 |
|
|
Artıq aylar ötür ki, sənətçilər tərəfindən Mədəniyyət Nazirliyinin Tədbirlərin təşkili şöbəsinin müdiri Mənzər Nurəliyeva barəsində irəli sürülən ciddi ittihamlarla bağlı nə ictimaiyyətə, nə də sənət cameəsinə hər hansı rəsmi açıqlama təqdim olunmayıb. Nazirliyin “araşdırma aparılacaq” vədi isə sadəcə bəyanat olaraq qalmaqdadır.
Editor.az xatırladır ki, ötən ilin sentyabr-oktyabr aylarında bir sıra tanınmış sənət adamları – müğənni Nura Suri, xanəndələr Pərviz Qasımov və Almaxanım Əhmədli, şair Vüqar Əhməd və kamança ifaçısı Şəhriyar Musayev – Mənzər Nurəliyevanın fəaliyyəti ilə bağlı ciddi narazılıqlarını ifadə etmişdilər. Onlar bildirmişdi ki, Nurəliyeva onlara qarşı qərəzli münasibət sərgiləyib, təşkil olunan mədəniyyət tədbirlərinə dəvət etməyib, hətta bəzi hallarda onlardan açıq və ya dolayı formada rüşvət tələb olunub.
Məsələ ilə bağlı açıqlama verən şair Vüqar Əhmədin sözləri isə vəziyyətin təxmin edildiyindən daha ciddi olduğunu göstərib.O, açıqlamasında bildirib: “Mənzər xanımda bütün istedadlılara qarşı qısqanclıq var. O, xalq musiqisi oxuyanlara qarşı düşməndir. Mənzər bütün sənət adamlarını qəsdən dövlətdən narazı salır. Mən naziri qınamıram, onun Mənzərə gücü çatmır, çatsaydı, onu çoxdan postundan uzaqlaşdırardı”.
Sənət cameəsinin üzdə olan nümayəndələrinin bu dərəcədə açıq və sərt ittihamlarla çıxış etməsi cəmiyyətin diqqətini çəkmiş və Mədəniyyət Nazirliyini araşdırma aparmağa vadar etmişdi. Sənətçilər məsələ ilə bağlı nazirliyə dəvət olunduqlarını və izahatlarının alındığını demişdi.
Lakin sonradan nazirliyin araşdırmasının nəticəsi haqqında ictimaiyyətə hər hansı məlumat verilmədi. Bununla bağlı nə nazirliyin rəsmi saytında, nə də mediada hansısa məlumata rast gəlmək mümkün deyil.
Ekspertlər bildirir ki, əgər nazirliyin bir sektor müdiri ilə bağlı kütləvi ciddi ittihamlar ortaya çıxır və uzun müddət ərzində heç bir rəsmi reaksiya verilmirsə, bu həmin dövlət qurumunun öz reputasiyası və idarəetmə imkanları ilə bağlı ciddi suallar doğurur.
Təəssüf doğuran digər məqam isə ondan ibarətdir ki, Mədəniyyət nazirliyi jurnalistlərin mövzu ilə bağlı sorğularından da yayınır.
Bu isə yalnız məsuliyyətdən yayınma cəhdi deyil, eyni zamanda ictimaiyyətdən gizlətməyə çalışılan daha dərin problemlərin mövcudluğuna işarədir.
Editor.az yaranmış vəziyyətlə bağlı yenidən nazirliyin mövqeyini öyrənməyə çalışacaq.
Editor.az
Dövlət Miqrasiya Xidmətinin əməkdaşları gecə saatlarında ağır qəza keçirib.
News365.Az xəbər verir ki, Dövlət Miqrasiya Xidmətinin çavuşu, Səbinə Rzayevanın idarə etdiyi avtomobil qarşıdan gələn nəqliyyat vasitəsi ilə toqquşub.
Hadisə zamanı S.Rzayeva və avtomobildə olan digər əməkdaşlar müxtəlif dərəcəli bədən xəsarətləri alıb.
Qarşı tərəfin sürücüsü isə çoxsaylı sınıq xəsarətləri ilə xəstəxanaya yerləşdirilib. Yaralıların vəziyyəti barədə hələlik rəsmi açıqlama verilməyib.
Məlumata görə, qəza Səbinə Rzayevanın yol hərəkət qaydalarını pozduğu üçün baş verib. Hadisə şahidlərinin iddiasına görə, qəzanı törədən xanım əməkdaş avtomobili içkili idarə edirmiş.
Prosport.Az-ın məlumatına görə, Səbinə Rzayeva ağırlıqqaldırma üzrə beynəlxalq 1-ci dərəcəli hakimdir.
Faktla bağlı araşdırma aparılır.
Bakı Slavyan Universitetində (BSU) keçirilən elmi seminarda Naxçıvan şəhər Heydər Əliyev adına tam orta məktəbin IX sinif şagirdi Fərid Nəzərlinin iştirakı ilə bağlı xəbər sosial mediada və təhsil ictimaiyyətində geniş müzakirələrə səbəb olub. Editor.az xəbər verir ki, səbəb isə sadə və bir o qədər də düşündürücüdür: bir məktəblinin tədbirdə iştirakı universitetin rektoru Anar Nağıyevin xüsusi təşəbbüsü kimi qabardılıb və mediada “nümunəvi addım”, “uğur” kimi təqdim olunub. Bəli, düz eşitdiniz, 10 yox, 100 yox, 1 məktəblinin hansısa tədbirdə iştirakı reklam alətinə çevrilib.
Ekspertlər bu halı “ucuz piar”, “şişirdilmiş təşəbbüs” və “populizm” kimi dəyərləndirir. Ekspertlərə görə, sadəcə bir şagirdin tədbirə qatılmasını rektor səviyyəsində təşviqat predmeti etmək universitetin təbliğat siyasətində ciddi boşluqları və cəmiyyətə təqdim edə bilmək üçün akademik uğurlarının olmadığını üzə çıxarır.
Hesab edirik ki, bir məktəblinin universitetdə təşkil edilən səminarda iştirakı xüsusi təbliğata çevrilməməli və rektor səviyyəsində təqdim olunmamalıdır. Ölkədə hər gün onlarla belə təşəbbüslər reallaşır. Hətta heç bir vəzifə daşımayan sadə vətəndaşlar müxtəlif gənclərin təhsilinə maddi və mənəvi dəstək verirlər.
Belə bir şəraitdə, elm və təhsildə real nailiyyətlər əvəzinə xırda hadisələri şişirtmək universitet rəhbərliyinin populist yanaşmasını ortaya qoyur. Bu, real elmi nəticələrin yoxluğunu ucuz reklam üsulları ilə ört-basdır etmək cəhdidir.
Qeyd edək ki, BSU-nun rektoru Anar Nağıyev mətbuatın gündəminə dəfələrlə müxtəlif qalmaqallarla gəlib və onun ünvanına ciddi ittihamlar səsləndirilib.
Görünür, bu cür ucuz piar siyasəti ilə qalmaqallı rektor özünə müsbət ictimai imic formalaşdırmağa çalışır.
Lakin yaxşı olardı ki, bu cəhd sadə bir Azərbaycan məktəblisinin üzərindən edilməzdi.
Cəmiyyət universitetlərdən real akademik nailiyyətlər gözləyir. Tək-tük tədbirlərə gənc iştirakçıların cəlb olunması isə gündəmi doldurmaq üçün vasitəyə çevrilməməlidir.
//Mahir Ağa, Editor.az
Bakıda avtobus zolaqları taksi sürücülərinə ciddi çətinliklər yaradır. Onlar müştəri götürüb düşürərkən cərimələndiklərini və bu səbəbdən qazancın cərimələrə getdiyini deyirlər.
Gununsesi.info-ya müraciət edən taksi sürücüləri qeyd edirlər ki, avtobus zolağına daxil olduqları üçün 100 manat cərimə və əlavə olaraq 3 cərimə balı tətbiq olunur. Hərəkət zolağında dayanarkən isə 80 manat məbləğində cərimələnirlər:
“VÖEN, “Asan imza”, buraxılış kartı, buraxılış vərəqi kimi bütün qanuni sənədlərimiz olsa da, bu problemlə qarşılaşırıq. Bu sənədlərin alınmasına təxminən 600-700 manat xərcləmişik, lakin nəticədə qazancımızın böyük hissəsi aylıq cərimələrə gedir. Ayda ən azı 150-200 manat cərimə ödəyirik. Bu vəziyyətdə necə işləyək? Əsas küçələrdə və yol kənarlarında xüsusi taksi duracaqları yaradılsa, həm müştərilər müəyyən nöqtədə gözləyər, həm də biz cərimə qorxusu olmadan rahat xidmət göstərə bilərik”– deyə sürücülər bildirirlər.
Bəs görəsən sürücülər necə etməlidir? Məsələnin həlli yolu nələrdir?
Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat xidmətinin rəhbəri Tural Orucov Gununsesi.info-nun sorğusuna cavabında bildirib ki, avtobusla sərnişin daşımaları şəhərdə mobilliyin təmin edilməsi baxımından böyük əhəmiyyətə malikdir:
“Avtobus üstünlüyünün təmin edilməsi məhz sıxlıq olan küçələrdə lazımdır. Xüsusi avtobus zolağı daha çox sərnişinin daşınmasına imkan yaradır. Paytaxt küçələrində xüsusi hərəkət zolaqlarının yaradılmasında məqsəd sərnişinlərin vaxt itkisinə məruz qalmadan daşınmasını təmin etməkdir. Nəticədə avtobusların bu zolaqlarda orta sürəti artıb, marşrut üzrə hərəkət vaxtı isə 22 dəqiqəyə kimi azalıb. Əksər marşrutlarda interval qısalıb, sərnişinlərin sayı və onların ictimai nəqliyyata etibarı artıb. Hazırda paytaxtın 40-a yaxın küçə və prospektində ümumi uzunluğu 112 km xüsusi hərəkət zolağı təşkil edilib. Bu zolaqlarla gün ərzində 900 minə yaxın sərnişin daşınır. Avtobus zolaqlarının 160 km-ə çatdırılması nəzərdə tutulur”.
Qurumun sözçüsü qeyd edib ki, Bakının bir sıra küçə və prospektlərində 134 taksi duracağı mövcuddur:
“Onların əksəriyyəti cəlbetmə məntəqələrində təşkil edilmədiyindən bəzən nəqliyyatın hərəkətinə maneə yaradır. Buna görə də AYNA məsələyə kompleks yanaşma tətbiq edərək, bəzi maneə yaradan məntəqələri ləğv edib, yeni cəlbetmə məntəqələrinin müəyyən edilməsi istiqamətində iş aparır.
Yeni cəlbetmə məntəqələrinin əsasən universitetlərin, ticarət mərkəzlərinin, nəqliyyat mübadilə mərkəzlərinin ətrafında, həmçinin avtobus zolaqlarının yaxınlığındakı alternativ yollarda təşkili nəzərdə tutulur.
Bu çərçivədə 10 yeni taksi məntəqəsi təşkil edilib, 9 məntəqə isə aidiyyəti qurumlarla razılaşdırılaraq mərhələli şəkildə quraşdırılacaq.
Sakinlərin də müraciətləri nəzərə alınaraq paytaxtın Tbilisi prospektində, A.M.Şərifzadə küçəsində, metronun “Ulduz” stansiyası ətrafında, “Gənclik” Mall-un yaxınlığında taksi minik avtomobilləri üçün duracaq, həmçinin minib-düşmə yerləri (drop off) təşkil edilib. Layihənin paytaxtın digər ərazilərində də həyata keçirilməsi üçün təhlillər aparılır”.
Gununsesi.info-ya açıqlamasında nəqliyyat eksperti Eldəniz Cəfərov bildirib ki, taksi dayanacağı məsələsi hazırda olduqca aktualdır:
“Müşahidələrimə əsasən deyə bilərəm ki, bu sahədə müəyyən işlər görülür və hal-hazırda iki növ taksi dayanacağı mövcuddur.
Birincisi, taksi sürücüsünün avtomobili ilə gəlib sərbəst şəkildə müştərisini gözləyə bildiyi dayanacaqlardır.
İkincisi isə minib-düşmə məntəqələri — yəni “drop-off” yerləridir. Bu cür məntəqələrin sayı hələlik azdır. Məsələn, belə yerlərdən biri Tbilisi prospekti ərazisində yerləşir. Lakin mənə verilən məlumata əsasən, bu tip məntəqələrin sayının artırılması istiqamətində işlər davam etdirilir. Bizim də bu istiqamətdə təkliflərimiz olub və onlar nəzərə alınıb.
Bununla yanaşı, bir başqa vacib məqam da var ki, mən özüm də tez-tez müşahidə edirəm: taksi dayanacağı kimi nəzərdə tutulan yerlərdə çox vaxt fərdi nəqliyyat vasitələrinin sürücüləri avtomobillərini saxlayırlar. Bu isə taksilərin dayanmasına və sərbəst fəaliyyətinə mane olur.
Belə hallar yolverilməzdir. Cəmiyyət olaraq bir-birimizin işinə hörmətlə yanaşmalıyıq.”
Ekspert bildirib ki, taksi sürücülərinin cərimələrlə bağlı narazılığı mühüm məsələlərdən biridir.
Onun fikrincə sürücülər bəzən ikinci zolaqda dayanmağa məcbur qaldıqlarından cərimələnirlər:
“İkinci zolaqda maşını saxlayıb müştəri düşürmək olmaz. Bunun üçün avtobus zolağının qırıq-qırıq xətt olan hissəsində həmin zolağa daxil olub, yolun istiqamətində avtomobili saxlayaraq müştərini düşürmək və birinci qırıq-qırıq xətdən çıxaraq yoluna davam etmək lazımdır. Əgər bu qaydalara əməl olunarsa, düşünürəm ki, Dövlət Yol Polisi və Yol Patrul Xidməti əməkdaşları sürücünü buna görə cərimələməz.
Avtobus zolağına yalnız qırıq-qırıq xətt olmayan hissədən daxil olmaq, yaxud bu zolaqda uzun müddət hərəkətdə qalmaq qayda pozuntusudur və bu halda cərimə tətbiq edilməlidir. Amma sürücü qırıq-qırıq xətdən daxil olub və eyni qaydada çıxırsa, bu zaman cərimə olunmamalıdır”.
Eldəniz Cəfərov hesab edir ki, bu məsələdə sərnişinlər də müəyyən qədər diqqətli davranmalıdırlar:
“Taksi xidməti varsa və sərnişin istədiyi ünvana gedirsə, bu, o demək deyil ki, o, yolun istənilən hissəsində taksini sifariş edə bilər. Biz də müşahidə edirik ki, bəzi hallarda hərəkətin intensiv olduğu, yolun ortasında belə taksi sifariş edilir. Bu isə düzgün deyil. Taksi sifarişini daha təhlükəsiz və uyğun ərazilərdə — parklanma yerlərində və avtomobillərin intensiv hərəkət etmədiyi sahələrdə vermək daha məqsədəuyğundur”.
Ağcabədi rayonunun Poladlı kənd tam orta məktəbinin direktoru Əfiqə Mustafayevanın oğlu həbs edilib.
Musavat.com xəbər verir ki, direktorun oğlu Zakir Mustafazadə dələduzluqda ittiham edilib.
Zakir Mustafazadə 3 nəfər tanışından onları anasının direktor olduğu məktəbə işə düzəldəcəyini vəd edib. Həmin şəxslərdən 5 min manat məbləğində pul alıb. Vədə əsasən həmin şəxsləri məktəbdə müəlimə kimi işə düzəldəcəkmiş.
Təqsirləndirilən Mustafazadə başqa bir qohumuna qarşı da dələduzluq edərək onunun 13 min manatlıq xırdabuynuzlu heyvanlarını baha qiymətə satacağı vədi ilə alıb. Həmin heyvanları sataraq pulu ələ keçirib.
İstintaq zamanı müəyyən edilib ki, Zakir Mustafazadənin zərərçəkmiş şəxslərə vurduğu ümumi ziyan 31700 manatdır. Mustafazadənin ailəsi həmin zərərdən 14700 manatı ödəyib.
Zakir Mustafazadə ifadəsində deyib ki, zərərçəkmiş kimi tanınan şxəslərdən pulu onları işə düzəltmək üçün yox, borc kimi alıb. O, azadlığa buraxılacağı təqdirdə zərərin qalan hissəsinin ödənilməsinə çalışacağını bildirib.
Məhkəmədə Zakirin direktor anası da şahid qismində ifadə verib. Bildirib ki, bir müddət əvvəl oğlu avtomobil qəzası keçirdiyi üçün borcları yaranıb. Həmin şəxslərdən də pulu borclarını qaytarmaq üçün alıb.
Törətdiyi əməllərə görə 26 yaşlı Zakir 2 il 9 ay müddətinə azadlıqdan məhrum edlib.
İlkin Muradov
Musavat.com
“Azərbaycan təhsili çıxılmaz bir labirintə salınıb”
Bu fikirləri Yenicag.az-a açıqlamasında təhsil eksperti Elşən Qafarov bildirib.
Ekspert Elm və Təhsil Nazirliyi tərəfindən bir neçə siniflər üçün gimnaziyaya qəbulun qadağan edilməsini şərh edərək bu addımı nazirliyin bacarıqsız insanlar tərəfindən idarə edilməsinin acı nəticəsi adlandırıb:
“Gimnaziyaya qəbul bir neçə gün öncə 4-cü siniflər üçün deyil, 5-6 və 8-ci siniflər üçün qadağan edilmişdi. Sosial şəbəkə, o cümlədən KİV üzərindən olan etirazları fonunda Təhsil İnstitutu bu mənasız və ağıla, məntiqə sığmayan qərarı icra etmək məcburiyyətində qaldı. Bu, Elm və Təhsil Nazirliyində təhsil sahəsində bilik və bacarıqları, səriştəsi olmayan insanların əsas funksional idarəetmə vəzifələrdə işləməsinin acı nəticəsidir. Onların verdikləri yanlış qərarlar minlərlə insana təsir edir”.
Təhsil eksperti hesab edir ki, lisey gimnaziyalarının təhsil müddəti artırılmalıdır:
“Ümumiyyətlə, lisey gimnaziyaları 12 illik təhsilə və ilk olaraq lisey gimnaziyaları publik hüquqi şəxsə keçməlidir. Nəticə çox ağırdır. Nəticə ona görə ağırdır ki, Emin Əmrullayevin yaxın dostu Təhsil İnstitutunun direktor vəzifəsinin səlahiyyətlərini icra edən Elnur Əliyev qəbul etdikləri qərarların əsaslandırılmasını verə bilmirlər. Sual olunur, niyə bu qərara gəldilər? Niyə bu siniflərə qəbul dayandırılıb? Niyə? Cavab yoxdur, ona görə ki, əsaslandırma da yoxdur. Deyirlər ki, belə istəyirik. “Belə istəyirik” deməklə təhsili idarə etmək olmaz. Addımlarını şərh edirlər ki, beynəlxalq təcrübədə var. Yoxdur axı! Beynəlxalq təcrübədə var ki, lisey, gimnaziyalar 5 yaşdan, hətta 1 yaşdan uşaqları qəbul edirlər. Lisey gimnaziyalarının qəbulunda əsas məsələ uşaqların IQ qabiliyyətinin, istedadının ölçülməsidir. Azərbaycan təhsili haqqında nəyi şərh edək? Nə deyək axı? Azərbaycan təhsili çıxılmaz bir labirintə salınıb. Kim necə istəyirsə, elə də qərar qəbul edir. Bu qərarların nəticəsini düşünmür.
Mən sizin sayta təşəkkür edirəm ki, məsələni işıqlandırdınız, TV-lər, təhsil mütəxəssisləri şərh edirlər, mən 20-ə yaxın sayta son 3 gündə müsahibə vermişəm. KİV-də bu problemi işıqlandırılmasının nəticəsində səhvlərini başa düşdülər”.
Ekspert Elm və Təhsil Nazirliyinin başqa bir səhvini aşkara çıxarıb:
“31 may-1 iyun tarixinə 5-6-8-ci siniflər üçün sınaq imtahanının biletləri satılmışdı”.
Ağdaşda yüngül dərəcəli əqli gerilikdən əziyyət çəkən azyaşlı Əhəd Məhərrəmov ev şəraitində təhsil almaq istəsə də, buna şərait yaradılmır.
Bu barədə Bakupost.az -a onun atası Elşən Məhərrəmov bildirib.
Valideyn iddia edir ki, övladının vəziyyəti nəzərə alınaraq ev şəraitində təhsil alması üçün Ağdaş Rayon Təhsil İdarəsinə müraciət edib. Lakin müraciətinə müsbət cavab verilməyib:
“Araşdırdım, mənə deyildi ki, bu uşağa evdə təhsil düşür. Dəfələrlə Ağdaş Rayon Təhsil İdarəsinə müraciət etmişəm. Amma imtina verirlər. Deyirlər ki, hara istəsən, müraciət elə. Elm və Təhsil Nazirliyinin icazəsi olmalıdır. İstəyirəm ki, övladım təhsildən yayınmasın”.
Məsələ ilə bağlı Mərkəzi Aran Regional Təhsil İdarəsindən Bakupost.az -a bildiriblər ki, müraciət araşdırılıb və hazırda uşaq evdə təhsilə cəlb olunmayıb. Səbəb kimi isə müvafiq sənədlərin təqdim edilməməsi göstərilib.
Rəsmi cavabda qeyd olunur ki, uşaqların fiziki və ya psixi inkişafında gerilik olduğu hallarda onların xüsusi təhsilə cəlb edilməsi qərarı yalnız müvafiq sənədlər əsasında rayon (şəhər) psixoloji-tibbi-pedaqoji komissiyası (PTPK) tərəfindən verilir. Bu komissiyaya təqdim olunmalı sənədlər sırasında valideynin ərizəsi, tibbi arayış (Forma 27U və ya xəstəlik tarixçəsindən çıxarış), pedaqoji xasiyyətnamə, qiymət cədvəli, şəxsiyyət və qeydiyyat sənədləri yer alır.
Qurumun açıqlamasına görə, Əhəd Məhərrəmovun xüsusi təhsil ehtiyaclarının qiymətləndirilməsi üçün tələb olunan bu sənədlər təqdim olunmadığından PTPK tərəfindən müayinə aparılmayıb və nəticədə evdə təhsil məsələsi ilə bağlı rəsmi qərar verilməsi mümkün olmayıb.
Şagirdlərin ağzını "skoç"layan müəllimlə bağlı araşdırılma aparılır.
Bu barədə Teleqraf-ın sorğusuna cavab olaraq Bakı Şəhər Təhsil İdarəsindən məlumat verilib.
Bildirilib ki, məsələ ilə bağlı müvafiq araşdırma davam edir: "Məktəb rəhbərliyinə qanunauyğun tədbirlərin görülməsi üçün tapşırıqlar verilib".
112 nömrəli məktəbdən isə sorğumuza cavab olaraq bildirildi ki, ibtidai sinif müəlliminin musiqi dərsində şagirdlərə rəqs öyrədərkən uyğunsuz davranışı ilə bağlı məktəbdaxili araşdırma aparılıb.
"Məktəb rəhbərliyi tərəfindən müəllim və valideynlərlə görüş keçirilib, müvafiq tövsiyələr verilib. Müəllimin izahatı alınıb. Məktəb rəhbərliyinin qeyd olunan sinfə nəzarətinin artırılması qərara alınıb", - məlumatda deyilir.
Maliyyə naziri Sahil Babayev rəhbəri olduğu qurumun daxilində yeni prosesə start verməyə hazırlaşır. Bu barədə "DİA-AZ"ı məlumatlandıran mənbə iddia edir ki, daxili təftiş davam edir və bu zaman ciddi ittihamlara yol açacaq faktlar əldə edən Sahil Babayev həmin faktlara hüquqi qiymət vermək niyyətindədir.
Mənbə deyir: "Bu isə o deməkdir ki, keçmiş nazir Samir Şərifovun kadrlarını təkcə "vurulmaq" deyil, həm də həbs təhlükəsi gözləyir".
Xatırladaq ki, keçən həftə Sahil Babayev MN daxilində inqilabi bir prosesə - regional idarələrin yaranmasına start verdi. Bütün bunlar o deməkdir ki, yeni maliyyə naziri həm islahatların həyata keçirilməsi və həm də köhnə maliyyə cinayətlərinin ifşası baxımından tam səlahiyyətlidir.
Məlum, bu gün “28 May – Respublika Günü” münasibəti ilə demək olar, hər yerdə tədbirlər və şənliklər keçirilir.
Ancaq görünür, hələ Cümhuriyyət qurulanda buna qarşı çıxanlar, istəməyənlər olduğu kimi, başqa sima ilə yenə də buna cəhd edənlər var.
Məsələn, şəhərin düz mərkəzində, özü də, Məhəmməd Əmin Rəsulzadə adına olan küçədə (Tarqovi) yerləşən restoranların biri, deyəsən, Respublika günümüzə hörmətsizlik etməyi özünə priolitet məqdəs olaraq götürüb.
Əvvəla, sual olunur:
Dilimizin də mövcud olduğu bir ölkədə “28 May” niyə Rus dilində yazılmalıdır?
Məgər bizim dövlət dilimiz Rus dilidir, bundan da xəbərimiz yoxdur?
Yoxsa, restoran öz rusdilli müştərilərin “yaltaqlanır” ?
Kimlərsə, beş-on manat artıq qazanacaq deyə, bu boyda ölkə, bu boyda dil alçaldılmalıdır?
Dövlət quran kişilər bu dil, bu ölkə üçün savaşmışdılar axı.
Onların yad olunduğu, ruhlarının şad olmalı olduğu bir gündə bu görüntü nəyə lazımdır və nəyə xidmət edir?!
Məsələn, hər yerdə, elə məhz bu küçədə olan evlərin də eyvanlarından bayraq asıldığı halda bu restoranda niyə bayraq yoxdur?
Biri var, ümumiyyətlə heç nə etməyəsən, biri də var, öz aləmində nəsə etməyə çalışasan, o da belə…
Bayraq əvəzinəmi qoyulub bu “vanna”?
Nədir məqsəd?
Nədir niyyət?
Sualllar, əlbəttə, bir az da ritorikdir. Fakt isə odur ki, açıq-aşkar “28 May Günü”-nə hörmətizlik edilir.
Gununsesi.info