 |
|
|
Şuşa Şəhəri Dövlət Qoruğu İdarəsinin keçirdiyi tender müsabiqəsinin (Açıq tender) qalibi “Laguna Group” MMC (VÖEN-1004604201) olub.
Yeniavaz.com xəbər verir ki, tenderin qalibi olan şirkət Şuşa 2024-cü il "İslam dünyasının mədəniyyət paytaxtı" ili çərçivəsində İCESCO-ya üzv ölkələrin memarlarının iştirakı ilə "Şuşa simpoziumu" 2024-cü il tədbirinin keçirilməsi xidmətini həyata keçirəcək və qarşılığında 173 min 775 manat 6 qəpik alacaq.
Məlumat üçün bildirək ki, tender müsabiqəsinin şərtlərində xarici ölkələrdən Azərbaycana 17 əcnəbi qonağın gələcəyi qeyd olunub. Maraqlıdır ki, tədbirin Şuşa 2024-cü il "İslam dünyasının mədəniyyət paytaxtı" ili çərçivəsində və İCESCO-ya (İslam Dünyası Təhsil, Elm və Mədəniyyət Təşkilatı) üzv ölkələrin memarlarının iştirakı ilə keçiriləcəyi nəzərdə tutulsa da, əcnəbi qonaqların 3-ü İCESCO-ya üzv olmayan – Keniya, İtaliya və Böyük Britaniyadan gələcəklər.
Qeyd edək ki, tenderin qalibi olan “Laguna Group” MMC daha əvvəl də dövlət qurumlarının keçirdiyi çoxsaylı tender müsabiqələrində qalib olub. Yüz minlərlə manat dəyərində tender müsabiqələrinin qalibi olan şirkət barədə açıq internet resurslarında geniş məlumat yoxdur. “Laguna Group” MMC-nin nə rəsmi saytı, nə də sosial şəbəkə hesabları mövcuddur. Dövlət Vergi Xidmətinin yenilənmiş “Kommersiya qurumlarının dövlət reyestri məlumatları”nda da şirkət barəsində məlumatlar mövcud deyil.
Qeyd edək ki, “Laguna Group” MMC 15 fevral 2017-ci ildə dövlət qeydiyyatına alınıb. MMC qeydiyyata alınan zaman nizamnamə kapitalı 10 manat olub. Hüquqi ünvanı Bakı şəhəri, Binəqədi rayonu, Əcəmi Naxçıvani ev 27, m. 102-də yerləşib, qanuni təmsilçisi isə Qarayev Ərtoğrul Hafiz oğlu olub.
Binəqədi rayonu, Əcəmi Naxçıvani ev 27, m. 102-də daha bir şirkət – “My Vings” MMC (VÖEN – 1002351891) dövlət qeydiyyatına alınıb və bu şirkətin qanuni təmsiçisi Rəfiyev Müzadil İlqar oğludur. Hazırda bu şirkət fəaliyyət göstərmir. Rəfiyev Müzadil İlqar oğlunun qanuni təmsilçisi olduğu başqa bir şirkət – “Aqroman” MMC də (VÖEN – 1202544661) Şuşa Şəhəri Dövlət Qoruğu İdarəsinin keçirdiyi 800 min manatlıq tender müsabiqəsində qalib olub.
Rəfiyev Müzadil İlqar oğlu xarici işlər nazirinin müavini Rəfiyev Yalçın İlqar oğlunun qardaşıdır. Hazırda xarici işlər nazirinin müavini olan Yalçın Rəfiyev də Binəqədi rayonu, Əcəmi Naxçıvani ev 27, m. 102 ünvanında qeydiyyatdadır. Tenderin qalibi olan “Laguna Group” MMC-nin qanuni təmsilçisi olmuş Qarayev Ərtoğrul Hafiz oğlunun da Yalçın Rəfiyevin yaxın qohumu olduğu bildirilir.
“Ötən ilin sonunda Nazirlər Kabineti “Bakı şəhərinin 2040-cı ilədək inkişafına dair Baş planı”nı təsdiq etdi. Elə bildik ki, bununla da tikinti sahəsində özbaşınalığa son qoyuldu. Lakin belə olmadı”.
KONKRET.az xəbər verir ki, bu sözləri Əkrəm Həsənov özünün facebook səhifəsində yazıb.
O daha sonra fikirlərini belə əsaslandırıb:
“Paytaxtda köhnə (guya qəzalı) binaların sökülməsi prosesi davam edir. Bu proses başdan ayağa qanunsuz və böyük ehtimalla korrupsiya əsnasında həyata keçirilir. Necə?
Şəhər icra hakimiyyəti sərəncam verərək binanın altındakı torpağı özəl tikinti şirkətinin istifadəsinə verir və deyir ki, bina sakinləri ilə razılıq əsasında onu sök, yeni binada isə onlara yaşayış sahəsi, tikinti dövrü ərzində isə başqa yerdə yaşamaq üçün kirayə haqqı ver. Tikinti şirkəti sakinlərin bir hissəsi ilə razılığa gəlir, digərləri ilə gələ bilmir (təəssüf ki, bizdə insalarımız birləşib mübarizə apara bilmir, hər kəs özü separat danışıqlar əsnasında udmaq istəyir, amma yekunda hamısı uduzur). Buna baxmayaraq şirkət başlayır binanı sökməyə, işığı və s. kəsir ki, binada yaşamaq mümkün olmasın. Üstəlik narazı sakinləri məhkəməyə də verir ki, onların mülkiyyət hüququna xitam verilsin. Məhkəmələr (başda Konstitusiya Məhkəməsi olmaqla) də bu iddiaları o səbəblə təmin edir ki, bu narazılar razı sakinlərin haqqını pozur və abadlaşma prosesinə mane olur. Bu minvalla faktiki olaraq camaatın binasını zorla əllərindən alırlar. Bundan sonra isə tikinti şirkəti olur atlı, sakinlər isə piyada. Ən pis halda bina ümumiyyətlə tikilmir. Ən yaxşı halda vəd edildiyindən daha uzun müddət ərzində tikilir. Üstəlik sakinlərə müvəqqəti yaşamaq üçün vəsait ya verilmir, ya da qismən verilir. Lakin şəhər icra hakimiyyəti buna görə məsuliyyət daşımır: deyir ki, mən sökməmişəm, özünüz razılaşmısız. Axı tikinti şirkətlərinin bir qayda olaraq heç qara qəpiyi də yoxdur (olanı isə məmurlara rüşvətə sərf edilir), binanı elə gələcək mənzilləri satdıqları vəsait hesabına tikirlər. Təəssüf ki, dövlətimiz indiyədək tikinti şirkətlərinə münasibətdə kapital tələbi müəyyən etməyib. Məsələn, bankın sahibləri banka azı 50 mln manat yatırmalıdır ki, ancaq başqalarının vəsaiti hesabına fəaliyyət göstərməsinlər. Amma tikinti şirkətlərinin sahibi ora pul qoymur, elə cəlb edilmiş vəsaitlə işləyirlər. Pul olmayanda isə layihə iflasa uğrayır.
Təbii, bu proses qanunsuzdur. Əvvəla, bina qəzalıdırsa, onu nə şəhər icra hakimiyyəti, nə də özəl tikinti şirkəti sökməli deyil. Şəhərsalma və Tikinti Məcəlləsinin 95.3-cü maddəsinə əsasən bu halda Fövqəladə Hallar Nazirliyi məhkəməyə müraciət etməlidir. Başqa sözlə, dövlət özü buna görə məsuliyyəti üzərinə götürməlidir. Niyə götürmür? Ona görə ki, bu halda sakinlərə özü cavab verməlidir sonra. Nəticədə paradoksal vəziyyət yaranır. Bina qəzalıdırsa, dövlət (şəhər icra hakimiyyəti) niyə bu məsələni tikinti şirkəti ilə sakinlərin razılığının öhdəsinə buraxır? Sabah binada bədbəxt hadisə baş versə, buna görə kim cavab verəcək?
Ona görə ki, bu səbəblə sökülən binaların əksəriyyəti qəzalı deyil. Bəli, köhnədirlər. Amma şəhərdə o qədər köhnə bina var ki, niyə hamısını sökmürlər? Ona görə ki, əsl səbəb binanın qəzalı olması deyil. Əsl səbəb tikinti şirkəti ilə məmurların pul hərisliyidir.
Reallıqda proses belə olur. Tikinti şirkəti hansısa binanı gözaltı edir, sonra şəhər icra hakimiyyəti ilə razılığa gəlir (necə gəldiyini hamımız asanlıqla təxmin edə bilərik) ki, binanın altındakı torpağı onun istifadəsinə versinlər. Nəticədə şəhər icra hakimiyyəti də məlum sərəncamı verir.
Sözügedən sərəncam ancaq ona görə qanunsuz deyil ki, qəzalı binanın sökülməsi haqda qərarı yalnız Fövqəladə Hallar Nazirliyinin müraciəti əsasında məhkəmə verməlidir (Konstitusiyanın 29-cu maddəsinə görə heç kəs məhkəmənin qərarı olmadan mülkiyyətindən məhrum edilə bilməz). Çünki şəhər icra hakimiyyəti hər bir halda deyə bilər ki, mən binanın sökülməsi haqda qərar verməmişəm, yalnız altındakı torpağı tikinti şirkətinin istifadəsinə vermişəm. Lakin bunun özü də qanunsuzdur. Belə ki, Mülki Məcəllənin 243.1-ci maddəsinə əsasən binanın altındakı torpaq sahəsi mənzil mülkiyyətçilərinin istifadəsindədir. Buna görə də şəhər icra hakimiyyəti həmin torpaq sahəsini tikinti şirkətinin istifadəsinə verə bilməz. Ümumiyyətlə, daşınmaz əmlaka, o cümlədən torpağa hər hansı hüquq, o cümlədən istifadə hüququ daşınmaz əmlakın dövlət reyestrində qeydiyyata alınmalıdır. Lakin tikinti şirkətinin bu “hüququ” qeydiyyata alınmır və alına da bilməz, çünki artıq istifadədir (bina sakinlərinin istifadəsində). Şəhər icra hakimiyyəti kimdir ki, başqasına mənsub olan torpaq sahəsinə dair sərəncam versin?!
Beləliklə, tikinti şirkətləri ilə iş birliyinə girən şəhər icra hakimiyyəti tam özbaşınalıq edir, insanların mülkiyyət və istifadə hüququnu kobud şəkildə pozur. Özü də bunu çox savadsız və abırsız şəkildə edir. Çünki tikinti şirkətləri adətən mənzil-tikinti kooperativləri (MTK) formasında fəaliyyət göstərir. Bu da o deməkdir ki, MTK-nin üzvləri elə gələcək binadakı mənzil sahibləri olmalıdır. Lakin binaları sökülən vətəndaşlarımızı MTK üzvü etmirlər, çünki əks halda onlar səs hüququ əldə edərək özləri qərar verə biləcək və MTK-nin faktiki yiyələri (tikinti maqnatları) nəzarəti itirə bilər (belə isə heç tikinti layihəsini mənzil sahiblərindən gizlədirlər, istədiklərini edirlər, hətta bir mənzili bir neçə nəfərə də satırlar). Yəni MTK o deməkdir ki, insanlar özləri toplaşıb onu yaradır ki, bina tiksinlər. Bizdə isə kimlərsə MTK adı altında gəlib binaları sökür. Tam dərəbəylikdir!
Bəs əslində yeni binalar necə tikilməlidir? Mülki Məcəllədə tikintisi başa çatmayan binanın tərkib hissələrinə hüquqların qeydiyyatı institutu ətraflı təsbit edilib (144-1-ci, 147-ci, 770-1-ci maddələr). Yəni dövlət torpağı vətəndaşların mülkiyyətinə verir, tikinti şirkəti də podratçı kimi tikintini həyata keçirir. Gələcək yaşayış sahəsinə hüquqlar da qabaqcadan dövlət qeydiyyatına alınır. Yəni tikinti layihəsinin sahibi tikinti maqnatları yox, gələcək mənzil mülkiyyətçiləri olmalı və pulu da qabaqcadan tam ödəməməlidirlər. Tikinti şirkəti bu halda adi işçidir, podratçıdır, onu hər an işdən kənarlaşdırmaq da olar.
Qanunda bu əminli mexanizm olduğu halda şəhər icra hakimiyyəti və tikinti şirkətləri niyə əyri yollarla gedir? Ona görə ki, niyyət saf deyir. Məmurlar rüşvət almaq, tikinti şirkətləri isə daha çox qazanmaq istəyir. Nəticədə binalar qanunsuz sökülür və tikilir, insanların heç nədən (layihədən, tikintinin keyfiyyətindən və s.) xəbəri olmur, onlardan maya dəyərindən xeyli yüksək pul alırlar və i.a. Üstəlik bina tikiləndən sonra da tikinti şirkəti qanunsuz olaraq onu idarə etməyə davam edir, dövlət orqanları isə buna göz yumur. Çünki əl əli yuyar, əl də üzü…”.
Naxçıvan Muxtar Respublikasının yerli Dövlət Statistika Komitəsi məlumat verir ki, Naxçıvanda maaşlar artıb. Məlumata görə, hazırda orta aylıq maaş 775,2 manatdır. Bu da ötən illə müqayisədə 16,2 faiz çoxdur. Dia-az.Media xəbər verir ki, bu rəsmi məlumat iki gün əvvəl yayılıb.
Xatırladaq ki, elə bir neçə gün bundan əvvəl bir qrup yerli sakin maaşlarının 50 faizə qədər azaldığını bildirmişdilər. Yəni bu barədə vətəndaş gileylərini zaman-zaman diqqətinizə təqdim edirik. İndi isə görünəni odur ki, Fuad Nəcəfli cənabları reallığın acınacaqlı təzahürlərini pərdələmək üçün və Bakıda özü barəsində saxta müsbət rəy formalaşdırmaq üçün KOLXOZVARİ HESABATLARI xatırladan rəqəmlərlə yalançı rəy formalaşdırmağa çalışır.
Dia-az.Media bildirir ki, yerli statistika komitəsinin bu saxta rəqəmləri sosial şəbəkələrdə Naxçıvan sakinləri tərəfindən qınanılıb. Onlardan bəzilərini olduğu kimi təqdim edirik. Hər halda, xalq doğrusun danışır... Beləliklə...
***
Emil Mammadov:
Azərbaycanın ən işsiz bölgəsi Naxçıvandır. Əhalinin 50%-i işsizlik səbəbindən öz evlərini tərk edib
***
Elsen Esgerov:
Bəsdirin caamatin hissləriylə oynayirsiz utanmazlar nə artim əəə
***
Behlul Muradov:
İnsan utanmaq hissini itirərsə, hər şey deyər.
***
Sabir Veliyev:
İş var ki maaş artsın ? Məsuliyyətsiz çıxışlardır
***
Narmin Huseynova:
Hökumət statistikaları saxtalaşdırır? Adamlar maaşların azaldığını deyir, bu rəqəmlərə necə inanmaq olar?
***
Elgun Aykhan:
İş var ki maaş olsun.
***
Eli Abdullayev:
Men işsizlikdən qaçıb istanbul'a gəlmişəm borc qitlaqdan,bang ne ler neler iş var orda ancaq rüşvət
***
Eldeniz Nesirli:
2 ildi işsizem
***
Bu rəylərin sayını artırmaq da olar. Hər halda, durumun nə yerdə olduğu hər kəsə aydındır. Aydın olmayanı isə odur ki, Fuad Nəcəflinin bu saxta hesabatlarını "yuxarılar" necə qarşılayacaq... Bunu isə zamanla görəcəyik...
Elektriklə işləyən avtomobil hələ də dəbdəbədir, amma az adamın onlardan almaq imkanı var
Paytaxtda keçiriləcək beynəlxalq iqlim sammiti (COP29) ərəfəsində nəqliyyat sahəsində yaşıl mövzular genişlənməkdə davam edir. Bu tendensiyanın ardınca ixtisaslaşanlar ekoloji cəhətdən təmiz şəxsi avtomobillərə keçid gündəliyinə sadiqdirlər, lakin bu zövqün qiyməti adi vətəndaşlar üçün münasib deyil.
Azərbaycanda elektriklə işləyən avtomobillərin qiyməti əhalinin gəlirləri ilə müqayisədə həddən artıq yüksəkdir. Bunu yerli iqtisadi icma nümayəndələri deyirlər. Bu hal ekoloji təmiz nəqliyyata keçidin qarşısını alan əsas maneə adlanır.
Digər maneələrə inkişaf etməmiş şarj infrastrukturu və aşağı gəlir daxildir. Hakimiyyət orqanlarının avtomobil sahiblərini yeni avtomobillərə keçmək cəhdlərinə baxmayaraq, vətəndaşlar əksər hallarda büdcəli işlənmiş avtomobillərə üstünlük verirlər.
Hökumətin yaşıl təşəbbüsləri Aİ-92 markalı benzin və dizelin tariflərinin artırılması, taksi sənayesində islahatlar və şəxsi avtomobil sahiblərinin ictimai nəqliyyata keçirilməsi planları kimi qeyri-populyar qərarların əsası kimi təqdim olunur. Paytaxtda sərnişindaşıma sahəsində vəziyyətin ağır olması ilə bağlı son qərarda anlaşılmazlıq olub. İllərlə aparılan islahatlara və ciddi dövlət xərclərinə və dövlət hesabına yeni avtobus parkına baxmayaraq, vətəndaşlar avtobus marşrutlarının səmərəsiz planlaşdırılmasından şikayətlənirlər. Bu planlar xərcləri azaltmaq və sərnişinlərin çatdırılmasını sürətləndirmək kimi əsas məqsədə cavab vermir.
Çoxsaylı dəyişmələr bir çox avtobus marşrutlarında xərcləri artırır. Şəhər sakinləri üçün ümumi nəqliyyatla gediş vaxtı şəxsi avtomobillə eyni məsafədən iki dəfə uzun başa gəlir. Buraya pik saatlarda metronun və avtobusların sıxlığını, eləcə də paytaxtın kənarındakı köhnəlmiş avtobus parkının vəziyyətini də əlavə etsək, insanlar şəxsi avtomobillərindən imtina etməyə tələsmir, ictimai sərnişin nəqliyyatı və bahalı yeni ekoavtomobillərin fonunda özlərinin, hətta köhnə avtomobillərinə üstünlük verirlər.
Etiraf etmək lazımdır ki, bu maşınların maya dəyərinin aşağı salınması üçün artıq müəyyən tədbirlər həyata keçirilir və yeni təkliflər hazırlanır. Deputat, iqtisadçı alim Vüqar Bayramovun sözlərinə görə, Milli Məclis bu yaxınlarda keçirilən plenar iclasda elektriklə işləyən avtomobillər üçün enerji dolduran qurğuların idxalının və satışının daha iki il müddətinə ƏDV-dən azad edilməsi ilə bağlı qanun layihəsini birinci oxunuşda qəbul edib.
“Xatırlatmaq istəyirəm ki, bu müddət gələn ilin yanvar ayına qədər başa çatır. Buna görə də 2027-ci ilin yanvarına qədər uzadılması qərarına gəlinib. Bu, şübhəsiz ki, elektrik nəqliyyat vasitəsi sahiblərinin tələb etdiyi şarj avadanlığının təchizatı səviyyəsini dəstəkləyəcək. Axı yollarımızda onların sayının artması bu cihazlara tələbatı artırıb. İdxalda üstünlükləri genişləndirməklə, bununla da ölkəyə idxal olunan elektromobillərin sayını artıracağıq, çünki bu qərar özlüyündə avtomobil bazarının sözügedən seqmentinin canlanmasına kömək edəcək”, - deyə o bildirib.
Yavaş-yavaş da olsa, “təmiz” nəqliyyata marağımız artır. Məsələn, 2021-ci ildə respublikaya 12,9 min ədəd, 2023-cü ildə isə 14,1 min ədəd hibrid avtomobil idxal edilib. Müsbət dinamikanı idxal olunan elektromobillərin sayında da görmək olar: iki il ərzində cəmi 0,2 min ədəd idxal edilib, keçmişdə isə bu rəqəm 3,1 min ədədə yüksəlib. Analitiklərin fikrincə, bu idxal gömrük rüsumlarından və bir sıra vergilərdən azaddır, lakin burada hibrid avtomobillər və elektrik mühərrikli avtomobillər qonşu ölkələrlə müqayisədə bahadır.
Elektrik mühərriki olan avtomobil lüks deyil, nəqliyyat vasitəsidirsə, onun əlçatanlığına diqqət yetirməlisiniz. Ekoloji cəhətdən təmiz nəqliyyatın qiymətinin azaldılması onun uğurunun əsas şərtidir - demək olar ki, hamı məsələnin bu cür formalaşdırılması ilə razılaşır. Bununla belə, ekspertlər vətəndaşları “yaşıl” nəqliyyat almağa həvəsləndirmək üçün daha sistemli addımların atılmasının vacibliyində israr edirlər.
İqtisadçı ekspert Natiq Cəfərli AYNA-ya söyləyib ki, eko avtomobillərə keçmək üçün onların dəyəri ardıcıl olaraq aşağı salınmalı, paytaxtda və respublikanın regionlarında lazımi infrastruktur yaradılmalıdır. Digər məsələlərlə yanaşı, o, iddia edir ki, əgər hökumət həqiqətən bundan narahatdırsa, təbii və keçid üçün geniş təşviq proqramı qəbul etməlidir.
Elektrik və hibrid avtomobillər seqmentində mövcud üstünlüklər kifayət deyil, ona görə də yeni avtomobillər bahalı və əhali üçün əlçatmazdır. Nədənsə idxal imtiyazları yalnız üç illik elektromobillərə şamil edilir, lakin belə avtomobillərin mühərriklərinin iş prinsipi eynidir və istehsal tarixindən asılı deyil - avtomobilin konveyerdən dünən və ya on il əvvəl buraxılmasından asılı olmayaraq. Ona görə də elektrik mühərrikli avtomobillərin istehsal ili əsasında güzəştlərin məhdudlaşdırılmasının məntiqi aydın deyil.
Cəfərlinin sözlərinə görə, elektrik mühərrikli avtomobillər nəinki bahadır, həm də bizdə yüksək qiymətə satılır: “Məsələn, yerli qiymətləri Gürcüstan və Türkiyədə belə avtomobillərin orta qiyməti ilə müqayisə etsəniz, qonşu ölkələrin əhalisi üçün elektromobillər daha ucuzdur. Əhalinin marağı hibrid avtomobillər seqmentindədir - onlar elektriklə işləyən avtomobillərdən daha populyardır, çünki sonuncular üçün infrastruktur hələ mükəmməl olmaqdan çox uzaqdır. Təbii ki, yüksək qiymətlər də müasir elektromobillərin populyarlaşmasına kömək etmir, çünki ölkədə bu cür seçim mədəniyyətini və hibrid və elektromobil parkına kütləvi keçidi aşılaya bilən sistemli və əhatəli proqramlar yoxdur”.
Liberal İqtisadçılar Mərkəzinin rəhbəri Akif Nəsirli də bu fikiri bölüşür ki, Azərbaycanda elektromobillər qonşu ölkələrlə müqayisədə daha bahadır: “Məsələn, burada və Gürcüstanda məşhur “Tesla X” modelinin qiymətlərini müqayisə etsək, fərqi görərik. Azərbaycanda bu model üçün 50 min dollar istəyirlər, qonşulardan isə cəmi 40 min dollara, yeri gəlmişkən, Türkiyədə 38 min dollara satılır”.
Müəllif: Emma Rzayeva
ayna.az
Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən (AYNA) olan şikayətlərlə bağlı AYNA öz səssizliyini qorumaqda davam edir.
Şikayətlərə heç bir reaksiya və ya açıqlama vermir, haqqında olan “rüşvət” iddialarına münasibət belə bildirmir. Nə isə, “dağ Məhəmmədə yaxınlaşar” deyib, üz tutduq AYNA-nın mətbuat xidmətinin rəhbəri Tural Orucova.
Bundan əvvəl dəfələrlə onunla əlaqə yaratmağa çalışsaq da, telefonlarımıza cavab verməyən Tural Orucov, nə əcəbsə, bu dəfə ilk dəfədən zəngimizi açdı. Hansı media qurumundan olduğumuzu bilən kimi necə deyərlər, “kürkünə birə düşdü” və suallarımızı WhatsApp üzərindən göndərməyimizi istədi.
AYNA haqqında suallarımızı heç eşitmək belə istəməyən mətbuat katibi ciddi-cəhdlə yayındı, hətta aqressiv şəkildə vaxtının olmadığını bildirdi.
Suallarımızın hansı mövzuda olduğunu dinləmək istəməyən Tural Orucov dəfələrlə “vaxtım yoxdur” deyərək cavab verməkdən imtina etdi.
İndi media cameəsini bir sual maraqlandırır. Davranışları, sualları cavablandırmaması ilə medianı çoxdan qane etməyən, narazı salan mətbuat xidmətinin rəhbəri Tural Orucov nə ilə məşğuldur ki, quruma ünvanlanan sualları cavablandırmağa vaxtı yoxdur?!
Həə, cavabını da özümüz verək. Yəqin Tural Orucovun başı AYNA sədri Anar Rzayevin şəxsi biznesinin piarına, şirkətlərinin “qara-qura” işlərinə qarışıb. Bir də Tural Orucov AYNA-nın Tarqovıdakı “qoçu”su Ramin Əliyevin qanunsuz əməllərini ört-basdır etməklə məşğuldur. Budur mətbuat xidmətinin bütün fəaliyyəti.
Mətbuatın suallarından yayınan, başı Anar Rzayevin biznesinə qarışan hörmətli Tural Orucova xatırladaq ki, sosial şəbəkələrdə çiynində pencəklə paylaşdığı fotolardakı kimi bir gün tutduğu vəzifəsindən o cür gedəcəyi gün də uzaqda deyil.
İnterpress.az
“Heç kim bizə hesabat vermir. Məsələn Yusif Səfərov küçəsi. Yusif Səfərov küçəsində mərkəzdə park var idi. Parkı yıöşdırdılar, zolağı artırdılar. Dedilər ki, tıxac olmayacaq. Tıxac varmı? Var!”.
KONKRET.az xəbər verir ki, bu sözləri tanınmış avtomobil blogeri Tural Yusifov bildirib.
O xüsusi olaraq vurğulayıb ki, “İndi sual olunur. Bu təklifi verən, bizi tıxacdan “azad etməyə” söz verən adam hardadır və niyə bununla bağlı o, heç bir açıqlama etmir. Üzr də istəmir.
Biz şəhəri korladıqdan sonra AYNA-ya və yol polisinə deyirik ki, “Düzəlt!”. Korlayanlar isə üzr istəmir. Bir gün şəhərdə elə bir tıxac olacaq ki, nə qabağa gedə biləcəyik, nə dala. Nə də qapını aça biləcəyik. 3-4 saat şəhər dayanacaq. Həəə… Məhz ondan sonra artıq Bakı şəhərinin baş planı ilə bağlı əmr olacaq. Ondan sonra ictimai nəqliyyata büdcə veriləcək. Yəni, çox çeşidli ictimai nəqliyyat olacaq. Bu şəhərin adamlarını ya avtobus daşıyır, ya da metro. Bu absurddur və həmçinin ayıbdır”.
Abşeron Rayon İcra Hakimiyyəti Başçısının Xırdalan şəhəri üzrə icra nümayəndəliyi Xırdalanda yolların əsaslı təmiri ilə bağlı tenderə yekun vurub.
Reportyor.info xəbər verir ki, tenderin qalibi “Proqress İnşaat EN” şirkəti seçilib.
Təmir işləri quruma 1 478 634,87 manata başa gələcək.
“Proqress İnşaat EN” şirkəti ötən ay Xırdalan şəhər icra nümayəndəliyinin iki tenderində qalib olub. Tenderlərdən biri küçə işıqlarının, digəri isə mənzil fondunun təmiri ilə bağlı keçirib.
Şirkət bu iki tender üzə qurumdan 841 247 manatlıq sifariş alıb.
“Proqress İnşaat EN” şirkəti 29 noyabr 2021-ci ildə qeydiyyata alınıb. Nizamnamə kapitalı 1000 manatdır. Şirkətin qanuni təmsilçisi İslamov Nazim Əli oğludur.
Göründüyü kimi şirkət 3 ildir yaradılıb. Bu müddət ərzində “tender kralı”na çevrilib. Hətta o dərəcədə ki, 1 ay ərzində Xırdalan icra nümayəndəliyinin 3 tenderinin qalibi seçilir. Özü də satınalma predmeti fərqli olan tenderlərin. Bu işləri görmək üçün şirkət kifayət qədər güclü maddi-texniki bazaya malik olmalıdır. Amma “Proqress İnşaat EN” şirkətin heç saytı və əlaqə telefonları belə yoxdur.
Açıq mənbələrdə ümumiyyətlə şirkət və qanuni təmsilçisi haqqında məlumata rast gəlinmir.
Bütün bunlar “Proqress İnşaat EN” MMC-nin kağız üzərində yaradılan şirkətlər kateqoriyasına aid olması barədə şübhələr yaradır.
Bir qədər də Xırdalanın yolları barədə.
Dövlət satınalmalarının vahid portalı üzərindən apardığımız araşdırmadan məlum olur ki, ötən il də Xırdalanın yollarının təmiri ilə bağlı tender keçirilib. Tenderin qalibi “Xezer Construction” MMC seçilib. Bu tender üzrə satınalma müqaviləsinin maliyyə dəyəri 1 927 615,41 manat olub.
Abşeron Rayon İcra Hakimiyyətinin başçısı Abdin Fərzəliyevdir. O, 2022-ci ildə bu vəzifəyə təyin edilib.
Abdin Fərzəliyevin icra başçısı kimi karyerası isə 2003-cü ildən başlayır. O, həmin il Nizami Rayon İcra Hakimiyyətinin başçısı vəzifəsinə təyinat alıb. İki il sonra isə Nərimanov Rayon İcra Hakimiyyətinin başçısı təyin edilib. Onun Nərimanov rayonuna rəhbərliyi 2022-ci ilə qədər davam edib.
Onun Xırdalan şəhəri üzrə nümayəndəsi ilə Malik Məmmədovdur.
“Azər Aqro” və “Azər Kuban” MMC “Bank of Baku” arasında kredit qalmaqalı davam edir.
Reportyor.info xəbər verir ki, “Azər Aqro” və “Azər Kuban” şirkətlərinin rəhbər şəxsləri Səyyad Əsgərovla Vidadi Əkbərov bu mübahisədə haqlı olduqlarını sənədlərlər sübut etməsinə baxmayaraq məhkəmələr hansısa səbəbdən bunu görməzdən gəlir.
Səyyad Əsgərovla Vidadi Əkbərov isə mübarizələrini davam etdirməkdə israrlı görünür. Onlar üzləşdikləri haqsızlıqla bağlı müxtəlif instansiyalara müarciət edir. Bu müraciətlər hələ ki, bir nəticə verməsə də, sahibkarlar nəhayət ədalətin bərqərar olunacağına inanı və müraciətlərini davam etdirir.
Qalmaqalın mahiyyətinə gəlincə, adıçəkilən şəxslər yazır ki, 14. 06. 2011-ci il tarixdə 60 ay müddətinə “Azər-Aqro” Ltd şirkətinə (Borcalan) “Bank of Baku” ASC-dən 500 000 azn məbləğində kredit ayrılıb.
Kreditin təminatı olaraq həmin bankın depozit hesabında “Borcalana” məxsus 550 000 azn məbləgində əmanətdə olan pul vəsaiti və hər aya görə hesablanmış 7791,67 azn faiz gəlirərinin girovu müqaviləsi olub. Kredit müqaviləsinin bitmə tarixinə 32 ay qalsa da və “Bopcalanın” hec bir borcu olmdıgı halda bank tərəfi “Azər-Aqro” Ltd şirkətini məhkəməyə verib. 1 saylı Bakı İnzibati-İqtisadi Məhkəməsi məhkəmə mühasibatlıq ekspertizası keçirilməsi barədə təqdim olunan vəsadətimizi bank əməkdaşlarının xahişi və təkidi ilə təmin etməyib, eyni zamanda heç bir ekspertiza kecirilmədən 02.06.2015-ci il tarixdə bankın xeyrinə əsas borcdan 500 000 azn, faiz borcundan isə 104417,60 azn, cəmi 604417,6 azn borcun olması barədə qətnamə cıxarıb: “Həmin qətnamədən “Borcalanlar” tərəfindən apelliyasiya şikayəti verilmiş, 11. 11. 2016-ci il tarixdən 07. 07. 2018-ci il tarixədək 3 (üc) dəfə məhkəmə mühasibatlıq, 1 (bir) dəfə sənədlərin texniki ekspertizası, cəmi 4 (dörd) dəfə məhkəmə kecirilmiş və eyni məzmunlu ekspert rəylərinin nəticələrinə işdə olan mötəbər sübutlara əsaslanılaraq, Bakı Apelliyasiya Məhkəməsinin 1-ci və 2-ci apelliyasiya baxışları zamanı işə baxan məhkəmə kollegiyaları ,”Azər-Aqro” Ltd şirkətinin banka hec bir börcun olmadıgını, əksinə bankın “borcalanlar”ın hesabından 125191 azn artıq vəsaitini özbaşına silərək mənimsədiyini, ödəniş qəbzlərinin üzərində bankın baş idarəsinə məxsus 506924 saylı bank kodunun bank tərəfindən dəyişdirilərək yalnız bankın özünə məlum olan, bankın ikinci qara mühasibatlıgında istifadə etdiyi 506567 saylı saxta kodla dəyişdirildiyi kodla sübuta yetirilmişdir. Ekspertiza araşdırması zamanı aşkar edilib ki, “Bank of Baku” ASC borcalana kredit verilənə qədər ödəniş qəbzlərinin üzərində bankın 506924-saylı düzgün kodunun, kredit verilən gündən məhkəmə mübahisəsi başlayan ana qədər isə ikili qara mühasibatlıqda bankın özündən başqa hec kəsə məlum olmayan 506567- saylı saxta koddan istifadə edərək “borcalan”ın ödənişlərinin təyinatlarını bu yolla dəyişərək mənimsəmişdir. 11. 09. 2017-ci il tarixdə bankın əməlində aşkar edilmiş bu və digər cinayət hallarının araşdırılması ilə bağlı 2-1(103)-08/17 saylı Xüsusi Qərardad cıxarılaraq iş materiallarının surəti araşdırılması üçün Baş Prokrorluq yanında Korrupsiyaya Qarşı Mübarizə Baş İdarəsinə göndərilərək, 11. 09. 2017-ci il № 2-1(103)-08/17 saylı (hakim Cahangir Yusifov), 24. 07. 2019 -cü il № 2-2 (103)84/2019 saylı (hakim Kəmalə xanim Abıyeva ) Qətnamələri ilə 1-saylı Bakı İnzibati İqtisadi Məhkəməsinin bankın xeyrinə cıxardıgı 02. 06. 2015-ci il tarixli qətnaməsi iki dəfə ifşa olunaraq ləğv edilmişdir. Bank qətnamələrdən kasassiya şikayəti vermiş kasassiya kollegiyası isi “Azər-Aqro” Ltd-in bankdan götürdüyü 500 000 azn kreditin girovu kimi həmin bankın əmanət hesabında “borcalana” məxsus olan 550 000 azn pul vəsaiti və ona hesablanmış hər ay ücün 7791,67 azn əmanətin faiz gəlirlərindən müqaviləyə əsasən akseptsiz olaraq, kredit borcuna silinəcəyi bir halda əmanətdən, daxil olan faiz gəlirlərindən bir manat da olsun silinməyərək, bu kreditə hec bir ödənişin aparilmaması səbəbi ilə bağlı təkrar əlavə kompleks məhkəmə mühasibatlıq ekspertizası kecirmək ücün işi dördüncü dəfə təkrar apelliyasiya baxışına qaytarıb”.
İş adamları daha sonra yazır ki, 28. 01.2022-ci il tarixdə Bakı Apelliyasiya Məhkəməsinin məruzəçi hakimi Aidə Hüseyn isə, Ali Məhkəmənin bu tapşırıgına məhəl qoymadan, bankın təklifi ilə Xarici Audit rəyi əldə edilməsi ilə bağlı qərardad cıxarıb:
“Azərbaycanda fəaliyyət göstərən bütün xarici audit firmalarının filalları “Bank of Baku”ASC- nin əməlində cinayət halları ilə bağlı məhkəmənin 11.09.2017- ci il tarixli Xüsusi Qərardadı ilə iş materiallarının Korrupsiyaya qarşı Mübarizə Baş İdarəsinə göndərilməsi və hazırda istintaqın davam etməsi digər mötəbər sübutlarla tanış olduqdan sonra Xarici Audit rəyi ilə bağlı məhkəmənin qərardadını icra etməkdən birmənalı imtina ediblər. Xarici Audit rəyinin məhkəmə qərardadı ilə 1(bir) aya icrasının əvəzində 9 ay ərzində icra olunmadıgını görən “Borcalanın” nümayəndəsi kasasiya kollegiyasının qərarının 83-cü, AR paraqrafını və Azərbaycan Respublikası Audit xidməti haqqında “Azərbaycan Respublikasının Qanununun 8-ci maddəsini əsas tutaraq, Xarici Audit qarşısında məhkəmənin qərarı ilə hakim Aidə Hüseynə qoyduğu 18 sualın cavablandırılması məqsədi ilə, dövlət sifarişlərinin icrasına icazəsi olan Auditlə müqavilə bağlayıb, 02. 09. 2022-ci il tarixdə bankın bu kredit müqaviləsi ilə mübahisələndirdiyi digər 2 (iki) kredit müqavilələri ilə birlikdə “vaxtı kecmiş kredit” adı altında “borcalanın” hesabından 1530480,24 azn məbləğində vəsaitini bankın əsası məlum olmayan hesablara silməklə mənimsəməsi barədə obyektiv Audit rəyi məhkəməyə təqdim edilib. Məhkəmə Audit rəyi ilə qane olmayıb və 21. 10. 2022-ci il tarixdə əlavə kompleks məhkəmə mühasibatlıq ekspertizası kecirmək əvəzinə, ilkin olaraq adi məhkəmə mühasibatlıq ekspertizası kecirilməsi barədə qərardad cıxarmiş və həmin qərardadla 17. 03. 2023-cü il tarixdə № 9/7970 saylı ekspert rəyi verilmişdir. Ekspert isə kredit müqaviləsinin 2.5-ci maddəsinə zidd olaraq tədqiqatı bu işlə bağlı keçirilmiş məhkəmə ekspertizasının 4 (dörd) ekspert və 1 (bir ) audit rəyindən fərqli olaraq kreditin qalığını və mövcudluğunu müəyyən etmək ücün kreditin ucotunun aparıldıgı müvafiq ssuda hesablarından cıxarış sənədlərinə görə deyil, müqavilənin hec bir bəndində göstərilməyən cari- təsərrüfat hesabından cıxarış və bank mədaxil qəbzlərinə görə tədqiqat aparmaqla Azərbaycan Respublikasının Banklar haqqında Qanunun, Mərkəzi Bankın müvafiq təlimat və qaydalarını kobud surətdə bilərəkdən pozub”.
Şikayətçilər bildirir ki, məhkəmənin ekspertin qarşısında qoyduğu sualda ekspert işin mahiyyəti ücün ən vacib məqam olan müddətləri və bu müddətlər üzrə aparılmış ödənişlərin tarixlərini saxtalaşdıraraq məhkəməni aldadıb:
“Eyni zamanda Məhkəmənin sualında qoyulmuş, əslləri bankın möhürü ilə təsdiq edilmş iş materiallarında olan, kreditin mövcudluğunu təsdiq edən və ücotu aparılan, yeganə hüquqi gücə malik müvafiq ssuda hesablarından cıxarış sənədlərindəki ödənişləri ekspert məhkəmədən gizlədərək 1-saylı Bakı İnzibati İqtisadi Məhkəməsinin hec bir araşdırması, ekspertizası, auditi kecirilmədən, 1-ci və 2-ci apellyasiya baxışları zamanı dalbadal ləğv edilmş 8-il budan əvvəlki (8-il ərzində aparılan ödənişləri, silinmələri, köcürmələri belə tədqiq etmədən) 02.06.2015-ci il tarixdə bankın xeyrinə cıxarılmış qətnamədə göstərilmiş 604417 azn məbləgində, guya “Azər-Aqro” Ltd-nin Banka borcu olması ilə bağlı məhkəməyə doğru olmayan saxta natamam ziddiyyətlərlə dolu olan rəy verib.
Məhkəmənin cıxardığı qətnamənin təsviri və əsaslandırıcı hissəsindən isə acıq-aydın görünür ki, məhkəmə kollegiyası işdə olan mötəbər sənədlərə deyil, yalnız ekspertin doğru olmayan 17.02. 2023 -cü il tarixli №7/7970 saylı natamam, ziddiyyətli və şəxsi maraq zəmnində təqdim etdiyi saxtalaşdırılıb, təhrif edilmiş “ekspert” rəyinə əsaslanaraq əsassız Qətnamə cıxarıb.
Artıq həmin qətnamə tam hüquqi qüvvəsini almışdır. AR MPM-nin 432, 432.1 maddəsində göstərilir ki, qanuni qüvvəyə minmiş məhkəmə aktlarına yeni açılmış hallar üzrə yenidən baxıla bilər. Həmin Məcəllənin 432.2.2-ci maddəsində göstərilir: “Əsassız qətnamənin cıxarılmasına səbəb olmuş ekspertin biləbilə yalan rəy verməsi, tərcüməçinin biləbilə düzgün tərcümə etməməsi, sənədlərin və maddi sübutların saxtalığı müəyyən edildiyi hallarda yeni açılmış hal kimi baxıla bilər. İş materiallarında olan mötəbər sübutlar bir daha bankın sənədlərini saxtalaşdirması, ikili qara mühasibatlıqda iki bank kodundan istifadə ödənişlərin bu cür yolla kreditə ödənilərək təyinatlarının dəyişdirilərək, vəsaitlərin mənimsənilməsi, qəbzlərin saxtalaşdırılması “vaxtı keçmiş kredit” şərhi ilə əsası məlum olmayan bank əməliyyatlarının aparılması, ekspertin isə iddia müddətinin, ödəmə qrqfiklərinə görə ödənişlərin uyğun olmayan müddətlərdə təhrif edilərək yeganə hüquqi gücə malik ödəniş sənədlərində kreditin ödənişi üçün aparılmış köçurmələri, silinmələri, məqsədli qaydada, şəxsi maraq zəmnində təhrif etməsi, gizlətməsi və sair. “Bank of Baku” ASC ilə “Azər Aqro” LTD bağlanmış kredit müqaviləsi arasında kredit borcunun icrası ilə bağlı Bakı Apelyasiya Məhkəməsinin 17 mart 2023-cü il tarixli 2-2(103)-10/2023 saylı qüvvəsini almış məhkəmə qətnaməsi ekspertin biləbilə yalan rəyinə əsaslanaraq verildiyindən, işdə sənədlərin saxtalaşdırılması, hakimin şəxsi marağı zəmində Azərbaycan Respublikası Ali Məhkəməsinin qərarında göstərilən xüsusi və məcburi tapşırıqlara məhəl qoymayaraq, xarici audit qarşısında məhkəmənin qərarı ilə qoyulmuş 18 sualın dövlət sifarişlərinin icrasına icazəsi olan Audit tərəfindən obyektiv yoxlanılaraq tərtib edilmiş Audit Rəyinin hakim Aidə Hüseyinin gizlətməsi sonradan isə öz qərarı ilə xarici Audit Rəyi əldə etmək üçün xarici Audit qarşısında qoyduğu 18 sualın 17-sini in çıxarılmasına səbəb olub.
Odur ki, Bakı Apellyasiya Məhkəməsinin 21.10.2022-ci il tarixli qərarı ilə keçirilmiş məhkəmə-mühasibatlıq ekspertizasının yekun nəticələri ilə məhkəməyə təqdim olunmuş 17. 03. 2023-cü il tarixli № 9/7970 saylı ekspert Rəyi biləbilə təhrif edilərək, saxtalaşdırıldığına görə əsassız qətnamənin çıxarılmasına səbəb olub.
Azərbaycan Respublikasının Mülki Prosessual Məcəlləsinin 432.1, 432.2.2, 432.2.3 maddələrinə əsasən, Bakı Apellyasiya Məhkəməsinin 17. 03. 2023-cü il tarixli 2-2(103)-10/2023 saylı qüvvəsini almış qətnamə ləğv edilərək, yeni açılmış hal kimi yenidən adiyyəti üzrə baxılmalıdır.
Eyni vəziyyət “Bank of Baku “ASC-nin mübahisələndirdiyi “Azər-Kuban” MMC üzrə də qoyulmuş, kreditlər üzrə aparılmış bank əməliyyatları ilə eyni senari ilə saxtalaşdırılaraq təhrif edilib”.
Azərbaycanda yuxarıdan-aşağıya bütün dövlət ərkanı COP29 kimi mötəbər bir tədbirə hazırlaşdığı vaxtda bu tədbirin mahiyyətinə zidd hərəkətlərə yol verən məmular da var. Bir tərəfdə yaşıllıqlar məhv edilir, digər tərəfdə isə yaşıllaşdırmaya, abadlaşdırmağa süni əngəllər yaradılır.
Bu qənaətə Yasamal rayonu Şəfayət Mehdiyev 65 ünvanında yaşayan sakinlərin AFN.az-a müraciəti ilə tanış olduqdan sonra gəlmək olar. Vətəndaşlar bildirirlər ki, yaşadıqları ünvan COP29-un əsas marşrutlarından birinin üzərində yerləşir. Həmin ərazidə isə nəinki COP29-un mahiyyətinə zidd, hətta normal insan yaşayışı üçün tələb olunan şəraitə uyğun olmayan vəziyyət hökm sürür: “Yaxınlıqda yaşayış kompleksi tikilib istifadəyə verilib. Tikinti işləri tamamlandıqdan sonra nəinki ətrafdakı zibil təmizlənməyib, əksinə, daha da bərbad vəziyyət yaranıb. Olduqca səliqəsiz, naxoş görüntü durumunda olan ərazini öz vəsaitimiz hesabına abadlaşdırmaq istəyirik. Bunun üçün nə dövlətdən, nə tikinti aparan şirkətdən, nə də hər hansı qurumdan dəstək umuruq. Bütün işləri öz gücümüzə görməyə hazırıq. Burada heç bir tikinti aparmırıq, sadəcə abadlaşdırma işləri görmək istəyirik. Lakin Əmlak Məsələləri Dövlət Xidməti buna imkan vermir. Biz bu işlərə təzə başlayanda Yasamal rayon İcra Hakimiyyətindən, Fövqəladə Hallar Nazirliyindən, polisdən, Dövlət Şəhərsalma və Arxitektura Komitəsindən nümayəndələr gəldi, hamısı ilə danışıb məqsədimizi bildirdik və razılaşdılar. Hətta bəziləri bizə təşəkkür də etdilər belə gözəl təşəbbüs üçün. Bircə Əmlak Məsələləri Dövlət Xidmətinin nümayəndələri ilə razılaşa bilmədik. Əvvəl Xidmətin Bakı Ərazi şöbəsinin əməkdaşları gəldilər, çox çək-çevirdən sonra maddi maraqlarının olduğunu hiss etdik. Buna razılaşmadığımız üçün başladığımız işi yarımçıq qoymaqla kifayətlənmədilər, indiyədək etdiklərimizi də uçurub, dağıdıb getdilər. Sonradan bizə məlumat çatdırdılar ki, Xidmət rəisinin qəbuluna getməliyik. Biz Bakı Ərazi Şöbəsinin rəhbəri ilə görüşmək istəyimizi təkidlər bildirsək də, dedilər ki, mütləq Əmlak Xidmətinin rəhbər şəxsləri ilə görüşməlisiz. Əraziyə gələn qrupa rəhbərlik edən Əli adlı əməkdaşa şöbə rəisi ilə görüş istəyimizi bildirməyimizə baxmayaraq, bundan imtina etdilər. Hətta bizim rəislə telefon danışığımıza da şərait yaratmadılar. Bildirdik ki, biz burada tikinti işləri görmürük, obyekt tikmirik, sadəcə, abadlaşdırma işləri aparmaq istəyirik. Bunun üçün xidmət rəhbərliyinin onsuz da çətin olan qəbuluna düşmək vaxt itkisidir. Bir halda ki, Bakı ərazi şöbəsinin rəhbəri ilə görüşə bilmirik, Xidmətin rəhbərliyi ilə necə görüşə biləcəyik?!”
Sakinlərin sözlərinə görə, həmin ərazidə yaxınlıqda tikilən yaşayış kompleksinin davamı inşa ediləcək. Məhz bu səbəbdən də boş ərazidə abadlıq işləri aparmağa imkan vermirlər: “Bizə sözarası başa saldılar ki, sonra burda tikinti işləri aparılanda ağacların kəsilməsi, yaşıllığın götürülməsi üçün müəyyən prosedurlar lazım olacaq. Ona görə də bura belə qalsa yaxşıdır. Biz isə deyirik ki, tikinti aparsınlar, etirazımız yoxdur, amma ona qədər biz abadlaşdırmaq istəyirik. Biz bunu dövlətdən istəmirik, öz vəsaitimizlə, öz hesabımıza bu işləri görmək istəyirik. Buradan COP29-un marşrutlarından biri keçəcək. Olmazmı ki, gələn qonaqlar görsünlər, dövlətimiz, ölkəmiz haqda onlarda yüksək təəssürat yaransın?!”
Sakinlərin müraciəti əsasında ərazidə olduq və kiçik araşdırma apardıq. Görünən mənzərə xeyli suallar yaradır. Belə ki, ünvana baxış keçirən zaman ətrafda xeyli sayda şəhərsalma qaydaları və prosedurlarını pozan tikililərin olduğunu müşahidə etdik. Maraqlıdır, bəs zamanında onlara niyə mane olmayıblar? Deməli, hansısa maraqlar çərçivəsində onlara icazə verilib?! Sakinlər isə bir daha bildirdilər ki, orada nümunəvi bir görüntü, filmlərdə, videolarda görünən həyət tipi yaratmaq niyyətləri var: “Heç bir tikinti aparılmayacaq, amma imkan vermirlər. İşi başladıq, yarıda dayandırdılar, lap biabırçı vəziyyət yarandı”.
Maraqlıdır ki, məsələyə hansısa qüvvələr "Azərişıq" ASC-nin yerli qurumlarını da qatıblar: “Bizə dedilər ki, buradan yeraltı kabel keçir, o da dərində olmadığı üçün ərazinin üzərində iş görmək olmaz. Nə qədər desək ki, burada tikinti aparılmır, sadəcə abadlaşdırma işləri görüləcək, yenə razılaşmadılar. Uzun illərdir orada yaşayırıq, bütün proses gözümüzün qarşısında getdi, ərazidə kabellərin bir qisminin normativ qaydalara uyğun olaraq daha dərindən aparılmasına baxmayaraq, həmin kabelin davamında digər bir hissəsi bilərəkdən torpaq qatının üst səthi ilə aparılıb. “Azərişıq” ASC-nin Yasamal rayon idarəsinin texniki direktoru bizdən 3 min manat istədi. Təbii ki, ondan imtina edərək, bildirdik ki, bu prsesdən şikayət edəcəyik. Belə olan halda bizi ASAN Kommunala yönləndirdilər. Halbuki bizə bunu daha öncə deməmişdilər. ASAN Kommunal da görüləcək iş üçün yenidən həmin şəxsə yönləndimə etdi. Onlar bu dəfə 18 metrlik məsafə üçün 150 metr kabel tələb etdilər, bir sözlə, hesab-kitabı elə qurdular ki, proses 6-7 min manatı belə keçdi. Məcbur olub imtina etdik. Bütün sənədləşmə işləri əlimizdədir, lazım gəlsə təqdim edə bilərik. Beləcə yaxşı bir təşəbbüs beşikdəcə boğuldu. Hələ də anlaya bilmirik ki, biz sadə vətəndaşlar dövlət başçısının təşəbbüsünə həvəslə qoşulmağa hazır olduğumuz halda, məmurlar niyə mane olurlar”.
Sakinlər media vasitəsi ilə Azərbaycan Respublikasının Prezidenti İlham Əliyevə müracitə edərək, onun 2024-cü ili “Yaşıl dünya naminə həmrəylik ili” elan etməsini alqışladıqlarını bildirirlər. Eyni zamanda onun bu nəcib təşəbbüsünün bəzi məmurlar tərəfindən “sabotaj” edilməsini nankorluq kimi dəyərləndirirlər: “Cənab Prezident! BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 kimi mötəbər bir tədbirin Azərbaycanda keçirilməsi ərəfəsində, COP29-un əsas marşrutlarından birinin üzərində yerləşən ərazidəki bərbad vəziyyəti gözümüz-könlümüz götürmür. Sizdən xahişimiz budur, Əmlak Məsələləri Dövlət Xidmətinin rəhbərliyinə göstəriş verəsiniz ki, yaşadığımız ərazinin abadlaşdırılmasında bizə mane olmasın. Biz bütün məsuliyyətimizlə bəyan edirik ki, həmin ərazidə heç bir tikinti aparılmayacaq, sadəcə yaşıllıqlar salınacaq, insanların istirahəti, rahat hərəkəti üçün şərait yaradılacaq”.
Yazıda adları çəkilən qurumların mövqeyini verməyə hazırıq.
“Azərenerji” Açıq Səhmdar Cəmiyyəti Qaz mühərrikləri üçün energetik yağların satın alınması (elektrik stansiyaların mühərriklərində mövcud olan energetik yağlara istehsalçının tələbinə və avadanlıqların istismar qaydalarına uyğun olaraq eyni markalı yağların əlavə edilməsi və ya yenilərinin tədarük olunması) üzrə 12.08.2024-cü ildə başladığı açıq tender müsabiqəsinə yekun vurub və “CASPIAN LUBRICANTS AND CHEMICALS COMPANY” QAPALI SƏHMDAR CƏMİYYƏTİ ilə 6.459.910 manat məbləğində satınalma müqaviləsi bağladığını 11.10.2024-cü il tarixdə dövlət sanalmalarının vahid internet portalında dərc edib.
Bəs “Azərenerji” ASC-nin 6 milyon manatdan çox dəyəri olan tenderinin qalibi olan şirkət haqqında nə kimi məlumatlar var?
Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarda “CASPIAN LUBRICANTS AND CHEMICALS COMPANY” (VÖEN 1503506271) Qapalı Səhmdar Cəmiyyəti 13.03.2017-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2000 manat olan MMC-nin hüquqi ünvanının BAKI ŞƏHƏRİ NƏSİMİ RAYONU, ABBASQULU AĞA BAKIXANOV, ev 26A, m. 20, qanuni təmsilçisinin isə Abdullayev Sənan Elmar oğlu olduğu göstərilir.
Dövlət Vergi Xidmətinin reyestrində edilən dəyişiklikdə «Caspian Lubricants and Chemicals Company». QSC 18.12.2020-ci ildən “EXOL AZERBAİJAN” Qapalı Səhmdar Cəmiyyəti kimi fəaliyyətə başlayıb. Reyestr dəyişikliklərində şirktətin təşkilati-hüquqi forması Məhdud Məsuliyyətli Cəmiyyəti, nizamnamə kapitalı isə 100 manat olduğu göstərilir. Şirkətin təsisçi və ilk qanuni təmsilçisi Şahmuradov Cavid İlham oğlu olub. Çox güman ki, səhmdarlardan biri olaraq da qalmaqdadı.
Banker.az 12.04.2023-cü ildə şirkətin maliyyə hesabatına istinadən xəbər verib ki, “Exol Azerbaijan” QSC 2022-ci ili 2 milyon 655 min manat xalis mənfəət ilə başa vurub. 2021-ci ildə şirkətin mənfəəti 1 milyon 761 min manat olub ki, bu da illik müqayisədə 1.5 dəfə böyükdür.
Qeyd edək ki, “Exol Azerbaijan” QSC Balaxanı Sənaye Parkının rezidentlərindən biridir. Fəaliyyət sahəsi isə işlənmiş yağların emalıdır. Balaxanı Sənaye Parkının rezidentləri haqqındakı məlumatda cəmi 10 nəfər işçisinin olduğu göstərilir.
Burada təəcüblü olan nədir. Qeyd etdiyimiz kimi «Caspian Lubricants and Chemicals Company» QSC 18.12.2020-ci ildən adını dəyişdirərək “EXOL AZERBAİJAN” Qapalı Səhmdar Cəmiyyəti olub. Bir çox rəsmi məlumatlardan da göründüyü kimi “EXOL AZERBAİJAN” QSC kimi də fəaliyyətini davam etdirir. Belə olan təqdirdə “Azərenerji” Açıq Səhmdar Cəmiyyəti nədən 2020-ci ildən adı dəyişdirilmiş «Caspian Lubricants and Chemicals Company» QSC ilə satınalma müqaviləsi bağladığın elan edib.
Maraqlıdır, “Azərenerji” nin keçirdiyi tenderdə iştirak etmək üçün şirkət hansı adla müraciət edib. «Caspian Lubricants and Chemicals Company» QSC adı ilə müraciət edibsə, deməli şirkət rəhbərliyi adın dəyişdirilməsinə baxmayaraq birinci addan da istifadə edir. Bu da çox güman ki, Dövlət Vergi Xidmətindən gəlirləri gözlətmək üçün düşünülmüş addımdır. Yox əgər şirkət tenderdə iştirak etmək üçün “EXOL AZERBAİJAN” QSC kimi müraciət edibsə onda “Azərenerji” ASC nədən 2020-ci ildən adı dəyişdirilmiş «Caspian Lubricants and Chemicals Company» QSC ilə satınalma müqaviləsi bağladığın elan edib.
Ümid edək ki, “Azərenerji” Açıq Səhmdar Cəmiyyətinin rəsmiləri bu müəmmaya aydınlıq gətirəcək.
Aktualinfo.org