Ukraynanın yenidən silahlanmasına yardımın göstərilməsi qərara alınıb: qısa, orta və uzunmüddətli perspektivdə

Ukraynanın müdafiə naziri Oleksey Reznikov qeyd edib ki, Ukrayna Müdafiə Təmas Qrupunun (Ramşteyn-5) 5-ci iclasında Ukraynaya uzunmüddətli dəstək kursu müəyyən edilib. Yardımın artması onu deməyə əsas verir ki, Ukrayna öz tərəfdaşlarını təkcə Rusiyanın hücumunu dəf etmək deyil, həm də ərazisini geri almaq qabiliyyətinə inandırmaq üçün uzun bir yol keçib.

Bunu gördükdən və inandıqdan sonra yardım paketləri böyüməyə başladı. Biz tank əleyhinə raketlər və MANPADS alan ölkədən hava hücumundan müdafiə və HIMARS formasında yardım alan ölkəyə çevrilmişik. Bundan əlavə də çox iş görülüb. Çünki əvvəllər bütün tərəfdaşlar Ukraynanın silaha olan real ehtiyaclarını dərhal başa düşmürdülər.

Ola bilsin ki, bəzi ölkələr yenə də öz “ehtiyatlı mövqeyinə” sadiq qalmağa davam edəcək, lakin tərəfdaşların əksəriyyəti əmin olub ki, Ukraynaya yardım artırılmalıdır. Bu gün onun həcmlərinin gələcəkdə artmağa davam edəcəyini proqnozlaşdırmaq olar.

"Ramşteyn-5” bizim üçün də önəmlidir. Birincisi, NATO və tərəfdaş ölkələrin proqramları çərçivəsində təhsil alacaq Ukrayna hərbçilərinin sayının artırılması ilə bağlı razılıq əldə edilib. İkincisi, laylı hava hücumundan müdafiə sisteminin yaradılması və Ukraynanın yenidən silahlanmasına yardımın göstərilməsi qərara alınıb: qısa, orta və uzunmüddətli perspektivdə.

Başa düşmək lazımdır ki, biz həm hava qüvvələrini, həm də hava hücumundan müdafiəni yeniləmək üçün "Lend-liz" və "Ramşteyn"in mexanizmlərini cəlb etməliyik. Əlamətdar hadisə həm də ABŞ dövlət katibi Antoni Blinkenin Ukraynaya səfəri oldu. Bununla ABŞ Ukraynanın Rusiyanın təcavüzünə qarşı mübarizə və ərazilərin azad edilməsi hərəkatını açıq şəkildə dəstəklədi. Səfər verilən qərarlarla üst-üstə düşdü.

Mühüm məqam ondan ibarətdir ki, Ukrayna qüvvələrinin bu uğurlu irəliləyişi bütün növ yardımların və ondan səmərəli istifadənin nəticəsidir. Axı HIMARS sistemləri və gəmi əleyhinə "Harpoon" raketləri və M-777 artilleriya sistemləri, özüyeriyən artilleriya sistemləri - bütün bunlar bu gün Baş Qərargahın açıqladığı qələbəmizə kömək etdi.

Amma silahlardan başqa, əlbəttə ki, taktika mühüm rol oynayır. Düşməni tükəndirmək strategiyası, ukraynalı əsgərlərin qəhrəmanlığı və Ukrayna qüvvələrinin əhval-ruhiyyəsi. Bu baxımdan, müharibənin bir çox hərbi taktika və strategiya dərsliklərində yer alacağı şübhəsizdir.

Müəllif: Aleksandr Musienko - Hərbi Hüquq Araşdırmaları Mərkəzinin rəhbəri

Mənbə: UNİAN

Tərcümə AYNA-ya məxsusdur

Müəllif: Turan Abdulla

"Cənab Müdafiə Nazirliyi.
Ancaq bu başdan deyim ki, məni nə prokurorluğa vermək lazımdır, nə
də üzr istətmək. Çünki böhtan atmaq , lağ etmək mənim işim deyil. Konkret.
Ordunun təhcizatı haqda çoxundan məlumatlıyam. Deyim ki, 100 faiz də olmasa, haqqı danışaq, normaldır. Ərazidə yeni HH lərin tikintisi, Hərbi strukturun bərpası da öz yerində. Görmüşəm, alqışlayıram. Bildiyiniz kimi Ordu ilə uzun zamandır birlikdəyəm, hər bir işə də adekvat yanaşmağım məlumunuzdur. "
Teref.az yazır ki, bunu hərbi ekspert Abuzər Əbilov yazır.Daha sonra hərbi ekspert yazır:
"Lakin son günlər "Müasir Ordu " anlamında müşahidə elədiyim və mənası, lazımlılığı çox vacib olan bir sıra ləvazimatların, qoruyucu vasitələrin olamasıdır.

Bunlardan biri də Taktiki, Ballistik eynəklərin şəxsi heyətdə olmamasıdır. Sözsüz ki, bu eynəklər Xüsusi Təyinatlılarda və müxtəlif xüsusi xidmər orqanlarının qruplarında var. Lakin atəş altına düşən tək onlar deyil.
Məlumat üçün: Taktiki eynəklər xüsusi istifadəli olaraq, döyüşlər zamanı döyüşçünün gözünü xırda qəlpələrdən, tozdan, partlayışlar zamanı yerdən qalxan müxtəıif ziyanverici predmetlərdən qorumaqla yanaşı, linzaları dəyişdikdə, günəş şüalarından və digər təbii faktorlardan qoruyur.

Azərbaycan əsgərinin hərbi-döyüş ləvazimatlarının içərisində bu vacib əşyanın olmaması, nəylə izah edilir?
Müasir orduların silahlanmasında bu və digər köməkçi predmetlərə xüsusi diqqət ayrılır. Azərbaycan ordusu da hal hazırda Qafqazlarda ən müasir, döyüş hazırlıqlı ordudur.
Mənim düşüncəmə görə və müasir dünyanın lokal və məhəlli münaqişələrində ,döyüşçülərin istifadəsində olan bu predmetin olmaması, sadəcə çatışmamazlıq və təəssüf hissi doğurur.
Son savaş xronikalarına baxanda, məhz bu predmetin heç bir əsgərdə,MAXE-də olmasına rast gəlmədim."
Teref.az

ABŞ Birləşmiş Qərargah Rəisləri Komitəsinin hazırkı sədri, general Mark Milli Polşanın paytaxtı Varşavada hərbi bazaya baş çəkib.

Polşa səfərindən sonra general Milli bəzi açıqlamalar verib.

General Rusiyanın Ukraynaya qarşı müharibəsində böyük uğursuzluqlarla üzləşməkdə davam etdiyini bildirib. Bu səbəbdən də ehtiyatı əldən verməməyə çağırıb.

O, Moskvanın son uğursuzluqlara nə reaksiya verəcəyinin gözlənilməz olduğunu qeyd edib. Buna görə də qoşunları gərgin vəziyyətdə ayıq-sayıq olmağa çağırıb.

Mark Milli həmçinin əlavə edib ki, ABŞ-ın Avropadakı qüvvələri təhlükə altında hesab olunmur. Lakin o, buna baxmayaraq, ehtiyatı əldən verməməyin zəruriliyini vurğulayıb.

“İndi müharibə Rusiya üçün o qədər də yaxşı davam etmir. Ona görə də hamımız yüksək səviyyədə hazırlığı, ayıq-sayıqlığı qorumağa borcluyuq. Müharibə zamanı bundan sonra nə olacağını yüksək dərəcədə əminliklə bilmək olmur”, – deyə o bildirib.

Millinin Varşavadakı bazaya səfəri müxtəlif müdafiə sistemlərinin, o cümlədən “Patriot” raketləri batareyalarının sınaqdan keçirilməsini də əhatə edib.

Məlumata görə, əgər Rusiya qoşunları bazaya hücum edərsə, ABŞ və onun NATO müttəfiqləri ilə daha çox münaqişə riski yaranarsa, raketlərin “son müdafiə xətti” olması nəzərdə tutulur. Tədbirdə iştirak edən mətbuat nümayəndələrindən Millinin ziyarət etdiyi bazanın konkret adının təhlükəsizlik səbəbilə açıqlanmaması istənilib.

“Qırğızıstan-Tacikistan sərhədində baş verən qarşıdurmalar nəticəsində Tacikistanın 200-dən çox hərbçisi həlak olub, 400-ə yaxını isə yaralanıb”.
Bu barədə Qırğızıstan Respublikası Təhlükəsizlik Şurasının katibi Marat İmankulov mətbuat konfransında deyib.
Son məlumatlara əsasən, iki ölkə arasında toqquşmalar nəticəsində 59 qırğızıstanlı ölüb, 163 nəfər isə yaralanıb. Onların neçəsinin hərbçi və mülki vətəndaş olduğu barədə rəsmi məlumat yoxdur.
Tacikistan rəsmiləri isə 35 nəfərin öldüyünü və 30-a yaxın yaralının olduğunu bildirib.

“Türkiyə istehsalı olan “Bayraktar-TB2” operativ-taktiki döyüş dronlarının iki il qabaq Ermənistan-Azərbaycan, indi isə Rusiya-Ukrayna müharibəsində oynadığı rol bütün dünyanın diqqət mərkəzindədir”. Redaksiyası ABŞ-ın Nyu-York şəhərində yerləşən “Business İnsider” nəşrinin dərc etdiyi məqalədə belə deyilir.

Bildirilir ki, 2020-ci ilin payızında Türkiyənin müttəfiqi olan Azərbaycanın 44 günlük müharibə zamanı Ermənistan üzərində qələbə çalmasına yardım göstərmiş “Bayraktar-TB2” dronları 2022-ci ilin fevralından başlanmış Rusiya-Ukrayna müharibəsindəki roluna görə yenidən gündəmdədir: “Bayraktar-TB2” əfsanəyə çevrilib. Bu dronları istehsal edən “Baykar” şirkətinin baş direktoru Haluk Bayraktarın ötən ay Ukraynanın “Salamat qayıt” Fonduna verdiyi açıqlamaya görə, “Bayraktar-TB2”yə tələbat o qədər artıb ki, indi onu almaq istəyənlərin 3 illik növbəsi yaranıb”.

Məqalədə qeyd olunur ki, “Baykar” şirkəti ayda 20-dən çox pilotsuz təyyarə istehsal edə bilir: “Hazırda şirkət sayı artırmaq üçün Ukraynada yeni zavod tikməyi planlaşdırır.

Ukraynanın Rusiya təcavüzünə qarşı müqavimətində oynadığı rol “Bayraktar-TB2”ni daha da şöhrətləndirib. İnternet məkanında pilotsuz təyyarələrin Ukrayna müqavimətinin simvoluna çevrildiyini nümayiş etdirən saysız-hesabsız videoya rast gəlmək mümkündür. “Bayraktar-TB2” dronları olmasa, Ukrayna Rusiyaya müqavimət gücünü itirə bilər”.

Məqalədə vurğulanır ki, “Bayraktar-TB2” dronunun çoxsaylı imkanları onu ixrac silahına çevirib: “Hazırda 13 ölkədə bu dronlara rast gəlmək olar”.

Məqalədə xatırladılır iki, ötən həftə Ukrayna Silahlı Qüvvələri iki ədəd “Bayraktar-TB2”nin Rusiyanın 28,35 milyon dollar dəyərində hərbi texnikasını, o cümlədən bir neçə tankını, artilleriya qurğularını, piyadaların döyüş maşınlarını sıradan çıxardığını açıqlayıb.
pressklub

Rusiyalı hərbçilər və onların ailələrindən gün ərzində davamlı müraciətlərin qəbulu üzrə Koordinasiya qərargahında “qaynar xətt” işə salınıb.

Bu barədə hərbi əsirlərin müraciət məsələləri üzrə Koordinasiya qərargahı xəbər verib («UNİAN»).

«Bu, dövlət layihəsinin davamıdır və rusiyalı hərbçilərin silahı yerə qoymaq, öz həyatı və sağlamlığını saxlamaq imkanları barədə məlumatlandırılmasına xidmət edir.

«Yaşamaq istəyirəm» dövlət layihəsi rusiyalı hərbçilərə Ukrayna silahlı qüvvələrinə təhlükəsiz əsir düşməkdə kömək etməyə yönəlib» - xəbərdə deyilir.

Ukraynanın Zaporojye vilayətinin Melitopol şəhərində güclü partlayış baş verib. Bu barədə şəhər meri İvan Fyodorov məlumat verib.

“İlkin məlumata görə, partlayıcı qurğu şəhərin mərkəzində işə düşüb”, - deyə bildirilib.

İranda “SU-22” qırıcı təyyarəsi qəzaya uğrayıb.

APA-nın Tehran bürosunun məlumatına görə, İran İslam İnqilabı Keşikçiləri Korpusunun (SEPAH) Aerokosmik Qüvvələrinə məxsus təyyarə təlim uçuşu yerinə yetirərkən texniki nasazlıqla üzləşib və pilotların səyi ilə yaşayış olmayan əraziyə düşüb.

Təyyarə yerə çırpıldıqdan sonra partlayıb.

Pilot katapult edərək qəzadan sağ çıxıb.

“Ermənistan və Azərbaycan BMT müqaviləsini qəbul edərək bu təşkilata üzv olub. Beləcə, hər ikisi bir-birinə qarşı bu formatı qəbul edib. Burada da bir-birinin ərazi bütövlüyünü tanımaq və problemləri dinc yolla həll etmək kimi mühüm maddələr var.

Ancaq Ermənistan Azərbaycanın ərazi bütövlüyünü 30 ildir tanımır və bizə qarşı içində soyqırımın və etnik təmizliyin olduğu müharibə aparıb, işğal həyata keçirib”.

Bu sözləri politoloq Nazim Cəfərsoy cəbhədə son baş verənləri şərh edərkən deyib. O bildirib ki, məhz qeyd edilənlər fonunda Ermənistanın BMT formatına əhəmiyyət vermədiyini demək mümkündür:

“Hətta bu ölkə 4 BMT qətnaməsinə də konkret 28 il boyunca tüpürüb. Yəni Ermənistan BMT müqaviləsinin ona tanıdığı formatı Azərbaycanla münasibətdə hər mənada çox açıq şəkildə rədd edib. Beynəlxalq hüququn ən əsas prinsiplərindən biri dövlətlərarası münasibətlərdə bərabərlik və qarşılıqlılıq prinsiplərinin hakim olmasıdır. Ermənistan Azərbaycanın ərazi bütövlüyünü tanımırsa, Azərbaycanın da onun ərazi bütövlüyünü tək tərəfli olaraq tanıması kimi bir borcu yoxdur!

Beynəlxalq hüquqda öz qəbul və tətbiq etmədiyin prinsipi başqasından tələb etmək kimi bir şey yoxdur. Ermənistan 30 ildir Azərbaycanla ərazi bütövlüyünü tanıdığını ifadə edən ikili müqavilə də imzalamayıb. 2 ildir bu müqaviləni imzalamır, əsas səbəb də beynəlxalq hüquqa görə Azərbaycanın olan Qarabağ bölgəsini və anklavların bizim olduğunu qəbul etməməkdir. Bu konteksdə Azərbaycanın Ermənistanın ərazi bütövlüyünü tək tərəfli tanımaq borcu yoxdur”.

Ekspert qeyd edib ki, bərabərlik və qarşılıqlılıq prinsiplərinə görə, Azərbaycanın da hazırda Ermənistan ərazisi sayılan yerlərin statusunu müzakirəyə çıxarmaq hüququ var: “Ermənistan Azərbaycanla sərhədlərini dəqiqləşdirmə və nişanlama işlərində də hərtərəfli mane yaradır, müasir texnoloji imkanlarla qısa müddətdə həll olunacaq məsələni uzadır. Yəni Azərbaycanın sərhədlərini bizim əleyhimizə şübhə altına alır. O zaman Azərbaycanın da bərabərlik və qarşılıqlılıq prinsiplərinə görə Ermənistan sərhədlərini şübhə altına alma haqqı var! Ermənistan 30 il işğalçı siyasət aparıb və hazırda Azərbaycanda işğal qüvvələri var. Bu ölkə ərazilərimizdən öz qüvvələrini çıxarmayana qədər qarşılıqlılıq prinsipi çərçivəsində Azərbaycanın da Ermənistan ərazisinə girmə hüququ doğur. Üstəlik beynəlxalq hüquqda sıx -sıx ABŞ -ın və İsrailin istifadə etdiyi önləyici legitim müdafiə hüququ buna imkan verir.

Bu çərçivədə təhdid təşkil edən hərbi hədəfləri vurmaq beynəlxalq hüquqa uyğundur. Hətta geniş mənada bu hüququn içinə bəzən “bufer zona qurmaq” da daxil edilir ki, bunun nümunələri var. Ermənistan rəsmiləri də hər fürsətdə Azərbaycana hərbi zərər vermək niyyətlərində olduqlarını bəyan edirlər. Bu şərtlərdə Azərbaycan da Ermənistanda hərbi hədəfləri vuranda önləyici legitim müdafiə hüququndan istifadə edib”. N.Cəfərsoy həmçinin vurğulayıb ki, beynəlxalq hüquqda “isti izləmə” kimi bir haqq daha var:

“Qısaca, bu hüquq sizə qonşu ölkədən terrorist və ya diversant hücum edəndə onun arxasınca qonşu ölkənin sərhədindən içəri girə biləcəyinizi deyir. Bu hüququ da ABŞ, İsrail, Türkiyə və s. istifadə edir. Son hadisədə Azərbaycan beynəlxalq hüquqa görə, Ermənistan diversantlarını isti təqib etmək hüququndan istifadə edib! Hələ bizim cinayətkarları mühakimə etdirmə və təzminat istəmə hüquqlarımız da var. Hamısını sonuna qədər istifadə etməliyik. Beynəlxalq hüquqda belə şeylər olduğunu bilmək lazımdır, əks halda, fikirlərdə cəhalət qalib gəlir və elə bilirlər, Azərbaycan haqsızdır!”.