ABŞ-nin Texas ştatında fəaliyyət göstərən "Venus Aerospace" startapı Nyu-Yorkla London arasındakı 5 567 kilometrlik məsafəni cəmi 55 dəqiqəyə qət edə biləcək yeni nəsil təyyarə üzərində işləyir.

Oxu.Az-ın verdiyi məlumata görə, bu barədə şirkətin rəsmi saytında xəbər verilib.

Gələcəyin hava nəqliyyatı kimi təqdim olunan "Stargazer" adlı bu təyyarənin xüsusi olaraq uzunmüddətli uçuşlar üçün nəzərdə tutulmuş güclü mühərriklə təchiz ediləcəyi bildirilir.

Layihəyə əsasən, "Stargazer" saatda 4 939 kilometr sürət yığa biləcək ki, bu da səs sürətindən təxminən dörd dəfə çoxdur.

Bu göstəricilər sayəsində təyyarə Nyu-York-London (5 567 km) və Nyu-York-Paris (5 833 km) marşrutlarını bir saatdan da az müddətə qət edəcək.

Layihə qlobal hava nəqliyyatında inqilabi dönüş nöqtəsi kimi qiymətləndirilir.

İnsan oğlu tarix boyu fərqli və yaddaqalan toy mərasimlərinə üstünlük verib. Amma dünyada ilk dəfə kosmosda toy etmək ideyası bəşəriyyət tarixində bir ilkə çevrildi.

AzPost xəbər verir ki, 2003-cü ildə Beynəlxalq Kosmik Stansiyada qeyri-adi bir toy mərasimi baş tutdu. Rusiyalı kosmonavt Yuri Malenchenko və ABŞ vətəndaşı Ekaterina Dmitriyeva tarixə düşən bu qəribə evliliyə imza atdılar. Maraqlıdır ki, toyun bir tərəfi yer üzündə, digər tərəfi isə kosmosda baş tutdu. Yuri həmin dövrdə Beynəlxalq Kosmik Stansiyada vəzifə icra edirdi.

Ekaterina isə ABŞ-ın Texas ştatında yaxın dostları və ailə üzvləri ilə birlikdə mərasim keçirirdi. Toy zamanı Malenchenko xüsusi rabitə bağlantısı vasitəsilə həyat yoldaşına evlilik andını söylədi. Bu mərasimə NASA və Rusiya Kosmik Agentliyi tərəfindən icazə verildi. Hətta kosmosdan canlı bağlantı ilə toya qonaqlar da qoşuldu. Mərasim zamanı kosmik stansiyada xüsusi bayraq qaldırıldı və toy üçün musiqi çalındı. Evlənmə şəhadətnaməsi isə Malenchenkonun qayıdışından sonra imzalandı.

Bu hadisə dünyanın bütün media qurumlarında geniş yayılıb. Ekspertlər bu toyu insan münasibətlərində yeni mərhələ adlandırır. Çünki kosmosda evlənmək təkcə romantika deyil, həm də texnologiya və elm üçün önəmli hadisə sayılır. Hazırda isə fərqli cütlüklər kosmik toy planlaşdırır.

Bəzi agentliklər artıq kommersiya məqsədilə kosmik toy paketləri təklif etməyə başlayıb. Tədqiqatçılar bildirir ki, bu cür toylar gələcəkdə Ay və Mars koloniyaları üçün də aktual ola bilər. İlk kosmik toy bəşər tarixində həm texnoloji, həm də sosial baxımdan unikal hadisə kimi yadda qaldı.

Bayroyt Universitetinin (Almaniya) tədqiqatçıları CRISPR gendəyişmə sistemini ilk dəfə hörümçəklər üzərində sınaqdan keçiriblər.

Oxu.Az knife.media-ya istinadən xəbər verir ki, təcrübə uğurlu olub.

Məlumata görə, genləri dəyişdirilmiş hörümçəklər artıq parlaq qırmızı tor hörə bilirlər.

Qeyd edək ki, "CRISPR-Cas9" insan genomunu öyrənməyə və nadir xəstəlikləri effektiv müalicə etməyə imkan verən innovativ gendəyişmə sistemidir. Onun köməyi ilə bitki və heyvanların genomunu dəyişmək mümkündür.

"Əgər siz rahatlıq, davamlılıq və sərfəli xərclərlə uzunmüddətli istifadə axtarırsınızsa, yapon avtomobilləri daha uyğun seçimdir..."

Yaponiya və Almaniyanın avtomobil sənayesi uzun illərdir dünya miqyasında nüfuz qazanmış iki güclü rəqibdir.

Moderator.az xəbər verir ki, bu barədə "auto.novyny.live" nəşri yazıb.

Nəşr qeyd edir ki, yapon avtomobilləri sadəlik və etibarlılıqla seçilirsə, alman maşınları texnoloji təkmillik və sürücülük zövqü ilə fərqlənir. Bəs hansını seçmək daha məqsədəuyğundur?

Nəşr bu sualın cavabını tapmaq üçün əsas göstəriciləri müqayisə edib.

Avtomobillərin qiyməti

Yapon modelləri daha sərfəli sayılır. Bu, həm kütləvi istehsal, həm də Avropaya nisbətən ucuz nəqliyyat xərcləri ilə bağlıdır. Üstəlik, Yaponiyada texniki baxış sistemi son dərəcə sərtdir, bu səbəbdən yerli sürücülər avtomobillərini cəmi bir neçə ildən sonra dəyişməyə üstünlük verir. Nəticədə bazara çoxlu sayda keyfiyyətli ikinci əl yapon avtomobili çıxır.

Yığım keyfiyyəti

Alman avtomobilləri dəqiqlik və texnoloji kamillik nümunəsi kimi tanınır. BMW, "Mercedes-Benz" və "Audi" daim ən son təhlükəsizlik və komfort sistemlərinin inkişafına sərmayə yatırır. Yapon istehsalçıları, xüsusilə "Toyota" və "Honda" isə sadə, sınanmış və davamlı həllərə üstünlük verir.

Davamlılıq və etibarlılıq

Yapon avtomobilləri sadə konstruksiya sayəsində daha az nasazlıqla üzləşir. "JD Power" 2025 reytinqinə əsasən, "Toyota" və "Lexus" 5 illik istismardan sonra belə öz davamlılığı ilə ön sıralarda qərarlaşıb. Alman modellərində isə elektronika, turbinlər və sürətlər qutusu ilə bağlı problemlər daha tez-tez müşahidə olunur. Bu da onların mürəkkəb və bəzən həddən artıq həssas texnologiyaları ilə əlaqədardır.

Dinamik göstəricilər və məhsuldarlıq

Bu sahədə üstünlük alman modellərindədir. Onlar sürətli və emosional sürücülük üçün nəzərdə tutulub, mühərrik və asqı sistemləri idman üslubuna uyğunlaşdırılıb.

Hərəkət təhlükəsizliyi

"Euro NCAP", IIHS və NHTSA sınaqlarında həm yapon, həm də alman modelləri yüksək ballar toplayır. Amma "Mercedes:, BMW və "Audi"-nin flaqman modelləri aktiv və passiv təhlükəsizlik sahəsində daha qabaqcıl texnologiyalarla təchiz olunur, bu isə onların üstünlüyünü daha da gücləndirir.

İdarəetmə və komfort

"Audi A6", "BMW 5 Series" və "Mercedes E-Class" lüks interyer, səssiz salon və dəqiq idarəetmə ilə seçilir. "Toyota Camry" və "Mazda 6" isə komfortu sadəlik və istifadə rahatlığı ilə təmin edir. Burada lüks yerini funksionallığa verir.

Baxım və texniki xidmət

Yapon avtomobilləri saxlanma baxımından daha sərfəlidir. Bu, həm ehtiyat hissələrinin geniş əlçatanlığı, həm də sadə texniki quruluşla bağlıdır. Alman modellərinin servisi daha bahalıdır, bəzi hallarda təmir xərcləri bir neçə dəfə artıq ola bilər.

Status və nüfuz

2025-ci ildə yenilənmiş "Audi Q7", "BMW X5" və "Mercedes GLC" modelləri öz zərif və nüfuzlu görünüşü ilə nüfuz rəmzinə çevrilib. Yapon modelləri isə daha sadə və funksional dizayn təqdim edir, daha çox praktikliyə yönəlir.

Qiymət və keyfiyyət nisbəti

Burada üstünlük yaponlara məxsusdur. "Toyota Corolla", RAV4 və "Honda CR-V" kimi modellər münasib qiymətə həm etibarlılıq, həm də komfort təqdim edir.

Əgər siz rahatlıq, davamlılıq və sərfəli xərclərlə uzunmüddətli istifadə axtarırsınızsa, yapon avtomobilləri daha uyğun seçimdir. Əgər sizə dinamika, nüfuz və yüksək texnologiyalar önəmlidirsə, alman modelləri gözləntilərinizi qarşılayacaq. Seçim sizindir.

ABŞ prezidenti Donald Tramp texnologiya nəhəngi "Apple"ı sərt şəkildə hədəfə alıb.

"Referans" xəbər verir ki, Tramp "Truth Social" platformasında paylaşdığı bəyanatında şirkətə 25%-dən az olmayan gömrük rüsumu tətbiq ediləcəyi ilə hədələyib.

“Apple" rəhbəri Tim Kuka çoxdan bildirmişəm ki, ABŞ-da satılacaq "iPhone"lar məhz ABŞ-da istehsal olunmalı və yığılmalıdır – Hindistanda və ya başqa bir yerdə yox. Əks halda, "Apple" Amerika Birləşmiş Ştatlarına ən azı 25% gömrük rüsumu ödəməlidir. Bu məsələyə diqqət göstərdiyiniz üçün təşəkkür edirəm!” – deyə Tramp yazıb.

Bu bəyanat "Apple"ın xarici istehsal zəncirlərinə qarşı ciddi təzyiq kimi qiymətləndirilir. Ekspertlər bildirirlər ki, Trampın belə sərt ritorikası, onun “Amerikada istehsal et” strategiyasını yenidən gündəmə gətirdiyini göstərir.

"Apple" rəhbərliyi hələlik bu açıqlamaya rəsmi cavab verməyib. Lakin mümkün 25%-lik rüsum şirkət üçün milyardlarla dollar zərər demək ola bilər.

“Google” şirkəti “Google Meet”də digər dillərə sinxron tərcüməni aktivləşdirib.
TEREF xəbər verir ki, süni intellektlə bağlı keçirilən konfransda şirkət doğma ingilis və ispan dillərində danışan insanlar arasında real vaxt dialoqunu nümayiş etdirib.
Tərcümə edərkən süni intellekt danışanın səsini, tonunu və intonasiyasını qoruyur.
Hazırda sistem yalnız ingilis dilindən ispan dilinə və əksinə tərcümə edə bilir, lakin “Google” yaxın həftələrdə alman, italyan və portuqal dillərinə də canlı tərcüməni aktivləşdirməyi planlaşdırır.
Bizim.Media

İnnovasiya və sürət lideri "Bakcell" media nümayəndələrinə “Süni intellektin iş mühitində tətbiqi" mövzusunda növbəti təlim təşkil edib. Ümumdünya Telekommunikasiya və İnformasiya Cəmiyyəti Günü çərçivəsində keçirilən tədbirdə 50-dən çox media nümayəndəsi iştirak edib.
Təlimin əsas məqsədi jurnalistləri süni intellekt sahəsində ən son trendlər ilə tanış etmək, dəyişən dünyada innovasiya və son dövr yeniliklərin mediada tətbiqi ilə bağlı praktik tövsiyələr vermək olub. Təlim zamanı süni intellektin telekommunikasiyada rolu və “Bakcell”in süni intellekt əsaslı məhsul və xidmətləri ilə bağlı ətraflı məlumat verilib. Tədbir çərçivəsində iştirakçılar süni intellektin kommunikasiya sahəsində istifadəsinə dair əhatəli biliklər qazanıblar.

Bu təşəbbüs “Bakcell”in innovasiya və süni intellekt strategiyası çərçivəsində rəqəmsal həllərin cəmiyyət üçün faydaya çevrilməsi istiqamətində atdığı ardıcıl
və məqsədyönlü addımların növbəti nümunəsidir.
"Bakcell" haqqında
"Bakcell" Azərbaycanın ilk və ən böyük özəl telekommunikasiya şirkətidir. Hazırda şirkət üç milyondan çox müştərini yüksəkkeyfiyyətli və sürətli telekommunikasiya xidmətləri ilə təmin edir. Ölkə iqtisadiyyatının qeyri-neft sektorunun ən böyük investorlarından biri olan "Bakcell" süni intellekt əsaslı innovativ həllərlə Azərbaycanın dayanıqlı inkişafına töhfə verir.
"Bakcell" müxtəlif ölkələrdə telekommunikasiya, enerji, yüksək texnologiyalar və tikinti sahələrində fəaliyyət göstərən "NEQSOL Holding" beynəlxalq şirkətlər qrupunun tərkibinə daxildir.

Bu gün Qərbi Azərbaycan Xronikası layihəsi çərçivəsində növbəti veriliş efirə gedib.

Jurnalist Rufik İsmayılovun müsahibi Qərbi Azərbaycan İcmasının Ziyalılar Şurasının üzvü, yazıçı-publisist, jurnalist Tamxil Ziyəddinoğlu olub. O, Qərbi Azərbaycanın Qafan rayonundan söhbət açıb. Bildirib ki, Qafan Zəngəzurda azərbaycanlıların tarixən ən geniş məskunlaşdığı rayon olub. Onun sözlərinə görə, tarixi mənbələrdə bu yaşayış məntəqəsində məskunlaşma eramızdan əvvəl VI əsrə aid edilir. Sovet hakimiyyəti illərində Zəngəzur qanunsuz olaraq Ermənistana verildikdən sonra Qafan rayonu inzibati ərazi kimi 1930-cu il sentyabrın 9-da təşkil olunub. Qafan rayonu Qubadlı, Qarakilsə, Gorus, Meğri, Ordubad və Zəngilan rayonları ilə həmsərhəddir.

Müsahib deyib ki, gözəl təbiəti, şəfalı havası, bulaqları, çayı ilə Qafan Qərbi Azərbaycanın dilbər guşələrindən biri olub. Bu rayonun Gığı dərəsi adlanan ərazisindəki 18 kənddə ancaq Azərbaycan türkləri yaşayıb. Həmin kəndlərdən biri Kuruddur. Bu yaşayış məntəqəsində də milli-mənəvi dəyərlər, o cümlədən Novruz adət-ənənələri insanlar tərəfindən qorunub, hər il yüksək səviyyədə qeyd edilib.

Ötən əsrdə ermənilərin azərbaycanlılara qarşı soyqırımı və deportasiyasından, ayrı-seçkiliyindən danışan T.Ziyəddinoğlu diqqətə çatdırıb ki, Ermənistan dövləti şüurlu şəkildə soydaşlarımız yaşayan kəndlərdə bir sıra problemlər yaradıb, insanları basqı altında saxlayaraq ata-baba yurdunu tərk etməyə məcbur qoyub. Məktəblərdə erməni dili bilərəkdən tədris edilməyib ki, azərbaycanlılar rəsmi dövlət dilini bilməsinlər və gələcəkdə İrəvanda, həmçinin digər bölgələrdə iş tapa bilməsinlər. Yazıçı-publisistin dediyinə görə, ötən əsrin əvvəlində Andranik Ozanyanın quldur dəstəsi Oxçu camaatını kənd məscidinə doldurub diri-diri yandırıblar. Bütün bu faciələrə baxmayaraq, qaçqınlıqdan sonra Qafanın azərbaycanlı sakinlərinin 52 faizi yenidən ata-baba yurduna qayıdıb. Bunun qarşısını almaq üçün Anastas Mikoyanın tapşırığı ilə ermənilər soydaşlarımıza qarşı fiziki, mənəvi, psixoloji təzyiqləri daha da artırıblar.

1987-1991-ci il hadisələrinə toxunan T.Ziyəddinoğlu söyləyib ki, o dövrdə azərbaycanlı əhalinin mərkəzlə əlaqəsini kəsmək üçün ermənilər kənd yollarına rus tanklarını yerləşdiriblər. Öz ev-eşiyindən zorla qovulan azərbaycanlıların mal-mülkü əllərindən alınıb. Ermənilərin bu özbaşınalıqlarından mətbuatda yazmaq istəyəndə isə buna imkan verilməyib, "xalqlar dostluğuna" xələl gələr deyə, qarşısı müxtəlif bəhanələrlə alınıb. Müsahib vurğulayıb ki, o qanlı-qadalı illərdə baş verənlərə Fərman Kərimzadə və Hafiz Baxışın ürəyi dözməyib. Hər iki şəxs bizim şəhid ziyalılarımızdır.

Qərbi Azərbaycan İcmasının Ziyalılar Şurasının üzvü T.Ziyəddinoğlu sonda qeyd edib ki, Qarabağa qayıtdığımız kimi, Qafana da mütləq qayıdacağıq.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulması, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Ətraflı Baku TV-nin süjetində: