dəfə xırda məbləğdə ofşor firmalar üzərindən pul göndərdi.

Əvəzində isə 200 min dollardan artıq malımı aparıb pulumu vermədi. Pulu mənə nə üçün rəsmi deyil, ofşordan göndərdiyini soruşanda, dedi ki, mən Azərbaycanda vergi vermirəm. Başa düşdüm ki, bu, həm vergidən yayınır, həm də dələduzluq edir.

Əməkdaşlığı dayandırıb pullarımı tələb etməyə başladım. Lakin o, pulumu vermək əvəzinə məni Azərbaycanda məhkəməyə verdi ki, guya mən ona borcluyam. Amma yalan ayaq tutar, yeriməz. Məhkəmədə sübut edildi ki, bu, hoqqabaz və dələduzdur.

Həbs olunanda çox sevindim ki, nəhayət, haqlı cəzasını çəkəcək. Çox təəssüf ki, Bakı Apellyasiya Məhkəməsi belə bir qərar verdi.

Ümid edirəm ki, Qədim Ədilov bu dəfə bizə qarşı törətdiyi dələduzluq əməlinə görə nəhayət ki, layiqli cəzasını alacaq”.

E.MƏMMƏDƏLİYEV,
Musavat.com

Xüsusi nümayəndəlik muxtar respublikanın konstitusiyasına daxil edilir

Naxçıvan Konstitusiyasına dəyişikliklər barədə qanun təsdiq olunmaq üçün Milli Məclisə təqdim ediləcək.

Naxçıvan Ali Məclisinin yeddinci çağırış yaz sessiyasının son iclasında “Naxçıvan Muxtar Respublikasının Konstitusiyasında dəyişikliklər edilməsi haqqında” Naxçıvan Muxtar Respublikasının Qanunu (ikinci səsvermə) müzakirə olunub. Ali Məclisin yaz sessiyasının 20 fevral tarixdə keçirilən iclasında “Naxçıvan Muxtar Respublikasının Konstitusiyasında dəyişikliklər edilməsi haqqında” Qanunun geniş müzakirə edilərək birinci səsverməyə çıxarıldığını və qəbul edildiyini bildirən Ali Məclis sədrinin birinci müavini Bəxtiyar Məmmədov qeyd edib ki, Naxçıvan Konstitusiyasına əsasən, Naxçıvan Muxtar Respublikasının Konstitusiyasına dəyişikliklər 3 aydan sonra yenidən səsverməyə qoyulmalıdır. Birinci səsvermə fevral ayının 20-də keçirilmişdi. İkinci səsvermə birinci səsvermədən 3 ay sonra keçirilib.

"Konstitusiyaya dəyişikliklər haqqında" Qanun Ali Məclisin sədri tərəfindən imzalandıqdan sonra təsdiq olunmaq üçün Milli Məclisə təqdim ediləcək.

Qeyd edək ki, muxtar respublikada həyata keçirilən struktur islahatları, səlahiyyətli nümayəndəlik institutunun yaradılması, yeni idarəçilik qaydalarının tətbiqi, dövlət orqanlarının yenidən formalaşdırılması və qanunvericilik sisteminin təkmilləşdirilməsi kimi tədbirlər Naxçıvan Muxtar Respublikası Konstitusiyasında da dəyişikliklərin edilməsini zəruri edib. Hazırlanmış qanun layihəsi qeyd olunanları əhatə etməklə muxtar respublikada yeni idarəetmə modelinin tətbiqini nəzərdə tutur.

Qanunvericiliyə görə, muxtar respublikaya Ali Məclisin sədri rəhbərlik etməlidir, lakin səlahiyyətli nümayəndəlik institutunun da təsis edilməsindən sonra ortaya çıxan bir sıra suallar hələ də aktuallığını qoruyur. Yəni indi Ali Məclis sədrinin müavini nazir təyinatlarını həyata keçirirsə, səlahiyyətli nümayəndə o halda ümumi koordinasiyaya cavabdehdir.

Qeyd edək ki, Vasif Talıbovun işdən çıxarılmasından sonra Prezident Naxçıvan Ali Məclisi sədrinin bir neçə səlahiyyətini ləğv edib.

Bu gün Naxçıvanda “ikihakimiyyətlilik” var. Formal olaraq hakimiyyət muxtar respublikanın idarəetmə orqanlarındadır. Amma orada Bakıdan təyin olunan səlahiyyətli nümayəndə də var. Bu gün səlahiyyət bölgüsü haqda hər hansı bir izahat da yoxdur.

Qeyd edək ki, iki il əvvəl dekabrın 22-də Prezident İlham Əliyev Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi haqqında fərman imzalayıb. Fuad Nəcəfli Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi təyin edilib. Bəzi ekspertlərə görə, Ali Məclis strukturu saxlanıbsa, mümkündür ki, onun üzərindən idarəetmə davam edə bilər.

Naxçıvan Muxtar Respublikasının Konstitusiyasında ediləcək  dəyişikliklər Naxçıvanda Ali Məclisin səlahiyyətinə hansı formada təsir edə bilər? Muxtar Respublikada Prezidentin xüsusi nümayəndəliyi də fəaliyyət göstərir. Yeni dəyişikliklər xüsusi nümayəndəliyin də ana qanunda təsbit olunmasını özündə ehtiva edəcəkmi və səlahiyyət bölgüsü bundan sonra tam aydınlaşacaqmı?

Aydın Hüseynov

Milli Məclisin deputatı Aydın Hüseynov “Yeni Müsavat”a bildirdi ki, “Naxçıvan Muxtar Respublikasının Konstitusiyasında dəyişikliklər edilməsi haqqında” Naxçıvan Muxtar Respublikasının Qanunu təsdiqləndikdən və Milli Məclisə təqdim olunduqdan sonra hansı dəyişikliklərin, yeniliklərin olduğu barədə məlumat verə bilər: “Bu gün  vəziyyət ondan ibarətdir ki, sözügedən sənəd Milli Məclisə daxil olmayıb, həmçinin mediada yayılmayıb, ictimailəşdirilməyib. Ona görə də qanunda hansı dəyişikliklərin nəzərdə tutulması barədə dəqiq fikir bildirmək yanlış olardı. Nəzəri cəhətdən belə düşünmək olar ki, Naxçıvan Muxtar Respublikasının idarəetməsində son bir neçə ildə reallaşdırılan yeniliklər, islahatlar, dəyişikliklərin muxtar respublikanın konstitusiyasında əksini tapması zərurəti meydana gəlib. Ona görə də məhz qeyd olunan məsələlərlə bağlı dəyişikliklər ediləcəyindən danışmaq olar. Ali Məclisin, hökumətin səlahiyyətləri bəllidir və hazırkı konstitusiyada əks olunur. Prezidentin xüsusi nümayəndəliyinin də hesab edirəm ki, əsas qanunda səlahiyyətlərinin nədən ibarət olduğu müvafiq şəkildə qeyd olunmalıdır. Dəyişikliklərdə Ali Məclisin səlahiyyətlərinin azaldılıb-azaldılmayacağı haqda da layihəni oxumadan dəqiq nə isə söyləmək düzgün olmaz”.

Etibar SEYİDAĞA,
“Yeni Müsavat”