 |
|
|
Ankara Baş Prokurorluğu Cümhuriyyət Xalq Partiyasının (CHP) 38-ci qurultayında baş verdiyi iddia edilən pozuntularla bağlı istintaqı başa çatdırıb. İş üzrə İstanbul meri Əkrəm İmamoğlu daxil olmaqla 12 nəfər barəsində ittiham aktı tərtib edilib.
“Report” xəbər verir ki, bu barədə “T24” məlumat yayıb.
“Ankara Respublika Baş Prokurorluğu keçmiş Hatay Böyükşəhər Bələdiyyə sədri Lütfü Savaşın şikayəti əsasında Özgür Özəlin CHP sədri seçildiyi CHP-nin 38-ci Qurultayındakı “şübhəli məqam” iddiaları ilə bağlı apardığı istintaqı tamamlayıb”, – qəzetin məhkəmə müxbiri Asuman Aranca bildirib.
Təhqiqat nəticəsində İstanbul meri Əkrəm İmamoğlu, İzmir meri Cemil Tuqay, CHP-nin İstanbul özəyinin başçısı Özgür Çelik, Beşiktaş meri Rıza Akpolat və CHP-nin Ərzurum özəyinin başçısı Serhat Can Eş də daxil olmaqla 12 nəfər barəsində ittiham aktı tərtib edilib.
İttiham aktında göstərilir ki, 4-5 noyabr 2023 tarixlərində Ankarada keçirilmiş qurultayda Əkrəm İmamoğlunun rəhbərlik etdiyi mütəşəkkil qrup nümayəndələrə Özgür Özəlin namizədliyinə səs vermələri müqabilində pul mükafatları, bələdiyyələrdə və bələdiyyə şirkətlərində vəzifələr təklif edib. Nümayəndələrin bir qismindən doldurulmuş bülletenlərin fotoşəkillərini göndərmələri tələb edilib. Bundan əlavə, qurultayda Kamal Kılıçdaroğlunun namizədliyini geri götürməsi barədə yalan məlumatların yayıldığı və bunun səsvermənin növbəti mərhələsinə keçidi ləngitdiyi iddia edilir.
Prokurorluq təqsirləndirilən şəxslər üçün üç ilədək azadlıqdan məhrumetmə və cəza müddəti ərzində siyasi fəaliyyətlə məşğul olmaq qadağası tələb edib.
İttiham aktında Kamal Kılıçdaroğlu zərərçəkmiş kimi təqdim olunub. Bununla belə, ona ifadə vermək üçün dəvət göndərilsə də, o, prokurorluğa gəlməyib. İş üzrə şikayətçi keçmiş Hatay meri Lütfü Savaş olub, o, fevralın 25-də şikayət ərizəsi təqdim edib və şahid qismində ifadə verib.
Siyasi şərhçi Elçin Xalidbəyli TV Müsavatın canlı efirində aparıcı Emil Salamoğlunun qonağı olub və diqqətçəkən açıqlamalar verib.
Musavat.com xəbər verir ki, Elçin Xalidbəyli Rusiya-Ukrayna müharibəsindən danışıb.
Ətraflı məlumat və təhlil üçün verilişin videosuna baxa bilərsiniz.
Fransanın ən böyük mum muzeyi olan Qrevin Muzeyindən Fransa Prezidenti Emmanuel Makronun heykəli oğurlanıb.
Oxu.Az xəbər verir ki, bu barədə "Franceinfo" radiosu məlumat yayıb.
İlkin məlumata görə, muzey işçisi geyimində olan iki qadın və bir kişi fiquru götürüb yorğana bükərək qəza çıxışından binanı tərk ediblər. Daha sonra naməlum şəxs telefonla muzeylə əlaqə saxlayaraq özünü "Greenpeace" beynəlxalq təşkilatının fəalı kimi təqdim edib və hadisəyə görə məsuliyyəti üzərinə götürüb.
Muzey rəhbərliyi oğurluq hadisəsi ilə bağlı dərhal polisə məlumat verib. Bildirilir ki, heykəlin dəyəri təxminən 40 min avrodur.
ABŞ Dövlət Departamentinin rəsmi nümayəndəsi Temmi Bryus verdiyi müsahibədə Rusiya-Ukrayna münaqişəsinin həlli ilə bağlı önəmli açıqlama verib.
Milli.Az xəbər verir ki, onun sözlərinə görə, münaqişənin həlli şərtləri bilavasitə Moskva və Kiyev arasında razılaşdırılmalıdır:
"Bu məsələdə əsas qərarlar tərəflər arasında danışıqlar yolu ilə verilməlidir. Əlbəttə, ABŞ-nin bu mövzuda öz maraqları və tələbləri var. Onlar bizim mövqeyimizi yaxşı bilirlər. Lakin yekun qərarlar Ukrayna və Rusiyadan asılı olacaq", - deyə Bryus əlavə edib.
Ekspertlərə görə, bu açıqlama Vaşinqtonun münaqişənin diplomatik həllinə açıq olduğunu göstərsə də, ABŞ-nin müəyyən strateji mövqeləri qoruduğunu da təsdiqləyir.
Ukrayna xüsusi xidmət orqanlarının Rusiyanın dərinliklərində həyata keçirdiyi “Hörümçək toru” əməliyyatı dünyanın diqqət mərkəzindədir. Məsələ heç də onda deyil ki, bu bombardmançı təyyarələrin məhvi Rusiyanın Ukraynada apardığı müharibəyə ciddi şəkildə təsir edəcək.
Rusiya 4-cü ilə keçən müharibə boyu cəmi bir neçə dəfə Ukraynanın uzaq məsafədən bombalanmasında bu təyyarələrdən istifadə edib. Ukraynanın infrstrukturuna zərbələr əsasən “İsgəndər”, “Kalibr”, “Xəncər”, X-101 və s. raketləri ilə endirilir və bunların buraxılması üçün strateji bombardmançılar qaldırılmır.
Məsələ Rusiyanın dərinliklərində, cəbhə xəttindən 3-4 min km məsafədə yerləşən aerodromlara – həm də Rusiyanın ciddi şəkildə qoruduğu obyektlərə - hücumdan gedir. Ukraynanın məhv etdiyi təyyarələrlə faktiki olaraq Rusiya həmişə öyünüb, qürur duyub, onların xüsusilə Cənubi Amerika və yaxud hansısa uzaq ölkəyə “birbaşa uçuşları” Rusiyanın gücünün və sözügedən ölkələrə istisnasız dəstəyinin nümayişi kimi təqdim edilib.
Yəni Ukrayna Putinin qürurlandığı, fəxr etdiyi təyyarəni məhv etdi və bu, növbəti əməliyyatdır: bundan əvvəl Putinin xüsusi həssasiyyətlə yanaşdığı Krım körpüsünə zərbə endirilmişdi.
Analoji əməliyyatdır: 2022-ci ildə, Putinin ad günü “sürprizi” olaraq Krım körpüsünün partladılması əməliyyatı da partlayıcının Rusiya ərazisinə keçirilməsi və Krıma göndərilməsi ilə icra olunmuşdu; indi də konteynerlər Rusiya ərazisinə keçirilir və Rusiyanın öyündüyü strateji raket daşıyıcılarının yanına yerləşdirilir, sonra total hücum başlayır.
Bütün ekspertlər bu hücumu Yaponiyanın Pyorl Harberə hücumu ilə müqayisə edir və yaxud az qala hər kəs bunu “Tramp Ukraynanın kartının olmadığını deyirdi, varmış” kimi qiymətləndirməkdə maraqlıdır. Ancaq əsas sual bu olmalıdır: Ukrayna kanteynerləri hansı ölkə ərazisindən Rusiyaya ötürə bilib?
Ukrayna bundan əvvəlki analoji əməliyyatı Ermənistan üzərindən həyata keçirmişdi: Krım körpüsünə hücum üçün “zəif bənd” olaraq Ermənistan seçilmişdi və bu da təsadüf deyil.
Ermənistan Rusiyaya tətbiq edilən sanksiyaların dəlinməsində müstəsna rol oynayan əsas ölkədir. Ermənistan Avropadan hansısa yolla qəbul etdiyi malların təyinatını dəyişməklə, “təkrar ixrac” əməliyyatı aparır və Rusiyaya göndərir. Bu, artıq Avropa Birliyi üçün də gizli deyil və dəfələrlə nümuzlu beynəlxalq nəşrlər bu məsələyə toxunub, Ermənistanın Rusiyaya sanksiyaların dəlinməsindəki roluna AB-nin göz yumması da müzakirə edilib.
Krım körpüsünə hücumda partlayıcı maddənin Rusiyaya asanlıqla ötürülməsinin bir səbəbi də elə bu idi: Avropadan gələn mal Ermənistandan yenidən sənədləşdirilərək, adı dəyişdirilmişdi və “Ermənistanın ixracı” kimi Rusiyaya göndərilmişdi – Ermənistan Aİİ üzvü olduğu üçün Rusiyaya göndərdiyi məhsullar da sərhəddən daha az nəzarətlə qəbul edilir.
Krım körpüsü partladılandan sonra Ermənistandan gələn malların Rusiya sərhəd-keçid məntəqəsində ciddi yoxlanılmasına başlanmışdı. Bu, hətta Ermənistanın rəsmi şəkildə bir neçə dəfə narazılığına da səbəb olmuşdu. Ancaq aradan bir müddət ötdükdən sonra Ermənistandan gələn yük maşınlarının Rusiya sərhədindən keçidi yenə də “sadələşdi”.
Beləliklə, Ukrayna xüsusi xidmət orqanları analoji əməliyyatı yenə də Ermənistan üzərindən keçirə bilməzmi?
“Financial Times” qəzetinin jurnalisti Kristofer Miller “X” sosial şəbəkəsində Rusiya ilə münaqişənin həlli ilə bağlı Ukrayna memorandumunun tam mətnini dərc edib.
“Report”un məlumatına görə, sənəd bu gün İstanbulda baş tutan danışıqlardan əvvəl Rusiya tərəfinə verilib.
Layihənin mətni ukrayna və ingilis dillərində dərc olunub.
Memorandumun əsas məqamları arasında bunları qeyd etmək olar:
- sonrakı danışıqlar üçün quruda, havada və dənizdə tam və qeyd-şərtsiz atəşkəs;
- Rusiya ərazisində yerləşən ukraynalı uşaqların geri qaytarılması;
- Ukrayna neytrallığı qorumağa borclu deyil, Avropa İttifaqı və NATO ilə əməkdaşlıq etmək hüququna malikdir. Kiyev Ukrayna ərazisində Ukrayna Silahlı Qüvvələrinin sayının məhdudlaşdırılmasının əleyhinədir;
- bəzi anti-Rusiya sanksiyalarının tədricən ləğvi mümkündür, lakin lazım gələrsə, ləğv edilmiş məhdudiyyətlərin təsirini bərpa etməyə imkan verəcək “snapback” mexanizmi nəzərə alınmaqla;
- nizamlanmanın əsas aspektlərini müzakirə etmək üçün Rusiya və Ukrayna prezidentləri Vladimir Putin ilə Vladimir Zelenskinin görüşü keçirilməlidir;
Qeyd edək ki, İstanbulda bir saatdan çox davam edən danışıqlarda Rusiya və Ukrayna nizamlanmaya dair memorandumlarını müzakirə ediblər.
Adı açıqlanmayan ukraynalı məmur “Axios”a bildirib ki, Rusiyanın təqdim etdiyi sənəddə Ukrayna Silahlı Qüvvələrinin Rusiyanın işğalı altında olan Donbas, Luqansk, Xerson və Zaporojya bölgələrindən çıxarılması tələbi var.
Təklifdə on ukraynalı uşağın Ukraynaya qaytarılması da var.
Xəbər verdiyimiz kimi, Rusiyanın hərb tarixinə şok hadisə kimi düşəcək əməliyyat baş verib. Ukrayna Təhlükəsizlik Xidməti (UTX) Rusiya ərazisinin dərinliklərində keçirdiyi xüsusi dron hücumu ilə Moskvanın strateji aviasiyasına ağır zərbə endirib.
Musavat.com xəbər verir ki, Ukrayna kəşfiyyatı Murmansk və İrkutsk vilayətlərində yerləşən iki mühüm hərbi bazaya – Olenya və Belaya aerodromlarına gizli şəkildə sızaraq, kütləvi pilotsuz hücum həyata keçirib.
“Hörümçək toru” kod adı verilən əməliyyat çərçivəsində Ukrayna tərəfi 117 ədəd FPV tipli kamikadze drondan istifadə edib. Hər biri təxminən 1000 ABŞ dolları dəyərində olan bu dronlar vasitəsilə Rusiya ordusunun milyardlarla dollarlıq strateji aviasiyası ciddi şəkildə sıradan çıxarılıb.
İlkin qiymətləndirmələrə əsasən, hücum nəticəsində 40-dan çox strateji bombardmançı – Tu-95 və Tu-22M3 tipli təyyarələr, eləcə də A-50 erkən xəbərdarlıq sistemi daşıyan hava gəmisi məhv edilib və ya ciddi zədələnib. Ümumilikdə Rusiya Hərbi Hava Qüvvələrinin strateji bombardmançı potensialının 34 faizi sıradan çıxıb.
Əməliyyatın ən diqqətçəkən tərəfi isə hücumun Ukrayna ərazisindən deyil, birbaşa Rusiya daxilindən təşkil olunmasıdır. Məlumata görə, FPV dronları Rusiya ərazisinə yük maşınları ilə gətirilərək, hərbi bazaların yaxınlığında gizlədilib və daha sonra koordinasiyalı şəkildə işə salınıb. Bu isə Ukrayna xüsusi xidmət orqanlarının Rusiya ərazisinin dərinliklərində effektiv fəaliyyət göstərdiyini göstərir.
Əməliyyat UTX rəhbəri, general Vasili Malyukun nəzarəti altında planlaşdırılıb və icra olunub. Ukrayna mediası və müstəqil hərbi mənbələr bu hücumu simvolik və taktiki baxımdan Rusiya üçün sarsıdıcı zərbə kimi dəyərləndirirlər. Həm də bu, Rusiya ərazisində həyata keçirilmiş ən genişmiqyaslı və effektiv daxili diversiya əməliyyatı kimi tarixə düşə bilər.
UTX-in son günlərdə Rusiyada keçirdiyi digər əməliyyatlar da diqqətdən yayınmır. Belə ki, Mariupolda mülki əhalinin kütləvi qətliamında iştirak etmiş Rusiya ordusunun zabiti, mayor Zaur Qurtsiyev Stavropolda Ukrayna xüsusi xidmət orqanları tərəfindən aradan götürülüb.
Qeyd edək ki, o, hadisə zamanı Stavropol şəhər merinin müavini vəzifəsini icra edirdi.
Müşahidəçilər qeyd edirlər ki, bu əməliyyatlar Rusiya kəşfiyyatının ciddi boşluq buraxdığını nümayiş etdirir. Kreml xüsusi xidmətləri hazırda digər ölkələrə qarşı kiberhücum və təxribatlarla məşğul olduğu üçün ölkənin içində baş verən real təhlükələri gözdən qaçırır.
Azərbaycan Müdafiə Nazirliyinin hərbi polisinin keçmiş rəisi, polkovnik Rövşən Məhərrəmov Musavat.com-a açıqlamasında bildirib ki, bu, Ukrayna kəşfiyyatı tərəfindən aylarla hazırlanmış əməliyyatdır:
“Murmansk və Kursk sərhəddən 5 kilometr uzaqda yerləşir. Dronlar isə Ukraynadan deyil, elə Rusiyanın öz ərazisindən yönəldilib. Bunu Rusiya rəsmiləri də açıqlama verib təsdiq etdilər. Vurulan təyyarələr strateji əhəmiyyət kəsb edir, hava məkanında bir dəfəyə 12-15 min kilometr məsafəni yanacaq doldurulmadan uçuş edə bilirlər. Onlar nüvə silahını daşıyan təyyarələrdir və artıq Rusiyada istehsal olunmur, indi 17 ədəd qalıb. Sovet dövründə istehsal olunublar. Bu təyyarələr Rusiya üçün böyük əhəmiyyət kəsb edir. Bu əməliyyat Rusiyanın aviasiya parkına böyük bir zərbədir.
“Hörümçək toru” əməliyyatı Rusiyanın xarici kəşfiyyatının nə qədər zəif olmasını göstərdi. Xüsusi xidmət orqanları qabaqlayıcı addım kimi heç nə etməyib. Çünki ölkənin daxilində aparılan əməliyyatdan xəbərsiz olublar. Bu, Rusiyaya böyük bir zərbədir. Üç ildir ki, Ukrayna ilə müharibə gedir, ancaq Rusiya heç bir mühüm irəliləyiş əldə edə bilmir. Bir kəndi ələ keçirəndə isə bunu böyük bayram kimi təqdim edir. Rusiya özündən kiçik ölkələrə qarşı təxribat törədir, hədə-qorxu dilində danışır. Halbuki Rusiya Federal Təhlükəzislik Xidməti daxildəki problemlərlə məşğul olmalıdır. Bu ölkənin milli azlıqlarla ciddi problemi var. Məsələn, Tatarıstanda tatarlar öz dillərində cəmi 4 saat təhsil ala bilərlər. Bu da onların narazılığına səbəb olur. Başqırdıstanda da ayrı problemlər yaşanır. Bu, Rusiyanın daxilindəki narazılıqları göstərir.Gələcəkdə böyük bir inqilabi partlayış ola bilər. Çünki Rusiya xüsusi xidmət orqanları o qədər zəifdir ki, öz ərazisindən qalxan dronların haradan buraxıldığını bu gün də müəyyən edə bilmir.
Rusiyanın milli azlıqlar yaşayan ərazilərinə də bu proseslər gedir. Bu yaxınlarda tatarlarla görüşdüm, bunu onlar da etiraf etdilər. İnsanları böyük məbləğdə pulun müqabilində döyüşlərə aparırlar. Şimali Koreyadan, Afrika ölkələrindən muzdlu döyüşçülər gətirirlər. Rusiyanın canlı resursu və maliyyəsi artıq çökür. Üç ildən çoxdur ki, Ukrayna ilə müharibə aparır, iqtisadiyyatı buna nə qədər tab gətirə bilər ki?!
Ağır tonnajlı gəmilərinə ağır sanksiyalar tətbiq olunsa, Rusiyanın iqtisadiyyatı çox geri düşəcək. Bütün su hövzələrində Rusiya gəmilərinə sanksiya qoyulması məsələsi qaldırılıb, bu, ağır zərbədir. Bu müharibə Ukrayna xalqı öz ərazi bütövlüyünü təmin edənə qədər davam edəcək”.
Musavat.com
Ehtimal var ki, Polşada seçkilərin nəticələrini sabah səhər elan edəcəklər. Hal-hazırda isə ehtiyatlı optimizm yaradan xəbərlər var.
"İpsos"un açıqladığı ilk exit-pollun nəticələri belədir:
Tşaskovski-50.3%
Navrotski-49.7%.
Amma məsələnin ən vacib tərəfi odur ki, bu rəqəmlər diasporanın səsini nəzərə almadan hesablanıb, xaricdə yaşayan polşalıların əksəriyyəti isə Tşaskovskini dəstəkləyir, yəni əgər exit-pollun nəticələri dəqiqdirsə və fərq gerçəkdən 0.6%-dir, onda diasporanın səslərinin hesablanmasından sonra fərq daha da çoxalacaq və Tşaskovski növbəti prezident olacaq.
Rəsmi rəqəmləri və nəticələri gözləyirik, amma istənilən halda müsbət xəbərlər gəlməkdədir.
Kamran Cəfərov
TEREF
“Türkiyə burada sülhün əldə olunmasında israr etməlidir”
Avropa İttifaqının (Aİ) nümayəndələrinin Ukrayna münaqişəsinin həlli ilə bağlı İstanbulda planlaşdırılan danışıqlara qatılmasına icazə verilməməlidir. AYNA.AZ xəbər verir ki, bu barədə Türkiyənin “Aydınlıq” qəzeti yazıb.
Nəşrin müəllifləri Böyük Britaniyanın o vaxtkı Baş naziri Boris Consonun Ukrayna Prezidenti Volodimir Zelenskini sülh yolu ilə nizamlanma şərtləri ilə razılaşmamağa çağırdığı əvvəlki İstanbul danışıqlarının təcrübəsinə diqqət çəkiblər.
"Bu danışıqlar zamanı belə hal baş verməməlidir. Türkiyə burada sülhün əldə olunmasında israr etməli və Ukraynanın münaqişəni davam etdirməsini istəyən avropalılara imkan verməməlidir", - nəşr yazıb.
Rusiya nümayəndə heyəti Ukrayna tərəfi ilə danışıqlar aparmaq üçün İstanbula gəlib.
AzPost bildirir ki, Moskva ilə Kiyev arasında birbaşa danışıqların ikinci mərhələsinin sabah Türkiyədə baş tutacağı gözlənilir.
Daha əvvəl prezident Zelenski Ukraynanın görüşdə iştirakını təsdiqləyib. Tərəflərin atəşkəslə bağlı memorandumlar layihəsini müzakirə edəcəyi gözlənilir.
Rusiya nümayəndə heyətinə prezidentin köməkçisi Vladimir Medinski, Ukrayna nümayəndə heyətinə isə mayın 16-da keçirilən əvvəlki görüşdə olduğu kimi müdafiə naziri Rustem Umerov rəhbərlik edəcək.