 |
|
|
Məlum olduğu kimi istehsal olunan malların keyfiyyət göstəricilərinin qorunması və təhlükəsizliyinin təmin edilməsi baxımından markalanmanın əhəmiyyəti kifayət qədər böyükdür.Əgər hansısa bir firma müəyyən bir məhsulu və ya xidməti hazırlayıb müştərilərinə təqdim edirsə, mütləq formada bunun üçün bir marka formalaşdırmalı, rəsmini hazırlamalı, məhsul və ya mal haqqında obyektiv məlumat bazası yaratmalı və müştərilərə markalanma vasitəsilə bütün bunları çatdırmalıdır. Markalanma problemləri və məsələləri Azərbaycanda qanunvericilik səviyyəsində ciddi şəkildə tənzimlənir və bununla bağlı ölkəmizdə müvafiq Qanun qüvvədədir. Belə ki, “İstehlakçıların hüquqlarının müdafiəsi haqqında” Azərbaycan Respublikasinin Qanununda göstərilir ki, ölkə ərazisində istehsal olunan, həmçinin ixrac edilən malların, məhsulların hər birinin üzərində istehsal və ya ticarət markası olmalıdır.
Bəs istehlakçılar Azərbaycana idxal olunan məşhur dünya markaları barədə nə dərəcədə məlumatlıdırlar? Bununla bağlı vətəndaş İlkin Məmmədkərimovun maraq doğuran müraciətini diqqətinizə çatdırırıq.
Sizə şikayətim Unilever brendi ilə bağlıdır. Deməli mən illərdir əksər Unilever markalarının Azərbaycanda satılmaması, satılan markaların isə çox məhdud çeşiddə satılması üstəlik bütün supermarketlərdə əlçatan olmaması ilə bağlı Unilever ABŞ, Unilever Böyük Britaniya, Unilever Hindistan, Unilever Türkiyə ofislərinə şikayət edirdim. Mənimlə bir neçə il bundan əvvəl Unilever Türkiyə ofisindən zəng etdilər onlara bütün problemləri bildirdim lakin bir müddət sonra heçnə dəyişilmir bütün problemlər davam edirdi. Mən təkrar Unilever Türkiyə ofisinə şikayət etdim və mənimlə 2020-ci ilin yanvar ayında Unilever Bakı ofisindən əlaqə saxladılar onlarada bütün problemləri dedim mənə bütün problemlərin həll olunacağı vədi verilsədə bir müddət sonra yenədə heçnə dəyişmədi. Onuda deyim ki, Unilever kimi qlobal brendlərin bütün ölkələrdə müştərilər üçün əlaqə mərkəzi varki müştərilər istədikləri vaxt müraciətlərini edə bilir. Azərbaycan kimi 10 milyon əhalisi olan ölkədə isə Unilever-in əlaqə mərkəzi yoxdur. Problemin həll olunmadığını görüb Unilever-in Xətaidə, Ağ Şəhərdə yerləşən ofisinə getdim problemi xanıma izah etdim. Xanım bütün bu problemləri cavabdeh şəxslərə çatdıracağını söylədi. Bir müddət sonra yenə heç bir dəyişiklik olmadığını görüb Unilever Türkiyə Tüketici Hattına zəng etdim Azərbaycandan zəng etdiyimi bildirdim və bütün problemləri izah etdikdən sonra xanım operator mənə Emre Yusufoğlu adlı şəxsin E-mail adresini verdi və mənə bütün problemləri Emre beyin E-mailinə göndərməyimi bildirdi. Mən də bütün problemləri Emre beyin E-mail adresinə göndərdim. Bir neçə saat sonra cavab E-maili gəldi və Emre bəy mənimlə Unilever-in Azərbaycan və Gürcüstan üzrə direktoru Araz Tehmasebinin əlaqə saxlayacağını bildirdi. Araz bəy mənimlə əlaqə saxladı bütün problemləri ona da bildirdim. Mənə bütün problemlərin həll olunacağını və hansı supermarketdə markalarımızın tapa bilmirsinizsə həmin supermarketlərin adını ona göndərməyimi istədi, Mən də göndərdim. Bir müddət sonra bütün problemlər davam edirdi. Mən narahat etməyim deyə Araz bəyə zəng etmədim. Whatsapp vasitəsi ilə heç bir şeyin dəyişmədiyini bütün problemlərin davam etdiyini bildirdim. Mesajımı oxuyub nömrəmi həm Whatsapp, həm də Telegram-dan blok ettdi. Bunun nə demək olduğunu öyrənmək üçün zəng etdiyimdə, cavab vermədi. Bütün bu olanlardan sonra Emre bəyə baş verənlərlə bağlı E-mail yazdım və bu nə tərbiyəsizlikdir deyə sual verdim. Emre bəy mənə göndərdiyi cavab E-mailində baş verənlərə görə məndən üzr istədiyini bütün bu olanları lazımi şəxslərə çatdırdığın bildirdi. Özümü rəsmən axmaq yerinə qoyulmuş kimi hiss edirdim. Bilirsiz mənim illərdir P&G, Henkel, GSK, RB və s. qlobal brendlərin Azərbaycan ofisi və Azərbaycandakı rəsmiləri ilə əlaqəm var və sağ olsunlar indiyədək hansı sualım olubsa sevə-sevə cavablayıblar və bütün müraciətlərə həssas yanaşıblar. Yəni mən indiyədək belə bir rəzillik görməmişdim. Mən Araz bəyin şəxsi E-mailini öryəndim ona mənimlə əlaqə saxladığını, problemi həll etmək vədi verdiyini, nömrəmi blok etdiyini zəng etdikdə cavab vermədiyini, bunun nə demək olduğunu sual verdim və bildirdim ki, verəcək cavabınız yoxdur çünki. Mənə Aydın Əhmədov adlı şəxs E-mail göndərib problemin nədən ibarət olduğunu soruşdu. Aydın bəyə cavab E-mailimdə bütün problemləri izah etdim heç bir açıqlama vermədi. Verəcək cavabları yoxdur çünkü. Bütün ölkələrdə Unilever-in əksər markaları bütün çeşidləri ilə hər yerdə əlçatan olduğu halda Azərbaycanda əsas markaları satılmır, satılanlar da çox məhdud çeşiddə olur və hər yerdə əlçatan deyil. Birdə Unilever bəzi markalarının istehsalçı ölkəsini və tərkibini dəyişib. İllərdir Almaniya istehsalı gələn “Dove” duş geli indi Birləşmiş Ərəb Əmirlikləri gəlir. Onsuz da heç kimə sirr deyil ki, Unilever kimi brendlər Avropa ölkələrində və ABŞ-da daha keyfiyyətli məhsullar istehsal edir, Azərbaycan kimi ölkələrdə isə fərqli tərkib və aşağı keyfiyyətdə markalar istehsal edirlər. Unilever-in fırıldaqları bununlada bitmir. Məndə olan məlumata görə Unilever markalarını supermarketlərə vitrin pulu, hər bir marka üçün ayrıca barkod açmamaq üçündür. Çünki hər bir marka üçün barkod açmaq 5 min manatdır. Üstəlik idxalçıya əlavə pul verməmək üçün markalarını Sədərək və Binə ticarət mərkəzlərinə özü satır.
Mən də bir neçə ay öncə Unilever brendinin Azərbaycandakı özbaşınalığından İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə həm də Azad İstehlakçılar Birliyinə 24.08.2022-ci ildə şikayət etmişdim. İndiyədək mənə yalnız İqtisadiyyat Nazirliyindən icracı zəng edib Unilever-in ünvanını və əlaqə nömrəsini soruşub, mən də Unilever-in Bakı ofisinin ünvanını və brendin işçisi Aydın Əhmədov adlı şəxsin E-mailini vermişdim. Bir müddət bundan əvvəl İqtisadiyyat Nazirliyindən icracı zəng edib bildirdi ki, şikayətinizlə əlaqədar Unilever-ə sorğu göndərmişik cavab versinlər sizə cavab verəcəyik və indiyədək cavab verilmir. Bir neçə gün bundan əvvəl şikayətimi sosial şəbəkələrdəki müştəri qruplarında da paylaşmışdım. Paylaşımımın yorum hissəsinə brendin işçisi Aydın Əhmədovun bu qədər problemə aydınlıq gətirməsi üçün tag etdim. Adam nəinki problemə aydınlıq gətirmək, üstəlik öz rəzillikləri azmış kimi şikayətə ironiyalı cavab verir, üstəlik bu məsələnin sonuna qədər gedəcəyimi,problemim həll olunanadək şikayət etməkdə davam edəcəyimi bildirdikdə, tərbiyəsizcəsinə “Çox gözləyərsən əlinindən gələni ardına qoyma” deyərək cavab verir. Bu heç təəccüblü deyil, çünki bilirsiz Unilever əməkdaşlarına xas olan davranışdır. İstehlakçı hüquqlarının yüksək səviyyədə qorunduğu ölkələrdə Unilever kimi şirkətlər nəinki bu dərəcədə misli görünməmiş özbaşınalıq, müştəriyə qarşı adi bir kobudluq belə edə bilməzlər. İqtisadiyyat Nazirliyi bu ölkədə heç nədən çəkinməyən qanunlara tüpürən bu brendə qarşı nə vaxt tədbir görüb İstehlakçı Hüquqlarımı qoruyacaq? Mən də müştərilərin şikayətinə önəm verməyən, problemi həll etməyən və müştəriyə gəlir mənbəyi kimi baxan Unilever-in markalarından hər kəsi imtina etməyə çağırıram. Unilever kimi brendlər qanunvericilikdəki boşluqlardan məharətlə istifadə edirlər. Sağolun.
Aktualinfo.org
Sumqayıt Dövlət Universitetinin 3-cü kurs tələbəsi Əliyev Müşfiq Mikayıl oğlu təhsilhaqqını ödəyə bilmədiyi üçün heç bir dərsə, imtahana buraxılmadığını deyir.
Bu şikayətlə “Qafqazinfo”ya müraciət edən tələbə bildirib ki, Fizika Elektroenergetika fakültəsində İstilik Energetik Qurğular ixtisasi üzrə təhsil alır. Onun sözlərinə görə, illik təhsilhaqqı 1200 manadır: “Özüm şəhid övladıyam. Atam Əliyev Mikayıl Atababa oğlu 1992-ci il fevralın 26-da şəhid olub. 31 yaşım var, hərbçiyəm. Ailəliyəm, bir övladım var. Çox çətinliklə ailəmi dolandırıram. Təhsilhaqqımı ödəyə bilməməyimə səbəb isə banklara xeyli borcumun olmasıdır. Sadəcə birinci kursumun ödənişini etmişəm, daha sonra edə bilmədim. Övladım hidrosefaliyyadan əziyyət çəkir. Qızım həm də eşitmə əngəllidir. Nə eşidə bilir, nə də danışa. Qazancımı onun müalicəsinə sərf etdiyim üçün təhsilhaqqımı ödəyə bilməmişəm”.
Müşfiq Əliyevin sözlərinə görə, 2020-ci ildə dərslərdə və imtahanlarda iştirak edə bilməyib: “Vətən müharibəsi başladı və mən həmin vaxt ön cəbhədə olmasam da, xidmətdə idim. Dərslərdə axrıncı dəfə aprel ayında iştirak etmişəm. Ödənişi etmədiyim üçün imtahana buraxılmadım və dedilər ki, dərslərə də buraxılmayacağam”.
Tələbə əlavə edib ki, şəhid övladı kimi dövlət tərəfindən ona ev də verilməyib: “Baxmayaraq ki, atamın ölümündən 30 il keçib və bununla bağlı lazım olan sənədlərlə dəfələrlə Sosial Xidmətlər Agentliyinə müraciətlər etmişəm”.
Müşfiq Əliyevin dərslərə və imtahanlara buraxılmaması ilə bağlı Sumqayıt Dövlət Universitetinə müraciət etdik. Universitetdən sorğumuza verilən açıqlamada deyildi ki, tələbə ilə görüşərək ona məsələ ilə əlaqədar ətraflı məlumat verilib.
Tələbə M.Əliyev də saytımıza təsdiqlədi ki, bizə müraciətindən sonra universitetə dəvət olunub. Ona bildirilib ki, problemi ilə bağlı kömək etməyə çalışacaqlar, vəziyyətlə bağlı rektora da məlumat veriləcək: “Lakin hələ də heç bir tədbir görülməyib”.
Şəhid övladına ev verilməsi məsələsinə gəlincə, bununla əlaqədar Sosial Xidmətlər Agentliyinə üz tutduq. Qurumun səlahiyyətli şəxsi Müşfiq Əliyevin əlaqə nömrəsini alaraq onunla danışılacağını bildirdi. M.Əliyevin saytımıza bildirdiyinə görə, artıq onunla əlaqə saxlanılıb və hazırda agentliyin balansında ikiotaqlı mənzilin olmadığı, yalnız olduğu halda problemə baxıla biləcəyi qeyd edilib.
«Naxçıvanda Rafael Əliyevdir, Bağdadda kor xəlifə».
Ovqat.com-a Naxçıvandan göndərilən şikayət məktubunda belə deyilir.
Bir hərbçi tərəfindən qələmə alınan məktubda bildirildiyinə görə, Naxçıvan MR Maliyyə naziri Rafael Əliyev özünü elə sərhədsiz səlahiyyət sahibi hesab edir ki, hətta Azərbaycan prezidenti İlham Əliyevin Fərman və Səlahiyyətlərinə belə məhəl qoymur. Məktubu olduğu kimi dərc edirik:
«Salam Heydər bəy. İlk öncə Naxçıvanda haqsızlığa qarşı baş qaldırmanızı yüksək qiymətləndirir və şəxsim adından sizlərə öz təşəkkürümü bildirirəm.
Heydər bəy, bildiyiniz kimi, Naxçıvanda aparılan Bakı yoxlamaları bəzi təşkilatlarda qismən də olsa silkələnmələrə yol acmışdı. Əlbəttə, sizin də bu işdə özünüzəməxsus xidmətləriniz var. Odur ki, Ovqat.com-a bütün naxçıvanlılar adından təşəkkürümü bildirirəm.
Amma Naxçıvan Maliyyə naziri Rəfael Əliyev hələ də hərbi qulluqçuların haqqını yeyir, onların müavinətlərini illərdir mənimsəyir. Bu adama nədənsə Naxçıvanda «dur» deyən tapılmır.
Rafael Əliyevin zülmünə məruz qalanlar içərisində ən çox incidilənlər isə xidmət edən hərbi qulluqçulardır. Bu adam illərdir, hərbi qulluqçuların istifadə etmədiyi məzuniyyət əvəzi pul kompensasiyasını vermir və hüquqa məhəl qoymur, Azərbaycan Respublikası Prezidentinin hərbi qulluqçuların pul təminatı haqqında imzaladağı Sərəncam və Fərmanlarını icra etmir. Bir sözlə "Naxçıvanda Rafael Əliyevdir, Bağdatda kor xəlifə".
Heydər bəy, bizim bu qanuni vəsatimizin mənimsənilməsini işıqlandırmanızı sizdən artıq dərəcədə xahiş edirik».
Məktubda daha sonra Naxçıvan Muxtar Respublikasında Ovqat.com-a tətbiq edilmiş qanunsuz «sanksiyalardan» da bəhs olunur.
«Sonda onu da qeyd edim ki, sizin Ovqat.com sayıtınız Naxçıvanda işləmir, bunun da səbəbkarı Naxçıvan Rabitə naziri Vüsal Sevdimalıyevdir...»
Məktubda Naxçıvan MR Rabitə və Yeni Texnologiyalar Nazirliyində baş alıb gedən qanunsuzluqlar barədə ciddi ittihamlar irəli sürülüb. Məlumatları dəqiqləşdirib, dərc etməyə çalışacağıq.
Xəbər verildiyi kimi, dünən Azərbaycan Milli Elmlər Akademiyasının prezidenti postuna seçkilər keçirilib. Nəticələrə əsasən İsa Həbibbəyli qurumun rəhbəri seçilib.
TEREF.AZ JAMAZ.İNFO-ya istinadla bildirir ki, bu hadisəyə Milli Şuranın sədri, AMEA-nın üzvü, professor Cəmil Həsənli maraqlı münasibət sərgiləyir. Tarixçi alimin Facebook hesabında bununla bağlı yazıbnı olduğu kimi təqdim edirik:
Dünən İsa Həbibbəylinin Azərbaycan Milli Elmlər Akademiyasının prezidenti təyin edilməsi cəmiyətdə xeyli suallar doğurdu. Əgər 3 ay bundan əvvəl radikal islahat adı ilə təqdim olunanlar, Akademiyanın parçalanması İsa Həbibbəylinin prezident olacağı ilə nəticələnəcəkdisə daha bunun nəyi radikal və harası islahat idi. Həmin “islahatla” Akademiya öldürüldü, Həbibbəylinin prezident təyin edilməsi isə özünün dəfn mərasimi, bütövlükdə Akademiya elminin fatihəsinin verilməsidir. İsa Həbibbəyli Akademiyanın yerliçilik mərəzinə tutulmasının mərkəzi fiqurlarından, əsas koordinatorlarından biri idi. İndi isə birincisi oldu. Elmə heç bir töhfə verməyən bir dəstə həmyerlilərin Akademiya üzvü seçilməsində onun “əməyi və rolu” müstəsnadır.
Azərbaycan Milli Elmlər Akademiyası deyəndə ki, artıq Akademiya nə millidir, nə də elmidir. Orta səviyyəli birisi kimi İsa Həbibbəyli də çoxdan elmdən ayrıldığı üçün alimdən çox məmurdur, çinovnikdir. Adam ikicə cümlənin bir-birinin ardınca quraşdırıb normal bir fikri ifadə edə bilmir. Şübhəsiz ki, vaxtıla Həbibbəyli Mirzə Cəlilin yaradıcılığı, mühiti və müasirləri ilə bağlı bir şeylər yazıb. Amma son illərdəki “qələm təcrübəsi” ilə o özü Mirzə Cəlilin müasir personajlarından birinə çevrilib. Axı Mirzə Cəlil həmişə bizim müasirimizdir. Ata Akademiyanın prezidenti, oğul da Naxçıvan Gömrük Komitəsinin sədri. Daha əvvəl də yazdığım kimi son illərdə gömrük orqanları ilə akademiya arasında elə bir fərq yox idi. İndi bu fərq həm mənəvi, həm də milli mənada daha da qısaldı. Bir qalır gömrük komitəsinin adını Milli Gömrük Komitəsi qoysunlar.
Təbrizdə maraqlı bir deyim var: qanı damara görə alarlar. İsa Həbibbəyli bir tərədən Milli Məclisin deputatıdır, o bir tərəfdən Komitə sədri, yan tərəfdən YAP siyasi şurasının üzvü, yön tərəfdən YAP Elm və təhsil komitəsinin sədr müavini (görəsən sədri kimdir?), yuxarı tərədən Ədəbiyyat İnstitutunun direktoru, aşağı tərəfdən AMEA-nın Humanitar elmlər bölməsinin sədridir. Daha lüğətdə tərəfləri göstərən ifadələr qalmadığı üçün o biri vəzifələrini yazmıram. Hələ prezident olmazdan əvvəl keçirdiyi növbəti iclasların birində demişdi ki, bu gün bundan əvvəl 18 iclas keçirib. Onun prezident seçilməsi olsa-olsa keçirdiyi iclasların sayını artıra bilər, elmə elə bir töhfə verə bilməz. Dediyim odur ki, islahat deyilən nəsnə AMEA-nı elə vəziyyətə saldı ki, hətta İsa Həbbəyli kimi birisi də onun prezidenti ola bildi. Adam hələ birinci vitse prezident olanda müasir Azərbaycan dilçiliyinin ən mükəmməl bir alimi 80 yaşlı Tofiq Hacıyevə “məsləhət” görmüşdü ki, Tofiq müəllim yaxşı olar ki, özün ərizə yazıb könüllü şəkildə Dilçilik İnstitutunun direktoru vəzifəsindən gedəsən, biz səni əmrlə çıxarsaq “turdavoyun” körlanar. Əsl Mirzə Cəlilik mövzudur, özü də müasirindən.
Ramiz Mehdiyevdən sonra İsa Həbbəylinin Akademiyanın prezidenti təyin edilməsi AMEA deyilən qurumu yenidən ironiya mənbəyinə, gülüş hədəfinə çevirdi. Yəni İsa Həbibbəylinin prezidentliyi elə Akademiyanın Mehdiyevləşməsinin davamıdır, onun daha eybəcər formasıdır, regional xəstəliyin “elm məbədində” xroniki hal almasıdır. Vaxtılə mən onu və belələrini “donqili akademiklər” adlandırmışdım. İndi Akademiya özü bütövlükdə “Donqili Akademiya” oldu. Axır bu islahatların bir çıxacağı vardı. Şükür ki, bu xatasız ötüşdü və Milli Elmlər Akadeiyamızın “millisiz”” və elmsiz” donqili bir quruma çevrilməsi ilə yekunlaşdı.
“Qaz, yol, məktəb, uşaq bağçası, tibb məntəqəsi, ictimai nəqliyyat yoxdur, işıq dirəkləri aşır, əsasən yayda su qıtlığı hökm sürür”.
Qəbələnin Bəyli və Quşlar kəndlərinin sakinləri Meydan TV-yə kənddəki sosial problemlərdən danışıblar.
Onlar bildiriblər ki, hər iki kənddə yaşayış üçün vacib şərtlər olmadığından, insanların güzəranı olduqca ağır keçir. Bəylidə 75, Quşlarda da təqribən o civarda ailə yaşayır. Sakinlərin sözlərinə görə, Sovet vaxtı Qəbələnin kəndlərində, o cümlədən, Bəyli və Quşlarda mavi yanacaq olub. 1990-cı illərin əvvəllərində kəndlərə mavi yanacağın verilişi dayandırılıb. Mavi yanacağın verilməsi son illərdə başqa kəndlərdə bərpa olunsa da, bu iki kənddə hələ də adamlar qaz xətlərinə baxıb, köks ötürürlər.
Bəyli sakini İntiqam Quliyev danışır:
“Sovet vaxtı Ağdaş istiqamətindən gələn qaz borusu ilk bu kənddən keçib, bizdən Quşlara, oradansa başqa kəndlərə gedib. İndi də qaz xətləri yerindədir, bir az qırıq yerlərin təmir-bərpasına ehtiyac var. Ancaq qaz verilmir. Qaz qonşuluqdakı Savalan kəndinədək gəlir, ordan bu tərəfə xətt bağlıdır, verilmir. Məsələn, Quşlardan sonrakı kəndlərdə qaz var, o kəndlərə başqa istiqamətdən gəlir. Bir sözlə, ətraf kəndlərin hamısında qaz var, iki kənd qalıb ortada…”.
Bəyli və Quşlarda qış sərt keçir. Ancaq bir neçə ildir ki, kəndlilər evlərini isitmək üçün meşədən çör-çöp də yığa bilmirlər. Nəticədə baha qiymətə odun almalı olurlar. Odunun qiyməti ilbəil artır ki, bu da büdcəsi olmayan kəndliyə uyğun deyil.
Hər iki kəndin enerji təminatı bərbaddır. Qəzalı vəziyyətdə olan naqilləri saxlayan 30-40 ilin çürümüş taxta dirəklər aşmasın deyə, kəndlilər onların dibinə əlavə dirəklər basdırıblar. Qışda isinmək üçün qızdırıcılardan istifadə olunduğuna görə, naqillərdə qısaqapanmalar olur, köhnə ötürücü şitlər sıradan çıxır, nəticədə bu iki kənd tez-tez işıqsız qalır.
Təhsil məsələsi də hər iki kənddə problemlidir. Bəyli kəndinin uşaqları 2-3 kilometr qol qət edərək Quşlardakı məktəbə gedir. Halbuki, heç bu məktəb də istifadəyə yararlı deyil. Bina köhnədir, dərs ləvazimatları, avadanlıqlar yararsızdır.
Bəylidə tibb məntəqəsi yoxdur, Quşlardasa tibb məntəqəsi adına Sovetdənqalma bir tikili var – dağılmış, qapısı qıfıllı…
Sakin İlhamə Səfərova danışır: “Əvvəllər Bəyli ilə Quşlar eyni sovetlikdə idi, indi ayırıblar. Tibb məntəqəsi Quşlarda olub, Bəyli kəndinin sakinləri də həmin tibb məntəqəsindən istifadə edib. Uzun illərdir ki, tibb məntəqəsindən geriyə uçuq-sökük bir daxma qalıb. Hər iki kəndin xəstələri ən aşağı tibbi xidmət almaq üçün də rayon mərkəzinə getməlidir. Hər dəfə sistem qoşdurmaq üçün 10 manat o başa, 10 manat bu başa xərcləməlisən. Çoxu xəstələnir, imkansızlıqdan tibbi xidmət ala bilmir, dünyasını dəyişir”.
Bu kəndlərdə yol da bərbaddır. Yağış yağanda palçıq dizə qalxır, uşaqlar məktəbə gedəndə ayaqlarına sellofan bağlayır.
Kəndliləri narahat edən məsələlərdən biri də işsizlikdir. Bəyli və Quşlarla rayon mərkəzi arasında 30 kilometr yol var. Ancaq sakinlərin mərkəzə gedib-gəlmələri üçün ictimai nəqliyyat yoxdur. Taksiylə gedib-gəlmək təxminən 20 manata başa gəlir:
“Kəndlərdə iş yoxdur, məşğuliyyətimiz maldarlıqdır, əkindir, ancaq bu işlərlə məşğul olmağa şərait, su yoxdur. Əkinçilik aşağı səviyyədədir, baha başa gəldiyi üçün kəndlilər əkin işinə girişmir. Qalır bircə heyvandarlıq, o da orta səviyyədədir. İş yalnız rayonun özündə tapmaq mümkündür, ancaq ictimai nəqliyyat olmadığından, adamlar kənddən kənara çıxa bilmir”.
Məsələn, Bəylidə yalnız bir üzümçülük təsərrüfatı var, kəndlilərin bir qismi orada işləyir, o da mövsümi işdir. Üstəlik, bu iş bütün ailələri əhatə etmir.
Hər iki kəndin sakinləri uzun illərdir ki, sadalanan problemlərin həll olunması üçün aidiyyəti qurumlara yazır, ayaq döyür. Hər dəfə də eyni sözləri eşidirlər – növbəti ildən hər şey yaxşı olacaq:
“Deyirlər, gələn ay yol çəkiləcək, o biri ay qaz veriləcək… Artıq bu boş vədlərdən boğaza yığılmışıq”.
Qəbələ Rayon İcra Hakimiyyətindən Meydan TV-yə bildirilib ki, qurumun nümayəndələri tez-tez həmin kəndlərdə olur, problemləri qeydə alır. İcra hakimiyyəti problemlərin aradan qaldırılması üçün digər aidiyyəti qurumlara rəsmi müraciətlər edir. Kəndlərdə ilk növbədə qaz və yol problemlərinin həlli nəzərdə tutulub. //Meydan TV//
DogruXeber.az:[b][/b] - Oktyabrın 24-də Masallı Rayon Statistika idarəsi rayondakı bələdiyyələrin gəlirləri və xərcləri haqqında məlumat paylaşıb.
Məlumatda qeyd olunur ki, 9 ay ərzində Masallıdakı 36 bələdiyyə ümumilikdə 363, 6 min manat gəlir əldə edib, 380, 9 manat isə xərcləyib.
Cenub.az-ın araşdırma qrupub u rəqəmləri, necə deyərlər, çözəliyib.
Məlum olub ki, Masallı bələdiyyələrinin 9 ayda qazandığı 363, 6 min manatı rayondakı 36 bələdiyyəyə böləndə, hər bələdiyyəyə 9 ayda ən yaxşı halda 10.122 manat pul düşür. Həmin 10.122 manatı da 9 aya böləndə hər bələdiyyənin ortalama hər ay 1.122 manat düşdüyü anlaşılır.
Ortaya suallar gəlir?
Bələdiyyə bu gəlirləri nədən və haradan qazanır?
1. Subsidiyalar
2. Vergilər
3. İcarələr
4. Torpaq satışı
İndi oğulsan, öyrən ki, subsidiya nə qədərdir, icarədən, torpaq satışından, vergidən gəlir nə qədərdir?
Ölkədəki tankların, qumbaraların, minaların, sualtı qayıqların sayın öyrənmək olar, amma bələdiyyələrin gəlir-çıxarını yox.
Halbu ki, Bələdiyyələr Haqqında Qanuna görə, hər 6 aydan bir, BƏLƏDİYYƏLƏR seçicilərinə məlumat verməlidir. Bunun üçün çoxlu adam yığmaq çətin olsa, müvafiq saytlarda, ən azından özlərinin feyzbuk səhifələrində (onların belə səhifələri varmı?) həmin detallı məlumatları paylaşa bilərlər.
(cenub.az saytı belə məlumatları bizə təqdim olunsa, hər vaxt ödənişsiz, detalları ilə paylaşmağa hazırdır)
Bələdiyyələr qazandıqlarından çox xərcləyir, yaxud, niyə Masallıdakı 36 bələdiyyədən 31-i kəsirlə işləyir.
Yuxarıda qeyd etdiyimiz kimi, bələdiyyələr qazandığından çox xərcləyir və 36 bələdiyyənin 5-dən 4-ündən çoxu, kəsirlə işləyir.
Və bu, illərlə belədir. Qəribə səslənsə də, görəsən, hansı heyvandar “qısır” inəyi, süd verməyən inəyi illərlə saxlayar?
Bələdiyyələr, haradan qazandıqlarını gizlətdikləri kimi, həmin pulları hara xərclədiklərini də həmin qayda da gizlədirlər.
Rayonun çox önəmli yerlərində obyektlər tikili? Görəsən, onlar bələdiyyəyə nə qədər pul köçürür? Bir neçə il öncə AzərSUN Qızılağac bələdiyyəsindən 150 hektar torpağı icarəyə götürmüşdü. İndi o torpaqlar kimlərə və neçəyə icarəyə verilir?
Iki il öncə saytlarda məlumat yayıldı ki, rayonun Musaküçə kəndində 1000 maşından artıq qum satılıb. O pullar hara getdi?
Hələ Qəriblər kəndi ərazisində çay yatağında daşının daş-qum üçün hər gün ciblərə gedən “levi” pullar hara getdi?
Onlarla belə misallar çəkmək olar.
Niyə müvafiq orqanlar buna susur. Bələdiyyələrin fəaliyyətində aşkarlığa mane olanlar kimlərdir? Həmin dairələrdən seçilən deputatlar belə məlumatların gizlədilməsində niyə maraqlıdırlar?
Axı, bu aşkarlıq nə pul, nə digər material tələb etmir.
Gecə-gündüz saflıqdan, paklıqdan danışanlar, niyə müvafiq qanunlara hörmətsizlik edib bələdiyyələrdə aşkarlığı təmin etmirsiniz?
Yalançı rəqəmlərlə başımızı niyə qatırsiniz?
Bizimlə “faiz-faiz” oynamaqdansa, yazın kı, konkret hansı bələdiyyələr gəlirlə işləyib, hansı bələdiyyələr illərlə kəsirlə işləyir?
Qısası, hər şeyi detalları, xırdalıqları ilə bildirin və biz də çap edək. Xalq bilsin Kİ, harada nə var, kim nəyi neçəyə alır, neçəyə satır? Demirsinizsə, tələb etmirsinizsə, inciməyin, belələri ilə ya şəriksiniz, ya aciz.
Qeyd: Yəqin ki, yaydığı məlumatı “alt-üst” etdiyimə görə, Masallı Statistika İdarəsinin gənc və perspektivli müdiri bizdən inciməz- çünki belə detallı məlumatlar verməyi onlara qadağan ediblər.
Həm də belə gizlədilən məlumatlar təkcə bələdiyyələrdə deyil.
Araşdıracağıq. Bizi izləyin. Kim aşkarlıqdan qaçırsa, o...
Cenub.az. Zahir Əmənov
Göygöl şəhəri 1 nömrəli tam orta məktəbin müəllim kollektivi və həmin məktəbdə təhsil alan uşaqların valideynləri Elm və təhsil naziri Emin Əmrullayevə müracət edib.
Nazirə edilən bu dəfəki müraciət isə ənənəvi müraciətlərdən fərqlənib.
Söhbət adıçəkilən məktəbdə sentyabrın 15-dən bu günə qədər suyun olmamasıdır.
Gununsesi.info-nun elektron postuna daxil olan müraciəti biz də təqdim edirik.
Təhsil naziri cənab Emin Əmirullayevə.
Hörmətli cənab nazir!
Fəaliyyət göstərdiyimiz Göygöl şəhəri 1 nömrəli tam orta məktəbdə sentyabrın 15-dən bu günə qədər su yoxdur.
Bu səbəbdən 3 mərtəbəli məktəbdə 12 sanitar qovşağını təmizləmək mümkün deyil.
Məktəbdə müəllim və şagirdlərin ümumi sayı 1000 nəfərdən artıqdır.
Həmçinin 12 gündən artıqdır ki, məktəbdə işıq yoxdur.
Məktəbin müəllimləri şəxsi vəsaiti hesabına, cibimizdən işıq sayğacının kartına pul yükləyirik. (Zərurət olarsa ödəniş qəbzini də Sizə göndərə bilərik.)
Məktəbdə hər bir sinif müəllimi süpürgə və digər yumşaq inventarları öz şəxsi vəsaiti ilə alır.
Göygöl Təhsil Sektoruna bu problemlər barədə bir neçə dəfə müraciət olunub.
“Pul yoxdur, yuxarının da məlumatı var, pul olanda su motoru düzələcək, sayğaca pul yüklənəcək” deyə cavablar verilib.
Bu barədə Gəncə-Daşkəsən Regional Təhsil İdarəsinə, Göygöl Təhsil Sektoruna dəfələrlə rəsmi məktubla müraciət edilib.
Yazdıqlarımızı kiminsə şəxsinə yazılmayıb.
Hamısı faktlardır. Araşdırmanızı xahiş edirəm.
Cənab nazir!
Bu məsələlərdən sizin məlumatlı olduğunuz bildirilir.
Müəllimlər də, şagirdlər də, valideynlər də bilmək istəyir ki, doğrudan da cənab nazir Emin Əmirullayevin bu işdən xəbəri var? Yoxsa bizi aldadırlar?
Göygöl şəhəri 1 nömrəli tam orta məktəbin bütöv müəllim, şagird, müəllim kollektivi bilmək istəyir ki, biz niyə cibimizdən süpürgə almalıyıq?
Biz niyə məktəbin işığının pulunu cibimizdən ödəməliyik?
Biz niyə 1 aydan çoxdur təmizlənə bilməyən sanitar qovşaqlarından istifadə etməliyik?
Biz niyə məktəbə kapron qablarda əlimizdə su daşımalıyıq?
Bu işin cavabdehi kimdir?
Niyə məktəbdə bu cür xoşagəlməz hallar yaşanır?
Suallarımıza cavab istəyirik.
Hörmətlə: Göygöl şəhəri 1 nömrəli tam orta məktəbin şagird, müəllim, valideyn kollektivi
Gununsesi.info
Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan sabiq polis əməkdaşı Ramin Talıbovun cinayət işi üzrə məhkəmə prosesi başlayıb.
Bakı Ağır Cinayətlər Məhkəməsində hakim İradə Həsənzadənin sədrliyi ilə baş tutan prosesdə təqsirləndirilən şəxslərin anket məlumatları dəqiqləşdirilib.
Daha sonra Ramin Talıbovun vəkili bir neçə vəsatətlə çıxış edib. Vəkilin ilk vəsatəti müdafiə etdiyi şəxs barəsində olan cinayət təqibinə bəraətverici əsaslarla xitam verilməsi olub. O bildirib ki, müdafiə etdiyi şəxs barəsində istintaq orqanı tərəfindən verilən ittihamda heç bir sübut yoxdur: “20 il əvvəl istintaqa ifadə verən Hindistan vətəndaşları deyiblər ki, Samir Kərimovun yanında bir cavan polis əməkdaşı olub, həmin polis əməkdaşı kənarda dayanıb, heç bir halda müdaxiləsi olmayıb. Bundan başqa, müdafiə etdiyim şəxsin həmin adamlarla telefon danışığı da olmayıb”.
Prokuror isə deyib ki, bu məsələyə məhkəmə araşdırmasının sonunda qiymət verilməlidir.
O, vəsatətin baxılmamış saxlanılmasını istəyib. Hakimlər hazırkı mərhələdə vəsatəti baxılmamış saxlayıblar.
Daha sonra vəkil prosesin audioyazı ilə aparılması barədə vəsatət verib. Hakimlər hazırkı mərhələdə prosesin audioyazı ilə aparılması üçün texniki imkanların olmadığını deyiblər. Bu səbəbdən vəsatət təmin olunmayıb.
Bundan sonra vəkil müdafiə etdiyi Ramin Talıbovun əleyhinə ifadə vermiş bəzi şahidlərin dindirilməsi barədə vəsatət verib.
Vəkil qeyd edib ki, həmin şahidlər 13 il əvvəl prokurorluqda dindirilsələr də, cinayət işi sonradan yenilənən zaman həmin şahidlərin dindirilməsi, təqsirləndirilən şəxslərlə üzləşdirilməsi təmin olunmayıb.
Bu vəsatəti digər təqsirləndirilən Samir Kərimovun vəkili Kamandar Nəsibov da dəstəkləyib. Onun sözlərinə görə, sabiq baş prokuror Zakir Qaralovun Samir Kərimovla yaxşı münasibətləri olub.
O qeyd edib ki, Qaralova kostyumu da Samir Kərimovun atası alıb. Vəkilin sözlərinə görə, Abbas Abbasovun oğlu Aydın Abbasovun şikayətindən sonra Samir Kərimovla bağlı araşdırma başlanılıb. Vəkil deyib ki, şikayətçi Hindistan vətəndaşları Aydın Abbasovun himayədarlığı altında olublar:
“Aydın Abbasovun müraciətindən sonra Zakir Qaralov məsələyə qarışıb. Amma Samir Kərimovla bağlı heç bir araşdırma aparılmayıb. Biz müdafiə tərəfi olaraq dəfələrlə bununla bağlı istintaqa müraciəöt etsək də, bu iş dondurulub. Cinayət işinin icraatı dayandırılıb. Biz də hesab edirik ki, həmin şahidlər cinayət işi təzələnəndən sonra dindirilməli idilər. Amma istintaq nədənsə bunu etməyib. Biz də həmin şahidlərin dindirilməsinin təmin olunmasını istəyirik”.
Samir Kərimov deyib kİ, hazırda 62 yaşı var, ürək-damar sıxıntısı xəstəliyi keçirib, həmçinin kəskin böyrək çatışmçazlığından əziyyət çəkir. Göz yaşlarını saxlaya bilməyən Samir Kərimov deyib ki, prokurorluq orqanlarında bir sıra yüksək vəzifələrdə xidməti olub, sonuncu iş yeri isə Bakı şəhər prokurorluğunda müstəntiq vəzifəsi olub. O bildirib ki, Baş prokurorluqda onun vəzifəsi daha yüksək olub və Zakir Qaralovun baş prokuror təyin olunması üçün təqdimatın verilməsində iştirak edib.
Samir Kərimov əlavə edib ki, Zakir Qaralov baş prokuror təyin olunandan sonra onu Baş Prokurorluqdan kənarlaşdırıb və Bakı şəhər Prokurorluğuna müstəntiq təyin edilib.
Samir Kərimov qeyd edib ki, bu cinayət işi üzrə 1 il istintaq aparılıb və işlə bağlı onu kiminləsə üzləşdirməyiblər.
Müşavirə keçirən hakim heyəti isə vəsatəti hazırkı mərhələdə baxılmamış saxlayıb. Hakim İradə Həsənzadə deyib ki, cinayət işi üzrə əsas şahidlər dindirildikdən sonra əlavə şahidlərin dindirilməsi məsələsi müzakirə olunacaq.
Daha sonra Ramin Talıbovun vəkili o dövrdə bölmə rəisi işləyən Ülvi Allahyarovun əlavə şahid qismində dindirilməsi barədə vəsatət verib. Vəkilin bu vəsatəti təmin edilib. Hakim deyib ki, əsas şahidlər dindirildikdən sonra bu şahidin dindirilməsi təmin olunacaq.
Bundan sonra Samir Kərimovun vəkili Kamandar Nəsibov deyib ki, müdafiə etdiyi şəxs Baş Prokurorluqda müxtəlif yüksək vəzifələrdə çalışıb. Onun sözlərinə görə, sonuncu iş yeri isə Bakı şəhər Prokurorluğu olub və sonradan işdən çıxarılıb.
Kamandar Nəsibov bildirib ki, işdən çıxarılandan sonra Samir Kərimovun barəsində araşdırma başlanıb: “Bununla bağlı biz müdafiə tərəfi olaraq Baş Prokurorluğa dəfələrlə müraciət etmişik. Teleqramlar vurmuşuq. Bununla bağlı iş mareriallarında da var. Samir Kərimov burada iş tapa bilmədiyi üçün Rusiyaya gedib. Orada vətəndaşlığı qəbul edib, Rusiyada yaşayıb, amma heç yerdə gizlənməyib. Dəfələrlə Azərbaycanın Rusiyadakı səfirliyində olub, onların təşkil etdikləri tədbirlərdə iştirak edib.
Rusiyada olmasına baxmayaraq Samir Kərimov yenə də barəsində aparılan araşdırma ilə bağlı teleqramalar göndərib, dindirilməsini istəyib. Amma bu məsələ araşdırılmayıb. Bir gün Samir Kərimov səfirliyə gedib. Orada Daxili İşlər Nazirliyinin nümayəndəsi onu qəbul edib və deyib ki, barəsində araşdırma başlanıb. Bundan sonra onu Moskva prokurorluğuna aparılıb. Azərbaycan tərəfi onu tələb edib.
Amma Moskva prokurorluğa Samir Kərimovu təhvil verməyib və onun barəsində olan cinayət işinin materiallarını tələb edib. Azərbaycan prokurorluğu isə onun barəsində olan sənədləri Moskva prokurorluğuna göndərməyib. Biliriblər ki, onların sənədləri orada bərbad vəziyyətə düşəcək”.
Kamandar Nəsibov deyib ki, sonradan Daxili İşlər Nazirliyinə müraciət ediblər: “Nazirlikdən Samir Kərimovun barəsində axtarışın ləğv edildiyini deyiblər. Bir il sonra isə müraciətimizə cavab olaraq bildirilib ki, həmin sənədlər məhv edilib. 2004-cü ildən 2022-ci ilin fevralına kimi Samir Kərimovun barəsində axtarış aparılmayıb. Bu da rəsmi sənədlərlə iş materillarında öz təsdiqini tapır.
Həmçinin Samir Kərimov şəxsiyyət vəsiqəsini yeniləmək üçün ASAN xidmətə müraciət edir. Səhəri gün isə onu həbs edirlər. Bildirmək istəyirəm ki, Samir Kərimovun xəstəliyi var. Onun həbsdə saxlanılmasına ehtiyac yoxdur. Bundan əlavə, cinayət işinin cəlb etmə müddətinin vaxtı da keçib. Onun barəsində seçilmiş həbs qətimkan tədbirinin ev dustaqlığı ilə əvəz olunmasını istəyirik”.
Samir Kərimov bildirib ki, onun bu işlərdə heç bir günahı yoxdur: “Məhkəmə araşdırması zamanı da bu müəyyən olunacaq. Mən də bu işə aydınlıq gətirilməsini istəyirəm. Bu işi Abbas Abbasovun oğlu Aydın Abbasov qurub”.
Prokuror isə deyib ki, təqsirləndirilən şəxs hüquq-mühafizə orqanları tərəfindən axtarışda olub. Onun sözlərinə görə, Samir Kərimov Rusiyaya gedib və bundan sonra da ad-soyadını dəyişib: “2006-cı ildə isə Rusiya vətəndaşlığını alıb. Başqa ad-soyadla Azərbaycana gəlməsindən heç kim xəbərdar ola bilməzdi”.
Bu zaman prokurorla vəkil Kamandar Nəsibov arasında mübahisə yaranıb. Hakim isə vəkilə xəbərdarlıq edib. Müşavirə keçirən hakim heyəti Samir Kərimovun barəsində seçilmiş həbs qətimkan tədbirinin dəyişdirilməsi barədə vəsatəti təmin etməyib.
Daha sonra çıxış edən Samir Kərimov deyib ki, o, hələ müstəntiq olan zaman Zakir Qaralovun göstərişi ilə barəsində araşdırma aparılması başlanılıb:
“Digər otaqda bununla bağlı araşdırmalar aparılırdı. Mənə bir söz deyilmirdi. Hiss edirdim ki, mənimlə bağlı nəsə bir iş görürlər. Bununla bağlı özüm Baş Prokurorluğun Ağır Cinayətlərə Dair İşlər üzrə İstintaq İdarəsinə getdim. Orada məni Nurəddin adlı müstəntiq dindirdi. Ondan sonra məni heç kim heç yerə çağırmayıb, dindirən olmayıb. Burada iş axtarsam da, tapa bilmədim. 2004-cü ildə Rusiyaya getdim. Orada vəkil olmaq üçün sənəd verdim. Rusiyada olduğum zaman səfirliyin tədbirlərindən iştirak etmişəm. Qanuna görə, cinayət işinin cəlb etmə müddətinin vaxtı 12 ildir. Amma bu işin üstündən 12, 14 il yox, düz 18 il keçib”.
Samir Kərimov cinayət işi üzrə adı keçən 11 nəfər Hindistan vətandaşının yerinin müəyyən edilməsini və məhkəmədə dindirilməsini istəyib. Məhkəmə vəsatəti təmin etməyib.
Məhkəmə baxışı oktyabrın 31-nə təyin edilib.
Qeyd edək ki, Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan Ramin Talıbovla qabaqcadan əlbir olub, Hindistan vətəndaşlarından rüşvət alıb.
İstintaq sənədlərinə görə, 2001-ci ildə Bakı Şəhər Prokurorluğunun mühüm işlər üzrə müstəntiqi işləyən Samir Kərimov Yasamal rayon Polis İdarəsinin 28-ci polis bölməsinin əməkdaşı polis zabiti Ramin Talıbov və digər polis əməkdaşlarının müşayiəti ilə Hindistan vətəndaşlarının işlədiyi yuyucu toz satışı ilə məşğul olan şirkətə gedib.
Sabiq müstəntiq şirkətə baxış keçirib, hindistanlıları yararsız yuyucu tozlar satmaqda ittiham edib.
Bundan sonra müstəntiq məsələnin bağlaması üçün Hindistan vətəndaşlarından 20 min dollar rüşvət alıb.
Təqsirləndirilən Ramin Talıbov isə həmin vaxt sahə inspektoru kimi fəaliyyət göstərib, müstəntiqin tələbi ilə onunla birgə gedib.
Bir müddət sonra müstəntiqin əməlinin üstü açılıb, o, prokurorluq orqanlarından xaric olunub. Həmin vaxtdan isə Samir Kərimov ölkəni tərk edib.
Faktla bağlı Samir Kərimov və Ramin Talıbov barəsində cinayət işi açılıb. Samir Kərimov ölkədə olmadığı üçün barəsində həbsli axtarış elan olunub. Ramin Talıbov isə zaminə buraxılıb.
İttiham olunan Bakı şəhər Prokurorluğunun mühüm işlər üzrə sabiq müstəntiq Samir Kərimov cinayət hadisəsi törətdikdən sonra ölkədən çıxdığı üçün iş 20 il ərzində dayandırılıb. Bu ilin əvvəlində isə cinayət işi yenilənib.
İstintaq orqanı tərəfindən təqsirləndirilən şəxslərin barəsində Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) və 311.3.3-cü (külli miqdarda rüşvət alma) maddələri ilə ittiham elan olunub.
Təqsirləndirilən şəxslərdən Samir Kərimov həbsdə, Ramin Talıbov isə zamindədir.
Xatırladaq ki, Hindistan vətəndaşlarını işlədiyi şirkət baş nazirin sabiq 1-ci müavini Abbas Abbasovun oğlu Aydın Abbasova məxsus olub.
Qeyd edək ki, Bakı şəhər Prokurorluğunun sabiq müstəntiqi Samir Kərimov və onunla birlikdə mühakimə olunan Ramin Talıbovla qabaqcadan əlbir olub, Hindistan vətəndaşlarından rüşvət alıb.
Samir Kərimov 2001-ci ildən axtarışda olub və ötən il həbs olunub.
İstintaq orqanı tərəfindən təqsirləndirilən şəxslərin barəsində Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) və 311.3.3-cü (külli miqdarda rüşvət alma) maddələri ilə ittiham elan olunub.
Xatırladaq ki, təqsirləndirilən şəxslərdən Samir Kərimov həbsdə, Ramin Talıbov isə zamindədir.
Teleqraf.com
Xəbər verdiyimiz kimi, bu gün AMEA-nın ümumi yığıncağı keçirilib. Yığıncaqda seçki keçirilib və millət vəkili akademik İsa Həbibbəyli AMEA-nın prezidenti seçilib.
Qaynarinfo xəbər verir ki, İsa Həbibbəyli ailəlidir, iki oğlu, bir qızı var.
AMEA prezidentinin oğlu Səhət Həbibbəyli Naxçıvan Muxtar Respublikası Dövlət Gömrük Komitəsinin sədridir. Gömrük xidməti general-leytenantı rütbəsi daşıyan Səhət Həbibbəyli 2019-cu ildən bu vəzifəni tutur.
İsa Həbibbəylinin digər oğlu Ərəstü Həbibbəyli isə Azərbaycan Respublikası Baş nazirinin Katibliyinin rəisidir. O, birinci dərəcəli Fövqəladə və Səlahiyyətli Elçi rütbəsi daşıyır.
Deputatın qızı Günay Mənsimova isə Xırdalan şəhər 1 saylı Notariat Kontorunun rəisidir.